அப்பாவி கணேசனும் விமான அனுபவமும் - சிறுகதை

சுவிடனின் கோத்தன்பர்க்  நகரத்தில் இருந்து  வரும் அம்முவிற்காக , ரோம் சாம்பினோ விமான நிலையத்தில் காத்து இருந்த பொழுது , அப்பாவி கணேசன் நினைவுக்கு வந்தார். கடைசியாக ஒன்றரை வருடங்களுக்கு முன்னர், இந்த விமான நிலையத்திற்கு கணேசனுடன் வந்ததுடன் சரி அதன் பின்னர்  இன்றுதான் வருகின்றேன் .  மற்றபடி  என் போக்கு வரத்து எல்லாம்,  ரோமின் மற்றொரு விமான நிலையத்தை மையம் கொண்டு தான். 

சுவீடனில் படித்த பொழுது , அப்பாவி கணேசனுக்கு என்னுடன் பிரயாணம் செய்ய வேண்டும் என்றாலே பயம். ஒரு முறை கோபன்ஹெகன் ரயிலில் அவருடையை பயணச்சீட்டையும் எடுத்துக்கொண்டு வேண்டும் என்றே அவரைத் தெரியாததைப் போல வேறு  ஓரிடத்தில் போய் அமர்ந்து, பரிசோதகர் வரும் நேரத்தில் பரிதவிக்க விட்டு இருக்கின்றேன். 

மற்றொரு முறை, 

"கணேசன் , நம்ம காலேஜ் கார்டை காமிச்சா, ஒரு பாக்கெட் கடலை , வில்லிஸ் சூப்பர் மார்கெட்டில் கொடுப்பாங்க " 

 என சொல்ல போக , உண்மையிலேயே அட்டையைக் காட்டி கடலையைக் கேட்க , அந்த சூப்பர் மார்கெட்டில் அன்றைய மாலைப் பொழுது சூப்பராக போனது. 

தில்லு முல்லு ரீமேக் படத்தில் வருவதைப் போல, நான் ஒரு முறை விலை குறைந்த கூலிங் கிளாஸின் விலைக் குறிப்பை , விலை அதிகமான ஒன்றிற்கு மாற்றி வைத்து விட்டேன்.   

°கார்த்தி, சூப்பர் மாடல், வெறும் நூறு குரோனர் "  என சொல்லிக் கொண்டு எடுத்துப் போனார் நான் நமுட்டு சிரிப்பு சிரித்துக் கொண்டு வெளியே  வந்து விட்டேன்.  

கடைக்காரன் கில்லாடி ... பார்த்தவுடன் நிஜ விலையை கண்டுபிடித்து விட்டான்.

ஆயிரம் குரோனர், பணத்தைக் கட்டிவிட்டு வாங்கி வந்தார். அடுத்து வந்த கோடையில் அவரை விட , நான் தான் அந்தக் கண்ணாடியை அதிகம் அணிந்து இருப்பேன். 

என்னுடைய கெட்டப் பழக்கம் , அப்பாவிகளை , அம்மாஞ்சிகளை ,விளையாட்டுத் தனமாக கிண்டலடிப்பது. அது ,  சுமாரான பவுலர் நல்ல வாட்டமா பவுலிங் போட்டால் சிக்ஸர்களாய் அடிக்கும் பொழுது கிடைக்கும் மகிழ்ச்சியைப் போல இருக்கும் . பேட்ஸ்மேன் களுக்கு தொடர்ந்து அடித்தாடினால் தான் மதிப்பு ... ஆனால் பவுலர்களுக்கு ஒரு பந்து  போதும்.. அத்தனையையும் தரை மட்டமாக்க ... 

தொடர்ந்த ஓட்டலில் களைப்படைந்து வெறுப்படையும் அப்பாவிகள்  என்னை ஒரு கட்டத்தில் எதிரியாக பார்க்க ஆரம்பித்து விடுவார்கள். சந்தர்ப்பம் அமையும் பொழுது , மூக்கில் குத்தி விட்டு ஓடி விடுவார்கள். 

ஆனால் இந்த அப்பாவி கணேசன் அவர்களைப் போல அல்லாதவர். 

என் தொடர் கலாய்த்தலை தாங்கிக் கொண்டதால் தான், அன்று ரோம் நகரத்திற்கு நான் குடி பெயர்ந்த பொழுது, அவருக்கும் டிக்கெட் போட்டு அழைத்து வந்தேன். அதில் கூட ஒரு சுயநலம் உண்டு. இரண்டு பெட்டிகள் எடுத்து வர வேண்டும். மேலதிக சுமைகளுக்கு ஆகும் செலவிற்கு இவரைக் கூட்டிக் கொண்டு வந்தால், பெட்டி தூக்க ஒரு ஆள் இருக்கும் என்பதுதான். 

ஊர்ப்புறங்களில் பேருந்து கடைசி நிறுத்தத்தில் வந்து நின்றவுடன், அடுத்து ஐந்து நிமிடங்களில் திரும்ப எடுப்பார்கள். மக்கள் இறங்குவதற்கு முன்னரே கூட்டம் ஏறத் தொடங்கும். இது விமானம் என்பதால் அரை மணி நேரம். வந்த விமானமே திரும்ப பறக்கும். 

டவுன் பஸ்ஸில் இடம் பிடிப்பதைப் போல இடம் பிடித்தோம். 10 எ 10 பி , 10 சியில் யாரும் இல்லை.  மலிவு வகை விமான சேவை என்பதால், வண்டியை வளைத்து கிளம்பத் தொடங்கியதும் லாட்டரி சீட்டு முதற்கொண்டு சாராயம் , சிகரெட் வரை  அனைத்தையும் விற்க ஆரம்பித்து விடுவார்கள். அப்படி விற்றுக் கொண்டு இருக்கையில் 

ஒரு விமானப் பணிப் பெண்ணைக் கூப்பிட்டு , கணேசனை சுட்டி,

"இவர், காண்டம் கிடைக்குமா என கேட்கிறார்"  என்றேன் 

இருவரும் என்னை முறைத்தனர். பின்னர் கணேசனை , சமாதானப் படுத்தும் முயற்சியாக பேச்சை ஆரம்பித்தேன். 

°கணேசன் , நான் பிளைட்டோட லைஃப் ஜாக்கெட்டை திருடப்  போறேன்" 

"வேண்டாம் கார்த்தி, தப்பு ...மாட்டினால் மானம் போயிடும் " 

கைசுமைகளுக்கான பைகளை  கால் மாட்டில் தான் வைத்து இருந்தோம். விமானம் தரையிறங்கும் சமயத்தில் , எல்லோருடைய கவனமும் அதில் இருந்த பொழுது இருக்கைக்கு கீழ் இருந்த  உயிர் காப்பு கவசங்களை கையை விட்டு எடுத்து ஒன்றை அவரின் பையிலும் மற்றொன்றை என் பையிலும் வைத்துக் கொண்டேன்.  கணேசனுக்கு வெளியில் வரும் வரை வியர்த்துக் கொட்டியது. அன்று எனக்கு ரோமில் உதவி செய்து விட்டு போனவர் தான், அதன் பின்னர் என்னுடன் பேசவே இல்லை. அந்த லைஃப்  ஜாக்கெட்டுகளை இன்றும் பாதுகாத்து வருகின்றேன். 

எதோ ஓர் அறிவிப்பில் விமான நிலையம் வருகைப் பகுதி சலசலப்பானதும், அப்பாவி கணேசன் நினைவுகளை விட்டு நிகழ் காலத்திற்கு வந்தேன். கோத்தன்பார்க் விமானத்தைப் பற்றிதான் சொல்லுகின்றனர். கோத்தன்பார்க்கில் இருந்து வரும்  விமானத்தில் தொழில் நுட்பக் கோளாறு காரணமாக நகரத்திற்கு வெளியே கடலில் விழுந்து விட்டது  எனவும் மீட்புக் குழுக்கள் விரைந்து இருக்கின்றனர் எனவும் அந்த அறிவிப்பு சொன்னது. 

                                                                 ---

சுமைக்கூலி முக்கால் பணம் - மலிவுவகை விமான சேவைகள்

தரைக்கு மேலே பல்லாயிரம் அடிகளில் பறக்கும் விமான பயணம் என்பது எப்பொழுதுமே ஒரு சாகசம்தான், விமானப் பயணம் என்பது கடந்த பத்தாண்டுகள் முன்பு வரை, பணக்காரர்களுக்கானது என்ற நிலையை, மலிவு விலை விமான சேவைகள் அடித்து நொறுக்கி வருகின்றன. ஐரோப்பாவை பொறுத்தமட்டில், ஐரோப்பிய ஒன்றிய இணைப்புகளைக் காட்டிலும் மக்களை இணைத்தது இந்த வகை விமான சேவைகள்தாம், குறிப்பாக ரையான் ஏர் என்ற விமான சேவை. மேல்நடுத்தர வர்க்கத்திற்கான இன்பச்சுற்றுலாக்களை, சாமனிய ஐரோப்பியர்களுக்கும் திறந்துவிட்டது ரையான் ஏர் விமானசேவை என்பது மிகைப்படுத்தப்பட்டதல்ல, ஏறக்குறை மூடப்பட வேண்டிய பல விமான நிலையங்களுக்கு மறு வாழ்வு அளித்தது ரையான் ஏர் என்பது குறிப்பிடத்தக்கது. இங்கிலாந்திலும் ஸ்காட்லாந்திலும் ஏகப்பட்ட கிழக்கு ஐரோப்பிய நாடுகளைச் சேர்ந்தவர்கள், கட்டிட வேலைகளில் ஈடுபட்டிருப்பதைக் கண்டிருக்கலாம், ஐரோப்பிய ஒன்றியம் ஐரோப்பிய குடிமக்கள் எங்கு வேண்டுமானாலும் வேலை செய்யலாம் என்ற உரிமையத் தந்திருந்தாலும் , மக்களை எளிதாக இடம்பெயர இந்த வகைவிமான சேவைகள் கண்டிப்பாக உதவின.

ஆனாலும் சுண்டைக்காய் கால் பணம், சுமைக்கூலி முக்கால் பணம் என்ற வகையில் ரையான் ஏர் விமான சேவையோ அல்லது ஏனைய மலிவுவகை விமான சேவைகளை உண்மையில் அத்தனை மலிவானது அல்ல, அடிப்படை விலை ஒன்றுமே இல்லாதது போலத் தோன்றினாலும், அடுக்கடுக்காய் அவர்கள் வைக்கும் கட்டணங்கள், ஏனைய விமான சேவைகளைக் காட்டிலும் பல சமயங்களில் அதிகமாகவே வந்துவிடும்.

ஐரோப்பாவில் விஸ் ஏர், ரையான் ஏர் போன்ற மலிவுரக விமானசேவைகளின் பிரச்சினைகள்,

1. மேற்கண்ட இரண்டு விமான் சேவைகளும் பாரிஸ் , ஸ்டாக்ஹோல்ம், என்ற பெரு நகரங்களுக்கும் பறக்கிறோம் என்று விளம்பரம் செய்தாலும், உண்மையில் அவர்கள் அங்கு பறப்பதில்லை. சில ஆண்டுகளுக்கு முன்னர், முக்கிய விமானநிலையங்களுக்கான உரிமங்களில் ரையான் செய்த சில சொதப்பலிகளில், அவர்கள் பெருநகர மைய விமான நிலையங்களில் இருந்து விரட்டப்பட்டார்கள் என்பதுதான் உண்மை. அருகில் இருக்கில் சிறுநகரங்களின் விமான நிலையங்களுக்கே இந்த வகை விமான சேவைகள் இயக்கப்படுகின்றன.

2. உதாரணத்திற்கு, ஸ்டாக்ஹோல்மில் இருந்து பாரிஸிற்கு விமான சேவை இருக்கிறது, வெறும் 20 ஈரோக்கள் தான் என விளம்பரப்படுத்துவார்கள், ஆனால் நிஜத்தில், இந்த சேவையைப் பயன்படுத்த, நீங்கள் ஸ்டாக்ஹோல்ம் நகரத்தில் இருந்து ஸ்காவ்ஸ்டா (நீயுஷாப்பிங்)என்ற 160 கிலோமீட்டர்கள் தொலைவில் இருக்கும் நகரத்திற்கு பயணப்படவேண்டும். அதேபோல, பாரிஸை அடுத்துள்ள பவாய் நகரத்திற்கே பறப்பீர்கள், அங்கு இருந்து பாரிஸ் சொல்வது உங்கள் பிரச்சினை. ஸ்டாக்ஹோல்மில் இருந்து பாரிஸ் போய் வர, வெறும் உள்ளூர் பஸ் பயணத்திற்கே ஒரு ஆளுக்கு கிட்டத்தட்ட 50 ஈரோக்கள் செலவளிக்க வேண்டியதாக இருக்கும்.

3. தொடர் பயண விமான சேவைகளை இவர்கள் அனுமதிப்பதில்லை. உதாரணத்திற்கு நேரிடையான விமான சேவை இல்லாத நகரத்திற்கு, ஒரே பயண சீட்டின் மூலம் வேறு ஒரு நகரம் வழியாக பயணப்படுவது, நேரிடை விமான சேவை இல்லாத நகரத்திற்கு நீங்கள் பயணப்பட வேண்டுமனால், தனித்தனியாக பயணச்சீட்டு எடுத்து, தனித்தனி உள்நுழைவு நடைமுறைகளை ஒவ்வொரு விமான நிலையத்திலும் தொடரவேண்டும்.

4. பயணச்சீட்டுடன் 10 கிலோ கைப்பை மட்டுமே அனுமதி. செக்-இன் வழியாக உடைமைகளை எடுத்துச் செல்ல, மேலதிக கட்டணம் செலுத்த வேண்டும். செக்.இன் உடைமையோ கைப்பையோ குறிப்பிட்ட எடைக்கு மேல் அதிகமாக இருந்தால் ஈவிரக்கமின்றி தண்டக்கட்டணம் வசூலிப்பார்கள்., குறைந்தது 50 ஈரோக்கள் வரை தண்டக்கட்டணம் இருக்கும். உங்கள் சுற்றுலாவுக்கான மகிழ்ச்சி மனநிலையை நொடியில் உடைத்துவிடுவார்கள்.

5. விமானப் பயணத்தில் குடிக்க ஒரு சொட்டு தண்ணீர் கூட கொடுக்க மாட்டார்கள். ஆனால் சந்தைக்கடையைப் போல லாட்டரி சீட்டில் இருந்து, கவர்ச்சிப்படம், சிகரெட் , பரிசுப்பொருட்கள், நொறுக்குத் தீனிகள், உணவு என அரை மணி நேரப் பயணம் என்றாலும் கூட ஆணுறைகளைத் தவிர அத்தனையையும் விற்பார்கள்.

6. விமானங்கள் ரத்து செய்துவிட்டால், அனாதைகளைப் போல விமான நிலையத்தில் தேவுடு காக்க வைத்துவிடுவார்கள்.

7. விமானப் பயணம், மேட்டிமை மக்களைப்போல கவுரவமாக நடத்தப்படுவீர்கள் என எதிர்பார்க்காதீர்கள், சென்னை மாநகரப்பேருந்துகளை நினைவில் வைத்துக் கொள்ளுங்கள்.

8. நேரங்கெட்ட நேரத்தில்தான் விமான் சேவைகளை இயக்குவார்கள்,

இதையெல்லாம் மீறி பயணம் செய்ய விரும்புபவர்கள் கவனிக்க வேண்டிய விசயங்கள்,

1. விளம்பரங்களைக் கண்டு ஏமாந்து விட வேண்டாம், விமான நிலையத்திற்கும் நீங்கள் செல்ல வேண்டிய நகரத்திற்கும் எத்தனை தூரம் , எவ்வளவு செலவு ஆகும் என்பதையும் உங்கள் பயணச்செலவில் கணக்கிட்டுக் கொள்ளுங்கள். ரோம் நகரத்தைப் பொறுத்த மட்டில், ரையான் ஏர் விமான சேவை செயற்படும் விமான சேவை, கிட்டத்தட்ட நகரத்திற்குள்ளேயே இருக்கின்றது. ரோம் நகர மையத்திற்கு குறைந்த பட்சம் 2.20 அதிகபட்சம் 4 ஈரோக்களில் சென்றுவிடலாம். இவர்கள் வியன்னா நகரத்திற்குப் பறப்பதில்லை, ஆனால் வியன்னவில் இருந்து 40 நிமிட பேருந்து பயணத் தூரத்தில் இருக்கும், ஸ்லோவாக்கிய நாட்டின் தலைநகரத்திற்குப் பறக்கிறார்கள். ஆக ரோம், வியன்னா நகரங்களைச் சுற்றிப்பார்க்க, இந்த வகை விமான சேவைகள் நிச்சயம் உதவும். போலாந்து நாட்டைப் பொறுத்த மட்டில் எல்லா நகரங்களின் மைய விமான நிலையத்திற்கே இந்த வகை சேவைகள் இயக்கப்படுகின்றன.. விரைவில் மாற்றப்பட இருக்கும் வார்சாவா விமான நிலையம் கூட நகரத்தில் தான் இருக்கின்றது.

2. ஒரேயோரு கைப்பை தான் உடன் எடுத்து செல்ல அனுமதி. அதனுள்ளேயே மடிக்கணினி , ஏனைய பொருட்கள் அனைத்தும் வைத்துவிட வேண்டும். அதுவும் விமானசேவைகள் கொடுத்து இருக்கும் அளவீடுகளில் தான் பை இருக்க வேண்டும். விமானம் ஏறுவதற்கு முன்னர் கூட சோதிப்பார்கள். ஆகையால் அவர்கள் சொல்லி இருக்கும் அளவீடுகளின் படியே பயணப்படுவது, மன உளைச்சலைக் குறைக்கும். எதற்கும் செக்-இன் உடைமைகளை எடுத்துச் செல்லவும் முன்பதிவு செய்துவிடுவது நல்லது,

3. விமானப் பயணங்களில் அனுமதிக்கப்படும் அளவிலான குடிதண்ணீர் , உணவு வகைகளை உடன் எடுத்துச் செல்வது உசிதமானது. மறந்தும் கூட விமானத்தில் விற்பதை வாங்காதீர்கள். 5 மடங்கு விலை கொடுக்க நேரிடும்.

4. செக்-இன் உடைமைகளுக்கான விலை , நகர மையத்திற்கு செல்லும் பேருந்துக்கான கட்டணம், பயணச்சீட்டின் விலை இவற்றை ஏனைய நற்மதிப்பு பெற்ற விமான சேவைகளுடன் ஒப்பிட்டு பின் பதிவு செய்யுங்கள்.

சுமைக்கூலியை குறைத்துவிட்டால் சுண்டைக்காய் பணத்தில் நிச்சயம் ஐரோப்பாவை ஒரு சுற்று சுற்றிவிடலாம்.

---

நார்வேயில் இருந்து வெளிவரும் வானவில் மாத இதழுக்காக எழுதப்பட்ட கட்டுரை.

ஐரோப்பிய அம்மு - சிறுகதை

ஆணுறையைத் தவிர அனைத்தையும் விமானப் பயணத்தின் போது விற்கும் விமான சேவை இது, மலிவு விலை விமான சேவை எனக்கு அறவேப் பிடிக்காது எனினும், ரோமில் இருந்து ஸ்லோவாக்கிய தலைநகரத்திற்குப் போவதற்கு இதைவிட்டால் வேறுவழி கிடையாது என்பதால் பிராட்டிஸ்லாவாவில் ஒரு கருத்தரங்கை முடித்துவிட்டு ரோமிற்குத் திரும்பிக்கொண்டிருக்கின்றேன்.

எனக்கு முன்னால் நின்று கொண்டிருந்த, பெண் மென்சோகத்துடன் ஒரு கையில் தனது இரண்டு அல்லது மூன்று வயது குழந்தையையும் பிடித்துக் கொண்டு செக்-இன் உடைமைகளின் எடை அதிகம் இருக்கின்றது என, சிலவற்றை எடுத்து, கைப்பையில் திணித்துக் கொண்டிருந்தாள். அம்மு கொஞ்சம் நிறமாக இருந்து, தங்க நிறக் கூந்தல் இருந்தால் எப்படி இருந்திருப்பாளோ அதேப்போல இருந்தாள். பிரதிகளில்தான் தருணங்கள் தன்னை நீர்த்துக் கொள்கின்றன. அம்முவின் உருவத்தை உணர்வை சந்தர்ப்பம் கிடைக்கும் பொழுதெல்லாம் தேடிக்கொண்டிருக்கின்றேன்.  நான் தொடர்ந்து பார்த்துக் கொண்டிருப்பதை உணர்ந்திருப்பாளோ என்னவோ, குழந்தையை இழுத்துக்கொண்டு, பாதுகாப்பு சோதனை வலையத்தை நோக்கி வேகமாக நடந்துப் போனாள்.

நான் வைத்திருந்தது வெறும் கைப்பைதான், பொதுவாக 10 கிலோ தான் அனுமதி என்றால் நான் எடுத்துச் செல்வது 5 கிலோவிற்கு மிகாது. எனக்கான நடைமுறைகளை முடித்து, விமானத்திற்காகக் காத்திருக்கும் தளத்திற்கு சென்றபொழுது , அங்கும் இங்கும் ஓடிவிளையாடிக்கொண்டிருந்த குழந்தைக்கு முதுகில் ஓர் அடியைப்போட்டு உட்கார வைத்துக்கொண்டிருந்தாள் அந்த ஐரோப்பிய அம்மு. ஐரோப்பிய நாடுகளில் குழந்தைகளை அடிக்க மாட்டார்கள் என்றாலும், முன்னாள் சோவியத் தோழமை நாடுகளில் , ஒழுக்கம் தண்டனைகளின் வழியாகவும் போதிக்கப்பட்டிருந்ததால், இந்தத் தலைமுறையிலும்  சிலப் பல இடங்களில் வெளிப்படும். ஏன் மேற்கத்திய  இத்தாலியில் கூட , ஒரு முறை அடம்பிடித்த குழந்தையை அம்மா இரண்டு சாத்து சாத்த, பாட்டியிடம் ஓடிப்போன குழந்தைக்கு , பாட்டியிடமும் இரண்டு அடி கிடைத்தது.

சிறுகதைகளைத் தேட ஆரம்பித்தபின்னர் காத்திருப்பின்பொழுது புத்தகம் படிக்கும் பழக்கத்தையும்,  இளையராஜாவைக் கேட்கும் பழக்கத்தையும் விட்டுவிட்டதால் மனிதர்களை கவனிக்க ஆரம்பித்தேன், கண்டிப்பாக ஒரு சிறுகதையாவது சிக்கும். ஐரோப்பிய அம்முவின் குழந்தை, என்னைப் பார்த்து கண் சிமிட்டியது,  அப்படியேக் குட்டி ஐரோப்பிய அம்மு. கூந்தல் நிறம் மட்டும் கருப்பு, குழந்தையின் அப்பாவின் பாதி ஜீன் கூந்தலில் வந்துவிட்டது போலும், நிமிடத்திற்கு ஒரு முறை கைபேசியை எடுத்து யாருக்கோ அழைக்க முயற்சித்துக் கொண்டிருந்தாள்,  ஒரு சந்தர்ப்பத்தில் பேசிக்கொண்டிருக்க, குழந்தை அவள் கட்டுப்பாட்டை மீறி என்னை நோக்கி ஓடி வந்தது. பேசிக்கொண்டிருந்தவள், ஓடி வந்து குழந்தையை வெடுக்கென இழுத்துக் கொண்டு போனாள். கோபமும் அம்முவையே பிரதிபலித்ததனால் ஐரோப்பிய அம்முவின் மேலும் ஈர்ப்பு அதிகமானது.

விமானத்திற்குள் செல்ல ஒவ்வொருவராகத் தயாராக, விமான சேவையின் அதிகாரிகள் கைப்பையின் எடையையும் பரிமாணத்தையும் சோதிக்க ஆரம்பித்தனர். பாதிக்குப் பாதி பேர் அழுத்தி திணித்து, சமாளித்துவிட்டனர். ஐரோப்பிய அம்முவின் கைப்பையோ இரண்டு மடங்கு இருந்தது,அவளே சில மேல் சட்டைகளை எடுத்து மாட்டிக்கொண்டாலும் இன்னும் அளவு குறையவில்லை. நேரம் அதிகம் எடுத்துக் கொண்டிருப்பதால், அவளை தண்டக் கட்டணம் செலுத்தச் சொன்னார்கள். ஸ்லோவாக்கிய மொழியில் அதிகாரிகளும் அவளும் பேசிக்கொண்டிருந்தாலும், கெஞ்சல்கள் எந்த மொழியிலும் புரியும் என்பதால் என்னப் பேசி இருப்பார்கள் என்பது விளங்கியது.   அவளிடம் பணமும் குறைவாக இருந்தது போலும். வரிசையில் இருந்து விலகி, குழந்தையின் சில உடைகள், அவளது சில உடைகள், சில விளையாட்டுப்பொருட்கள்,ஆகியனவற்றை குப்பைத் தொட்டியில் போட்டாள். அனுமதிக்கப்பட்ட அளவிற்கு பை இருந்ததால் இந்த முறை விமானத்திற்கு செல்ல அனுமதிக்கப்பட்டாள். வரிசையில் இருந்து விலகிய நான்,  குப்பைத் தொட்டிக்குச் சென்று அவற்றை எடுத்து யாரும் கவனிக்காதபடி  கைப்பையில் போட்டுக்கொண்டேன்.

மாநகரப்பேருந்தில் பயணம் செய்ய உள்நுழையும் பொழுது என்ன உணர்வு ஏற்படுமோ அதே உணர்வு, கடைசியாக விமானத்திற்குள் நுழையும்பொழுது ஏற்பட்டது. எந்த விசயத்தை ஒதுக்க நினைக்கிறமோ , அதுவே ஆடை அலங்காரங்களுடன் அருகே வரும். எனக்கு அவளுக்கருகே ஓர் இருக்கை கொடுக்கப்பட்டது.  தலைக்குமேல் கைப்பைகளை வைக்கும் இடங்கள் நிரம்பிவிட்டதால், காலுக்கு அடியில் அவரவர் கைப்பைகளை வைத்துக்கொள்ள அறிவுறுத்த்தப்பட்டனர். எனது பையில் துருத்திக் கொண்டிருந்த குழந்தையின் விளையாட்டு பொம்மையின் நுனியைப் பார்த்த அவளின் குழந்தை தையத்தக்கா என கையாட்டிக்கொண்டே இருந்தது. இரண்டு முறை பேச முயற்சித்தேன், குழந்தைக்கு தொடர்ந்து அடி கிடைக்கக் கூடாது என ரோம் வரும் வரை எதுவும் பேசவில்லை. ரோமில் விமானம் தரையிறங்கிய பின்னர் அவள் குப்பையில் தூக்கி எறிந்த பொருட்களை எடுத்துக் கொடுக்கலாம் என நினைத்துக் கொண்டிருந்த பொழுது, எல்லோருக்கும் முன்னராக வேகமாக வெளியேறினாள்.

சரி செக்.இன் உடைமைகள் எடுக்கும்பொழுதாவது பிடித்துவிடலாம் பின் தொடர்ந்தால், அங்கும் எல்லோரையும் முந்திக்கொண்டு, தனது பெரிய பெட்டியை எடுத்துக்கொண்டு விமானநிலையத்தில் அவளுக்காக காத்துக் கொண்டிருந்தவனை நோக்கி வேகமாக நடந்தாள். அது அவளுடைய காதலனாகவோ கணவனாகவோ இருக்கக்கூடும், குழ்ந்தை அவளிடம் இருந்து அவனிடம் தாவிக்கொண்டது. நல்ல வாட்ட சாட்டமான இத்தாலிய இளைஞன். குழந்தை மீண்டும் என்னைப்பார்த்துக் கைக்காட்ட ஐரோப்பிய அம்முவும் ஏதோ சொல்ல, அவன் என்னை முறைக்கத் தொடங்கினான்.  இத்தாலியர்கள் முதலில் அடித்துவிட்டுத்தான் பேசுவார்கள், எதற்கு வம்பு என பொருட்களைக் கொடுக்காமலேயே எனது பேருந்து வரும் இடத்திற்குப் போனேன்.  ஒரு வேளை உண்மையான அம்முவும் என்னை சந்திக்க நேர்ந்தால் இப்படித்தான் நடந்து கொள்வாளோ !! என்ற யோசனையுடன் குழந்தையின் விளையாட்டுப்பொருளை எடுத்துப் பார்த்துக் கொண்டிருக்கையில் ஐரோப்பிய அம்முவின் கார் கடந்தது. முன்னிருக்கையில் இருந்த குழந்தை பொம்மையைப் பார்த்து தையத்தக்கா என ஆட, அந்த ஐரோப்பிய அம்மு என்னைப் பார்த்தாள், அவளின் மாறும் முகபாவத்தைக் கவனிக்கும் முன்னர் எனதுப் பேருந்து இடையில் வர, மற்றும் ஒரு சிறுகதை அனுபவத்துடன் பேருந்தில் ஏறினேன்.