நானும் கடவுள் - சிறுகதை

வேகமாக அலுவலகத்தை  நோக்கிப் போய்கொண்டிருக்கையில்,

"எதிர்கால உலகம் இப்பொழுது இருப்பதைப்போல இருக்குமா, இதைவிட நன்றாக இருக்குமா அல்லது மோசமாக இருக்குமா"  ஆங்கிலத்தில் கேட்டவரை பார்த்தேன்.

வசீகரமான குரல், நல்லத்தோற்றம் கையில் சில துண்டுப்பிரசுரங்கள், கேள்வியின் தன்மை, கிறிஸ்தவ மத, யெகோவாவின் சாட்சிகளில் ஒருவர் என்று புரிந்தது.  திரைகடல் ஓடியும் திரவியம் தேட நான் செல்லும் நாடுகளில் எல்லாம் குறைந்தது ஒரு யெகோவா சாட்சியையாவது சந்தித்துவிடுவேன். அது மதப்பரப்புரை  கேள்வி என்று தெரிந்தும் ,

"இப்பொழுது இருப்பதே தொடர்ந்தால் போதும், பாதகமும் வேண்டாம், சாதகமும் வேண்டாம்" தமிழில் யோசித்ததை இரண்டி வினாடிகள் செலவளித்து மொழிப்பெயர்த்து ஆங்கிலத்தில் பதில் சொன்னேன்.

"யெகோவாவின் மேல் நம்பிக்கைக்கொண்டால், இந்த உலகம் ரட்சிக்கப்பட்டு நாமெல்லாம் பாவங்களில் இருந்து மீட்கப்படுவோம்"

"மன்னிக்கவும் , எனக்கு இறை நம்பிக்கை கிடையாது" பொய்யான கடுமையை முகத்தில் வரவழைத்துக்கொண்டு அவ்விடத்தைவிட்டு நகர்ந்தேன்.

 யெகோவா சாட்சிகளின்  கடுமையான இறை நம்பிக்கை என்னை அடிக்கடி வியப்பிலாழ்த்தும்.  யெகோவா சாட்சிகள் ஓர் உதாரணம் மட்டுமே. கிட்டத்தட்ட எல்லா மதங்களுமே நம்பிக்கை வைத்தால் இறைவன் கரம் கொடுப்பார், மீட்பார் என்று சொல்கிறது.

"நம்பினோர் கெடுவதில்லை என்பது நான்மறை தீர்ப்பு" , "கடவுளை நம்பினோர் கைவிடப்படார்" என்ற சொல்வடைகளை ஊரில் இருக்கும்பொழுதெல்லாம் அடிக்கடி கேட்டிருக்கிறேன்.

"கடுகளவேனும் விசுவாசம் கொண்டாலும் மலையை நகர்த்தும் காரியத்தைகூட இறைவன் செய்து கொடுப்பார்" என்று பைபிளின் மத்தேயு 17-20 சொல்கிறது.

"திண்ணமாக என் இறைவன் அருகில் இருக்கின்றான், பிரார்த்தனைகளுக்கு பதில் அளிப்பவனாக இருக்கின்றான்" போன்ற நம்பிக்கையை போதிக்கும் கருத்துகள் திருக்குர் ஆனிலும் இருக்கின்றன.

எனக்கான காரியங்கள் என்னால் , என் முயற்சிகளினால் மட்டுமே நடக்கின்றன என்பதை நம்புபவன் நான். குறைவான முயற்சிகளிலோ அல்லது முயற்சியேயின்றியோ, வேண்டுதல்களின் உதவியுடன் எப்படி காரியங்கள் நடக்கமுடியும். நீந்தத் தெரியாதவர்களுக்குத்தான் பிடித்துக்கொள்ள துடுப்பு தேவை , எனக்கெதுக்கு என்று யோசித்தபடியே அலுவலகம் வந்து சேர்ந்தேன்.

அலுவலகத்தில் எனது மேலாளரும் எனது அணியின் மற்ற உறுப்பினர்களும் நாங்கள் வெளியிடவிருக்கும் "உட்டோப்பியா" விளையாட்டு மென்பொருளுக்கான இறுதிவேலைகளில் மூழ்கியிருந்தனர்.  இன்னும் ஒரு மணிநேரத்தில் முதலாளி டேன் உல்லெர்சன் (Dan Ullrsson) வந்துவிடுவார்.  அவர்தான் இந்த மென்பொருளுக்கான மூளை. யாருக்கும் முகம் கொடுத்து பேசாத டேன், என்னிடம் கொஞ்சம் கரிசனம் காட்டுவார்.  பழைய ஏற்பாட்டில் வரும், கனவுகளுக்கு விளக்கம் சொல்லும் தீர்க்கதரிசி டேனியல் என்பதன் ஸ்வீடிஷ் பதம் டேன் என்பது எனக்குத் தெரியும்.  உல்லெருக்கான பொருள் என்னவென்று அவரிடமே ஒருநாள் , ஓர் இரவுக்கொண்டாட்டத்தில் கேட்டுவிட்டேன் ,

"ஸ்கேண்டிநேவிய நோர்ஸ் மத நம்பிக்கையில் அதிகம் விவரிக்கப்படாத, ஆனால் முக்கியத்துவம் மிகுந்த கடவுள் என்று சொல்லப்படுகிறது "  என்றார்.

"அதிகம் விவரிக்கப்படாமல் எப்படி முக்கியத்துவம் கொடுக்கப்படும்"

"சூத்ரதாரிகள் தங்களைப்பற்றிய விபரங்களை அதிகம் சொல்வதில்லை"

அன்றைய கொண்டாட்டத்தில், எங்களது பேச்சு இந்தப்பேரண்டமே கணினிக்குள் இருக்கும் விளையாட்டுப்பொருளாகவோ பாவனையாகவோ (simulation) இருக்கும் என்று திரும்பியது.  டேன் உல்லெர்சன் அன்றைக்கு போட்ட விதைதான் இன்றைக்கு முழுமையடையப்போகும் உட்டோப்பியா கணினி விளையாட்டாக  உருவாகியிருக்கிறது.

தத்ரூபமாக மனித கதாபாத்திரங்களைக் கொண்டு உட்டோப்பியன் சமுதாயத்தை உருவாக்குவதே இந்த விளையாட்டின் வெற்றி இலக்குகள். டேன் உல்லெர்சனுக்கு காட்டுகையில் வடிவமைப்பு தத்ரூபம் எல்லாம் திருப்திகரமாக இருந்தும் தனக்கு  இந்த விளையாட்டில் சிலவை குறைவதைப்போல இருக்கிறதென்றார்.

"எதை சேர்க்கலாம் டேன்" இது என் மேலாளர்.

"நம்பிக்கை என்பதை விளையாட்டில் சேர்த்தால் என்ன? " டேன் சொன்னவுடன் எனக்குப்புரிந்துவிட்டது. ஆனால் மேலாளருக்குப் புரியவில்லை.

"புரியவில்லை டேன் , தயை செய்து விளக்கவும்"

"விளையாட்டின் பாத்திரங்கள், அவர்களை விளையாட வைக்கும்  நம்மிடம் வேண்டுதல்களை வைக்கும் வாய்ப்புகள், அவர்களின் நம்பிக்கையின் அளவைப்பொறுத்து , நாம் வரங்களைக் கொடுப்பது போன்றவற்றை சேர்க்கலாம்".

"கடவுள் நம்பிக்கை என்பதைப்போலவா டேன்"  என்றேன்.

"அதேதான் கார்த்தி"

"வேண்டுதல்கள் இல்லாமல் சுயபுத்தியுடன் தனது பிரச்சினைகளைத் தீர்க்கும் வாய்ப்பையும் விளையாட்டின் பாத்திரங்களுக்கு கொடுக்கலாமே டேன்"

"வேண்டாம், நமது உட்டோப்பியன் கணினி விளையாட்டை விளையாடுபவனுக்கு கிடைக்கும் தான் கடவுளைப்போன்றவன் என்ற எண்ணத்தை அது கெடுத்துவிடும் கார்த்தி"

அன்று மாலை அவரது அறைக்கு வரசொன்னார் டேன் உல்லெர்சன்.

"கார்த்தி நீ சொன்ன -சுயபுத்தி- அற்புதமான யோசனை. ஆனால் சுயபுத்தி முழுமையடையும்பொழுது விளையாட்டமைப்பை விட்டு பாத்திரங்கள் வெளியே வந்துவிடும்"

"உண்மையாகவே புரியவில்லை"

"தீவிரமான கிறிஸ்தவர்களைப் பார்த்திருக்கிறாயா? அவர்களின் பல பிரச்சினைகள் பிரார்த்தனைகள் மூலம் தீர்ந்தன என்று சொல்வார்கள், சொல்வதோடு மட்டுமல்லாமல் கிறிஸ்தவமே உண்மை மற்றவையெல்லாம் பொய் என்றும் சொல்வார்கள்"

"ஆமாம்"

"இஸ்லாமியர்களும் அப்படித்தான், ஏக இறைவன் மேல் நிபந்தனையற்ற நம்பிக்கை வைக்கும்பொழுது அவர்களின் பிரச்சினைகள் தீர்ந்தன என்றும் ஏக இறைவனே எல்லாம் மற்றவை எல்லாம் பொய் என்றும் சொல்வார்கள்"

"ஆமாம்"

"ஏன், உன் மதத்தில் மலைக்குப்போனால் பிரச்சினை தீரும், தலைமுடி எடுத்தால் பிரச்சினை தீரும் , பசுமாட்டிற்கு தீவனம் போட்டால் சரியாகும் என்று சொல்வார்களே "

"ஆமாம்"

"எல்லோரும் தத்தமது கடவுள்தான் உண்மை, ஏனைய கடவுள் எல்லாம் பொய் என்று சொல்வதைப்பற்றி நீ என்ன நினைக்கிறாய் கார்த்தி?"

"எல்லா கடவுள்களுமே பொய்"

"இல்லை கார்த்தி, எல்லா கடவுள்களுமே உண்மை. எல்லா நம்பிக்கைகளுமே உண்மை, எல்லா மத நூல்களுமே கடவுள்களால் வழங்கப்பட்டவைதான், நம்பிக்கையான பிரார்த்தனைகள் பிரச்சினைகளைத் தீர்க்கும்"

"அது எப்படி சாத்தியம் டேன்"

"நமது உட்டோப்பியன் கணினி விளையாட்டைப்போன்றதுதான் நமது உலகமும். கற்பனைக்குப் புலப்படாத பெரிய கணினியில் ஆடப்படும் விளையாட்டு, இந்த ஆட்டத்தை இயக்குபவர்கள்தான் பூமியில் சொல்லப்படும் அனைத்து கடவுள்களும்"

"சுயபுத்தியுடன் பகுத்தறிந்து , தன்மேல் நம்பிக்கை வைத்து நடப்பதினால் பிரயோசனமேயில்லையா டேன்"

"ஏன் இல்லை,  மந்தையில் இருக்கும் ஆடுகள் தங்களை ஆடுகள் என உணரும்பொழுது மந்தையை நடத்தும் மேய்ப்பாளனாக மாறும், நானே  ஒரு மேய்ப்பாளன்தான்" டேன் உல்லெர்சன் சொல்லிமுடிக்கும்பொழுது அவருக்கும் எனக்குமிடையில் ஒரு கண்ணாடி திரை இருப்பதைப்போல ஓர் உணர்வு.

இது எந்தவிதமான பரிமாணம். திரைக்குள் நான் இருக்கிறேன். என்னருகில் இருந்தாலும் திரைக்குவெளியே டேன் உல்லெர்சன் இருக்கிறார்.

"எல்லா கடவுள்களுமே சுயபுத்தியுடையவர்கள் மற்றும் பகுத்தறிவாளர்கள்.
சுயபுத்தியுடையவர்கள் கடவுள்களாகி விளையாடி வரம் கொடுக்கும் பாக்கியத்தை அடைவர், என்ன புரிந்ததா கார்த்தி"

"புரிந்தது டேன், நானும் ஒரு கடவுள்" திரையை கிழித்துக்கொண்டு வெளியே வந்து டேனுக்கு அருகில் வந்தமர்ந்தேன்.  சில ஒளியாண்டுகள் தொலைவில்  அமர்ந்திருந்த மற்ற கடவுள்கள் என்னைப்பார்த்து சிரித்து வரவேற்றனர்.

நீச்சல் மிதவையும் பிள்ளையார் நம்பிக்கையும் - குட்டிக் கட்டுரை

மண்டப எழுத்தாளர்களிடம் இருந்து தொடர்ந்து கட்டுரைகள் பெற்றுவருவதால், சுயமான எழுத்து எழுதி நீண்ட காலம் ஆகிவிட்டது. ஆக, ஈயம் பூசினாற் போலவும் இருக்க வேண்டும், பூசாத மாதிரியும் இருக்க வேண்டும் என்ற வகையிலான குட்டிக் கட்டுரை இது.

முன்பொரு காலத்தில் , சுவீடனில் இருந்த பொழுது சில வாரங்கள் நீச்சல் கற்றுக் கொண்டேன். அக்குளத்தில் என்னுடன் பயிற்சி பெற வந்தவர்களில் பெரும்பாலோனோர் முன்னரே நீச்சல் தெரிந்தவர்கள், ஆக அவர்கள் குளத்தில் குதித்தவுடன் பயமின்றி நீரோடு நீராய் மாறிப்போனார்கள். தொட்டதற்கெல்லாம் பயப்படும் நான், இடுப்பில் மிதவை ஒன்றைக் கட்டிக் கொண்டு நீச்சல் பழக ஆரம்பித்தேன். இடுப்பில் இருந்த மிதவை பயத்தைப் போக்கும் மிகப் பெரிய பிடிப்பாக இருந்தது. என்னுடைய பயிற்சியாளர் இரண்டாம் நாளன்று, மிதவை இல்லாமலேயே நீ நன்றாக நீந்துவாய் , அதை நீக்கி விடு என அறிவுறுத்தினார், நான் ஏற்றுக்கொள்ளவில்லை.

இந்த நீச்சல் எடுத்துக்காட்டைப் போல , ஒவ்வொருவர் வாழ்க்கையிலும் மிதவையைப் போன்ற ஒரு பிடிப்புத் தேவைப்படுகின்றது. அந்த நம்பிக்கை நல்லதைத் தரும் முருகனாக இருக்கலாம். ஏசுவாக இருக்கலாம், புத்தனாக இருக்கலாம், ஏக இறைவன் அல்லாவாக இருக்கலாம், ஏன் அம்மா கொடுத்த அழுக்கான ஐந்து ரூபாய்த் தாளாக கூட இருக்கலாம். எதைத் தின்றால் பித்தம் தெளியும் என எல்லாவற்றையும் தின்று செரிக்கும் தமிழ்ச் சமுதாயத்திற்கு இந்த நம்பிக்கை இன்னும் அதிகமாகவே தேவைப்படுகின்றது அல்லது திணிக்கப்படுகின்றது.

நீரில் மிதவை/பிடிப்பு இல்லாமலும் நீந்த முடியும் என்பது அனைவரும் அறிந்த உண்மை. பிரச்சினை எங்கு வருகிறது என்றால், மிதவை திணிக்கப்படும் பொழுதுதான்... மிதவை இல்லை என்றால் நீரில் மூழ்கி மூச்சடைத்து இறந்துப் போவாய் எனப் பயம் காட்டி வைத்து இருக்கின்றது குமுகம். மறுப்பக்கத்தில் மிதவை வேண்டியதில்லை எனப் பரப்புரை செய்யும்பொழுது , மிதவைகளை அறுத்து எறிவதைக் காட்டிலும் மிதவை இன்றி நீந்தி மக்களுக்கான பயத்தைப் போக்குவதன் மூலம் 'தன்' நம்பிக்கை ஒன்றே சிறந்தப் பிடிப்பு என தொடர்ந்து வரும் சந்ததியினரை உணர வைக்க முடியும் .

டா வின் சி கோட் என்றத் திரைப்படத்தில் ஒரு காட்சியில் அழகாக விவரிக்கப்பட்டு இருக்கும். ஏசு ஒரு மனிதர் , திருமணமானவர் என்று நம்பும் நாயகன் Robert Langdon , தனது சிறு வயது அனுபவம் ஒன்றைப் பகிர்ந்து கொள்வார்.

"Okay, maybe there is no proof. Maybe the Grail is lost forever. But, Sophie, the only thing that matters is what you believe. History shows us Jesus was an extraordinary man, a human inspiration. That's it. That's all the evidence has ever proved. But... when I was a boy... when I was down in that well Teabing told you about, I thought I was going to die, Sophie. What I did, I prayed. I prayed to Jesus to keep me alive so I could see my parents again, so I could go to school again, so I could play with my dog. Sometimes I wonder if I wasn't alone down there. Why does it have to be human or divine? Maybe human is divine. Why couldn't Jesus have been a father and still be capable of all those miracles? "
காட்சித் துணுக்கு - http://www.youtube.com/watch?v=B7zXxCAZjK4

நாயகனைப் போல , ஏதாவது ஒரு சந்தர்ப்பத்தில் ஒவ்வொருவருக்கும் முருகனோ ஏசுவோ அல்லாவோ தேவைப்பட்டு இருப்பார்கள். என் அம்மா அப்பா சிறு வயதில் சண்டை போட்டுக் கொள்ளும்பொழுது எல்லாம் முருகனிடம் தான் சண்டை சீக்கிரம் சமரசம் ஆக வேண்டும் என வேண்டிக் கொள்வேன். ( இன்றும் 'முருகனின்' மேல் தமிழரசியல் சார்ந்த விசயங்களுக்காக நம்பிக்கை உண்டு )

ஒரு கட்டத்திற்கு மேல் தேவை இல்லை என ஆகும் நம்பிக்கைகள் தொடர்ந்து 'பின்பற்றப்படுவதன்' காரணம் , 'தெளியும்' முன்னர் தன்னுடைய தனது குடும்ப அடையாளங்களாக மாறிப் போய் விடுவதுதான். பிள்ளையார் வழிபாட்டைத் திட்டினால், கடவுளைத் திட்டுகிறார்கள் என்றக் கோபத்தைக் காட்டிலும் என் 'அம்மா , அப்பா' ' தாத்தா பாட்டி' தனக்கு சொல்லிக் கொடுத்த நம்பிக்கைகளை புனிதங்களை மறுதலிக்கின்றார் களே என்ற கோபமே மேலோங்கி இருக்கும் . இந்த உள்ளூர கோபம் , கணன்று தீர்க்கமான மாற்ற முடியாத 'புனிதமாக' மாறி விடும்.

உயிரைக் கொன்று உணவாய் உண்ண , ஆடு கோழிகளைப் போல மாடும் பன்றியும் ஒன்றே என புனிதத்தை உடைக்க எனக்கு சில ஆண்டுகள் ஆனது. தமிழ்ச் சமூகம் பாவத்தைக் கூட எளிதில் கடந்து விடும். போலியான புனிதங்களை கடக்க விரும்பவே விரும்பாது.

வர்த்தக முன்னேற்றங்களை அளவுகோலிட குறைந்தது மூன்று வருடங்கள் ஆவது தேவை. சமூக வாழ்வியலில் சமத்துவ மாற்றம் ஏற்பட மூன்று தலைமுறைகளாவது கொடுக்கப்படவேண்டும் . மருந்தை சாக்லெட் சாப்பிடுவர்களுக்கு சாக்லெட்டின் மூலமாகவும், கார பஜ்ஜி போண்டா சாப்பிடுபவர்களுக்கு அதன் மூலமாகவும் கொடுத்துக் கொண்டே இருக்கவேண்டும், மருந்து இருக்கின்றது என்பதை மறைத்தோ மறைக்காலோ .. கல் தோன்றி மண் தோன்றா காலத்தே முன் தோன்றிய மூத்த சமூகமான தமிழ்ச் சமூகம் இன்றும் ஒரு குழந்தையைப் போலத் தான் இருக்கின்றது. மானே தேனே பொன் மானே எல்லாம் போட்டுத் தான் மாற்ற வேண்டும்.

ஆக மருத்துவர் புருனோ ( Mariano Anto Bruno Mascarenhas -https://www.facebook.com/spine.brain.surgeon/posts/10151856337539828) பகிர்ந்ததைப் போல, கலைஞரோ, சீமானோ, பிள்ளையாரோ, ஏசுவோ, நபிகளாரோ , அவரவர்களுக்கான நாட்களில் அமைதி காத்து விடலாம். ( பிள்ளையார் ஊர்வலங்கள் மசூதிகளின் மேல் பன்றிக் கறி எறியப்படாமல் நடக்க வேண்டும் என வைக்கப் படும் சமுதாய அக்கறை வேண்டு கோள்கள் சீண்டல்களில் வராது ).

எத்தனைக் கொடுங்கோலர்கள் தோன்றினாலும் , கடும்போக்காளர்கள் தோன்றினாலும் உலகம் அழிந்து விடாமல் தொடர்ந்து இயங்கிக் கொண்டு இருப்பதற்கான காரணம் நற்குணம் கொண்ட மிதவாதமானப் போக்கு உடையவர்களால் தான் என்பதை ஓர் உடையாடலின் பொழுது திரு ஞாநி ( Gnani Sankaran) சொன்னார். அது உண்மையே , நிதானமான மிதவாதப் போக்கு பக்குவமானது.

இறுதியாக மிதவையுடன் நீந்துகின்றார்களா... இல்லையா என்பதைக் காட்டிலும் எல்லோரும் குளத்தில் நீந்த அனுமதிக்கப் படுகின்றனரா என்பதையும் பார்க்க வேண்டும்.

சொந்தக் கதையில் ஆரம்பித்து சொந்தக் கதையிலேயே முடித்து விடுகின்றேன். நீச்சல் பயிற்சியின் கடைசி நாளன்று , கிட்டத்தட்ட அரை மணி நேரம் தனியாக நீந்தினேன். விஷயம் என்னவெனில் , எனது பயிற்சியாளர், எனக்குத் தெரியாமல் எனது மிதவையை அவிழ்த்து விட்டு இருக்கின்றார். மிதவை என்ற பிடிப்பு இன்றிதான் , அந்த அரை மணி நேரமும் நீந்தி இருக்கின்றேன் . கரை ஏறிய பின்னர்தான் அந்த விஷயத்தை என்னிடம் சொன்னார்

கடவுள் - சில ஒரு வரித்தொடர்கதைகளும் ஒரு அறிவியல் புனைவும், கூடவே ஒரு கவிதையும்

தொடர்கதை , காலம் காலமாய் தொடர்ந்த, தொடர்கின்ற, தொடரும் வினைத்தொகையாய் இருக்கும் மற்றொரு வினைத்தொகையான கட + உள் கடவுள் பற்றிய சில ஒரு வரிக்கதைகள் 
----
1. மனிதனிடம் தஞ்சம் புகுந்த முதல் அகதி - கடவுள்

2. மனிதனின் முதல் வளர்ப்புப் பிராணி கடவுள், மனிதன் காலங்காலமாய் அதற்கு தரும் பிஸ்கட் - பக்தி

3. மனிதன் உருவாக்கிய முதல் நகைச்சுவை கதாபாத்திரம் - கடவுள்

4. மனிதனின் முதல் ஊழல் - கடவுள்

 5. மனிதன் தன் இயலாமைக்கு வைத்த பெயர் - கடவுள்

6. மனிதனின் சோதனை எலி வேற்றுமதக் கடவுள் (எழுதியவர் டான் அசோக் - www.donashok.blogspot.com )

7. காரணமில்லாமல் சண்டையிட மனிதன் உருவாக்கிய காரணம் - கடவுள் (பாலராமன் - https://twitter.com/BalaramanL)

---


கொஞ்சம் அறிவியல் புனைவாய் ஒரு குட்டிக்கதை -  (நிஜமாகக் கூட இருக்கலாம்)

டைனோசரின் சிதிலமடைந்த சிலைக் கண்டுபிடிக்கப்பட்டது... உயிரியல் படிமங்கள் ஏதும் இல்லாததால் குழம்பிப்போயினர் ஆராய்ச்சியாளர்கள்...
பாவம் அவர்களுக்குத் தெரியாது , அது டைனோசர் காலத்துக் கடவுளின் சிலை என்று.

---

ஒரு கலகக்கவிதை 

காகங்கள் வெள்ளையாக இருக்காது என்றவன்அடித்து துவம்சம் செய்யப்பட்டான்
காலம் அவனை புறா சின்னத்துடன் கடவுள் ஆக்கியது ... 
இன்று அவன் சந்ததி, நாய் என நினைத்து ஓநாயைக் கொஞ்சிக் கொண்டு இருக்கிறது
நாய்கள் குழந்தை ரத்தம் குடிக்காது என்று ஓரத்தில் நின்று கத்திக் கொண்டிருக்கின்றேன்... அடிக்க நெருங்குகிறார்கள்... 
கவலை இல்லை , நாளை நானும் கடவுள் ஆகிவிடுவேன்.

ஆண்ட்ராய்டும் கடவுளும் - சிறுகதை

”ஒரேயொரு அப்ளிகேஷன், நச்சுன்னு சும்மா உலகத்தை அசைச்சுப் பார்க்கிற மாதிரி செஞ்சுட்டேன்னா, கோடீஸ்வரன் தான், அதுக்கப்புறம்,,,, நோ கோடிங், நோ வேலை, நார்வே ல பெரிய வீடு வாங்கிட்டு செட்டில் ஆயிட்டு, ஒன்லி கொஞ்சல்ஸ் ஆஃப் அம்மு” என அம்முவின் கன்னத்தைக் கிள்ளினேன்.

“ ஒவ்வொரு சீசனுக்கும் ஒன்னு சொல்லு,  போன வாரம் சினிமா ஸ்கிரிப்ட் பத்திப் பேசின, அதுக்கு முந்தின வாரம் ஷார்ட் ஃபிலிம் எடுக்கப்போறேன்னு கேமரா வாங்கின, இன்னக்கி ஆண்ட்ராய்ட் அப்ளிகேஷன்,  ரோம்ல வேலைக்கிடைக்கிறதே குதிரைக்கொம்பு, கிடைச்ச வேலையை, அடக்கிக்கிட்டு ஒழுங்காப்பாரு, எல்லாம் நடக்க வேண்டிய நேரத்துல நடக்கும்”

அம்மு சொல்றதும் உண்மைதான். நாய் எல்லாத்துலேயும் வாயை வைக்கிற மாதிரி,  கோடையில் ஒரு லட்சியம் உருவாகும், அது இலையுதிர்காலத்தில் மறைந்து, குளிருக்கு இதமாய் வேற ஏதாவது ஒன்று தோன்றும். திரும்ப விட்ட குறை தொட்ட குறையாய் ஆரம்பத்தில் இருந்து மீண்டும் ஒரு சுற்று வரும். இருந்த போதிலும், இந்த ஆண்ட்ராய்ட் மென்பொருள் உருவாக்கம், எளிதில் நடக்கும் என்று தோன்றியது. எனக்கு கொஞ்சம் ஜாவா தெரியும், ஒரு பத்து நாள் ஆண்ட்ராய்டு இணையப் புத்தகங்களையும், எடுத்துக்காட்டுகளையும்.  முழுமூச்சாய் படித்தால், அடிப்படைத் தெரிந்து விடும். எந்த விசயத்திற்கு அடித்தளம் பலமாக இருந்தால், அதன் மேலே ஏறி கதகளியே ஆடிடலாம்.

பத்துநாட்கள் என்பது ஒரு மாதம் ஆனபின்னரும்,  நுனிப்புல் மேயாமல் முழுமையாகக் கற்றுக்கொண்டேன்.  இப்பொழுது என்ன புதிதாக வடிவமைக்கலாம்,  வங்கிகளுக்கான ஏதேனும் ஒன்றைச் செய்யலாமா, விளையாட்டு நிரலி ஏதேனும், அரட்டை சம்பந்தப்பட்டவை ம்ஹூம் ஒன்றுமே உருப்படியாகத் தோன்றவில்லை.

”இன்னக்கி மனசுக்கு சாந்தமா இருந்துச்சுடா,” அம்மு மாலை நடைப்பயிற்சியையும், அத்துடன் அவளுக்கான கடவுள் வேண்டுதலையும் முடித்துவிட்டு வருகிறாள்.  எங்கள் வீட்டில் இருந்து ஒரு கிலோ மீட்டர் தூரத்தில்,  சிறிய குன்று இருக்கின்றது.  அதில் ஏறுவதற்கான நடைபாதையும் உண்டு. அம்மு தினமும் அங்கு போய் எந்த இடத்தில், அவளுக்கு சாந்தமான உணர்வு கிடைக்கிறதோ, அந்த இடத்தில் அமர்ந்து, கொஞ்சம் தியானம் செய்துவிட்டு வருவாள். அவளின் பக்தி, மனிதம் மற்றும் இயற்கை சார்ந்தது.

“அந்த ஹில் முழுசுமே ஒரு பவர் இருக்குடா, ஐ கேன் ஃபீல் த காட்லினெஸ்”

கடவுள் என்றதும் ஒரு பொறித்தட்டியது. ஏன் கடவுள் தொடர்பான மென்பொருள்கள்,  எழுதக்கூடாது.  கூகுள் பிளேயில் தேடிப்பார்த்தால், ஏகப்பட்ட மதம் சார்ந்தவைகள்தாம் இருந்தன.  தினம் ஒரு பைபிள்  வாசகம் சொல்லுவதற்கு, மெக்கா திசை கண்டுபிடிப்பதற்கு, ராகுகாலம் எமகண்டம் சொல்லுவது !!!  ஜோசியம் சொல்லுவது, அவை எல்லாவற்றையும் விட,  பேய், பிசாசு இருந்தால் கண்டுபிடிக்க உதவுபவை என சொல்லிக்கொண்டவைகள் கூட இருந்தன.

”God Detector, God Finder, God Locator” என்று தேடிப்பார்த்தேன். ஒன்றும் கிடைக்கவில்லை.  நானே கடவுளைத் தேட முடிவு செய்தேன்.  மேம்பட்ட ஆண்ட்ராய்ட் கைபேசிகளில், மின்காந்தப் புலங்களை கண்டறியவும், வேறுசில புலனறிவுக் கருவிகளும் உள்ளடக்கமாகவே வருகின்றன.  இணையத்தில் ஏற்கனவே பேய் பிசாசு கண்டுபிடிக்க எழுதியிருந்த எடுத்துக்காட்டு நிரலியை அடிப்படையாக வைத்து மென்பொருளை எழுத ஆரம்பித்தேன்.

வாடிகன்,  உள்ளிட்ட ரோமின் பிரபல தேவாலயங்களிலும் , மசூதிகளிலும் கிடைக்கும் அதிர்வெண், அலைவரிசைகள், தமிழ்நாட்டில் பிரபலமான கோவில்களிலும், பிரபல சாமியார்கள் கூடும் இடங்களிலும் அதே விபரங்களை என் நண்பர்களை வைத்தும் எடுத்துக்கொண்டேன்.  எலக்ட்ரானிக் குரல் நிகழ்வுகள், மின்காந்த சூழல், ஆற்றல் ஆகியனவற்றை, அடிப்படையாக வைத்தும், வெவ்வேறு மதங்களின் நல்ல நேரம், கெட்ட நேரம்,  இருப்பிடம் ஆகியன வைத்து , ஓர் ஒழுங்கற்ற வகையில், கடவுள் இருக்கிறது எனக் காட்டக்கூடிய வகையில் ஓர் ஆண்ட்ராய்ட் அப்ளிகேஷனை தயார் செய்தேன்.  கிட்டத்தட்ட, வாயில் இருந்து லிங்கம் எடுக்கக்கூடிய வகையில் உட்டாலக்கடியான வேலையாக இருந்தாலும், மக்களின் ஆர்வக்கோளாறினால் இது நன்றாக வியாபாரம் ஆகும் என நம்பினேன்.

இப்பொழுது ஆய்வு செய்துப் பார்த்துவிட வேண்டியதுதான்  அம்மு, தனக்காக வைத்திருக்கும் தியான அறையில் , அவள் தியானிக்கும்பொழுது, மெல்ல எனது கைபேசியில் தரவிறக்கி வைத்திருந்த ”கடவுளைத் தேடி “ மென்பொருளுடன் உள் நுழைந்தேன். கரு நீல நிறத்துடன், கணினித் திரை சினுங்கியது, கடவுள் இருக்கின்றாராம்.  கடவுளுக்கு நீல நீறம் கொடுத்தால் நன்றாக இருக்கும் என்பதால், நான் வடிவமைத்த கடவுளின் அலைவரிசை கிடைக்கும் பொழுது  எல்லாம் நீலம் நீறம் திரை முழுவதும் விரவும்.

அம்முவுடன் மறுநாள் நானும், அந்த மலைக்குன்றிற்கு சென்றேன், கணினித் திரை நீல நீறத்திலேயே இருந்தது. அந்த மலை முழுவதும் கடவுளின் ஆதிக்கம் தான் போலும்.

மனம் மகிழ்ச்சியில் குதுகலித்தது. கடவுள் இருக்கின்றாரா இல்லையோ !!! கடவுள் சார்ந்த விசயங்களில் என் அப்ளிகேஷன் ஒளிர்கிறது.  ஏதாவது சாமியாரிடம் பேரம் பேசி, அவரை வைத்து மார்க்கெட்டிங் செய்து, டாலர்களில் சம்பாதித்து விட வேண்டும்.  நெருங்கிய நண்பர்களிடம் தரவிறக்கி சோதனை செய்துப் பார்க்க மென்பொருளை அனுப்பி வைத்தேன்.

 மறுநாள்  ஞாயிற்றுக் கிழமை  வாடிகனில் சோதித்துப் பார்க்கக் கிளம்பினேன்.  கோடையாதலால் காலையிலேயே சுள்ளெனெ வெயில் அடித்தது. அரைக் கிலோமீட்டர்களுக்கு நீண்ட வரிசை, தண்ணீர் தாகம் அடித்தது.  ”கடவுளைத் தேடி” மென்பொருள் இன்னும் ஒளிரக் காணோம். எனக்கு முன்னே ஒரு வயதான அம்மணி, மிக பக்தியுடன் புனித பீட்டர் தேவாலயத்தை பார்த்துக் கொண்டிருந்தார். அவர் என்னைப் பார்த்து சிரிக்கவும், வாடிகன் எல்லையை மிதிக்கவும் எனது கைபேசி நீலநிறத்தில் ஒளிரவும் சரியாக இருந்தது. அந்த அம்மணியிடம் கூச்சப்படாமல் தண்ணீர் கேட்டு வாங்கிக் குடித்துக் கொண்டேன்.

அனைவரின் பார்வையும் தேவாலயத்தின் மாடத்தின் மேலேயேத் தான் இருந்தது. போப்பாண்டவர் வந்து காட்சித் தருவார் என, மாடத்தையும் கைபேசியையும் மாறி மாறிப்பார்த்துக் கொண்டிருந்தேன். அவரும் வந்தார், கைபேசியைப் பார்த்தேன், நீலநிறம் சுத்தமாக காணாமல் போய் இருந்தது.
நிரலியில் ஏதாவது பிழை இருக்கலாம், வெப்பநிலையைக் கணக்கில் எடுத்துக் கொண்டேனா என ஐயம் வந்தது.

அருகே அருகே இருந்த வெவ்வேறு சர்ச்சுகளிலும் நீல நிறம் கிடைக்கவில்லை.  ரோமில் இருந்த மிகப்பெரும் மசூதியிலும் கிடைக்கவில்லை. ஹரே கிருஷ்ணா கோவிலிலும் சீக்கிய குருத்வாராவிலும் சோறு போடும் இடத்தில் மட்டும் நீல நிறம் கிடைத்தது.

மாலையில் சில நண்பர்களிடம் இருந்து மின்னஞ்சல்கள் வந்திருந்தன. எந்தக் கோவிலிலும் , சர்ச்சிலும், மசூதியிலும் நீல நிறம் கிடைக்கவில்லை. ஆனாலும் ஒரு நண்பன், கோவிலுக்குப் போய்விட்டு , அப்ளிகேஷனை ஓடிக்கொண்டிருப்பதை மறந்துவிட்டு,   மருத்துவரைப் சந்திக்கையில் ஒளிர்ந்ததாக சொன்னான்.  அந்த மருத்துவர், அவனின் குழந்தையை ஒரு நோயில் இருந்து மீட்டவர்.  எனது மூளையில் நீலநிறம் படர்ந்தது.

அம்மு மளிகைக் கடைக்குப் போய் இருந்தாள், எனது கைபேசி எடுத்துக் கொண்டு அவளின் தியான அறைக்கு சென்றேன், ஒளிரவில்லை. அவள் வழக்கமாகப் போகும் குன்றிற்கு போனேன், நீலநிறத்திற்கான சுவடே இல்லை. திரும்பும் வழியில், ரொசாரியோ வைச் சந்தித்தேன். அவர், அகதிகளுக்காகப் போராடும் வாதாடும் ஒரு வழக்கறிஞர். புரிந்திருப்பீர்கள்., நீல நிறம் ஒளிர்ந்தது.  பக்கத்து வீட்டு குழந்தை, என்னைப் பார்த்தால் வாலை குழைக்கும் நாய், எதிர்த்த வீட்டுப் பாட்டி என இவர்களைக் கடக்கும்பொழுதெல்லாம் நீலநிறம் கிடைத்தது. வீட்டிற்கு வந்ததும் அம்மு கட்டி அணைத்துக் கொண்டாள். நீலநீறம் ஒளிர்ந்தது.

ஒருப்பக்கம் என்னை நினைத்து பெருமையாக இருந்தது. ஏதோ ஒரு வகையில் கடவுளைக் கண்டுபிடித்துவிட்டேன் அல்லவா !! “கடவுளைத் தேடி”  மென்பொருள் திட்டம் மிகப்பெரும் தோல்வி. மென்பொருளை அவரவர் கைபேசிகளில் இருந்து நீக்கிவிடுமாறு நண்பர்களுக்கு மின்னஞ்சல் செய்தேன். இதை நான் விற்கப்போவதில்லை.  மடிக்கணினியில் இருந்த அத்தனை நிரலியையும் அழித்துவிட்டு , கைபேசியில் இருந்த கடைசி பிரதியையும் அழிக்க எத்தனிக்க முனைகையில் என்னிடத்திலும் நீலநிறம் ஒளிர்ந்தது.