கிரிக்கெட்டின் கண்ணீர்த்துளி - கட்டுரை

உலகின் மகாமோசமானவர்கள் இறந்தாலும் கண்ணீர் அஞ்சலிகள் கண்ணியமாகவே எழுதப்படும். இறந்தவர்களின் நற்செயல்கள் மட்டுமே நினைவுகூரப்படவேண்டும் என்பது  வறட்டு சம்பிராதயமாக திணிக்கப்பட்டுவிட்டதோ என்று சமயங்களில் தோன்றும். எச்சில் கையால் காகம் ஓட்டியது எல்லாம் கொண்டாடப்படும் இறுதிச்சடங்குகளில் மறைந்தவர்  செய்த அட்டகாசங்களையும் பதிவு செய்யத்தவறுவது கால எந்திரத்திற்கு நாம் செய்யும் துரோகம். வாழ்க்கைத் தத்துவத்திற்கு  மிகநெருங்கிய உறவான கிரிக்கெட் ஆட்டத்தின் ஆட்டக்காரர்கள் ஓய்வுப்பெறுகையிலும், கண்ணீர் அஞ்சலி போஸ்டர்கள் ஒட்டப்படும். சமீபத்திய வரவு, சிலோன் ஆட்டக்காரர்களான சங்கக்கரா ,ஜெயவர்த்தனே. 

புள்ளி விபரங்கள் பொய்யல்ல. ஆனால் சமயங்களில் அதைப்பகுத்துப் பார்க்கையில் புள்ளிவிபரங்கள் பொய்யும் சொல்லும் என்று அறியலாம். வேறு யாருமில்லாதபொழுது , தங்களுக்கு மட்டுமே வாய்ப்பு கொடுக்கப்பட்டு , "ஆல் தோட்ட பூபதி" விவேக்கைப்போல யூத்தாக தொடர்ந்து ஆடிக்கொண்டிருந்தால் ஆயிரம் இரண்டாயிரம் என ஓட்டங்களை அடித்துக் கொண்டேயிருக்கலாம்.  சங்கக்கரா , ஜெயவர்த்தனே ஆகியோர் ஆல் தோட்ட பூபதி வகையில் சேர்வார்கள். சினிமா காமெடி பார்க்காதவர்களுக்கு உலகின் சிறந்த ஆல்ரவுண்டர் சாகித் அப்ரிடியைக் கைக்காட்டினால் எளிதில் விளங்கும். பாகிஸ்தான் அளவிற்கு ஏன் போகவேண்டும் , நம்மூர் ரோகித்தை எடுத்துக்கொள்ளுங்கள், 4000 ஓட்டங்கள் அடித்துவிட்டார். ஒரே காரணம் வழங்கப்பட்ட தொடர் வாய்ப்புகள். எண்ணிலா வாய்ப்புகள் கொடுக்கப்படுகையில் ஏழெட்டாவது தேறிவிடும். 

கிரிக்கெட்டின் மகத்தான பெருமை சங்கக்கரா என்று ராஜபக்சேவை விஞ்சும் அளவிற்கு வெள்ள்வத்த முதல் டொரான்டொ வரை ஒரே புகழாரம். சஙகக்கரா ஆடுகளத்தை விட்டு வெளியேறுகையில் வானமே கண்ணீர் வடிக்கின்றது என்று தெலுங்கு சினிமா பாணியில் லா லா லா பாடியிருப்பதோடு நிறுத்தியிருந்தால் மட்டும் "every dog has its day"  என்று நாம் விலகிப்போயிருக்கலாம். 

விடுவார்களா, சிலோன் கிரிக்கெட் ரசிகர்கள், குறிப்பாக கொழும்புத் தமிழர்களும், கொழுப்பு எடுத்த ஒரு சில புலம்பெயர்ந்த ஈழத்தமிழர்களும். சச்சின் டெண்டுல்கருக்காக உலகக்கோப்பையை வாங்கித்தந்த பிசிசிஐ போல, இலங்கை கிரிக்கெட் வாரியம் லாபி செய்யும் அமைப்பல்ல என்று சமூக ஊடங்களில் எழுதப்போக வாதம் எதிர்வாதம் என்று கசப்பான வாக்குவாதங்களில்தான் பெரும்பாலான இழைகள் முடிந்தன.  

வெள்ளவத்தை தமிழர்களை விடுங்கள், புலம்பெயர்ந்த ஈழத்தமிழர்கள் இலங்கை அணியை ஆதரிக்கலாமா என்ற விவாதத்திற்குப் போகவிரும்பவில்லை. பாகிஸ்தான் அணியின் வெற்றிக்கு கைத்தட்டி பாராட்டிய ரசிகர்கள் தமிழ்நாட்டு ரசிகர்கள். சையத் அன்வரின் 194, சமீபகால இரட்டை சதங்களைக் காட்டிலும் அதிகமாக தமிழ்நாட்டு ரசிகர்களின் நினைவில் இருக்கும்.  கிரிக்கெட்டின் ரசிகர்களில் அறிவுப்பூர்வமான நேர்மையான விமர்சனங்கள் கொடுக்கும் ரசிகர் கூட்டம் என்றால் தமிழ்நாட்டு கிரிக்கெட் ரசிகர்கள் என்பது  மிகையாகாது. இப்படிப்பட்ட தமிழ்நாட்டு கிரிக்கெட் ரசிகப்பாரம்பரியத்தில் வளர்ந்த நான், எந்தவொரு கிரிக்கெட் அணியையும் நாடு கடந்து மொழி கடந்து  அரசியல் கடந்து  தங்களுக்குப் பிடித்தவர்களை ஆதரிக்கலாம், அது பாகிஸ்தானாக இருந்தால் கூட சரியே, என்று நம்புபவன்.  

அதனால், மொழி, அரசியல், நாடு எல்லாவற்றையும் ஒதுக்கிவைத்து விட்டு சங்கக்கரா, ஜெயவர்த்தனேவை முன் வைத்து, இந்திய கிரிக்கெட் வாரியத்தை, இந்திய ஆட்டக்காரர்களை  தரக்குறைவாக பேசுவது தர்க்கரீதியில் சரியா என்று மட்டும் பார்ப்போம். எங்கோ ஒரு மூலையில் , தனிநபர்களின் கருத்துக்களை வைத்து  பொதுப்படுத்தவேண்டுமா என்ற கேள்வியும் எழாமலில்லை. இந்த டிஜிட்டல் உலகில், குறிப்பாக சமூக ஊடகங்களில் தனிப்பட்ட கருத்து எதுவும் தனிப்பட்ட கருத்தாக நின்றுவிடுவதில்லை. அவரவருக்கு இருக்கும் பிரபல்யம் பொருத்து பிராப்ளமாகவோ பலமாகவோ வலுப்பெறுகின்றது.  பின்னர் அதுவே, சமூகக் கருத்தாக கட்டமைக்கப்படும் வாய்ப்பிருப்பதால் நேரமிருக்கையில் அவரவர் அவரவரளவில் எதிர்வினை கொடுப்பது முக்கியம். 

புனையப்படும் கருத்து  - சங்கக்கரா ஒரு ஜென்டில்மேன் கிரிக்கெட் வீரர். 

பெருந்தன்மையாளர்களின் விளையாட்டு கிரிக்கெட். சங்கக்கரா பெருந்தன்மையாளராக இருந்தாரா என்று பார்த்தால், ஒன்றல்ல இரண்டல்ல மூன்று முறை, பெருந்தன்மைக்கு எதிர்ப்பதமாக இருந்திருக்கிறார். 

1. 2011 உலகக்கோப்பை இறுதிப்போட்டி நாணயச்சுண்டலில்  நாணயமற்று நடந்து கொண்டதை உலகமே கைக்கொட்டிச் சிரித்தது. 

2. ஒரு முறை வீரேந்திர சேவக், 99 ஓட்டங்கள் எடுத்திருந்தபொழுது, வெற்றிக்கு ஓர் ஓட்டமே பாக்கியிருந்தது. சிங்கள வீரர் சங்கக்கரா என்ன செய்தார் தெரியுமா, பந்து வீச்சாளர் சூரஜ் ரந்தீவை நோபால் வீசச்செய்யச் சொல்லி சேவக் சதமடிப்பதைத் தடுத்தார்.

3. அதற்கு முன்பு டெண்டுல்கர் 96 ஓட்டங்கள் எடுத்திருந்த பொழுது, பந்துவீச்சாளர் மலிங்காவை வைடு பந்தை வீச்சச்சொல்லி அதைப்பிடிக்காமல் பவுன்டரிக்கு தள்ளி 5 உபரி ஓட்டங்கள் கொடுத்து ஆட்டத்தை முடிக்கவைத்தார். 

(குறிப்பு 2, 3 கிட்டத்தட்ட சல்மான் பட், முகமது அமீரை நோபால் வீசச்சொன்னதற்கு சமம். ஒருவேளை விசாரணை நடத்தப்பட்டிருந்தால் நமக்குத் தெரியாத உண்மைகள் வெளிவந்திருக்கலாம்.  ) இப்படி, பெருந்தன்மைக்குப் பொருள் தெரியாத சங்கக்கராவை எல்லாம் "ஜென்டில்மேன்" கிரிக்கெட் வீரர் என்றால் அது கிரிக்கெட்டிற்கே அவமானம். 

சங்கக்கரா "ராஜபக்சே" என்றால், அவரின் அடிப்பொடி ஜெயவர்த்தனே "பொன்சேகா". அசுவின் ஒரு முறை, மன்காடட் முறையில் சிலோன் ஆட்டக்காரரை ஆட்டமிழக்கசெய்தார். பின்னர், பெருந்தன்மையின் நாயகன் தோனி, ஆட்டமிழப்புக் கோரிக்கையைத் திரும்பப்பெற்றுக்கொண்டு, சிலோன் ஆட்டக்காரரை தொடர்ந்தாட அனுமதித்தார். அன்றைய ஆட்டம் முடிந்ததும்,  ஜெயவர்த்தனே , மன்காடட் முறையில் ஆட்டமிழக்கசெய்வது ஏதோ இனப்படுகொலைக் குற்றம் போல பேசினார்.  கிரிக்கெட் மிகப்பெரிய சமனி என்று சொல்வார்கள்..  சமீபத்தில் , இலங்கையின் ஸ்பெஷலான "எறிபந்து"  வீச்சாளர் சேனநாயகா மேன்கேடட் முறையில் இங்கிலாந்து ஆட்டக்காரரை ஆட்டமிழக்க, நடுவர் கேட்டுக்கொண்டபின்னரும் சிலோன் அணித்தலைவர்  மாத்யூஸ் திரும்பப்பெற்றுக்கொள்ளவில்லை. ஆட்டம் முடிந்த பின்னர் பேசிய ஜெயவர்த்தனே, "மன்காடட், கிரிக்கெட் விதிமுறைகளுக்கு உட்பட்டது, அப்படி ஆட்டமிழக்கச்செய்வது சரியே" என்று வாதிட்டார். 

இலங்கைக்காக ஆடும்பொழுது மட்டுமல்ல, சிலோன் ஆட்டக்காரர்கள் எங்கு ஆடினாலும் ஆட்டநெறிகளுக்கு புறம்பாகத்தான் ஆடுவார்கள். ஐபிஎல் ஆட்டங்களில் ஆடும் சிலோன் ஆட்டக்காரர்களைக் கவனித்தால் இது மேலும் தெளிவாக விளங்கும்.

இன்று மட்டுமல்ல, அன்றே இலங்கை ஆட்டக்காரர்கள் நேர்மைக்கு பரமவைரிகள்தாம். உலகமே இனவெறி தென்னாப்பிரிக்காவை ஒதுக்கிவைத்திருக்கையில்,  இலங்கை ஆட்டக்காரர் வர்ணபுரா தலைமையில் , இலங்கை அணி தென்னாப்பிரிக்காவிற்கு சுற்றுப்பயணம் செய்தது. இனமட்டுமல்ல, இனவெறியும் இனவெறியுடன் சேரும் என்பதற்கான முன்னோட்டம் அது. 

புனையப்படும் கருத்து - இலங்கையால் லாபி செய்ய முடியாது . 

இலங்கை கிரிக்கெட்டைப் பார்க்கும்பொழுது  நம்மையறியாமலும் ஓர் அசூயை ஏற்படுவது  இலங்கையின் இனவெறியினால் மட்டுமல்ல. இலங்கையின் கிரிக்கெட் வரலாறே அசூயை உணர்வை ஏற்படுத்தும் அளவிற்குத்தான் இருக்கும். தமிழ்நாடு அணியின் இரண்டாம் நிலை ஆட்டக்காரர்களுடன் கோபாலன் டிராபி ஆடிக்கொண்டிருந்ததுதான் சிலோன் அணி. ஶ்ரீலங்காவில் இனப்படுகொலை ஆரம்பமான நேரத்தில்  1981 ஆம் ஆண்டு இலங்கையின் இமேஜைத் தூக்கி நிறுத்த எடுக்கப்பட்டது அஸ்திரமே  இலங்கைக்கான டெஸ்ட் ஸ்டேடஸ் லாபி. 

திசநாயகவின் தலைமையில் லார்ட்ஸ் பிரபுக்களை குஷிப்படுத்த மது, மாதுக்கள் கொண்டாட்ட இரவுகளுக்கு பணம் நீராய் செலவளிக்கப்பட்டது.  இலங்கை கார்ப்பரேட் நிறுவனமான  மகராஜா மற்றும் அதனுடன்  இருந்த பிரிட்டீஷ் நிறுவனமான Belfour Beatty க்கும் ஒரு விளையாட்டு விளம்பர அடையாளம் தேவைப்பட்டது. இப்படி கார்ப்பரேட் கிளாமர் டெக்னிக்குகளால் பெறப்பட்டதுதான் இலங்கைக்கான டெஸ்ட் அந்தஸ்து. இப்படி எல்லாம் கூட லாபி செய்யலாம் என்று முதன் முறையாக கிரிக்கெட் உலகிற்கு அறிமுகப்படுத்தியது  இலங்கைதான். 

அடுத்து சிலோன் ரசிகர்கள் அடிக்கடிப்பேசுவது, 96 உலகக்கோப்பை வெற்றி. ஆஸ்திரேலியாவும் மேற்கிந்தியத் தீவுகளும் இலங்கைக்கு சென்று ஆட விரும்பாததால் தட்டில் விழுந்த புள்ளிகள் இலங்கையை முதலிடத்திற்கு தள்ள, cant'bowl , can't bat, can't field அணியான இங்கிலாந்தை வீழ்த்த முடிந்தது. 2003 உலகக்கோப்பையில் ஓசியில் கிடைத்த புள்ளிகளினால் கென்யா அரையிறுதி வரை வந்ததல்லவா அது மாதிரிதான். ஒரு துரதிர்ஷ்டமான நாள் இந்திய அணியை வெளியேற்ற , இறுதிப்போட்டிக்கான வாய்ப்பு கிடைத்தது. இன்று இந்தியாவின் வெற்றிகளுக்கு லாபி காரணம் என்று சொல்பவர்கள், ஆஸ்திரேலியா கூட, இலங்கைக் கடற்கரை வீடு, சிங்கள மசாஜிற்காக வீழ்ந்தது என்று சொல்லமாட்டார்கள்.  

திசநாயகே, டோனி கிரெய்க், இலங்கை பிரிட்டீஷ் கூட்டு ஸ்தாபனங்கள், கடற்கரையோர மசாஜ் பார்லர்கள் இவைகள் இல்லை என்றால் இலங்கை கிரிக்கெட் இன்னும் தமிழ்நாடு பி டீமுடன் கோபாலன் டிராபிதான் ஆடிக்கொண்டிருக்கவேண்டும். 

ரஞ்சி டிராபி ஆடும் அணிகளில் மிகவும் மோசமான அணியைத் தொடர்ந்து 15 ஆண்டுகளுக்கு அணியை மாற்றாமல், பன்னாட்டுப்போட்டிகளில் விளையாட வைத்தால், இலங்கையை விட சிறப்பாக ஆடுவார்கள். அப்படி ஆடி ரவுடியாக பார்ம் ஆனவர்கள்தாம் சிலோன் ஆட்டக்காரர்கள்.  இலங்கை,  கிரிக்கெட்டில் செய்த அதிகப்பட்ச சாதனை  முரளிதரனின் 800 ரன் அவுட்டுகள் மற்றும் சில "எறிபந்து" வீச்சாளர்களை அறிமுகப்படுத்தியது மட்டுமே.  நாளையே  தமிழ்நாடு, குயின்ஸ்லாந்து, விக்டோரியா, கர்நாடகா போன்ற அணிகள் டெஸ்ட் ஆடலாம் என்று ஐசிசி  முடிவு செய்தால் , இலங்கை தரப்பட்டியலில் கடைசிக்கான இடத்திற்குப் போட்டியிடும். 

திறமை, நேர்மை, பெருந்தன்மை  என்று எதுவுமே போதுமான அளவிற்கு இல்லாத லாபி புகழ் ஶ்ரீலங்கா கிரிக்கெட் வாரியத்தின் ஆட்டக்காரர்களான சங்கக்கரா, ஜெயவர்த்தனேவை கிரிக்கெட்டின் பெருமை என்று பேசுவது கிரிக்கெட்டின் பெருமைமிகு ஆளுமைகளை சிறுமை செய்வதற்கு சமம். டபிள்யூவி.ராமன், வினோத் காம்ப்ளி போன்றவர்களுக்கு  சங்கக்கரா ஜெயவர்த்தனே போன்று திகட்டத்திகட்ட வாய்ப்புக்கிடைத்திருந்தால், இவர்களைவிட அதிக சாதனைகள் செய்திருப்பார்கள். 

ஶ்ரீலங்கா , இந்தியத் துணைக்கண்டத்தின்  அரசியல் மானுடவியல் நிலப்பகுதி கண்ணீர்த்துளி மட்டுமல்ல , பெருந்தன்மை ஆட்டமான கிரிக்கெட்டின் கண்ணீர்த்துளியும் கூட. சுருக்கமாகச்சொன்னால் ஜென்டில்மேன் கிரிக்கெட்டின் அபஸ்வரம் ஶ்ரீலங்கா. 

-------

பிற்சேர்க்கை - நீரடித்து நீர் விலகுமா - http://vinaiooki.blogspot.it/2015/03/blog-post_24.html

உபரி ஓட்டங்கள் - 23-10-2012 (சினிமா , கிரிக்கெட்)

கைதி, ஆட்டோராணி, இதுதாண்டா போலிஸ் தொடங்கி நேற்றைய அருந்ததி, இன்றைய நான் ஈ வரை நான் தெலுங்கு மொழிமாற்றுப்படங்களின் மிகப்பெரும் ரசிகன். அந்தப்புரம் என்ற படம், முதல் பாதி மொழிமாற்றுப்படமாகவும், பிற்பாதி நேரடிப்படமாகவும் இருக்கும். இப்பொழுது வரும் மொழிமாற்றுப்படங்களில் எல்லாம், நகைச்சுவைப்பகுதியை மட்டும் சொருகி நேரடிப்படங்கள் மாதிரியான தோற்றத்தைக் கொடுத்துவிடுகிறார்கள். சரி தமிழில் வந்த மொழிமாற்றுப் படம் என்னவென தேடியதில் நாகேஷ்வரராவ், அஞ்சலி தேவி வில்லியாக நடித்த கீலுகுர்ரம் என்ற படம் தான் முதல் டப்பிங் படம் என்று ராண்டார் கை எழுதிய ஒரு கட்டுரையில் குறிப்பிட்டப்பட்டிருந்தது.  இதில் சுவாரசியமான விசயம் என்னவெனில் , இந்தப்படம் தமிழில் உரிமை வாங்கப்பட்டு, பாலய்யா நாயகனாக நடித்து, எம்.ஜி.ஆர், வி.என் ஜானகி சிறுவேடங்களில் நடிக்க மோகினி என்ற பெயரில் தமிழில் நேரடியாக வெளிவந்து பெரும் தோல்வியடைந்ததாம். இதைப்பார்த்த கீலுகுர்ரம் படத்தின் தயாரிப்பாளர் தெலுங்குப்படத்தை மாயக்குதிரை என டப் செய்து வெளிவிட்டு கொஞ்சம் காசு பார்த்தாராம்.

தகவலுக்கான தரவு - http://www.thehindu.com/arts/cinema/article3790929.ece 

-----

ஒரு கிரிக்கெட் கேள்வி, ஆட்டத்தின் கடைசிப்பந்து, ஐந்து ஓட்டங்கள் எடுத்தால் வெற்றி, மட்டையாளர் பந்தை வேகமாக விளாசுகிறார், பந்து தரையில் உருண்டோடி , மெல்ல எல்லைக்கோட்டை நோக்கை நகர்ந்து எல்லைக்கோட்டைத் தொடுகிறது.  அதற்குள் மட்டையாளர்கள் ஐந்து ஓட்டங்கள் ஓடிவிடுகின்றனர். ஆட்டத்தின் முடிவு என்ன? ஏன்?

----

இந்திய அரசாங்காத்தின் தணிக்கைக் குழு, பெரும்பாலான படங்களை பிரச்சினையின்றி தணிக்கை செய்து வெளியிட அனுமதித்தாலும், சிலப்படங்களை கொத்தி குதறி விடுவார்கள். பலக்காட்சிகள் வெட்டப்பட்டுவிடும். அவ்வாறு வெட்டப்படும்பொழுது, ஏன் அந்தக் காட்சி வெட்டப்பட்டது என விதிமுறைகளுடன், ஆவணப்படுத்தப்படும்.  இந்த அதிகாரப்பூர்வத் தளத்தில் திரைப்படங்களின் சென்சார் செய்யப்பட்ட காட்சிகள் என்ன , ஏன் எனவும் அறியலாம். 

http://cbfcindia.gov.in/ வலது மேற்பக்கத்தில் Search Film என்ற பெட்டியில் தேடுங்கள்

-----

தசாவதாரம் படத்தில், கமலின் பல்ராம் நாயுடு கதாபாத்திரம், ஒரு ரிங் டோன் வைத்திருக்கும் எந்தோ சின்னதி ஜீவிதம் நாகேஷ்வரராவ் நடித்த ஸ்ரீமாந்துடு என்ற தெலுங்குப்படத்தில் வரும் பாடல். இந்தப்பாடலுக்கும் கமலுக்கும் இருக்கும் மற்றும் ஒரு சம்பந்தம் கமல் , சிறு வயதில் இந்தப்பாடலுக்கு நடனமைத்திருக்கிறார். கமலஹாசன் எதையுமே காரியம் இல்லாமல் செய்ய மாட்டார்.

---

ரிடையர்ட் ஹர்ட் முறையில் நிறைய ஆட்டக்காரர்கள் ஆட்டமிழந்து இருக்கின்றார்கள். அத்தப்பட்டு, ஜெயவர்த்தனே இருவரும் ரிடையர்ட் அவுட் முறையில் கூட ஆட்டமிழந்து இருக்கிறார்கள். ரிடையர்ட் நாட் அவுட் என்ற முறையில் ஆட்டத்தை விட்டு வெளியேறியவர் கார்டன் கிரீனிட்ஜ். தனது மகளின் சிகிச்சைக்காக ஆட்டத்தின் பாதியில் இருந்து வெளியேறியவரின் ஸ்கோர் ரிடையர்ட் நாட் அவுட் என்ற முறையில் குறிக்கப்பட்டது. துரதிர்ஷ்டவசமாக, அவரின் மகள் அந்த சிகிச்சையில் பிழைக்கவில்லை.


----

கீழ்க்கண்ட படத்தின் முக்கியத்துவம் என்ன?

ஒரேயொரு கிரிக்கெட் கேள்வி - பதில் சொல்லுங்கள் ...வெல்லுங்கள் ரோமில் இருந்து ஒரு தபால் அட்டை

கிரிக்கெட் ஆட்டங்களில் மட்டையாளரால் அடிக்கப்பட்ட பந்து, தரையில் படாமல் எல்லைக்கோட்டைத் தாண்டி பறந்து வந்து விழுந்தால் ஆறு ஓட்டங்களும், தரையில் பட்டு எல்லைக்கோட்டைக் கடந்தால் நான்கு ஓட்டங்களும் வழங்கப்படுகின்றது.

சாத்தியப்படக் கூடிய கற்பனையான ஒரு பன்னாட்டு ஆட்டம் (இது டெஸ்ட் ஆட்டமாகவோ, ஒரு நாள் ஆட்டமாகவோ அல்லது இருபதுக்கு இருபதாகவோ இருக்கலாம்) புதிதாக கட்டப்பட்டுள்ள மைதானத்தில் ஆடப்படுகின்றது. மைதானம் அமைக்க பொருள் உதவி செய்தவருக்கு 5 உம் 8 உம் விருப்பமான எண்கள் ஆதலால், தான் கட்டிய ஆடுகளத்தில் தனக்கான எண்கள் , அதிகபட்ச ஓட்டங்களாக அமைய விரும்புகிறார். அவரின் விருப்பத்தைத் தொடர்ந்து, அந்த ஆடுகளத்தில் ஆட்டம் நடைபெறும்பொழுதெல்லாம் பவுண்டரிக்கு 5 ஓட்டங்களும், சிக்ஸருக்கு எட்டு ஓட்டங்களும் வழங்கப்படுகிறது. இது சாத்தியமா? சாத்தியம் என்றால் ஏன் எப்படி? சாத்தியம் இல்லை என்றால் ஏன் ? எப்படி

பதிலை எனது மின்னஞ்சல் முகவரி rrselvakumar@gmail.com வரும் ஞாயிற்று கிழமைக்குள் அனுப்பலாம். சரியான பதில் சொல்லும் அனைவருக்கும் ஒரு தபால் அட்டை ரோம் நகரத்தில் (பதில் சொல்பவர்களின் விருப்ப முகவரிகளுக்கு) இருந்து அனுப்பப்படும்.

விடை ஞாயிறு இரவு பதிப்பிக்கப்படும்


விடையைப் படிக்கவும் வெற்றி பெற்றவர்களைத் தெரிந்து கொள்ளவும்  இந்தச் சுட்டியை தொடரவும்

கிரிக்கெட் வினாடி வினா - ஆறுக்கு ஆறு (Cricket Quiz)

1. ஆரம்ப காலங்களில் , சச்சின் டெண்டுல்கர் நடுவரிசை ஆட்டக்காரராக, ஒருநாள் போட்டிகளில் ஆடும்பொழுது நிறைய ஆட்டங்களில் மட்டையடிக்க வாய்ப்பு கிடைக்காமல் போயிருக்கிறது. 94 ஆம் ஆண்டிற்குப்பின்னர், துவக்க ஆட்டக்காரராக ஆட ஆரம்பித்ததில் இருந்து அவர் ஆடும் எல்லா ஆட்டங்களிலும் அவருக்கு மட்டையடிக்க வாய்ப்பு கிடைத்திருக்கின்றது. கேள்வி இதுதான், கைவிடப்படாத ஒருநாள் ஆட்டமொன்றில்,(அதாவது ஆட்டம் முழுமையாக நடைபெற்றிருக்க வேண்டும்)கடைசியாக, டெண்டுல்கருக்கு பேட்டிங் செய்ய வாய்ப்புக்கிடைக்காத ஆட்டம் எது?

2. டெஸ்ட் போட்டிகளின் ஐந்து நாட்களிலும் ஏதாவது ஒரு சந்தர்ப்பத்தில் மட்டையடிப்பது என்பது கிரிக்கெட்டில் நிகழ்ந்துள்ளது. ஆனால் மட்டையடித்த ஐந்து நாட்களிலும் தலா ஒரு சிக்ஸர்கள் வீதம் ஐந்து சிக்ஸர்கள் மொத்தமாக விளாசிய கிரிக்கெட் வீரர் யார்? தனது 30 வது வயதிலேயே கேப்டன் பொறுப்பில் இருந்தும், ஆட்டத்தில் இருந்தும் அழுதுகொண்டே ஓய்வு பெற்றவர்.

3. கீழ்காணும் படத்தில் இருப்பவர் ஒரு தமிழர். கொழும்பில் பிறந்து சென்னையில் கிரிக்கெட்டைக் கற்று கொண்டு, இரண்டு பன்னாட்டு ஒருநாள் ஆட்டங்களில் ஆடியவர். ஆடிய முதல் ஆட்டத்திலேயே அரைசதம் அடித்த வெகுசில ஒருநாள் ஆட்டக்காரர்களில் இவரும் ஒருவர். இந்தக் கிரிக்கெட் ஆட்டக்காரர் யார்?



4. சமீபத்தில் மன்காடட் ரன் அவுட் ஒரு நட்சத்திர கிரிக்கெட் இறுதி போட்டியில் சலசலப்பை ஏற்படுத்தியது. மிகவும் எளிமையான கேள்வி தான், மன்காட்(Mankaded) முறையில் ரன் அவுட் செய்யும் முறை விதிமுறைகளுக்கு உட்பட்டதா இல்லையா

5. ஒரு கற்பனையான முதல் தர ஆட்டம், கடைசி விக்கெட்டிற்கு , இரண்டு ஓட்டங்கள் எடுத்தால் வெற்றி. மட்டையாளர் துணை ஓட்டக்காரரை(By-runner) வைத்திருக்கின்றார்.
மட்டையாளர் பந்தை திருத்தமாக அடிக்க, துணை ஆட்டக்காரரும் மறுமுனை ஆட்டக்காரரும் வேகமாக ஓடி முதல் ஓட்டத்தை முடிக்கின்றனர், இரண்டாவது ஓட்டம் முடியும் தருவாயில் பந்து தடகளப்பு செய்யப்பட்டு விக்கெட் கீப்பரிடம் வருகிறது, துணைஓட்டக்காரரும் மறுமுனை ஆட்டக்காரரும் ஓட்டங்களை பிரச்சினை இன்றி முடிக்கின்றனர்.
ஆனால் மட்டையாளர் உற்சாககுதுகலிப்பில், கோட்டிற்கு வெளியே நிற்கிறார். விக்கெட் கீப்பர் மட்டையாளரை ஆட்டமிழக்க செய்கிறார். கேள்வி என்ன வெனில்
இந்த ஆட்டத்தின் முடிவு என்ன? ஏன்?

6. கிறிஸ் கெய்ல் களத்திற்கு வந்தாலே சிக்ஸர்கள் பறக்கும். இருபதுக்கு இருபது பன்னாட்டு போட்டிகளில், இவர் மொத்தம் 34 சிக்ஸர்கள் அடித்துள்ளதாக புள்ளிவிபரங்கள் காட்டுகின்றன. உண்மையில் இவர் 37 சிக்ஸர்கள் அடித்துள்ளார். அவர் அடிக்கும் பந்தைப்போல , காணாமல் போன சிக்ஸர்களுக்கான காரணம் என்ன

---

விடைகள்

1. ஸ்டாண்டர்டு வங்கி முத்தரப்பு போட்டித்தொடரில், 2001 ஆம் ஆண்டு கென்யாவிற்கு எதிரான போட்டியில் சச்சின் டெண்டுல்கருக்கு மட்டையடிக்க வாய்ப்பு கிடைக்கவில்லை. முதலில் ஆடிய கென்யா அணி 90 ஓட்டங்களுக்கு சுருண்டுப்போக, குறைவான ஓட்டங்கள் மற்றும் பின்வரிசை ஆட்டக்காரர்களுக்கு மட்டைப்பயிற்சி அளிக்கவும், தீப்தாஸ் குப்தாவும் சேவாக்கும் களமிறங்கி விக்கெட் இழப்பின்றி அணியை வெற்றிபெறச்செய்ததால் டெண்டுல்கருக்கு பேட்டிங் செய்ய வாய்ப்பு கிடைக்கவில்லை.

ஆட்ட விபரம் இங்கே - http://www.espncricinfo.com/ci/engine/match/66101.html

2. கிம் ஹியுஜஸ் (Kim Hughes) என்ற முன்னாள் ஆஸ்திரேலிய கேப்டன் தான் அந்த வீரர். 80 ஆம் ஆண்டு, லார்ட்ஸில் நடைபெற்ற நூற்றாண்டு நினைவு டெஸ்ட் கிரிக்கெட் ஆட்டத்தில், ஒவ்வொரு நாளிலும் ஒரு சிக்ஸர் அடித்து கேள்வியில் சொன்ன சாதனை இன்னமும் தன்னகத்தே வைத்துள்ளார்.
ஆட்ட விபரம் இங்கே - http://www.espncricinfo.com/ci/engine/match/63271.html


சொந்த ஆட்ட சொதப்பல், அணியினரின் உள்குத்து, ஊடகங்களின் வெளிக்குத்து, மேற்கிந்தியத் தீவுகளின் கும்மாங்குத்து இவைகளை சமாளிக்க முடியாமல் , 84 ஆம் ஆண்டு பிரிஸ்பேன் டெஸ்ட் போட்டிக்குப்பின்னர், அழுகையை அடக்க முடியாமல், மேலாளரை ராஜினாமா கடிதத்தைப் படிக்கவிட்டு, தலைமைப்பதவியில் இருந்து விலகியவர். ஒட்டுமொத்தமாக விலகாமல், தொட்டுக்கோ துடைத்துக்கோ என அடுத்த இரண்டு ஆட்டங்களில் 3 முட்டை களுடன் ஒட்டு மொத்தமாக ஆட்டத்தை விட்டு மூட்டை கட்ட வைக்கப்பட்டார். பொதுவாக ஆஸ்திரேலியா கேப்டன்கள் பதவி விலகும்பொழுது ஆட்டத்தில் இருந்து ஓய்வும் பெற்றுவிடுவார்கள். ரிக்கிபாண்டிங்கிற்கு முன்னர், கிம் ஹியுஜஸ்தான் தலைவர் பதவியில் இருந்து விலகிய பின்னரும் சில ஆட்டங்கள் ஆடியவர்.


3. கனடா அணிக்காக ஆடிய அரவிந்த் கந்தப்பா - http://www.espncricinfo.com/canada/content/player/313432.html

4. விதிமுறை 42.15 இன் கீழ் மன்காட் முறையில் ஆட்டமிழக்க செய்யலாம்.

5. துணை ஓட்டக்காரர் வைத்திருக்கும்பொழுது, மட்டையடிப்பர், கோட்டுக்குள்ளேயே இருக்கவேண்டும். அப்படி இல்லாத பட்சத்தில், எத்தனை ஓட்டங்கள் முழுமையடைந்திருந்த பொழுதும், விக்கெட் கீப்பர் முனையில் மட்டையாளரை ஆட்டமிழக்க செய்யும் பொழுது, எடுத்த ஓட்டங்கள் எதுவுமே கணக்கில் வராது. அந்த வகையில் கேள்வியின் படி, பந்து வீசும் அணி வெற்றி பெறும்.

6. இருபதுக்கு இருபது ஆட்டங்களில், ஆட்டம் சமனில் முடியும்பொழுது , வெற்றித் தோல்வியை நிர்ணயிக்க, சூப்பர் ஓவர் நடை முறை உள்ளது சூப்பர் ஓவரில் எடுக்கப்படும் ஓட்டங்கள் , ஆட்டக்காரர்களின் புள்ளிவிபரங்களில் சேர்க்கப்படமாட்டாது. நியுசிலாந்துக்கு எதிரான ஒரு 20/20 போட்டியில், கிறிஸ் கெயில் சூப்பர் ஓவரின் போது மூன்று சிக்ஸர்களை விளாசி, வெற்றியைத் தேடித்தந்தார். அந்த மூன்று சிக்ஸர்கள் தான் கெயிலின் காணமல் போன சிக்ஸர்கள்.

ஆட்டவிபரம் இங்கே http://www.espncricinfo.com/ci/engine/match/366707.html

---விடைகளைக் கண்டுபிடிக்க முயற்சித்த அனைவருக்கும் நன்றி ---

கிரிக்கெட் வினாடி வினா - ஆறுக்கு ஆறு

நெருக்கப்பட்ட பன்னாட்டு கிரிக்கெட் போட்டிகளின் அட்டவணையில் சாமானிய ரசிகனால் உள்ளூர் போட்டிகளைத் தொடர்ந்து கவனிக்க முடிவதில்லை. ஐபிஎல் போட்டிகள் உள்ளூர் போட்டிகள் என்ற போதிலும், அதில் இருக்கும் பன்னாட்டு வீரர்களினால் இருபதுக்கு இருபதை சர்வதேசத் தரப் போட்டியாகவே நோக்கப்படுகிறது. கட்டமைப்பான உள்ளூர் போட்டிகளினாலும் தொடர்ந்த ஆஸ்திரேலிய ரசிகர்களின் ஆதரவாலும், ஆஸ்திரேலியா 30 வருடங்களுக்கு மேல் தொடர்ந்து நீட்டிப்பான வெற்றிகளைத் தொடர்ந்து பெற முடிகிறது. இந்தியாவிலும் உள்ளூர் முதல் தரப்போட்டிகளுக்கு ஆதரவு அதிகமானால் மேலும் இந்தியக் கிரிக்கெட்டின் தரம் உயரும். இந்த வினாடி வினாவில், நம் கிரிக்கெட் ரசிகர்களால் எந்த அளவிற்கு முதல் தரப்போட்டிகள் நோக்கப்படுகிறது என்பதை “டெஸ்ட்” செய்யும் விதமாக இந்த ஆறு கேள்விகளும் அமையப்போகின்றது. முடிந்தவரை எளிமையாகவே கேள்விகளை அமைத்து இருக்கின்றேன். வினாக்கள் முதல் தரப்போட்டிகளில் இருந்து கேட்கப்பட்டுள்ளன. ஒரு வேளை கேள்விகளில் தகவல் பிழை இருந்தாலும் சுட்டிக்காட்டவும்.

1. கீழ்கண்ட படத்தில் பிரபல ஆட்டக்காரர் கவாஸ்கர் இடதுகையால் மட்டையடிப்பது போல இருக்கின்றது, இது கண்ணாடி வழியாக இடவல மாற்றப் புகைப்படம் அல்ல, நிஜமாகவே ஒரு ஆட்டத்தில் கவாஸ்கர் இடதுகை ஆட்டக்காரராகவும் ஆடினார். அந்த இந்திய முதல் தர ஆட்டம் என்ன? எந்த சூழலில் அவர் ஆடினார் என்பதையும் தெரிந்தால் சொல்லுங்களேன்.



2. முதல் தரப்போட்டிகளில் பிரையன் லாரா அடித்த ஆட்டமிழக்காத 501 ஓட்டங்களே இன்று வரை அதிகபட்சமாக இருக்கின்றது. கேள்வி, பிரையன் லாராவிற்கு முன்னர் அந்த சாதனையை வைத்திருந்தவர் யார்?

3. இந்திய முதல்தரப்போட்டிகளில், முந்தைய ரஞ்சிக்கோப்பையை வென்ற அணியுடன், இதர இந்திய வீரர்களின் அணி (Rest of India)ஆடும் போட்டிக்கான கோப்பையின் பெயர் என்ன?

4. ஐபில் இருபதுக்கு இருபது ஆட்டமாக நகரங்களுக்கு இடையிலான போட்டிகளாக நடத்தப்படுகிறது. ஆனால் இந்திய அளவில் வேறு ஒரு இருபதுக்கு இருபது போட்டித்தொடரும் முதல்தரப் போட்டிகளாக நடத்தப்படுகின்றது. அதாவது ரஞ்சிப் போட்டிகளில் ஆடும் அணிகள் இந்த இருபதுக்கு இருபது போட்டிகளில் பங்கேற்கும். இந்தப் போட்டித் தொடரின் பெயர் என்ன?

5. கீழ்க்காணும் படத்தில் இருக்கும் கிரிக்கெட் வீரர் யார்? தொடர்ந்து இந்திய முதல் தரப்போட்டிகளைக் கவனித்து வருபவர் என்றால் இவரை சுலபத்தில் கண்டுபிடித்துவிடலாம்.



6. கடைசிக் கேள்வி, லீ ஜெர்மோன், தனது முதல் டெஸ்ட் ஆட்டத்தை கேப்டனாக அறிமுகமாகி ஆடினார். கேண்டர்பர்ரி அணிக்காக இவர் ஆடிய முதல் தர ஆட்டமொன்று கிரிக்கெட் பதிவுகளில் நீங்கா இடம் பெற்றுவிட்டது. அந்த ஆட்டத்தில் நிகழ்ந்த குறிப்பிடத்தக்க நிகழ்வு என்ன, அதில் இவரின் பங்கு என்ன?

விடைகள்

1. 81/82 ரஞ்சிப்போட்டிகளின் அரை இறுதி ஆட்டத்தில், ரகுராம் பட் என்ற கர்னாடகா அணியின் சுழற்பந்து வீச்சாளரின் பந்து வீச்சை சமாளிக்க முடியாமல் பம்பாய் அணியினர் சுருண்டனர். ஏற்கனவே முதல் இன்னிங்ஸில் அதிக ஓட்டங்கள் குவித்திருந்ததின் அடிப்படையில் கர்னாடகா இறுதிக்குத் தகுதிப்பெற்றிருந்தது. ஒட்டு மொத்தத் தோல்வியைத் தவிர்க்க, ரகுராம் பட் பந்து வீசும்பொழுது மட்டும் இடதுகை ஆட்டக்காரராக ஆடி, ஆட்டத்தை டிரா செய்தார். முதல் தரப்போட்டிகளில் நன்றாக விளையாடியும் சொற்ப பன்னாட்டு ஆட்டங்களே ஆடி ரகுராம் பட் ஓய்வுப் பெற்றார்.

ஆட்டவிபரம் இங்கே

2. ஹனீப் முகமது கராச்சி அணிக்காக அடித்த 499 ஓட்டங்கள். சுவாரசியமான விசயம் என்னவெனில் இவர் 500 வது ஓட்டத்தை எடுக்கும்பொழுது ரன் அவுட் என்ற முறையில் ஆட்டமிழந்தார். அதைப்பற்றியக் கட்டுரையை பின்வரும் சுட்டியில் படிக்கலாம்.
http://www.espncricinfo.com/magazine/content/story/385930.html

3. இரானி கோப்பை

4. எதிர்பார்த்த விடை சையத் முஷ்தாக் அலி கோப்பை என்ற போதிலும் Interstate 20 என்ற விடையும் சரியானதே

5. ராபின் பிஸ்ட் , ராஜஸ்தான் அணியின் ஆட்டக்காரர். இந்த சீசனில் அதிக ஓட்டங்களை ரஞ்சிப்போட்டிகளில் எடுத்தவர் என்ற பெருமை உடையவர்.

இவரின் பக்கம் http://www.espncricinfo.com/ci/content/player/262464.html

6. 59 ஓவர்களில் 291 வெற்றி இலக்கு என்று கடைசிநாளில் களமிறங்கிய கேண்டர்பர்ரி அணி, 108 ஓட்டங்களுக்கு 8 விக்கெட்டுகளை இழந்து தடுமாறிக்கொண்டிருந்தது. இருந்த போதிலும் லீ ஜெர்மோனும் ரோஜர் போர்டும் ஓரளவிற்கு சமாளித்து டிராவை நோக்கி ஆட்டத்தை நகர்த்திக் கொண்டிருந்தனர். எதிராக ஆடிய வெலிங்க்டனின் அணியின் கேப்டனும் பயிற்சியாளரும் ஒரு திட்டத்தை வகுத்தனர். இரண்டு ஓவர்கள் மீதம் இருக்கும் நிலையில் எளிதாக பந்துகளை ஆட்டக்காரர்களுக்கு வீசுவதன் மூலம் , இரண்டு மூன்று பந்து ஆடி வாங்கினாலும், கிட்டத்தட்ட 95 ஓட்டங்களை கண்டிப்பாக எடுக்க முடியாது, மீதமிருக்கிற இரண்டு விக்கெட்டுகளை எடுக்க வாய்ப்பு இருக்கின்றது என பெர்ட் வான்ஸ் என்பவரை பந்து வீசச்செய்தனர். வேண்டுமென்றே நோபால்களை வீசச் செய்து மட்டையாளர்களை குஷிப்படுத்தினர். கொடுத்தக் காசுக்கு மேல் கூவ ஆரம்பித்த வான்ஸ் வாரி வழங்கி 77 ஓட்டங்களைக் கொடுத்தார். கடைசி ஓவரில் 18 ஓட்டங்கள் தேவை என்ற நிலையில் 17 ஓட்டங்களை எடுத்த லீ ஜெர்மோன் ஸ்கோரை சமன் செய்தார். அதனைப் பற்றிய விவரணையான கட்டுரை இங்கே

http://www.espncricinfo.com/magazine/content/story/451716.html

விவிஎஸ். லக்‌ஷ்மண்

1998 ஆம் ஆண்டு, ஷார்ஜாவில் இந்திய அணிக்கு இரண்டு இலக்குகள் நிர்ணயிக்கப்பட்டன. ஒன்று ஆட்டத்தில் வெற்றி பெறுவதற்கு, மற்றொன்று இறுதிப்போட்டிக்கு ஓட்டங்கள் விகித அடிப்படையில் தகுதி பெறுவதற்கு,,, இரண்டில் எதையுமே அடைய விட மாட்டோம் என ஆஸ்திரேலியா கடினமான இலக்கை நிர்ணயிக்கிறது. சோம்பலுக்கும் சொதப்பலுக்கும் பெயர் போன, 90களின் இந்திய அணி 138 ரன்களுக்கு நான்கு விக்கெட்டுகளை இழந்து தடுமாறிக்கொண்டிருந்தது. அதன் பின்னர் தான் கதையே , அன்றிரவு ஏற்பட்ட மணற்புயலைக்காட்டிலும் பரபரப்பாக மறுநாள் பேசப்பட்டது டெண்டுல்கரின் சூறாவளித்தனமான ஆட்டம். டெண்டுல்கர் மட்டுமே பேசப்பட்டார்.... மறு முனையில் உறுதியாகவும் உறுதுணையாகவும் நின்ற விவிஎஸ் லக்‌ஷ்மணைப் பற்றி மக்கள் பேசவே இல்லை. டெண்டுல்கருடன் இணைந்து இணையாட்டமாக 104 ஒட்டங்கள் எடுத்து ரன்ரேட் அடிப்படையில் தகுதிப் பெற செய்ததில் கண்டிப்பாக லக்‌ஷ்மணுக்கு கால்வாசிப் பங்காவது உண்டு. இத்தனைக்கும் லக்‌ஷ்மணுக்கு மூன்றாவது ஒரு நாள் ஆட்டம்.

கடைசி 15 வருடங்களில் தொடர்ந்து கத்தித் தொங்கிக் கொண்டே இருப்பது லக்‌ஷ்மணினின் கழுத்துக்குத்தான் ... அணியில் தடகளப்பு சரியில்லையா.... தூக்கு லக்‌ஷ்மணை, பந்து வீச்சாளர்கள் சரி இல்லையா... லக்‌ஷ்மணை தூக்கிவிட்டு மேலதிக பந்துவீச்சாளரை சேருங்கள் ...என்னது இந்தியா தோற்றுவிட்டதா ... லக்‌ஷ்மணை எல்லாம் இன்னும் ஏனப்பா வைத்திருக்கிறார்கள் ... இந்தப் பல்லவியை லக்‌ஷ்மண் ஆடத்தொடங்கிய நாள் முதல் இன்று வரை கேட்கலாம். இந்திய அணியின் மறுமலர்ச்சிக்கு கங்குலியின் தலைமைப் பண்புகள் எந்த விதத்தில் உதவியதோ அந்த அளவிற்கு லக்‌ஷ்மணது நிதானமான கோல்கத்தா 2001 டெஸ்ட் ஆட்டமும் இந்தியக் கிரிக்கெட்டிற்கு மட்டுமல்ல, ஒட்டு மொத்த டெஸ்ட் போட்டிகளுக்கே புதுப் பரிமாணத்தைக் கொண்டு வந்தது. அற்புதங்கள் அடிக்கடி நிகழ்த்தப்பட்டால் அவை சாதாரண நிகழ்வுகள் ஆகிவிடும். லக்‌ஷ்மணால் அந்த அளவிற்கு மீண்டும் ஒரு ஆட்டத்தைக் கொண்டு வர இயலாவிட்டாலும், அந்த ஆட்டத்தின் அடர்த்திக்கு நெருக்கமாக பல ஆட்டங்களில் ஆடி வென்றோ அல்லது அணியைத் தோல்விகளில் இருந்து காத்தோ இருக்கின்றார். முதுகுவலி இருந்தாலும் பொறுத்துக்கொண்டு, புறமுதுகிட்டு ஓடிப்போன ஆட்டக்காரர்களைப்பற்றி நினையாமல் இஷாந்த் சர்மாவுடனும் கடைசியில் பிரக்யான் ஓஜாவுடனும் வெற்றிக்கான இலக்கை அடைய அவர் எடுத்த ஓட்டம் வெறு 76 ரன்களாக இருந்தாலும் அது 281 ரன்களுக்கு எந்தவகையிலும் குறைந்தது இல்லை.



ஏனோதானோவென்று லக்‌ஷமண் இந்திய அணியில் இடம்பெறவில்லை, வலுவாக முதல்தர ஆட்டங்களில் பிரகாசித்து, வெகுவான ஓட்டங்களை எடுத்துத்தான் உள்ளே நுழைந்தார். ரஞ்சிப்போட்டிகளில் இரண்டு முச்சதங்களை அடித்ததோடு மட்டுமல்லாமல், தொடர்ந்து 9 ஆட்டங்களில் சதமடித்து தனது இருப்பை தேர்வாளர்களுக்குக் காட்டிக்கொண்டே இருந்தார். கடவுள்களும் மஹாராஜாக்களும் இருந்த இந்திய அணியில் முழுக்க முழுக்க தனது விடாமுயற்சியாலும், தொடர்ந்த அர்ப்பணிப்புடனும் அணியில் இருந்து வருபவர்.

96 ஆம் ஆண்டும் தென்னாப்பிரிக்காவிற்கு எதிராக டெஸ்ட் ஆட்டங்களில் அறிமுகமான லக்‌ஷ்மண் முதல் ஆட்டத்திலேயே அரை சதத்தைக் கடந்தார். இவர் அணில் கும்ப்ளேவுடன் இணைந்து எட்டாவது விக்கெட்டிற்கு எடுத்த 56 ஓட்டங்கள் கடைசியில் இந்தியா வெற்றியைப் பெற மிகப்பெரும் காரணமாகும். கடைவரிசை ஆட்டக்காரர்களை கண்ணியமாக வழி நடத்தி, தேவைப்படும் ஓட்டங்களை எடுக்க வைப்பதில் லக்‌ஷ்மண் எப்பொழுதுமே கெட்டிக்காரர். பின்வரிசை ஆட்டக்காரர்கள் லக்‌ஷ்மணுடன் ஆடும்பொழுது, தன்னம்பிக்கையுடன் ஆடுவதைக் கவனித்து இருக்கலாம். மத்திய வரிசை ஆட்டக்காரரான இவரை, அணியின் துவக்க ஓட்டக்காரராக பலிகடா ஆக்கப்பட்டார். லக்‌ஷ்மணுக்கு விருப்பம் இல்லை என்றாலும் துவக்க ஆட்டக்காரராக சித்துவுடனும் ரமேஷுடனும் சில ஆட்டங்கள் களமிறங்கினார். சில அரைசதங்களை எடுத்தபோதிலும், இவரின் சிட்னி ஆட்டம் இவரைக் கவனிக்க வைத்தது. இவர் எடுத்த 167 ஓட்டங்கள் தொடர்ந்த ஒரு நாள் போட்டிகளுக்கான அணியில் இடம்பெற வைத்தது. ஒரு நாள் போட்டிகளில் சோபிக்காவிட்டாலும், சில டெஸ்ட் போட்டிகளுக்குப்பின்னர் இந்தியா வந்த ஆஸ்திரேலியாவை நொங்கு எடுத்த 281 ஓட்டங்கள் இவரின் இரண்டாவது சதமானது,

ஆரம்பகால விவிஎஸ் லக்‌ஷ்மணினின் பேட்டியைக் காண http://www.espncricinfo.com/ci/content/story/85437.html

ஆறு ஒருநாள் சதங்கள் , இரண்டாயிரம் ஓட்டங்களுக்கு மேல் எடுத்தும் , ஒரு உலகக்கோப்பைப் போட்டிகளில் கூட ஆடாத பிரபல வீரர் யார் என வினாடிவினா வகையில் கேள்வி கேட்கப்பட்டால் அதன் விடை விவிஎஸ் லக்‌ஷ்மண், ஓடத் தெரியாதவர், ஆடத்தெரியாதவர் என்றெல்லாம் எகத்தாளமாகப் பேசப்பட்டாலும், பாகிஸ்தானுக்கு எதிரான ஒருநாள் தொடரை பாகிஸ்தானிலேயே கைப்பற்றக் காரணமாக இருந்தவர் விவிஎஸ் லக்‌ஷ்மண். லாகூரில் நடை பெற்ற ஐந்தாவது மற்றும் இறுதி ஒருநாள் போட்டியில் சதமடித்து அந்த ஆட்டத்தையும் தொடரையும் வெற்றி பெறச்செய்தார். மேற்கு இந்திய தீவுகளுக்கு எதிராக இந்தியா 325 இலக்கை வெற்றிகரமாக எட்டிய அகமதாபாத் ஒருநாள் ஆட்டம், ஆஸ்திரேலியாவிற்கு எதிரான சிட்னி ஒருநாள் ஆட்டசதம் என பல சிறப்பான ஆட்டங்களை ஆடியிருந்த போதிலும் ஒவ்வொரு ஆட்டத்திலும் தான் எடுக்கும் 20 களையும் 30 களையும் சதமாகவோ அரைசதமாகவோ மாற்றமுடியாமல் போகும்பொழுது , நன்றாக ஆடி இருந்த போதிலும் சராசரிகளையும் சதங்களையும் வைத்து ஆட்டத்திறனை மதிப்பிடும் இந்தியக் கிரிக்கெட் மனோபாவத்தில் ஒருநாள் போட்டிகளில் இருந்து 2006 ஆம் ஆண்டு ஒட்டு மொத்தமாக நீக்கப்பட்டார்.

எல்லா சாபங்களிலும் ஒரு மறைமுக வரம் இருக்கின்றது. லக்‌ஷ்மணால் டெஸ்ட் ஆட்டங்களில் மேலும் நேர்த்தியாக ஆட முடிந்தது. பணிச்சுமை குறைந்தது. டெஸ்ட் ஆட்டங்கள் இல்லாதபொழுது ஓய்வு எடுக்காமல் பயிற்சிகளோ அல்லது ரஞ்கிப்போட்டிகளிலோ தொடர்ந்து ஆடி வருபவர். வலைப்பயிற்சிகளைக் காட்டிலும் , உண்மையான ஆட்டங்கள் ஆடும்பொழுதே சிறந்த பயிற்சி கிடைக்கின்றது, அது உள்ளூர் போட்டிகளாக இருந்த போதிலும் கூட..... யார் வீசினாலும் சில மைக்ரோ வினாடி கவனம் சிதறினாலும் ஆட்டமிழக்க இருக்கும் நிகழ்தகவு அனைத்துப்போட்டிகளிலும் ஒரே அளவே....

டெண்டுல்கருக்கும் கங்குலிக்கும் திராவிட் ஏவிஎம் ராஜன் என்றால் , திராவிடிற்கு லக்‌ஷ்மண் ஏவிஎம் ராஜன். கோல்கத்தா, அடிலெய்ட் என மறக்க முடியாத டெஸ்ட் ஆட்டங்களில் இந்த இணை கலக்கி இருந்தாலும் உள்ளூர்ப்போட்டிகளிலும் அதே அளவு ஆட்டத்தைத் தருவார்கள் என்பதற்கு ஒரு உதாரணம், 2003 ஆம் ஆண்டு சென்னை சேப்பாக்கத்தில் நடைபெற்ற இரானிக் கோப்பை ஆட்டத்தில் வெற்றி இலக்கு 340 என மும்பையால் நிர்ணயிக்கப்பட்டபொழுது, அசராமல் சிவாஜி - திராவிடும், ராஜன் - லக்‌ஷமனும் இணைந்து வெற்றியைத் தேடித் தந்தனர். ஆட்ட விபரம் இங்கே http://www.espncricinfo.com/india/engine/match/133757.html

கடைசி 10 வருடங்களில் மறக்க முடியாத இந்திய டெஸ்ட் வெற்றிகளை எடுத்துப்பாருங்கள், அதில் லக்‌ஷ்மணது பங்கு பாதிக்குப் பாதி இருக்கும். தோல்வியின் விளிம்பில் இருந்து காப்பாற்றிய ஆட்டங்களை எடுத்துக் கொள்ளுங்கள் அதிலும் லக்‌ஷமணது பங்கு இருக்கும். 37 வயது ஆகி இருந்தாலும் , கடந்த 6 வருடங்களாக ஒருநாள் போட்டிகளில் ஆடததால் , லக்‌ஷமணது ஆட்டத்திறனின் நீட்டிப்பு அதிகமே.... இந்திய கிரிக்கெட் ரசிகர்களும் ஊடகங்களும் எவ்வளவு மறதித் திறன் உடையவர்கள் என்பதற்கு உதாரணம், சமீபத்தில் நடந்து முடிந்த மேற்கிந்தியத் தீவுகள் டெஸ்ட் போட்டிகளில் மிகப்பெரும் சதத்தை அடித்தவர் லக்‌ஷமண்.

சிலர் சொகுசாக அனைத்தும் தனக்கு சாதகமாக இருந்தால் தான் ஆடுவார்கள், வெகுசிலர் எட்ட முடியாத இலக்கு, போராடினால்தான் வெற்றி , கழுத்துக்கு மேலே கத்தி, ஏழு கடல் ஏழு மலைத் தாண்டித்தான் சாதனையை அடைய முடியும் என்றால் புத்துணர்ச்சியுடன் ஆடுவார்கள். டெஸ்ட் ஆட்டங்களை தொடர்ந்து கவனித்துக்கொண்டிருப்பவர்களுக்கு, எப்படி லக்‌ஷ்மண் ஒவ்வொரு சறுக்கலிலும் மீண்டு வந்தார் என்பது தெரியும்.

தன்னை ஏமாற்றி பவுல்ட் ஆக்கிவிட்டார்களோ என முழிக்கும் அதே லக்‌ஷ்மண் , அடுத்த ஆட்டத்தில் எதிர்ப்பக்கம் போகும் பந்தை மணிக்கட்டை சுழற்றி கால்பக்கம் அடித்து நம்மை மெய் மறக்கச்செய்வார். சிலர் வைனைபோன்றவர்கள், காலம் ஆக ஆகத்தான் அவர்களின் மதிப்பும் பெருமையும் கூடிக்கொண்டேப்போகும். வாழ்க்கைக்கு நெருக்கமான விளையாட்டான டெஸ்ட்போட்டிகளில் வயதைக் காரணம் காட்டி ஒருவரைக் கீழேத் தள்ளிவிடுவது டெஸ்ட்போட்டிகளின் மூலம் நாம் கற்கும்பாடங்களுக்கு அழகல்ல.... நிச்சயம் பத்தாயிரம் டெஸ்ட் ஓட்டங்களை எடுத்தப்பின்னர்தான் லக்‌ஷமண் ஓய்வு பெறவேண்டும் , அப்பொழுதுதான் அவருக்கும் அவரின் பங்கிற்கும் ஒரு முழுமைத்துவம் கிடைக்கும்.

“நிக்காதடா.... வேடிக்கைப்பார்க்கதேடா ...ஓடுறா டேய் “ என அன்று ஓஜாவிடம் கத்தியது போல, உமேஷ் யாதவிடமோ அஷ்வினிடமோ அணிக்காகவும் அணியின் வெற்றிக்காகவும் லக்‌ஷ்மண் மீண்டும் ஒருமுறையல்ல, பலமுறை சத்தம் போட வேண்டும் என்பதே டெஸ்ட் கிரிக்கெட் ரசிகர்களின் விருப்பம்.

சிக்ஸர் சித்துவும் பெருந்தகையாளர் கபில்தேவும் - மறக்க முடியாத மெட்றாஸ் ஒரு நாள் கிரிக்கெட் போட்டி - 1987

சென்னை-மெட்றாஸ் , கிரிக்கெட் இவை இரண்டும் தேனும் பாலும் போல.... ஒன்றிணையும்பொழுது ரசிகர்களுக்கு திகட்டத்திகட்டக் கொண்டாட்டந்தான்... பெரும்பான்மையான சமயங்களில் காப்பியின் தொண்டைக்குழித் தித்திப்புக் கசப்பைப்போல வருத்தமான தோல்விகள் கிடைக்கப்பெறும் இடம் சென்னை சேப்பாக்கம் மைதானம்., இருந்த போதிலும் தோல்வியோ வெற்றியோ ஆட்டத்தை ஆட்டமாகப் பார்த்து கிரிக்கெட்டை நேசிப்பவர்கள். சொற்ப ஓட்டங்களில் தோல்வியுற்ற பாகிஸ்தான் டெஸ்ட் போட்டியாக இருக்கட்டும், சையத் அன்வர், அன்றைய உலகசாதனை ஓட்டங்கள் எடுத்த போதாகட்டும், எதிரணியினரைப் பாராட்ட சென்னை ரசிகர்கள் தவறியதேக் கிடையாது.

வெற்றியும் இல்லாமல் தோல்வியும் இல்லாமல் டிராவும் இல்லாமல், டையில் முடிவுற்ற ஆஸ்திரேலியா - இந்திய டெஸ்ட் ஆட்டம் நடைபெற்று ஒருவருடம் முடிந்த நிலையில், 1987 ஆம் ஆண்டு உலகக்கோப்பைத் துவங்குகிறது. இந்தியாவிற்கான முதல் ஆட்டம் மெட்றாசில்.... எள்ளு எண்ணெய் ஆகும் அளவிற்கு ரசிகர் கூட்டம்.... நாணய சுண்டலில் வென்ற இந்திய அணித்தலைவர் கபில்தேவ் ஆஸ்திரேலியாவை முதலில் ஆட பணிக்கிறார். ஜெஃப் மார்ஷ் சதமடிக்க, டீன் ஜோன்ஸ் அதிரடியாக ஆட , அன்றையக் காலக் கட்டங்களில் எட்ட முடியாத இலக்காக 271 ஓட்டங்கள் வெற்றி பெற நிர்ணயிக்கப்படுகிறது.



சோம்பேறித்தனமான ஆட்டத்திற்குப் பெயர் பெற்ற, கவாஸ்கர் அதிரடியாக ஆட, அரங்கமே ஆச்சரியத்தில் மூழ்கியது. வழக்கமாக விரைவாக ஆடும் ஸ்ரீகாந்தை விட கவாஸ்கர் குறைந்த பந்துகளில் 37 ஓட்டங்கள் எடுத்து ஆட்டமிழக்க, பின் வருகிறார் நவ்ஜோத் சிங் சித்து. அவருக்கான முதல் ஆட்டம். சித்துவும் ஸ்ரீகாந்தும் ஆஸ்திரேலிய பந்துவீச்சை பிளக்க, எளிதாக இந்தியா வெற்றியைப் பெற்றிவிடும் என்ற நிலையில் ஸ்ரீகாந்த் 70 ஓட்டங்கள் எடுக்க ஆட்டமிழந்தாலும், சித்து 5 சிக்ஸர்களுடன் வான வேடிக்கைகளைத் தொடர்ந்தார். அப்பொழுதெல்லாம், சிக்ஸர் என்றால் ஒன்றோ இரண்டோ ஆட்டத்திற்கு கிடைக்கும் நிலையில் ஐந்து சிக்ஸர்கள், அதுவுமொரு அறிமுக நாயகன் அடிப்பது என்பது பெரிய விசயம். 207 க்கு இரண்டு விக்கெட்டுகள், 90 பந்துகளில் வெறும் 64 ஓட்டங்கள் எடுத்தால் வெற்றி என்ற நிலையில் தொடங்கியது இந்திய அணியின் தொன்று தொட்டப்பழக்கம்... சித்து, வெங்க்சர்க்கார், ரவி சாஸ்திரி, கபில்தேவ் என வரிசையாக இருக்கைக்குத் திரும்ப, கடைசி ஓவர், 6 ரன்கள் எடுத்தால் வெற்றி,,, மட்டையடிப்பது மனிந்தர் சிங் .... டை ஆன டெஸ்ட் ஆட்டத்தில் கடைசியாக ஆட்டமிழந்தது, மனிந்தர் சிங் என்பதும் இங்கு குறிப்பிடத்தக்கது.

பந்து வீச வருவது ஸ்டீவன் வாக் ... மறு முனையில் நம்பகமான கிரன் மோரே ... அடுத்தடுத்து இரண்டு இரண்டாக நான்கு ஓட்டங்களை எடுத்த மனிந்தர் சிங் நம்பிக்கை சேர்க்கிறார். இரண்டு பந்துகளில் இரண்டு ஓட்டங்கள் எடுத்தால் வெற்றி,.. விட்டதைப்பிடிப்பாரா மனீந்தர் சிங்.... ஸ்டீவ் வாஹின் மிதவேகப்பந்து வீச்சில் கிளீன் பௌல்ட் .... ஆஸ்திரேலிய அணி ஒரு ரன் வித்தியாசத்தில் வெற்றிப்பெற்றது.... இதே போல மேலும் ஒரு ரன் வித்தியாச பரபரப்பான வெற்றியை 92 ஆம் ஆண்டு உலகக்கோப்பைப்போட்டியிலும் ஆஸ்திரேலியா மீள்பதிவு செய்தது.-......

சரி கிரிக்கெட் வர்ணனையெல்லாம் இருக்கட்டும், கபில்தேவ் எப்படி பெருந்தகையாளர் ஆனார் என்று கேட்கிறீர்களா !!! ஆஸ்திரேலியா ஆடும்பொழுது, டீன் ஜோன்ஸ் அடித்த ஒரு சிக்ஸர் நான்காக அறிவிக்கப்படுகிறது. எல்லைக்கோட்டின் அருகே இருந்த ரவி சாஸ்திரி பந்து தலைக்கு மேலே பறந்து எல்லைக்கோட்டைத் தாண்டிய பொழுதும், சிக்ஸர் இல்லை எனக்கூறியதை நம்பி நடுவர் டிக்கி பேர்ட் நான்கு என அறிவிக்கிறார். சாதாரணமாகவே போங்கு ஆட்டம் ஆடும் ஆஸ்திரேலியர்கள், அடித்த சிக்ஸரை சும்மா விட்டுவிடுவார்களா என்ன ... ஆஸ்திரேலிய அணி ஆட்டம் முடிந்த பின்னர், ஆட்ட இடைவெளியின் பொழுது டீன் ஜோன்ஸ் அடம்பிடித்து, அணி மேலாளர் அலன் கிராம்ப்டனை கபில்தேவிடம் பேச வைத்தனர். ஆட்டத்தை கண்ணியமாக ஆடும் கபில்தேவ், எந்த ஆட்சேபனையும் இன்றி இரண்டு ஓட்டங்களை விட்டுக்கொடுத்தார். நான்கு ஆறாக மாற்றப்பட்டு, ஆஸ்திரேலிய அணியின் ஸ்கோர் 270 ஆக உயர்த்தப்பட்டது. கடைசியில் தோல்விக்கு அந்த பெருந்தன்மை காரணம் என சராசரி ரசிகர்களால் பேசப்பட்டாலும், அன்றைய கிரிக்கெட் ஆட்டம் இன்றும் ரசிகர்களால் நினைவுகூறப்படுவதற்கு காரணம் கபில்தேவின் பெருந்தன்மை..... இன்று நன்னடத்தைகளைப் பற்றியும் அழுகுனி ஆட்டங்களைப் பற்றியும் வாய்கிழிய பேசும் ரவிசாஸ்திரியும் டீன் ஜோன்ஸும் எப்பொழுதும் கபில்தேவிடம் இருந்து கற்றுக்கொள்ள வேண்டிய விசயங்கள் ஏராளமாக இருக்கின்றன. அதுவரை போகிற வருகிறவர்களால் எல்லாம் அடித்து நொறுக்கப்பட்ட ஆஸ்திரேலிய அணி, வீறுகொண்டு அடுத்த 30 வருடங்களுக்கு அசைக்கமுடியாத கிரிக்கெட் சக்தியாக மாறிய வித்து இந்த மெட்றாஸ் ஒரு நாள் போட்டியில் தான் விதைக்கப்பட்டது. எழுச்சிப் பெற்ற 1987 ஆம் ஆண்டு உலகக்கோப்பையை ஆஸ்திரேலியா வென்றது அதற்குபின் வந்த வெற்றிகள் எல்லாம் வரலாறு ஆனது.
ஆட்ட விபரங்களை இங்கே காணலாம் http://www.espncricinfo.com/ci/engine/match/65093.html

விடைகள் - கிரிக்கெட் வினாடி வினா - ஆறுக்கு ஆறு (Cricket Quiz with Answers)

1. இந்தப்புகைப்படத்தில் இருப்பவர் யார், நவீன கிரிக்கெட் ஆட்டத்தின் போக்கை மாற்றிய ஒரு விசயத்தை முதன்முதலில் அதிகாரப்பூர்வமாக டெஸ்ட் ஆட்டங்களில் செய்தவர். இவர் செய்த விசயம்தான் என்ன?

கிரஹாம் யலுப் - அடிவயிற்றுப் பாதுகாப்பு உபகரணம் கண்டுபிடிக்கப்பட்டு கிட்டத்தட்ட நூறு வருடங்களுக்குப்பின்னரே , தலைக்கவசம் கிரிக்கெட் ஆட்டத்தில் அதிகாரப்பூர்வமாக பயன்பாட்டிற்கு வந்தது. மனிதனின் மூளையும் முக்கியமானது என உணர ஒரு நூற்றாண்டு தேவைப்பட்டுள்ளது என நகைச்சுவையாக கூறுவார்கள். கவாஸ்கர் , தலையைச் சுற்றி அடிபட்டால் கட்டும் கட்டுபோல போல ஒரு வடிவுடன் ஒரு கவசத்தை அணிந்து ஆடியிருக்கிறார்.

டென்னிஸ் அமிஸ், பெக்கர் உலக(கலகத்) தொடர் போட்டிகளில் மோட்டார் சைக்கிள் ஓட்டும்பொழுது பயன்படுத்தப்படும் தலைக்கவசத்தை சில மாறுபாடுகள் செய்து ஆடினார். ஆனால் அதிகாரப்பூர்வ டெஸ்ட் ஆட்டங்களில் , முதன் முறையாக தலைகவசத்தை அணிந்து ஆடியவர் கேள்வியின் படத்தில் இருக்கும் கிரஹாம் யலுப் என்ற ஆஸ்திரேலிய வீரர். மேற்கிந்திய தீவுகளுடன் உடன் ஆனா டெஸ்ட் தொடரில், பார்படாஸில் நடந்த இரண்டாவது டெஸ்டில் தலைகவசத்துடன் இறங்கி ஆடினார். பயந்தாங்கோலி என மேற்கிந்திய ரசிகர்களால் இவர் எக்களிக்கப்பட்டர்.

2. கிரிக்கெட் விதி எண் இரண்டின்படி மாற்று ஆட்டக்காரராக வருபவர் , விக்கெட் கீப்பிங் பணியை செய்ய இயலாது. டெஸ்ட் ஆட்டங்களில் ஒரு முறை இந்த விதி இரண்டு அணித்தலைவர்களின் ஒப்புதலோடு மீறப்பட்டுள்ளது. அந்த டெஸ்ட் ஆட்டம் எது? அந்த டெஸ்ட் ஆட்டத்தில் முதல் தர ஆட்டங்களில் அதிக அளவில் விக்கெட் கீப்பிங் முறையில் ஆட்டக்காரர்களை வீழ்த்தியவர் என்ற பெருமை உடைய ஒருவர் பன்னாட்டு ஆட்டங்களில் இருந்து ஓய்வு பெற்று இரண்டு வருடங்களுக்குப்பிறகு மாற்று விக்கெட் கீப்பராக சில நேரம் இருந்தார்.

பாப் டெய்லர் தான் அந்த விக்கெட் கீப்பர் . 86 ஆம் ஆண்டு லார்ட்சில் நடந்த நியுசிலாந்துக்கு எதிரான டெஸ்ட் ஆட்டம் ஒன்றில், இங்கிலாந்தின் விக்கெட் கீப்பர் புருஸ் பிரெஞ்ச், பேட்டிங் செய்யும்பொழுது காயமடைந்து விட , அணியில் இருந்த பில் அத்தே சில ஓவர்களுக்கு விக்கெட் கீப்பராக இருந்தார், சிறப்பாக கீப்பிங் செய்யத் தடுமாறிய பில் அத்தே விற்குப்பதிலக சிறப்பு விருந்தினர்களுடன் ஆட்டத்தைப் பார்த்துக்கொண்டிருந்த பாப் டெய்லர் இங்கிலாந்திற்கான விக்கெட் கீப்பராக இருக்கக் கேட்டுக்கொள்ளப்பட்டது.கிட்டத்தட்ட 70 ஓவர்கள் கீப்பிங் செய்த டெய்லரின் பணியை ஹாம்ப்ஷையர் விக்கெட் கீப்பர் பாபி பார்க்ஸ் தொடர்ந்தார்.

ஒரு ஆட்டத்தில் 4 விக்கெட் கீப்பர்கள் பயன்படுத்தப்பட்டது இந்த ஆட்டத்தின் மற்றொரு சிறப்பம்சம். இத்தனை மாற்றங்களுக்கும் நியுசிலாந்து அணியின் தலைவர் ஜெரமி கோனே பெருந்தன்மையாக ஒப்புக்கொண்டார். துணைத் தகவல் - ஜெரமி கோனே ஒரு முறை , அவரின் பந்து வீச்சை கபில்தேவ் துவம்சம் செய்தபொழுது வெள்ளைக்கொடி காட்டி அரங்கையே சிரிப்பில் ஆழ்த்தியவர்.

3. கிரிக்கெட்டில் ஹாட்ரிக் எனப்படுவது தொடர்ந்து மூன்று பந்துகளில் மூன்று விக்கெட்டுகளை வீழ்த்துவது. பலர் ஒரே ஓவரில் எடுப்பார்கள். சிலர் இரண்டு ஓவர்களில் எடுத்திருப்பார்கள். அதாவது முதல் ஓவரில் கடைசி பந்துகளில் ஒரு விக்கெட்டோ அல்லது இரண்டு விக்கெட்டுகளோ, அதே பந்துவீச்சாளர் மறுமுறை பந்துவீசும்பொழுது மீதமுள்ள விக்கெட்டுகளை எடுப்பது. டெஸ்ட் ஆட்டங்களில் ஒரு பந்து வீச்சாளர் மூன்று ஓவர்களில் தனது ஹாட்ரிக் விக்கெட்டுகளை எடுத்தார். எப்படி எடுத்தார் மேலும் அந்த பந்துவீச்சாளர் யார்?

ஆஸ்திரேலியாவின் மீசைக்கார வேகப்பந்து வீச்சாளர் மெர்வ் ஹியுஜஸ் தான் மூன்று ஓவர்களில் ஹாட்ரிக் எடுத்தவர். பெர்த்தில் மேற்கிந்திய தீவுகளுக்கு எதிரான டெஸ்ட் ஆட்டத்தில் , அம்புரோஸ் ஹாட்ரிக்கின் முதல் விக்கெட்டாக வீழ்ந்தார், அந்த பந்துடன் ஓவரும் முடிந்தது. ஹியுஜஸ் தனது அடுத்த ஓவரின் முதல் பந்தில் பாட்ரிக் பட்டர்சனின் விக்கெட்டை எடுத்தார். அத்துடன் மேற்கிந்திய தீவுகளின் முதல் இன்னிங்க்ஸ் ஆட்டமும் முடிவுக்கு வந்தது. ஆஸ்திரேலிய பேட்டிங்கிற்குப்பின்னர் , மீண்டும் களம் இறங்கி ஆடிய மேற்கிந்தியத்துவுகளின் இரண்டாவது இன்னிங்க்சில் பந்து வீச வந்த ஹியுஜஸ் தனது முதலாவது பந்திலேயே கர்டன் கிரினிட்ஜை ஆட்டமிழக்கச் செய்து சிறப்பம்சம் பொருந்திய இந்த ஹாட்ரிக் சாதனையுடன் ரசிகர்களின் மனதில் இடம்பிடித்தார்.



4. ஆமை முயலாகுமா எனத் தெரியாது. ஆனால் தனது ஆமை வேக ஆட்டத்தை தேவைப்பட்ட சமயங்களில் முயலென்ன, சிறுத்தை வேகத்தில் கூட மாற்றிக்கொள்ளக்கூடிய ஆட்டத்திறன் பெற்றவர் மேற்கிந்திய தீவுகள் அணியின் மட்டையாளர் சந்திரபால். இவர் பன்னாட்டு ஒருநாள் ஆட்டம் ஒன்றில் இங்கிலாந்தின் வேகப்பந்துவீச்சாளர் ஸ்டீவ் ஹாரிம்சன் வீசிய ஒரு ஓவரை துவம்சம் செய்தார். 5 பவுண்டரிகள் ஒரு சிக்சர் என தூள் கிளப்பி ஆடிய கீழ்க்காணும் காணொளியின் ஆட்டத்தின் முடிவு என்ன? அந்த முடிவில் இருந்த சுவராசியமும் என்னவென்று சொல்லுங்களேன்.



விடை :

மேற்கிந்திய தீவுகள் அணி ஒரு ஓட்டம் வித்தியாசத்தில் தோல்வியைத் தழுவியது. வருண பகவனும் இணைந்து விளையாடிய இந்த ஆட்டத்தில் வெற்றி இலக்கு ௨௭௧ என களமிறங்கி ஆடிய மேற்கிந்திய தீவுகள் அணியின் ஏழாவது விக்கெட்டாக ராம்தின் வீழ்ந்தார். டக்வோர்த் லூயிஸ் முறையின் படி இரண்டு ஓட்டங்கள் பின் தங்கி இருப்பதைக் கவனிக்காத பயிற்சியாளர் ஜான் டைசன் , மட்டையாளர்களை மழை காரணமாகத் திரும்ப உத்தரவிட்டார். நமுட்டு சிரிப்புடன் இங்கிலாந்து வெற்றியை எடுத்துக்கொண்டது.

Score Card - http://www.espncricinfo.com/wiveng2009/engine/current/match/352665.html

5. கொஞ்சம் எளிமையான கேள்விதான், நியுசிலாந்து பந்து வீச்சாளர் கிறிஸ் மார்ட்டினுக்கும் , முன்னாள் இந்திய சுழற்பந்துவீச்சாளர் பகவத் சந்திரசேகருக்கும் உள்ள ஒற்றுமை என்ன? பந்து வீச்சில் இருவரும் 200 க்கும் மேற்பட்ட விக்கெட்டுகளை வீழ்த்தியவர்கள், அதைத்தவிர வேறு ஒரு சுவாரசியமான ஒற்றுமை உள்ளது, அது என்ன?

விடை :

இருவரும் டெஸ்ட் ரன்களை விட அதிக டெஸ்ட் விக்கெட்டுகளை வீழ்த்தியவர்கள்.

6. சடகோபன் ரமேஷ் முன்னாள் இந்திய துவக்க ஆட்டக்காரர், ஓரளவிற்கு டெஸ்ட் ஆட்டங்களிலும் ஒரு நாள் ஆட்டங்களிலும் சோபித்தார். கால்களை நகர்த்தாமலேயே ஆடி 1000 ரன்கள் எடுப்பது என்பது அத்தனை சுலபம் அல்ல. கிரிக்கெட் ரசிகர்கள் மறக்காமல் இருக்க இவர் ஒரு சுவாரசியமான ஒருநாள் ஆட்ட சாதனையை தன் வசம் வைத்துள்ளார். உலக அளவில் 16 பேர் செய்து இருந்தாலும் இந்திய அளவில் இவர் ஒருவரே வைத்துள்ளார். 16 பேர்களில் குறிப்பிடத்தக்க மற்றொருவர் இன்சாமம் உல் ஹக். அது எத்தகைய சாதனை என்பதுதான் இந்த வினாடிவினாப் பதிவின் கடைசிக் கேள்வி.

விடை :

ஒரு நாள் போட்டிகளில் தனது முதல் பந்திலேயே விக்கெட் எடுத்த ஒரே இந்தியர்.

------------

அனைத்து கேள்விகளுக்கும் சரியாக விடையளித்த முகிலனிற்குப் பாராட்டுக்கள்

கிரிக்கெட் வினாடி - வினா - ஆறுக்கு ஆறு

1. ராஜேஷ் சௌகான் ஒரு முன்னாள் இந்திய சுழற்பந்து வீச்சாளர். 90களில் அனில் கும்ப்ளே, வெங்கடபதி ராஜுவுடன் மற்றும் ஒரு மும்மூர்த்தியாய் வலம் வந்தவர். பாகிஸ்தானுக்கு எதிரான, கராச்சியில் நடந்த ஒருநாள் போட்டி ஒன்றில் கடைசி ஓவரில் வெற்றிக்கு 8 ஓட்டங்கள் தேவை என்ற நிலையில், சிக்ஸர் அடித்து வெற்றியை எளிதாக்கியதில் பலரால் நினைவுக்கூறப்படுபவர். வீடியோ இங்கே

கேள்வி என்னவெனில் இந்த ராஜேஷ் சௌகான் மற்றும் ஒரு நினைவுகூறத்தக்க ஒரு சாதனையையும் வைத்துள்ளார். அந்த சாதனைதான் என்ன?

2. கிரிக்கெட் ஆட்டத்தின் தாய்வீடான லார்ட்ஸ் மைதானத்தில் டெஸ்ட் ஆட்டங்களில் முதன் முதலில் இந்திய அணி சார்பில் சதம் அடித்தவர் வினு மன்காட். அதன் பின்னர் திலீப் வெங்சர்க்கார் மூன்று சதங்களும், குண்டப்பா விஸ்வநாத், அசாரூதின், கங்குலி, ரவி சாஸ்திரி ஆகியோர் சதம் அடித்துள்ளனர். இவர்களைத் தவிர லார்ட்ஸ் மைதானத்தில் டெஸ்ட் சதம் அடித்துள்ள மற்றும் ஒரு இந்திய வீரர் யார்?

3. தற்பொழுது திரைப்பட நடிகராகிவிட்ட இந்திய அணியின் முன்னாள் தொடக்க ஆட்டக்காரர் சடகோபன் ரமேஷ் பன்னாட்டுப்போட்டிகளில் அடித்த ஒரே சிக்ஸரின் காணொளி கீழே இருக்கின்றது. இந்த ஆட்டத்தில் இந்தியாவின் சார்பாக அதிக ஓட்டங்கள் அடித்தவரும் இவரே ...

காணொளியைப் பார்த்து இருப்பீர்கள். இப்பொழுது கேள்வி என்னவெனில் , இந்த ஆட்டத்தின் முடிவு என்ன?

4. ககன் கோடா என்ற ஒருவர் இந்திய அணிக்காக இரண்டு ஒரு நாள் ஆட்டங்களில் துவக்க ஆட்டக்காரராக களமிறங்கியுள்ளார். அதே போல ஆஸ்திரேலியாவிற்காக அந்தோனி ஸ்டுவர்ட் என்பவர் மூன்று ஒரு நாள் ஆட்டங்கள் ஆடி இருக்கிறார். இவர்களுக்கு இடையில் இருக்கும் ஒரு சுவாரசியமான ஒற்றுமை என்ன?

5. தற்பொழுது மூன்றாம் நடுவர்கள், தீர்ப்புகள் வழங்கும்பொழுது ஆட்டமிழப்பை சிவப்பு விளக்கிலும், தொடர்ந்து ஆடச்சொல்வதை பச்சை என்ற வகையிலும் அறிவிக்கின்றனர். ஆனால் மூன்றாம் நடுவர்கள் அறிமுகப்படுத்தப்பட்ட ஆரம்பத்தில் எந்த நிறத்தை ஆட்டமிழந்தார் என்பதை அறிவிக்கப் பயன்படுத்தினர்?

6. பொதுவாக கிரிக்கெட் மைதானங்களில் , எல்லைக்கோடு வரை எந்த கம்பங்களோட இடையூறோ இருக்காது. இதற்கு விதிவிலக்காக இரண்டு மைதானங்கள் மட்டும் எல்லைக்கோட்டிற்குள் மரங்கள் கொண்டிருக்கின்றன.அந்த மைதானங்களில் பன்னாட்டு ஒருநாள் போட்டிகளும் நடைபெற்று இருக்கின்றன. அந்த மைதானங்கள் எவை?

---

விடைகள்

1. ராஜேஷ் சௌகான் இந்தியாவுக்காக ஆடிய 21 டெஸ்ட் போட்டிகளில் எந்தபோட்டிகளிலும் , இந்திய அணி தோற்றது கிடையாது.
ராஜேஷ் சௌகான் ஒரு விரும்பத்தகாத சாதனையும் வைத்துள்ளார், இந்திய பந்து வீச்சாளர்களில் ஒரு இன்னிங்ஸில் அதிக ஓட்டங்கள் விட்டுக்கொடுத்தவரும் இவர்தான். இலங்கைக்கு எதிரான 97 ஆம் ஆண்டு நடைபெற்ற டெஸ்ட் ஆட்டத்தில் 1 விக்கெட் எடுத்து 276 ஓட்டங்கள் விட்டுக்கொடுத்தார். (http://www.espncricinfo.com/ci/engine/match/63762.html)

2. மட்டையடிக்க தெரியாதவர் என அனைவராலும் கேலி செய்யப்பட்ட அஜித் அகர்கார் தான் லார்ட்ஸ் மைதானத்தில் சதமடித்தவர். அதன் காணொளி கீழே



3. லீசெஸ்டரில் நடைபெற்ற 99 உலகக்கோப்பை முதல் சுற்று ஆட்டங்களில் ஜிம்பாப்வே அணி இந்திய அணியை 3 ஓட்டங்கள் வித்தியாசத்தில் அதிர்ச்சி தோல்வி அடையச் செய்தது. ஹென்றி ஒலங்கா கடை ஓவரில் மூன்று விக்கெட்டுகளை வீழ்த்தி இந்திய கிரிக்கெட் ரசிகர்களை சோகத்தில் ஆழ்த்தினார்.

ஆட்ட விபரம் இங்கே - http://www.espncricinfo.com/ci/engine/match/65200.html

காணொளி கீழே



4. ககன் கோடாவும், அந்தோனி ஸ்டுவர்டும் தங்களது கடைசி ஒரு நாள் போட்டிகளில் சிறப்பாக விளையாடி ஆட்டநாயகன் விருதைப்பெற்றவர்கள். துரதிர்ஷ்டவசமாக அதன் பின்னர் அவர்கள் எந்தப்பன்னாட்டு போட்டிகளிலும் பங்கேற்க வாய்ப்புக்கிடைக்கவில்லை.

5. இன்றைய நிலைமைக்கு நேர் எதிராக பச்சை விளக்கு ஆட்டமிழப்பதைக் குறிக்கப் பயன்படுத்தப்பட்டது. காணொளி கீழே



6. மரங்கள் இருக்கும் இரண்டு கிரிக்கெட் மைதானங்கள்

செயிண்ட் லாரன்ஸ் - காண்டர்பெர்ரி - கெண்ட் (http://www.espncricinfo.com/england/content/ground/56869.html)

சிட்டி ஓவல், பியத்தர்மரிட்ஸ்பெரி , தென்னாப்பிரிக்கா
http://www.espncricinfo.com/southafrica/content/ground/59151.html

இந்த மைதானத்தில் சச்சின் டெண்டுல்கரும், கங்குலியும் நமீபியாவிற்கு எதிரான உலகக்கோப்பை ஒன்றில் சதமடித்துள்ளனர்.

கிரிக்கெட் வினாடி - வினா - ஆறுக்கு ஆறு

1. இந்திய மத்தியவரிசை மட்டையாளர் சுரேஷ் ரைனா வேறு எந்த இந்திய கிரிக்கெட் வீரரும் வைத்திராத ஒரு தனிச்சிறப்பு வாய்ந்த சாதனையை தன் கைவசம் வைத்துள்ளார். கிறிஸ் கெயில், மெக்கல்லம், ஜெயவர்த்தனே ஆகியோரும் உலகளவில் இந்த சாதனையை செய்துள்ளனர். அப்படி சுரேஷ் ரைனா செய்த சாதனைதான் என்ன?

2. ரன் அவுட் வகையில் ஆட்டமிழக்கப்படும் விக்கெட்டுகள் பந்து வீச்சாளர்கள் கணக்கில் சேராது. அது போல வேறு எந்த ஆட்டமிழக்கப்படும் முறைகள் பந்து வீச்சாளர்கள் கணக்கில் சேராது?

3. ஜாகிர்கான் மிகச்சிறந்த பந்துவீச்சாளர் என்பது அனைவருக்கும் தெரியும். அவ்வப்பொழுது நேர்த்தியாக பேட்டிங் ஆடுவதிலும் வல்லவர். எடுத்தோம் கவிழ்த்தோம் என ஆடாமல், நிலைமையை உணர்ந்து ஆடும் டெயிலெண்டர் ஆட்டக்காரர்களில் குறிப்பிடத்தக்கவர். பங்களாதேஷ் அணிக்கு எதிராக டெஸ்ட் ஆட்டம் ஒன்றில் இவரும் டெண்டுல்கரும் இணைந்து கடைசி விக்கெட்டிற்கு 133 ஓட்டங்கள் சேர்த்தது இந்திய சாதனையாக உள்ளது. டெண்டுல்கரிடமோ , கங்குலியிடமோ, சேவக்கிடமோ இல்லாத ஒரு அதிரடி பேட்டிங் சாதனையை, (In One Day Internationals) ஜாகிர்கான் தன் கைவசம் வைத்துள்ளார். அந்த சாதனை என்ன?

4. இங்கிலாந்து வீரர் பென் ஹோலியாக், ஜிம்பாப்வேயின் டிரெவர் மடாண்டோ, பங்களாதேஷின் மஞ்சுரல் இஸலாம் ரானா இவர்களுக்கு இடையிலான துயரமான ஒற்றுமை என்ன?

5. காயங்கள் காரணமாக , ஆட்டக்காரர்கள், “ரிடையர்ட் - நாட் அவுட்” வகையில் பெவிலியன் திரும்பி, பின்னர் ஆட வருவது வழக்கம். ஆனால் ரிடையர்ட்-அவுட் என தன்னைத் தானே ஆட்டமிழக்க செய்து கொண்ட முதல் டெஸ்ட் கிரிக்கெட் ஆட்டக்காரர் யார்? அதே டெஸ்ட் ஆட்டத்தில் இன்னொருவரும் தன்னைத் தானே ஆட்டமிழக்கசெய்து கொண்டார். அதற்கு பின்னர் யாரும் தங்களை இதுவரை ஆட்டமிழக்க செய்து கொள்ளவில்லை.

6. ஒருநாள் ஆட்டங்களில் களத்தடுப்பை இடையூறு செய்தல் (Obstructing the field), பந்தை கையால் தடுத்தல் (handled the ball) என இருவகையிலும் வெவ்வேறு ஆட்டங்களில் ஆட்டமிழந்த ஒரே ஆட்டக்காரர் யார்? இவர் ஒரு இந்திய ஆட்டக்காரர்.

விடைகள்

1. சுரேஷ் ரைனா டெஸ்ட், ஒருநாள், இருபதுக்கு இருபது என அனைத்து வகை பன்னாட்டு கிரிக்கெட் ஆட்டங்களிலும் சதம் அடித்துள்ள ஒரே இந்திய வீரர்.

2. Hit the ball twice - பந்தை இருமுறை அடித்தல், Obstructing the field - களத்தடுப்பை இடையூறு செய்தல், handled the ball - பந்தை கையால் தடுத்தல், Timed Out - நேரத்திற்கு வராமை

3. ஜாகிர்கான் , ஜிம்பாப்வே அணிக்கு எதிரான ஒருநாள் ஆட்டம் ஒன்றில் , ஒலாங்கா வீசிய ஓவரில் 4 சிக்ஸர்கள் உட்பட 25 ஓட்டங்கள் எடுத்தது இந்திய அளவில் ஒரு சாதனையாகும். அதில் கடைசி 4 பந்துகளையும் சிக்ஸருக்கு (இடையில் ஒரு Wide பந்து) தொடர்ந்து சிக்ஸருக்கு அனுப்பினார். முரண் நகையாக, ஆட்டத்தின் இரண்டாவது பாதியில் ஒரு பந்து, ஒரு விக்கெட் மீதமிருக்கும் நிலையில், 50 வது ஓவரில் ஓட்டங்களை வாரி வழங்கிய ஒலாங்கா வெற்றி ஓட்டத்தை எடுத்து ஜிம்பாப்வே அணிக்கு வெற்றித் தேடித்தந்தார்.

ஆட்ட விபரம் இங்கே http://www.espncricinfo.com/ci/engine/match/64682.html

4. மூவரும் இளம் வயதில் உயிர் இழந்த டெஸ்ட் கிரிக்கெட் ஆட்டக்காரர்கள். இதில் டிரெவர் மடோண்டாவைத் தவிர , ஏனைய இருவர் சாலை விபத்தில் காலமானவர்கள்.

5. மார்வன் அட்டப்பட்டு, மஹேலா ஜெயவர்த்தனே

ஆட்ட விபரம் இங்கே http://www.espncricinfo.com/ci/engine/match/63947.html

6. மொகிந்தர் அமர்நாத்

இந்தியக் கிரிக்கெட் - கடந்த 10 வருடங்களில்

சூதாட்டத்தில் தனது பெயரையும் பொலிவையும் இழந்த கிரிக்கெட், தனது சந்தைப்படுத்தலின் மூலம் வேகம் விறுவிறுப்பின் வழியாக அடுத்த தளத்திற்கு எடுத்துச் செல்லப்பட்டது இந்த 2001 - 2010 தசாப்தத்தில்தான். கண்ணியமிக்க கதாநாயகர்களின் ஆட்டம் என்ற தேன்கூடு கல்லெறிந்து கலைக்கப்பட்டபின்னர் குறிப்பாக இந்தியக் கிரிக்கெட்டை மீள் உருவாக்கம் செய்தவர்கள் தங்களை நிலைப்படுத்திக் கொண்டதும் இந்த பத்தாண்டுகளில் தான். உலகம் என்றால் அமெரிக்கா என இருப்பதைப்போல ஒரு காலத்தில் கிரிக்கெட் என்றால் இங்கிலாந்து என்ற மாயையை இந்தியா உடைத்ததும் இந்த பத்தாண்டுகளில் தான்.

கிரிக்கெட் பார்க்கும் நேரத்தில் உலகத்தை ஐந்து முறையாவது வலம் வந்துவிடலாம் என்ற சோம்பேறி பிம்பத்தை உடைத்து கால்பந்தைவிட சுவாரசியத்தைத் தந்த இருபதுக்கு இருபது ஆட்டத்தை தன்னுள் வரித்துக் கொண்டு கிரிக்கெட்டை அடுத்தத் தலைமுறைக்கு எடுத்துச் செல்ல தயாராக இருக்கும் இந்தத் தருணத்தில் கிரிக்கெட் வரலாற்றில் மைல்கற்களாக இருக்கும் இந்த பத்தாண்டுகளில் நடந்த இந்தியக் கிரிக்கெட் நிகழ்வுகளை மறுபார்வை செய்வோம்.

கனவில் மட்டும் நடக்க சாத்தியம் என நினைத்திருந்த வெற்றிகளை சமீபகாலங்களில் இந்திய கிரிக்கெட் அணி அடிக்கடி கைக்கொண்டாலும் இதற்கு முதன்முதலில் அடித்தளம் இடப்பட்டது 2001 ஆஸ்திரேலியா அணிக்கு எதிரான டெஸ்ட் தொடரில் தான். தொடர்ந்து 16 டெஸ்ட் வெற்றிகளைப் பெற்று பெயரில் மட்டும் கங்காருவைக் கொண்ட வேங்கையாக ஸ்டீவ் வாவ் தலைமையில் இந்தியா வருகிறது. இன்று வரும் தொடரும் பழக்கமான முதல் ஆட்டத்தில் மரண அடி. இரண்டாவது டெஸ்ட் ஆட்டம் கோல்கத்தா, எத்தனை முறை எழுதினாலும் வாசித்தாலும் பார்த்தாலும் அலுக்காத , திராவிட் - லக்‌ஷ்மண் இணையாட்டம் இந்தியவிற்கு பெருமையான வெற்றியைத் தருகிறது.

1983 உலகக்கோப்பை வெற்றிக்கு இணையான வெற்றி எனப்பார்க்கப்படும் கோல்கத்தா டெஸ்ட் இந்திய கிரிக்கெட் அணிக்கு ஒரு புது முகத்தை அளித்தது. கங்குலி அந்த முகத்தின் கிரீடம் ஆனார். கிரீடத்தின் முத்துக்களாக விவிஎஸ் லக்‌ஷ்மன், திராவிட், ஜாகிர்கான், ஹர்பஜன் சிங், சேவக்,யுவராஜ்,முகமது கையிப் ஆனார்கள். டெண்டுல்கரும் கும்ப்ளேவும் முகத்தின் பிரதிபலிப்பு ஆனார்கள்.

2003 உலகக்கோப்பை இறுதிப்போட்டி வரை முன்னேறியது, பாகிஸ்தானில் முதன்முறையாக டெஸ்ட் தொடர் மற்றும் ஒரு நாள் தொடர்களைக் கைப்பற்றியது, ஆஸ்திரேலிய மண்ணில் டெஸ்ட் தொடரை சமன் செய்தது, ஏனைய அணிகளுடன் குறிப்பிடத்தகுந்த ஒரு நாள் போட்டிகளில் வெற்றி பெற்றது என கங்குலி தலைமையில் ஏறுமுகம் ஆன இந்திய கிரிக்கெட் பத்தாண்டுகளின் மத்தியில் மீண்டும் மண்ணைக்கவ்வ ஆரம்பித்தது. கழுத்தில் வெள்ளை கைக்குட்டையைக் கட்டிக்கொண்டு மட்டையடிக்கும் லக்‌ஷ்மனின் புகைப்படம் தரும் உற்சாகத்தைவிட அதிகம் தருவது, தாடையில் அடிபட்டு , கட்டுப்போட்டுக்கொண்டு 14 ஓவர்களை வீசியதுடன் லாராவை ஆட்டமிழக்கவும் செய்தார், இந்திய அணிக்கு போர்க்குணத்தை விதைத்தவர் அணில் கும்ப்ளே என்பதற்கு மறு பேச்சில்லை. அனில் கும்ப்ளேவின் இந்த போர்க்குணமே இந்திய அணியின் கௌரவத்தை இந்த தசாப்தத்தின் பிற்பகுதிகளில் மீட்டெடுக்க உதவியது.

90களை நினைவூட்டிய தொடர் தோல்விகள் , சொந்த ஆட்டத்திறனின் வீழ்ச்சி, இந்திய அணிக்கு கிட்டத்தட்ட தரித்திரமாக வந்து சேர்ந்த கிரெக் சாப்பலுடனான பிரச்சினை ஆகியன கங்குலியின் தலைமைக்கு சிவப்பட்டை காட்டப்பட்டதுடன், அணியில் இருந்து கழட்டிவிடப்பட்டார்.

இந்திய கிரிக்கெட் அணியின் நிரந்தர ஏவி.எம்.ராஜன் ராகுல் திராவிட் அணித்தலைவர் ஆனார். நீண்ட காலத்திற்குப்பின்னர் மேற்கிந்திய தீவுகள் அணிக்கு எதிராகவும், இங்கிலாந்து அணிக்கு எதிராகவும் டெஸ்ட் தொடரை வென்ற பெருமையுடன் இவரும் ராஜினாமா செய்தார். 2007 ஆம் ஆண்டு உலகக்கோப்பைப் போட்டிகளில் முதல் சுற்றுடன் வெளியேறியது பெற்ற வெற்றிகளை மறக்கடிக்கச் செய்தது.

அணித்தலைமையை ஏற்க டெண்டுல்கர் மறுக்க, நான் இதற்காகத்தானே 118 டெஸ்ட் ஆட்டங்களாகக் காத்திருக்கின்றேன் என்று ஒருவர் எழுந்து கை உயர்த்தினார். ”கிரிக்கெட் நெறிமுறைகளின் படி கண்ணியமாக ஆடியது ஒரு அணி மட்டுமே” என்று ஆஸ்திரேலியாவை அதிரச்செய்த அனில் கும்ப்ளே. பாகிஸ்தானுடன் ஆன டெஸ்ட் தொடரை வென்றாலும், போதிய பயிற்சியின்றி 2007-08 ஆஸ்திரேலியா தொடரின் முதல் ஆட்டத்தில் இந்தியா சரண் அடைந்தது. சிட்னியில் நடுவர்களின் தடுமாற்றத்தினாலும் ஆஸ்திரேலியா அவ்வப்பொழுது ஆடும் ”நெறிமுறைகளுக்குட்பட்ட” ஆட்டத்தாலும் சமனாகும் ஆட்டும் தோல்வியில் முடிந்தது. இதனிடையில் ஹர்பஜன் - சைமண்ட்ஸ் பிரச்சினை மேலும் தூபம் போட்டது. அடுத்து ஆடப்போகும் மைதானம் பெர்த். பெர்த்தில் சாதரணமாக பந்து வீசினாலே முகத்திற்கு எகிறும் ஆடுகளத்தில், இந்தியா வழக்கம்போல சுருண்டு விடும் என்ற எதிர்பார்ப்பில் கிரிக்கெட் உலகம் காத்திருக்க, இஷாந்த் சர்மா, ஆர்.பி.சிங், பதான் ஆஸ்திரேலியாவை சுருட்டி ஓட ஓட விரட்டினர். பிரச்சினைக்குரிய சிட்னி ஆட்டத்திற்குப்பின்னர் ஆஸ்திரேலியா அணி இந்திய அணியை டெஸ்ட் போட்டிகளில் வெல்லவே இல்லை. நன்றாகக் கவனித்துப்பார்த்தால் ஆஸ்திரேலியாவின் தொடர் வீழ்ச்சி பெர்த் தோல்வியில் இருந்து துவங்குகிறது.

இதனிடையில் விளம்பர வருவாய் குறைபடும் என இந்தியா நீண்ட காலம் ஒதுக்கி வைத்து இருந்த இருபதுக்கு இருபது போட்டிகளின் முதல் உலகக்கோப்பை தென்னாப்பிரிக்காவில் துவங்கியது. பொன் முட்டையிடும் வாத்து என அப்பொழுது அறியாத இந்திய மூத்த ஆட்டக்காரர்கள் விலகிக்கொள்ள தோனி தலைமையில் இந்திய அணி கோப்பையை வென்றுத் திரும்பியது. அதிகாரப்பூர்வமற்ற ஐசிஎல், அச்செடுத்தாலும் அசலை விட நன்றாக எடுத்த ஐபிஎல் என இருபதுக்கு இருபது போட்டிகள் மற்றும் ஒரு மறுமலர்ச்சியை ஏற்படுத்தின. கங்குலி, கும்ப்ளே ஓய்வு பெற , அவர்களின் வெற்றிடம் இன்னும் நிரப்பப் படாமலே இருக்கின்றது. டெண்டுல்கர் , திராவிட் , லக்ஷ்மன் இன்னும் சில வருடங்களில் ஓய்வுப் பெறக்கூடிய சூழலில் அவர்களின் இடத்தை நிரப்ப யாரேனும் தயாராக இருக்கின்றார்களா என்றால் இல்லை என்பதுதான் பதில். நல்லதொரு டெஸ்ட் ஆட்டக்காரராக வந்திருக்க கூடிய முகமத் கயிப் தேர்வாளர்களின் தொலை நோக்குப் பார்வை இன்மையினால் தொலைந்துப் போனார். யுவராஜ் சிங் இந்திய அணியின் இளவரசராக வந்திருக்க கூடியவர் கடைசியில் தண்ணீர் தூக்கும் பனிரண்டாவது ஆட்டக்காரர் ஆனார்.

பந்து வீச்சைப் பொருத்தமட்டில் ஜாகிர் , ஸ்ரீசாந்த் , இஷாந்த் ஷர்மா , நெஹ்ரா , ஆர், பி, சிங் , முனாப் படேல் , இர்பான் பதான் என அடுத்த ஐந்து வருடங்களுக்காவது பிரச்சினை இல்லை. இந்திய ஆட்டக்காரர்கள் முகத்துக்கு நேர் வரும் பந்தை குனிந்து அரள்வதைப் பார்த்தே பழக்கப் பட்ட இந்திய ரசிகர்களுக்கு கீழ்காணும் படம் கண்டிப்பாக மகிழ்ச்சியைத் தரும்

இந்த பத்து வருடங்களில் இந்தியத் துணைக் கண்டத்தின் குணாதிசயங்களான வேகப்பந்து வீச்சைக் கண்டாலே உதறல் எடுத்தல் ,மந்தமான ஆட்ட வேகம் , டிரா செய்தால் போதும் என்ற மனப்பான்மை ஒழிந்து கடைசி நேரம் வரும் வெற்றியை வேட்டையாடும் எண்ண விதைகள் விதைக்கப்பட்டதே மிகப்பெரிய முன்னேற்றம் ஆகும்.

இந்த பத்தாண்டுகளில் இந்தியாவின் சிறந்த டெஸ்ட் வெற்றிகள்

1. கொல்கத்தா - எதிரணி - ஆஸ்திரேலியா

2. பெர்த் - எதிரணி - ஆஸ்திரேலியா

3. டர்பன் - எதிரணி - தென்னாப்பரிக்கா

சிறந்த ஒரு நாள் போட்டி ஆட்டங்கள்

டெண்டுல்கரின் இரட்டை சதம் நிறைவேறிய தென்னாப்பிரிக்கவிற்கு எதிரான ஒரு நாள் ஆட்டம்

லார்ட்ஸ் மைதானத்தில் இந்தியா இலங்கை இங்கிலாந்து முத்தரப்பு இறுதிப்போட்டி , 325 ஓட்டங்கள் என்ற கடும் இலக்கை எட்டி அடைந்து பிளின்டாப் செய்ததை கங்குலி செய்து காட்டிய ஆட்டம்

மறக்க முடியாத இருபதுக்கு இருபது ஆட்டம்

2007 இருபதுக்கு இருபது உலகக் கோப்பை இறுதி ஆட்டம்

எரிச்சல் ஊட்டிய விஷயம்

நிறவெறி தென்னாப்பிரிக்காவை ஒதுக்கி வைத்திருந்ததைப்போல செய்யாமல் அரசியலைப்போல விளையாட்டிலும் முதுகு சொறிந்து பழைய கோபாலன் டிராபி புகழ் இன வெறி இலங்கையுடன் உடன் கசக்க கசக்க கிரிக்கெட் ஆடியது.

கிரிக்கெட் எத்தனை வண்ண மயம் ஆனாலும் வெள்ளை உடைகளில் வாழ்க்கைப்போல ஆடப்படும் டெஸ்ட் ஆட்டங்களில் இந்திய சாதித்ததே கடந்த பத்து வருடங்களில் மிகப்பெரும் சாதனையாகும் அடுத்து வரும் வருடங்களில் சிறிய மீன் (இருபதுக்கு இருபது ) பெரிய மீனை(டெஸ்ட் போட்டிகள்) விழுங்கா விடாமல் இருந்தாலே இந்திய கிரிக்கெட்டும் அதன் வழியாக சர்வ தேச கிரிக்கெட்டும் காப்பாற்றப்படும்

------

தமிழோவியம் இணைய இதழுக்காக எழுதியது

கிரிக்கெட் வினாடி - வினா - ஆறுக்கு ஆறு

1. ஹான்ஸி குரோனியே, உஜேஷ் ராஞ்சோட், ருவான் கல்பகே, மார்க் எல்ஹாம், நீல் ஜான்ஸன், ஜேக்கப் ஓரம், மோண்டி பனேசர், கேமரூன் வைட், பீட்டர் சிடில், பீட்டர் ஜார்ஜ் சமீபத்தில் ஆண்டி மெக்கே இவர்கள் அனைவரும் டெஸ்ட் ஆட்டங்களில் ஆடி பந்து வீசவும் செய்தவர்கள். இவர்கள் அனைவரும் இந்தியாவுக்கு எதிராக குறைந்த பட்சம் ஒரு விக்கெட்டாவது எடுத்தவர்கள். இவற்றைத் தவிர இவர்களுக்குள்ளாக வேறொரு ஒற்றுமை உள்ளது , அது என்ன?

2.1998 ஆம் ஆண்டு ஷார்ஜா போட்டிகளில் ஒன்றில், வெற்றி இலக்கு 50 ஓவர்களில் 285, ஆனால் இறுதிப்போட்டிக்குத் தகுதிப் பெற 46 ஓவர்களில் 237, மணற்புயலுக்கு நடுவே சுழன்று சுழன்று சச்சின் டெண்டுல்கர் காஸ்ப்ரோவிக்ஸையும் ஷான் வார்னேயையும் அடித்து நொறுக்கியதை யாரும் மறந்திருக்க முடியாது. இந்திய அணி இறுதிப்போட்டிக்குத் தகுதி பெறுவதற்கான இலக்கை அடைந்த பின்னர், வெற்றியை நோக்கி நகரும் முயற்சியில் சச்சின் டெண்டுல்கர் ஆட்டமிழந்தார். கேள்வி டெண்டுல்கரைப் பற்றியது அல்ல, இந்த ஆட்டத்தில் டெண்டுல்கருக்கு உறுதுணையாக இணையாட்டமாக நூறு ஓட்டங்களுக்கு மேல் எடுக்க துணையாக ஆடியவர் யார்?

3. வி.வி.எஸ் லக்‌ஷ்மணன் ஒரு நாள் ஆட்டங்களில் ஆறு சதங்கள் அடித்துள்ளார். அவற்றில் நான்கு ஆஸ்திரேலியாவுக்கு எதிரானவை. டெண்டுல்கருக்கு அடுத்தபடியாக ஒரு நாள் போட்டிகளில் ஆஸ்திரேலியாவுக்கு எதிராக அதிக சதங்கள் அடித்தவரும் இவர் தான். இதுவரை ஆஸ்திரேலியாவுக்கு எதிராக இந்தியாவின் சார்பில் 25 சதங்கள் 12 பேரின் சார்பில் அடிக்கப்பட்டுள்ளன. இந்த 12 நபர்களில் ஒருவர் இன்று உயிருடன் இல்லை. இந்த நபர் யார்?


4. முன்னாள் இந்திய அதிரடி ஆட்டக்காரர் ராமன் லம்பா, 86 ஆம் ஆண்டு ஆஸ்திரேலியா அணிக்கு எதிரான ஒரு நாள் போட்டித்தொடரில் அறிமுக வீரராக களமிறங்கினார். இரண்டு அரை சதங்கள் மற்றும் ஒரு சதம் ஆகியவற்றுடன் இந்தியா தொடரை வெல்ல காரணமாக இருந்ததுடன் , ஆட்டத்தொடர் நாயகன் விருதையும் பெற்றார். இவரும் ஸ்ரீகாந்தும் இணையாட்டமாக ஆடிய ஆட்டங்கள் இன்றைய சேவக் - டெண்டுல்கர் இணைக்கு முன்னோடியாக அமைந்தவை. இன்றைய தோனி அடிக்கும் அடியைப்போல அன்றே ஆடிய ராமன் லம்பா அதன் பின் வந்த தொடர்களில் சோபிக்காததால் கழட்டிவிடப்பட்டார். ராமன் லம்பாவைப்போல, 99 ஆம் ஆண்டு கென்யாவில் நடைபெற்ற பன்னாட்டுத் தொடர் ஒன்றில் ஆட்டத்தொடர் நாயகன் விருதைப்பெற்றவர் பின்னாளில் காணாமல் போன கீழ்கண்ட புகைப்படத்தில் இருக்கு ஆட்டக்காரர் யார்?





5. பாகிஸ்தான் அணிக்கு எப்படி புற்றீசல் போல வேகப்பந்துவீச்சாளார்கள் வருகின்றனரோ அதுபோல இந்திய அணியைப்பொருத்தவரை, சுழற்பந்துவீச்சாளர்கள், மழைக்காளான்கள் போல அடிக்கடி மின்னி மறைவார்கள். 90 களின் இறுதியில் ஏனோதானோவென ஆடிக்கொண்டிருந்த இந்திய அணி அவ்வப்பொழுது வியத்தகு வெற்றிகளை ஈட்டும். (பின்னோக்கிப் பார்க்கும்பொழுது அவற்றின் நம்பகத்தன்மை கேள்விக்குறியாக்கப்பட்டாலும்) டெண்டுல்கர், அசாரூதின் இல்லாத சமயங்களில் சுறுசுறுப்பாக வழி நடத்திய அஜய் ஜடேஜாவின் தலைமையில் ”சுள்ளான்” இந்திய அணி, பலமான தென்னாப்பிரிக்கா அணியை 117 ஓட்டங்களுக்கு, கென்யா தலைநகர் நைரோபியின் ஜிம்கானா மைதானத்தில் சுருட்டியது. அறிமுகவீரர் விஜய் பரத்வாஜ் 10 ஓவர்கள் வீசி 16 ரன்கள் கொடுத்து தென்னாப்பிரிக்க அணியில் அதிக ஓட்டங்களை எடுத்த காலிஸை வீழ்த்தினார். இன்னொரு சுழற்பந்துவீச்சாளார் நிகில் சோப்ரா 3 விக்கெட்டுகளை வீழ்த்தினார். அணியின் அனுபவமின்மையைக் கருத்தில் கொண்டால் இதுவே பெரிய விசயமாக இருக்கும்பொழுது, மற்றொரு இடதுகை சுழற்பந்துவீச்சாளர் 10 ஓவர்கள் வீசி 6 மெயிடன்களுடன் வெறும் ஆறு ரன்களுக்கு 5 விக்கெட்டுகளை வீழ்த்தினார். அவர் யார்?

6. இடதுகை சுழற்பந்து வீச்சாளர்களை தான் ஆடும் ஆட்டங்களில் எல்லாம் சுளுக்கு எடுப்பதால், இந்திய அணியில் பல சமயங்களில் இடதுகை சுழற்பந்துவீச்சாளர்கள் இடம்பெறுவதை சவுரவ் கங்குலி விரும்பியதில்லை. கங்குலி இந்திய அணித்தலைவராக இருந்தபொழுது , ஓரங்கட்டப்பட்டவர்களில் குறிப்பிடத்தக்கவர்கள் முரளி கார்த்திக் மற்றும் சுனில் ஜோஷி. இருவருமே ஓரளவிற்கு நல்ல மட்டையாளர்களும் கூட. முரண் நகை என்னவெனில் அணித்தலைவராக கங்குலி தான் முதன்முதலில் களமிறங்கிய டெஸ்ட் ஆட்டத்தை ஆல்ரவுண்ட் ஆட்டத்தின் மூலம் தோல்வியில் இருந்து காப்பாற்றியவர் சுனில் ஜோஷி. நைட் வாட்ச்மேனாக களமிறங்கி முரளி கார்த்திக்கும் தன் பங்கிற்கு 43 ரன்கள் எடுத்தார். ராமன் லம்பா, விவிஎஸ் லக்‌ஷ்மண் போல ஆஸ்திரேலியா அணிக்கெதிராக என்றால் முரளி கார்த்திக்கும் சிறப்பாக விளையாடுவார். ஆஸ்திரேலியா அணிக்கெதிராக ஆட்டத்திறனில் கலக்கி, மும்பை வான்கடே மைதானத்தில் தலா ஒரு டெஸ்ட் , ஒரு, ஒருநாள் ஆட்டம் ஆகியனவற்றை வெல்ல உதவிய முரளி கார்த்திக்கிற்கு வேறொரு சிறப்பம்சம் இருக்கின்றது.(விடைக்கான உதவி : தனது ஒரே ஒரு டி20 பன்னாட்டுப்போட்டியை மும்பை வான்கடேயில் ஆடினார்)

விடைகள்

1. அனைவருக்கும் சச்சின் டெண்டுல்கர்தான், தங்களின் முதல் டெஸ்ட் விக்கெட்.

2.வி.வி.எஸ் லக்‌ஷ்மண் , ஒரு பக்கம் டெண்டுல்கர் அடித்தாடிக்கொண்டிருந்தாலும், தனக்கு வாய்ப்பு கிடைக்கும்பொழுதெல்லாம் ஒரு ஓட்டம் எடுத்து மறுமுனைக்கு வந்து , டெண்டுல்கருக்கு தொடர்ந்து வாய்ப்புக் கொடுத்துக்கொண்டே வந்தார். அந்த ஆட்டம் அவருக்கும் வெறும் மூன்றாவது ஒரு நாள் ஆட்டம்.

3. ராமன் லம்பா. பங்களாதேஷில் உள்ளூர் அணிக்காக ஆடிக்கொண்டிருந்தபொழுது , கிரிக்கெட் பந்து தலையில் பட்டு , அதன் தொடர்ச்சியாக மரணம் அடைந்தார்.

4. விஜய் பரத்வாஜ்.

5. சுனில் ஜோஷி

6. ஐபில் , ஸ்டான்ஃபோர்ட் டி20 இரண்டிலும் முதல் போட்டித்தொடரிலேயே பங்கேற்ற ஒரே வீரர் உலகளாவிய பெருமை முரளி கார்த்திக்கிற்கு உண்டு.


முதல் ஐந்து கேள்விகளின் விடைகள் அதற்கடுத்த கேள்விகளில் வரும்படியான Pattern இல் கேள்விகள் அமையப்பெற்று இருக்கின்றது.

கிரிக்கெட் நிகழ்வுகளின் நிகழ்கால ஊழல் - ஸ்பாட் பிக்ஸிங்

பாகிஸ்தானைப் பொருத்தமட்டில் மீண்டும் அதே பல்லவி, வெறும் குற்றச்சாட்டுகள், நிருபிக்கப்படவில்லை, நிருபிக்க போதுமான ஆதாரங்கள் இல்லை. கிரிக்கெட் குற்றச்சாட்டுகளை விசாரித்த நீதிபதி கய்யாம் பின்னொரு நாளில் குற்றஞ்சாட்டப்பட்டவர்களில் பலரைத் தனக்குப் பிடிக்கும் என்பதால் கடினமான தண்டனைகளைத் தர மனம் ஓப்பவில்லை என்றதில் இருந்து பாகிஸ்தானின் விசாரணை எந்த லட்சணத்தில் நடந்தது எனத் தெரியும்

தொடர்ந்து தமிழோவியத்தில் வெளிவந்துள்ள கட்டுரையைப்படிக்க இங்கே சொடுக்கவும்

கிரிக்கெட் - வினாடி வினா

வினாடி வினா வகையில் ஒரு பதிவைப்போடுவது எப்போதும் அலாதியானது. நீண்ட நாட்களாக பதிவுலகில் இவ்வகையிலான பதிவுகள் ஏதும் தென்படாததால் ஒரு “ஓவர்” கிரிக்கெட் க்விஸ் இங்கே !

1. இந்திய கிரிக்கெட் அணி முதன் முதலாக டெஸ்ட் ஆடியபொழுது இந்திய அணியின் தலைவர் சி.கே.நாயுடு. இந்திய அணி முதன்முதலாக ஒருநாள் போட்டியில் ஆடியபொழுது இந்திய அணியின் தலைவர் அஜீத் வடேகர். இப்பொழுது கேள்வி என்னவெனில் இந்தியா முதன் முதலாக டி20 பன்னாட்டுப்போட்டியில் ஆடியபொழுது இந்திய அணியின் தலைவர் யார்?

2. கிரிக்கெட்டில் நோ-பால் வீசப்படும்பொழுது ரன் - அவுட் வகையில் ஆட்டமிழந்தால் ஏற்றுக்கொள்ளப்படும். இது எல்லோருக்கும் தெரிந்ததே !! ஆனால்நோ - பால் வீசப்பட்டாலும் மேலும் மூன்று வகைகளில் ஒரு மட்டையாளரை ஆட்டமிழக்க விதிகளில் இடம் உண்டு. அவை யாவை?

3. முத்தையா முரளிதரன் பன்னாட்டு டெஸ்ட் போட்டிகளில் மொத்தம் 800 விக்கெட்டுகளை எடுத்துள்ளார். எதிர்காலத்தில் ”இன ஒழிப்பு , இனவெறி மற்றும் போர்” குற்றங்களுக்காக இலங்கை (முன்பு தென்னாப்பிரிக்காவை போல) சர்வதேச ஆட்டங்களில் பங்கு பெறுவதில் இருந்து ஒதுக்கப்பட்டு, ஏற்கனவே பங்குபெற்ற டெஸ்ட் ஆட்டங்களின் அங்கீகாரமும் நீக்கப்பட்டால் முத்தையா முரளிதரன் மொத்தம் பன்னாட்டு டெஸ்ட் போட்டிகளில் எத்தனை விக்கெட்டுகள் எடுத்திருப்பார்?

4. தற்பொழுது டெஸ்ட் ஆட்டங்கள் 5 நாட்கள் ஆடப்படுகின்றன. இங்கிலாந்து அணி ”முடிவிலா - நாட்கட்டுப்பாடு இல்லாத” டெஸ்ட் ஆட்டங்களை ஆடிக்கொண்டிருக்கையில், இந்தியாவின் முதல் டெஸ்ட் போட்டி 3 நாள் ஆட்டமாக இங்கிலாந்துடன் ஆடியது. பின் இங்கிலாந்து அணி இந்தியா சுற்றுப்பயணம் வந்த பொழுது இந்தியா 4 நாட்கள் கொண்ட டெஸ்ட் ஆட்டங்களாக ஆடியது. மீண்டும் இந்தியா இங்கிலாந்து சென்ற பொழுது மூன்று நாள் ஆட்டங்கள் கொண்ட டெஸ்ட் தொடர். 1947-48 ஆம் ஆண்டு ஆஸ்திரேலியா சுற்றுப்பயணம் மேற்கொண்ட இந்திய அணி 6 நாட்கள் கொண்ட டெஸ்ட் தொடரை ஆடியது. இந்த முன்னுரையுடன் கேள்வி என்னவெனில் இந்தியா யாருடன் தனது முதலாவது 5 நாட்கள் கொண்ட டெஸ்ட் போட்டியை ஆடியது? (ஓய்வு நாளைக் கணக்கில் எடுக்கவில்லை)

5. சின்ன நடக்க சாத்தியம் உள்ள ஒரு சுவாரசியமான கற்பனை, 5 நாட்கள் கொண்ட டெஸ்ட் ஆட்டம் , முதல் நாள் மழையின் காரணமாக ஆட்டம் கைவிடப்படுகிறது. இரண்டாவது நாளில் இருந்து ஆட்டம் துவங்குகிறது, முதலில் மட்டையடித்த ”ஈ”அணி 369 ஓட்டங்கள் எடுத்து ஆட்டமிழக்கிறது. எதிரணி "த" ஆட்டக்காரர்கள் 210 ஓட்டங்கள் எடுத்து ஆட்டமிழக்கின்றனர். ”ஈ” அணியின் தலைவர் “த” அணியைத் தொடர்ந்து(பாலோ ஆன்) ஆடச்சொல்லுகிறார். ”த” அணியின் தலைவர் 159 ஓட்டங்கள் தானே வித்தியாசம், தொடர்ந்து ஆட மாட்டோம் என மறுக்கிறார். யார் சொல்லுவது சரி? ஏன்?

6. தீபக் சோதான் (ஆர்.எஸ்.சோதான்), ஹனுமந்த் சிங், ஏ.ஜி.கிருபால் சிங், சுரீந்தர் அமர்நாத், முகமது அசாருதீன், பிரவீன் ஆம்ரே, சௌரப் கங்குலி , வீரேந்திர சேவக் இவர்களுக்கு இடையிலான ஒரு ஒற்றுமையான விசயம் என்ன? லாலா அமர்நாத், அப்பாஸ் அலி பெய்க், குண்டப்பா விஸ்வநாத் இந்த மூவர் செய்த சாதனைக்கும் மேற்சொன்னவர்கள் செய்த ஒரேமாதிரியான சாதனைக்கும் என்ன வித்தியாசம்?

விடைகளை அறிய இங்கே சொடுக்கவும்

சச்சின் டெண்டுல்கர் - சிகரங்களின் சிகரம்

மோகன்தாஸ் கரம்சந்த் காந்திக்குப்பிறகு இந்திய உப கண்டத்தில் மதம், மொழி,இனம், சாதி , தேசம் என அனைத்தையும் கடந்து மக்களால் நேசிக்கப்படுபவர் சச்சின் ரமேஷ் டெண்டுல்கர். மகாத்மா காந்திக்கு எத்தனை மரியாதை மேற்குலத்திற்கு இருந்தது அதே மரியாதை மதிப்பு, குறைந்த பட்சம் விளையாட்டில் இருக்கும் சமகால இந்தியர் டெண்டுல்கர். சச்சின் டெண்டுல்கரின் சாதனைகளை ஒரு கட்டுரையில் பட்டியலிட்டு விட முடியாது. சகாபதங்களுக்கு பல தொகுதிகளில் எழுதினாலும் தொடர்ந்து கொண்டுதான் இருக்கும்.



1999 ஆம் ஆண்டு உலகக்கோப்பைப் போட்டிகளின் போது பெப்சி குளிர்பான விளம்பரம் வரும், எல்லோரும் வருங்காலங்களில் ஓய்வுபெற்றுவிட அசாரூதின் மட்டும் அணியின் தலைவராக இருந்து ஆடிக்கொண்டிருப்பதாக, நிஜத்தில் அந்த விளம்பரத்திற்கு ஏகப்பொருத்தமானவர் சச்சின் ஒருவர் மட்டுமே!! இவருடன் பள்ளியிலும் அப்போதைய பாம்பே அணியிலும் பின்னர் இந்திய அணியிலும் ஆடிய வினோத் காம்ப்ளி இன்று இரண்டாம் தர தொலைக்காட்சி நிகழ்ச்சிகளில் பங்கு பெற்று வருகிறார். திறமை இருந்தாலும் தனிப்பட்ட ஒழுக்கம் ஒரு மனிதனை உயரத்திற்கு கொண்டு செல்ல முடியும் என்பதற்கு காம்ப்ளியும் டெண்டுல்கரும் எதிர் துருவ உதாரணங்கள். டெண்டுல்கரை விட நுட்பமான ஆட்டக்காரர் எதிர்கால அணித்தலைவர் எனவெல்லாம் அறியப்பட்ட சஞ்சய் மஞ்ச்ரேகர் இன்று தொலைக்காட்சிகளிலும் பத்திரிகைகளும் டெண்டுல்கர் புகழ்பாடி வருகிறார்.திறமையுடன் தன்னடக்கமும் இருந்தால்தான் சிகரத்தை அடையமுடியும் என்பதற்கு மஞ்ச்ரேகரும் டெண்டுல்கரும் மற்றும் ஒரு நேர் எதிரான உதாரணங்கள். தான் கிரிக்கெட் வானில் நட்சத்திரமாக நிலைத்தபின்னர், வந்த கிட்டத்தட்ட தனக்கு சமமாக ஒளிவீசி ஓய்வுபெற்ற கங்குலியின் நட்சத்திர வாழ்வு கடந்த பின்னரும் சுரேஷ் ரைனாக்களுக்கும் ரோஹித் சர்மாக்களுக்கும் சவால் விடும் வகையில் ஆடிவரும் சூரியனாக டெண்டுல்கர் இருக்கிறார் என்றால் நிச்சயமாக மிகைப்படுத்தல் இல்லை.

முதலில் தனக்காக ஆடிக்கொள்கிறார், பரிசுக்காக ஆடுகிறார் , புகழுக்காக ஆடுகிறார், அணிக்காக ஆடுவது என்பது டெண்டுல்கரின் கடைசித் தேர்வு என டெண்டுல்கரின் மேல் வைக்கப்படும் விமர்சனங்கள் அனைத்துமே மேலோட்டமாக வைக்கப்படுவதே !! டெண்டுல்கரின் புகழ் பாடுவதற்கு முன்னர் அவரின் ஆட்ட புள்ளிவிபர சாதனைகளைப் பார்த்தாலே அவரின் மேல் வைக்கப்படும் விமர்சனங்கள் புஸ்ஸாகிவிடும்.

உலகிலேயே அதிக டெஸ்ட் ஆட்டங்கள் ஆடியவர் என்றப் பெருமைய அடைய இன்னும் இரண்டு டெஸ்ட் கள் மட்டுமே பாக்கியுள்ள நிலையில் மொத்தம் 47 சதங்கள் அடித்துள்ளார். இதில் நான்கு இரட்டைச் சதங்களுடன் மொத்தம் 13,447 ஓட்டங்கள் எடுத்து இருக்கின்றார்.
சச்சின் ஆடியுள்ள 166 ஆட்டங்களில் 56 டெஸ்ட் போட்டிகளில் இந்திய அணி வெற்றி பெற்றுள்ளது. இந்த வெற்றி பெற்ற ஆட்டங்களில் 19 சதங்களுடன் 4895 ஓட்டங்கள் எடுத்து இருக்கின்றார். வெற்றி தோல்வி இல்லா டிரா ஆட்டங்களில் இவரின் பங்களிப்பு 18 சதங்களுடன் 5360 ஓட்டங்கள். இதில் பல ஆட்டங்களில் நிச்சயமான தோல்வியில் இருந்து கௌரவ டிராவிற்கு கொண்டு வந்ததில் சச்சின் டெண்டுல்கருக்கு மிகப்பெரும் பங்கு உண்டு. நன்றாக ஆடினாலும் வெற்றி உறுதிச் செய்யப்படும் வரை ஆடுவதில்லை என்றக் குற்றச்சாட்டு டெண்டுல்கரின் மேல் வைக்கப்படுவதற்கு காரணம் சில சதங்கள் மறக்க முடியாத தோல்வி ஆட்டங்களில் வந்ததுதான். ஆனால் அந்த ஆட்டங்களில் தோல்வி அடையாமல் இருந்திருந்தால் அந்த சதங்கள் இந்த அளவிற்கு நினைவு கூறப்பட்டிருக்குமா !!

கிரிக்கெட் இருக்கும் காலம் வரை சென்னை சேப்பாக்கம் மைதானத்தில் பாகிஸ்தானுக்கு எதிரான தோல்வி சதத்தை மறக்க முடியுமா !! முதுகுபிடிப்பு இருந்த போதும் 82 க்கு ஐந்து விக்கெட்டுகள் என்ற நிலையில் இருந்து 17 ஓட்டங்கள் எடுத்தால் என்ற நிலை வரை எடுத்துச் சென்ற சச்சின் ஆட்டமிழந்த பின்னர், பின் வந்த வால் ஆட்டக்காரர்களால் மீதம் இருக்கின்ற சொற்ப ஓட்டங்களை எடுக்க இயலாமல் போனதற்கு டெண்டுல்கரை குற்றம் சாட்டுவது நியாயம் ஆகாதே!!




1996 ஆம் ஆண்டு கேப்டவுனில் நடந்த டெஸ்ட் போட்டியில் மிரட்டும் டொனால்ட், மெக்மில்லன் , போலாக்கை சமாளித்து கழுத்து சுளுக்கு பவுல் ஆடம்ஸை கதற வைத்து அசாருதீனுடன் இணைந்து ஆடிய அதிரடி ஆட்டம் தோல்வியில் முடிவடைந்தாலும் கிரிக்கெட் ரசிகர்களால் இன்றும் மீள் நினைவுச் செய்யப்படும். ஆடம் பாக்கர் மட்டும் எல்லைக் கோட்டில் அந்த அற்புதமான கேட்சைப் பிடிக்காவிடில் அன்று டெண்டுல்கர் இருந்த மனநிலைக்கு முன்னூறு ஓட்டங்களே அடித்திருப்பார்.



ஐந்து வருடங்களுக்குப்பிறகு பிளொம்ஃபைண்டன் மைதானத்தில் அன்றைய அறிமுக ஆட்டக்காரர் வீரேந்திர சேவக்குடன் பின்னி எடுத்தது என்ன!! தோனிக்கள் யுவராஜுக்களின் காலமாக இன்று மாறிப்போனாலும் டெண்டுல்கர் ஆடினால் அவர் முடித்துக் கொடுத்து விட்டுத்தான் சென்றிருக்க வேண்டும் எனச் சொல்லப்படுவதற்கு சமீபத்திய உதாரணம் கடந்த வருடம் ஆஸ்திரேலியாவிற்கு எதிரான ஒரு நாள் போட்டி. இமாலய 350 ஓட்டங்களை துரத்தி, மூன்று விக்கெட்டுகள் இருக்கும் நிலையில் 17 பந்துகளில் 19 ரன்கள் எடுக்க வேண்டும் எனும்பொழுது, 175 ஓட்டங்கள் எடுத்து ஆட்டமிழந்த டெண்டுல்கருக்குப்பின்னர் தேவையான ஓட்டங்கள் எடுக்க முடியாமல் 3 ரன்கள் வித்தியாசத்தில் இந்திய அணி தோல்வியைத் தழுவியது.

ஏற்கனவே கேட்ட மெட்டை சிறிது மாற்றி திரும்பக்கொடுத்தாலோ , எடுத்தக் காட்சியமைப்பை திரும்பத் திரைப்படங்களில் காட்டினாலோ சலிப்படையும் ரசிகனை, ஆயிரம் முறை அடித்தாலும் அந்த கவர் டிரைவை வைத்த கண் வாங்காமல் பார்க்க வைக்க டெண்டுல்கரால் மட்டுமே முடியும். அதே போல் படித்த டெண்டுல்கரின் சாதனைகளை மீண்டும் மீண்டும் படித்தாலும் சுவாரசியம் குறைவதே இல்லை.

இன்று (ஏப்ரல் 24, 2010) அன்று தனது 37 வயதை நிறைவுச் செய்யும் சச்சின் ரமேஷைப் பற்றி வெளியுலகம் அறிந்து கொண்டது, டெண்டுல்கர் தனது பள்ளித் தோழன் வினோத் காம்ப்ளி யுடன் இணைந்து இணையாட்டமாக எடுத்த 664 ஓட்டங்கள் எடுத்த பொழுதுதான்.

தனது 15 வது வயதில் குஜராத் அணிக்கெதிராக தனது முதலாவது ரஞ்சிப் போட்டியிலேயே சதம் அடித்து தனது வரவைப் பதிவு செய்தார்.



தனது முதலாவது டெஸ்ட் தொடரில் பாகிஸ்தானுக்கெதிராக , அசூர வேகத்தில் பந்து வீசும் வாக்கர் யூனிஸ் பந்தில் முகத்தில் காயமடைகிறார். ரத்தம் சொட்ட சொட்ட துடைத்துக் கொண்டு ஆடி 57 ரன்கள் அடிக்கிறார். அந்த வாக்கர் யூனுஸை பின் வந்த 2003 உலகக்கோப்பையில் புரட்டி எடுத்து அவரின் கிரிக்கெட் வாழ்வை அஸ்தமிக்க வைத்ததில் டெண்டுல்கருக்குப் பெரும்பங்கு உண்டு.

ஒரு நாள் போட்டிகளைப் பொருத்தவரை ஆரம்ப 90களில் கடை ஏழாவது வள்ளலாக களமிறக்கப்பட்டதால் அவ்வளவாக சோபிக்க்காத டெண்டுல்கர், 1994 ஆம் ஆண்டு நியுசிலாந்துக்கு எதிராக துவக்க ஆட்டக்காரராக களம் இறக்கப்பட்டார். ஓவருக்கு நான்கரை அடித்தால் போதும் என்ற காலக் கட்டங்களில் அதிரடியாக ஆடி 49 பந்துகளில் 82 ரன்கள் அடித்தது சகாப்த புத்தகத்தில் மற்றொரு அத்தியாயத்தைத் துவக்கினார். மழைக் காளான்கள் போல சட சட வென துவக்க ஆட்டக்காரராக சதங்களை குவிக்க ஆரம்பித்தார். 96 ஆம் ஆண்டு உலகக்கோப்பைப் போட்டிகளில் அதிக ஓட்டங்கள் எடுத்தது,பின் ஷார்ஜாவில் தொடர்ச்சியான இரண்டு சதங்கள், 1999 உலகக்கோப்பையில் தந்தையின் இறுதிச் சடங்கிற்குப்பின்னர் ஆடுகளத்திற்கு திரும்பி வந்து சதமடித்து இந்திய அணிக்கு உற்சாகத்தை அளித்தது, 2003 ஆண்டு உலகக்கோப்பை ஆட்டங்களில் இறுதி வரைக் கொண்டு வந்து சேர்த்தது என இந்திய கிரிக்கெட் அணி என்றாலே டெண்டுல்கர் என ஆனது நிதர்சனம்.

கங்குலியும் திராவிடும் லக்‌ஷ்மனும் அவரின் சுமையைப் பகிர்ந்து கொண்டாலும் டெண்டுல்கர் எப்பொழுதும் மூலவராகவே இருந்தார். அரசியல், சூழ்ச்சிகள் நிறைந்த இந்திய கிரிக்கெட் சூழலில் சர்ச்சைகளுக்கு அப்பாற்பட்டவராக டெண்டுல்கர் இருந்தாலும் , சச்சின் சிக்கிய சர்ச்சைகளில் முக்கியமானது 98 ஆம் ஆண்டு காமன்வெல்த் போட்டிகளுக்கு போக விருப்பம் காட்டாமல் இருந்ததும் அன்றைய விளையாட்டுத்துறை அமைச்சர் உமாபாரதியின் நெருக்குதலில் சென்றமையுதாம். இந்தியக் கிரிக்கெட் கட்டுப்பாட்டு வாரியத்தின் அணியாக மட்டுமே பன்னாட்டுப் போட்டிகளில் பங்கேற்கும் இந்திய அணி, இந்திய தேசிய அணியாக பங்கேற்றதும் இந்தப் போட்டிகளில் மட்டுமே.

பந்தைச் சேதப்படுத்தினார் என நடுவர் மைக் டென்னஸினால் குற்றஞ்சாட்டப்பட, ராமனுக்கு களங்கமா என கிரிக்கெட் கட்டுப்பாட்டு வாரியம் வரிந்து கொண்டு களமிறங்க தென்னாப்பிரிக்கவுடன் ஆன மூன்றாவது டெஸ்ட் போட்டி அங்கீகாரம் இல்லாமலே அரங்கேறியது. பெர்ராரி காருக்கான சுங்கவரி விலக்குப் பெற்றதும், பிரச்சினை வந்தவுடன் பின்னர் அதற்கான வரியை பியட் நிறுவனமே ஏற்றுக்கொண்டு, பிராட்மேனின் சதங்களைக் கடந்தமைக்காக பரிசளித்தது பெருமை என்றாலும் டெண்டுல்கருக்கு சங்கடமான விசயம் ஆனது.

தனக்கு நெருக்கமான அபய் குருவில்லா, சமீர் திகே, ராபின்சிங் , கடைசி கால வினோத் காம்ப்ளி, சில காலம் அகர்கர் என சத்தமே இல்லாமல் அணிக்கு இவர் கொண்டு வந்த ஆட்களும் உண்டு. கிரிக்கெட் சூதாட்டங்களில் நேரிடையாக தொடர்பு இல்லை எனினும் நடந்த விசயங்கள் அரசல் புரசலாக தெரிந்ததை வெளியில் சொல்லவில்லை, ஒரு நாள் போட்டிகளில் துவக்க ஆட்டக்காரராக மட்டுமே ஆடுவேன் என 2003 உலகக் கோப்பைப் போட்டிகளில் கங்குலியிடம் விருப்பத்தை தெரிவித்தது, முல்தான் டெஸ்ட் போட்டியில் 194 ரன்கள் எடுத்திருந்த நிலையில் திராவிட் ஆட்டத்தை டிக்ளேர் செய்தபொழுது தனது வியப்பைக் காட்டியது, என ஆட்டத்திறன் இல்லாத காரணங்களுக்காச் செய்திகளில் வந்தாலும் இவை எல்லாம் பரந்து விரிந்த வெண்ணிற நிலப்பரப்பில் ஆங்காங்கே இருக்கும் சில நுண்ணிய கருப்புத் துகள்தாம்.

மட்டையாட்டத்தில் மட்டுமின்றி, ஆட்டக்களத் தடுப்பிலும் சுழற்பந்து வீச்சிலும் சற்றும் குறைந்தவர் இல்லை என அவ்வப்பொழுது நிறுபித்துக் கொண்டே இருப்பார் சச்சின். பெரும்பாலானோருக்கு ஹீரோ கோப்பையின் இறுதி ஓவரை கோலியாத்தைப்போல இருக்கும் மேக்மில்லனை ஒருமுனையில் நிறுத்தி ரன் எடுக்க விடாமல் தடுத்து வெற்றிக்கனியைப் பறித்துக் கொடுத்தது தான் நினைவில் இருக்கும். ஆனால் இந்த ஆட்டத்திற்கு முன்னோட்டமாக 1991 ஆம் ஆண்டு ‘டை' யில் முடிவடைந்த ஆட்டத்திற்கு காரணகர்த்தாவாக இருந்திருக்கின்றார்.

126 சொற்ப ரன்களுக்கு ஆட்டமிழந்த இந்திய அணி, எதிராடிய மேற்கிந்திய அணியை 76 ரன்களுக்கு 8 விக்கெட்டுகள் எடுத்து மட்டுப்படுத்தியது. ஆனால் அம்ப்ரோஸும் ஆண்டர்சன் கம்மின்ஸும் தட்டி தட்டி வெற்றி ஓட்டத்தை நோக்கி நெருங்க அம்ப்ரோஸ் ஆட்டமிழக்கிறார். கடைசி ஆட்டக்காரர் பாட்ரிக் பாட்டர்சனும் ஆட்டமிழக்கமால் இந்திய அணியினரை வெறுப்பேற்ற, முக்கிய பந்து வீச்சாளர்களின் 10 ஓவர் கோட்டா எல்லாம் முடிந்து 60 பந்துகளில் 6 ரன்கள் எடுக்க வேண்டிய சூழலில் டெண்டுல்கரை, அணித்தலைவர் அசாருதீன் பந்து வீச அழைக்கிறார். ஸ்கோர் சமமான நிலையில் கம்மின்ஸ் ஆட்டமிழக்க ஆட்டம் சமனில் முடிவடைகிறது.

பாலோ ஆன் வாங்கியும் வெற்றிப்பெற்ற லக்‌ஷ்மன் புகழ் கோல்கத்தா ஆட்டத்திலும் டெண்டுல்கரின் கைவண்ணம் உண்டு. இரண்டு இன்னிங்ஸ்களிலும் டென் - டென் என எடுத்தப்போதிலும் ஆஸ்திரேலியாவின் இரண்டாம் இன்னிங்க்ஸில் மூன்று விக்கெட்டுகளைக் கைப்பற்றி வரலாற்றின் வெற்றியில் தன் பங்கும் உண்டு எனக் காட்டிக்கொண்டார்.

அறிமுகம் ஆகி இதுவரை ஒரு போட்டித் தொடரில் கூட நீக்கப்படாத டெண்டுல்கர், 2007 பங்களாதேஷ் அணிக்கெதிரான ஒருநாள் போட்டித்தொடரில் அவரின் விருப்பம் இல்லாமாலேயே ஓய்வு அளிக்கப்பட்டார். வாய்ச்சொல்லில் தனது வீராப்பைக் காட்டாமல் அதன் பின் ஆடிய இரண்டு டெஸ்ட் ஆட்டங்களில் சதமடித்து மட்டையால் பதிலளித்தார்

தற்பொழுது ஐபிஎல் 2010 போட்டிகளில் அணித்தலைவராக கலக்கிக் கொண்டிருக்கும் டெண்டுல்கரின் இந்திய அணியின் தலைமைக் காலம் அவ்வளவு இனிப்பானதாக இல்லை. அணித்தலைவராக ஆடிய 25 டெஸ்டுகளில் நான்கில் வென்று 9ல் தோல்வியைத் தழுவினார். தனக்கு அளிக்கப்பட்ட அணியில் எத்தனை முறைதான் 11 பேருக்காகவும் ஒருவராகவே ஆடுவது, ஒரு நாள் போட்டிகளிலும் டைட்டன் கோப்பை, டோரண்டோ போட்டிகளைத் தவிர வேறு எவற்றிலும் பெரும் வெற்றியைக் காணவில்லை.

எத்தனை ஆட்டங்கள், எத்தனை ஓட்டங்கள். சச்சின் டெண்டுல்கரின் கிரிக்கெட் புள்ளிவிபரக் கணக்கை தோண்ட ஆரம்பித்தால் கணிதத்தின் அத்தனைச் சூத்திரங்களையும் பயன் படுத்தும் அளவுக்கு தேவையான விபரங்கள்.

சந்தன மரம் நாள் பட நாள் படத்தான் அதன் தனித்தன்மையை வெளியேக் கொண்டுவரும்.டெண்டுல்கரும் வயது வயது ஏற ஏற ஆட்டத்திறனும் பலவேறு பரிமாணங்களில் வெளிப்பட்டு வருகின்றது. 20 வருட கிரிக்கெட் உலகில் முடிசூடா மன்னனாகத் திகழும் டெண்டுல்கரின் மணி மகுடத்தில் ஒரு நாள் இரட்டைச் சதம் மற்றும் ஒரு வைரமகா ஜொலிக்கிறது. டைம் நாளிதழ் இவ்வாறாக சொல்லி இருந்தது ”ஒரு மைல் தூரத்தை நான்கு நிமிடங்களுக்கு குறைவாக கடக்கும் சாதனையைப்போல சச்சின் டெண்டுல்கர் ஒரு நாள் போட்டிகளில் இரட்டைச்சதம் அடித்தார்”. சச்சின் டெண்டுல்கரின் இரட்டைச் சதத்தைப் பார்க்க இங்கே சொடுக்கவும்

நிகழ்த்த முடியாது என நினைக்கப்படும் சாதனைகள் நம் காலத்தில் நம் கண்முன்னமே நிகழ்த்தப்படும் பொழுது பெரும்பாலும் அதன் முழு வீரியம் உள்வாங்கிக் கொள்ளப்படுவதில்லை. இந்தச் சாதனைகள் எல்லாம் ஒரே ஏற்பட்டவை அல்ல. திறமை, தனி மனித ஒழுக்கம், தான் இருக்கும் துறையில் ஈடுபாடு, காலத்திற்கேற்ப தன்னைத் தயார்படுத்திக் கொள்ளல், தன்னடக்கம், பயிற்சி என அனைத்தும் ஒரு சேர அமைந்து அர்ப்பணிப்பு உணர்வுடன் ஆடும்பொழுது மட்டுமே சாத்தியம் ஆகிறது. தொடர்ந்து எழுதிக் கொண்டே போனால் டெண்டுல்கரின் சாதனைப் புள்ளிவிபரக் குறிப்பாகப் போய்விடக்கூடும். 1992,96,99,2003,2007 ஆகிய வருடங்களில் செய்ய தவறியதை 2011 உலகக் கோப்பையில் ல் செய்து கொடுத்துவிட்டு தன் ஆட்டத்தை டெஸ்ட் போட்டிகளில் தொடர்வார் என்ற நம்பிக்கையுடன் இன்று பிறந்த நாள் காணும் சச்சின் டெண்டுல்கரை வாழ்த்துவோம்.

கிரிக்கெட்டை மதமாக்கி டெண்டுல்கரை தலைமைக் கடவுளாக ஆக்கினால் நாத்திகர்களும் ஆத்திகத்தை ஏற்றுக்கொள்ள ஒரு சந்தர்ப்பம் அமையலாம். பாரதரத்னா போன்ற விருதுகளைக் கொடுத்து டெண்டுல்கரை மீண்டும் அரசியல் ஆக்காமல், அவருக்குப் பெருமைச் சேர்க்கும் விதமாக ஒன்று செய்யலாம், இந்தியக் கட்டுப்பாட்டில் இருக்கு இமாலயச் சிகரங்களுக்கு ஏதேனும் ஒன்றை அவரின்பெயரைச் சூட்டி சிகரத்திற்கு சிறப்பு அளிப்போம்.