உபரி ஓட்டங்கள் (Extras 30-December-2009)

சுவீடன் வந்தபின் முதன் முறையாக திரையரங்கு ஒன்றில் அவதார் திரைப்படம் பார்த்தாகிவிட்டது. 150 இருக்கைகள் கொண்ட சிறிய அரங்கத்தில் சுவிடீஷ் சப் டைட்டில்களுடன் ஆங்கிலப் படமாகவே திரையிட்டு இருந்தனர். சில வசனங்களை கீழே இருக்கும் சப்டைட்டில்களைப்படித்து புரிந்து கொள்ளும் அளவுக்கு எனது மொழிப்புலமை வளர்ந்திருப்பது மகிழ்ச்சியாக இருந்தது. நாவி நேத்ரேயி கதாநாயகன் ஜேக்கை கிஸ்ஸடிக்கும் காட்சியில் விசில் அடிக்க எத்தனித்த அப்பாவி கணேசனைக் கட்டுப்படுத்துவதற்குள் போதும் போதும் என்றாகிவிட்டது.

படத்தின் பிரம்மாண்டம், நடிப்பு எல்லாவற்றையும் காட்டிலும் படத்தில் சிறப்பாக இருந்த அரசியலை எத்தனைப் பேர் புரிந்து கொண்டார்கள் எனத் தெரியவில்லை.

ஜேக் நாவிக்களிடம் உரையாற்றுகின்ற இந்த வசனம், They've sent us a message... that they can take whatever they want. Well we will send them a message. That this... this is our land!!!

அன்று தங்கத்திற்காக, இன்று பெட்ரோலுக்காக மக்களை நசுக்கி அழித்து, நான்கு திசைகளிலும் வளங்களைச் சுரண்டும் மேற்கத்திய உலகத்தை எதிர்கொள்ள நிஜமாகவே ஒரு/சில ஹீரோ(க்கள்) இப்படி வரமாட்டார்களா என எண்ண வைத்தது.

நாவிக்களை அழிக்க வரும் அதிவேக விமானங்களைப் பார்த்தவுடன் Made in Sweden என்று கமெண்ட் அடிக்க வேண்டும் போல இருந்தது.

ஆனால் இன்னும் ஒரு வருடம் படிப்பு இருக்கின்றதே !!!

---

நேற்றிரவு அலுவலகம் முடிந்து பேருந்தில் வீடு திரும்பிக் கொண்டிருக்கும்பொழுது, நான்கு வீடுகள் தள்ளி குடியிருக்கும் சோமாலியாவைச் சேர்ந்த இளைஞனைச் சந்தித்தேன்.அவனை இதற்குமுன்னர் சிலமுறை தெருமுனைகளில் சந்தித்துப் பேசி இருக்கின்றேன். சோமாலிய
தேசத்தவர்கள இந்திய முகக்களையுடன் , இயல்பான ஆப்பிரிக்க கருப்பு நிறத்தைக் காட்டிலும் சற்று மாநிறமாக இருப்பார்கள். பேருந்தில் வீல்சேர் இறங்குவதற்கான பலகை எடுத்துப்போடுவதில் உதவி செய்த அவனிடம் வீடு வரும் வரை பேசிக்கொண்டே வந்தேன்.

"மேன் , ஐ காட் அரெஸ்டட்"

"அய்யோ!! என்னடா ஆச்சுப்பா!!" எனக்கேட்டபொழுது, முந்தைய இரவு ஒரு கைகலப்பிற்காக கைது செய்ப்பட்டதாக கூறினான். ரோன்னிபி நகரத்தில் பொதுவாக சோமலியர்கள் எந்த வம்புதும்புக்கும் போக மாட்டார்கள். அரபு நாடுகளிடம் இருந்து புலம்பெயர்ந்தவர்களைக்
காட்டிலும் இவர்கள் அமைதியாகவே இருப்பார்கள். நிறம் ஒரு காரணமாக இருக்கலாம்.

என்ன ஆயிற்று விளக்கமாக கேட்டபொழுது, இரவு விடுதி ஒன்றில், இந்த இளைஞன் சில சோமாலிய தேசத்து நண்பர்களுடன் மது அருந்திக் கொண்டிருந்தபொழுது, அடுத்த மேசையில் இருந்த ஒரு சுவிடீஷ் மத்திய வயது ஆள்,

"டே கருப்பனுங்களா !! இங்கே எதுக்குடா வந்தீங்க, ஓடுங்கடா உங்க நாட்டிற்கு" என ஆத்திரமூட்டும் வகையில் பேசியபின்னரும் பொறுமைக் காத்த இவர்கள் , குடும்பத்தைப் பற்றி இழுத்தவுடன் கோபத்தை அடக்கமாட்டாமல் , இந்த சோமாலிய இளைஞன் சுவிடீஷ் ஆளை
ஒரு குத்து விட, போலிஸுக்கு தகவல் தெரிவிக்கப்பட்டு, வந்த போலிஸார் சுவிடீஷ் ஆளை கண்டித்து விட்டுவிட்டு, இவனைத் தாக்கிய குற்றத்திற்காக கைது செய்து ஒரு நாள் ரிமாண்டில் வைத்து விட்டார்களாம்.

"ஐ டோண்ட் நோ, ஹவ் டூ ஐ ஃபேஸ் மை பேரண்ட்ஸ்" எனக் கண்கலங்கியபடி போனவனுக்கு "மே காட் பிளஸ் யூ" என ஆறுதலும், இப்படிப்பட்ட சந்தர்ப்பங்களில் எக்காரணம் கொண்டும் கைநீட்டவேண்டாம் அறிவுரையும் கூறி அனுப்பி வைத்தேன்.

" They slapped two fellas on the wrist and they killed the other fella" என்று சமீபத்திய ஆஸ்திரேலிய - மேற்கிந்திய தீவுகள் ஆட்டத்தில் சுலைமான் பென் தண்டிக்கப்பட்டபொழுது, ஜோயல் கார்னர் சொன்ன வாசகம் நினைவுக்கு வந்தது.

------

ஸ்டீரியோ டைப் காதல் தோல்விக் கதைகளையும் , அரைச்ச மாவையே அரைச்ச பேய்கதைகளையும் எழுதிக் கொண்டிருந்த நான், அஸ்ஸலமு அலைக்கும் எனற இஸ்லாமிய முகமன் வாக்கியத்தை அடிப்படையாக வைத்து எழுதப்பட்டக் கதைப் பரவலாக
வாசிக்கப்பட்டபொழுதும், மக்கள் மேலோட்டமாகப் படித்து அதன் உள்ளார்ந்த அரசியல்களைக் கவனிக்காமல் போய்விட்டார்களோ எனத் தோன்றியது. எழுதி முடித்தபின்னர் மறுவாசிப்புக் கூட செய்யாமல் பதிப்புக்கும் பழக்கமுள்ள நான், சில இஸ்லாமிய நண்பர்களிடம் கருத்துக்
கேட்ட பின்னர்தான் பதிப்பித்தேன்.

உண்மைத்தமிழன் கதையின் நீளம் ரொமப அதிகம் எனச் சொல்லி இருப்பது, ஜெஃப்ரி பாய்காட் , ராகுல் திராவிட் பேட்டிங் ரொம்ப ஸ்லோ என்று சொல்வது போல இருந்தது.

//எவனைப் பார்த்தாலும் தொலைக்காட்சியில் காட்டும் குண்டு வைப்பவனைப் போலவே இருந்தது. // இந்த வாக்கியத்தில் மறைந்து இருக்கும் அரசியலைக் கவனிக்காமல், சில நண்பர்கள் வறுத்தெடுத்துவிட்டார்கள். தொலைக்காட்சியில் இப்படிக்காட்டி காட்டியே தாடி
வைச்சவனெல்லாம் குண்டு வைப்பவன் என ஊடகங்கள் ஆக்கிவிட்டார்கள் என்பதையே சராசரி மனிதனான கதையின் நாயகன் கார்த்தி மூலம் சொல்ல நினைத்தேன். சிறுகதை இலக்கணத்தில் கதை வரவில்லை, கட்டுரையாக வந்து இருக்காலாம் எனசிலர் குறிப்பிட்டு இருந்தனர்.

கட்டுரை எனும்பொழுது தரவுகளுடன் உண்மைகளை மட்டுமே வைக்க வேண்டும். புனைவுகளில் இந்தக் கட்டுப்பாடு இல்லை. ஒரு மையக் கருத்து, அதைச் சுற்றி நடக்கும் சம்பவங்கள், முடிவில் கதையின் ஆரம்பத்திற்கு நேர் எதிரான முடிவு, கதைக்கான காரணங்களைகதையிலேயே சொல்லி விடுவது என்ற எனது சிறுகதை இலக்கணத்திற்கு இது சரியாகப் பொருந்துவதால் இதுவும் சிறுகதையே !!

----


சென்ற உபரி ஓட்டங்கள் பதிவு கேள்விக்கான விடை ஆடம்பரோர். இவர்தான் முதன் முதலாக நியுசிலாந்து அணிகாக ஆடிய மவோரி இனத்தைச் சேர்ந்தவர். பரோடாவில் நடைபெற்ற இந்திய அணிக்கெதிரான ஒரு நாள் ஆட்டம் ஒன்றில் பவுண்டரிகளோ சிக்ஸரோ அடிக்காமல்

அதிக ரன்களைக் குவித்தவர் என்ற சாதனைக்கு சொந்தக்காரர். இவர் அடித்த ரன்கள் 96.


நியுசிலாந்து அணியில் ஆடிய மற்ற மாவோரி இன ஆட்டக்காரர்களில் ரோஸ் டெய்லர், டேரல் டஃபி குறிப்பிடத்தக்கவர்களாவர். ஒரு முறை மார்டின் க்ரோவ் , வர்ணனையின் போது மவோரி ஆட்டக்காரர்களுக்கு உயர்தர கிரிக்கெட் விளையாடும்பொழுது தேவையான பொறுமை
இல்லை எனக்கூறப்போக அது பிரச்சினையாக, பின்னர் மார்ட்டின் க்ரோவ் மன்னிப்புக் கேட்டார்.

----


சுதந்திரப்போராட்ட வீரர், இரண்டு மாநிலங்களுக்கு முதல்வராக இருந்தவர், படிப்பில் பல்கலைகழகத்திலேயே முதன் மாணவராகத் தேறியவர், பிரதமர் பதவியை மயிரிழையில் தவறவிட்டவர், காங்கிரஸை இரண்டாக உடைத்தவர் இவ்வளவு பெருமை வாய்ந்த என்.டி.திவாரி

உடல்நலக் காரணங்களுக்காக சமீபத்தில் ஆந்திர மாநில ஆளுனர் பதவியில் இருந்து விலகினார். நிஜக்காரணமான அஜால் குஜாலை டைம்ஸ் ஆஃப் இந்தியா பத்திரிக்கை , தனது இணையதளத்தில் இப்படி செய்தியாக வெளியிட்டது வெடிச்சிரிப்பை வரவழைத்தது.




After sex sting, AP governor Tiwari ejects prematurely

செய்தி இங்கே

---

இந்த உபரி ஓட்டங்கள் பதிவுக்கான கேள்வி, கீழ்காணும் படத்தில் இருக்கும் அம்மணி யார்? க்ளூ கொடுத்தால் எளிதாக கண்டுபிடித்துவிடுவேன் என வால்பையன் சொல்லுவார்.

அஸ்ஸலாமு அலைக்குமா கும்தலக்கடி கும்மாவா - சிறுகதை

அஸ்ஸலாமு அலைக்கும், கடவுள் உன்னைப் பாதுகாப்பாராக எனும் பொருள்படும்படியான வாக்கியத்தை பனி படர்ந்து இருக்கும் எனது வீட்டுத் தெருவில் நடந்து போகும்பொழுது பத்தாவது தடவையாகக் கேட்டிருப்பேன்.

கருப்புத் தலைமுடியும் மாநிற மேனியும் இருந்தால் உடனே அஸ்ஸலாமு அலைக்கும் தான், வெற்றுப்புன்னகையுடன் ஹல்லோ ஹாய் என்று பதில் சொன்னவுடன் அவர்கள் முகம் கருத்துப் போய்விடும். இந்த ரோன்னிபி நகரத் தெருக்களில் நான்கு பேரை பார்த்தால் அதில்
இரண்டு பேர் மத்திய தரைக்கடல் நாடுகளைச் சேர்ந்தவர்களாக இருப்பார்கள்.இந்த அகதிகள்தாம் என்னவோ அரசாங்கத்தையே நடத்துவது போல இவர்களின் அட்டகாசங்களை சகிக்க இயலாது. அடுத்த தலைமுறைக்கு சேவகம் பண்ணுவதற்காக தங்களை இறக்குமதி செய்து இருக்கிறார்கள் என்பதைப் புரிந்து கொள்ள இயலாத அரபுதேச அரசர்கள் இவர்கள். சுவீடனின் சர்வதேச அரசியல் தெரியாத அப்பாவி சுவிடீஷ் குடிமக்கள்,இந்த தேசம் சுவரேபியா ஆகிவிடுமோ என கவலையுடன் குழுமங்களில் உரையாடிக்கொண்டிருக்கிறார்கள்.

சரித் தெருக்களில் தான் இப்படி என்றால் கல்லூரிக்குப் போனால் முக்கால்வாசி மாணவர்கள் பாகிஸ்தானியர்கள். ஏதோ இந்த தேசமும் நகரமும் அவர்களது நாட்டில் இருப்பதைப்போல எண்ணத்திலேயே திரிவார்கள். பொன்னிறத் தலைமுடியும் வெளுப்பு நிறமும் இல்லாமல்
இருப்பவர்கள் எவரைக் கண்டாலும் சலாம் ஒ அலைக்கும், இது உருது. இதைக் கேட்கும்பொழுதெல்லாம் கும்தலக்கடி கும்மா என்ற் வாக்கியம் தான் நினைவுக்கு வரும்.

ஒரு முறை கல்லூரியில் கண்ணாடித் தனியறையில் உட்கார்ந்து அம்முவுடன் தொலைபேசியில் பேசிக்கொண்டிருக்கும் பொழுது, நீண்ட வெள்ளை அங்கி, தாடியுடன் வந்து கதவைத் தட்டியவருக்கு பதில் சொல்வதற்காக திறந்தால்,


"ஜல்தி கரோ நமாஸ் ஷுரு ஹூனே வாலே ஹய் மஸ்ஜித் கி சலே"

தொழுகை ஆரம்பிக்கப்போகின்றது, வந்து சேரவும் என அதிகாரத்தோரணையுடன் உருதுவில் சொல்லிவிட்டு போன பொழுது வந்த ஆத்திரம் அம்மு நெற்றியில் சந்தனம் வைக்கச் சொல்லி என்னுடன் போட்ட சண்டையில் கரைந்துப் போனது. கல்லூரியில் கொடுத்து இருந்த பொது பிரார்த்தனைக் கூடத்தை இவர்கள் தங்களுக்கான மசூதியாகவே மாற்றிவிட்டார்கள். அந்த அறையின் கூரையின் மேல் நான்கு கோபுரங்கள் மட்டும் தான் பாக்கி.

மற்றவர்கள் அங்கு போவதும் இல்லை, போக வேண்டிய சந்தர்ப்பங்களும் அமைந்ததில்லை. பக்கத்து நகரமான கார்ல்ஸ்க்ரோனாவில் அல்லேலூயா கூட்டங்கள் நடைபெறும் இடங்கள் இருப்பதால் நைஜீரிய கிறிஸ்தவ மாணவர்களும் இதைக் கண்டு கொள்வதில்லை. சுவிடீஷ் மாணவர்களுக்கு கிறிஸ்துமஸ் தினத்தில் மட்டுமே தேவாலயம் இருக்கும் திசை நினைவுக்கு வரும்.

சரி இதாவது பராவாயில்லை, அதிகம் பேர் இருப்பதால் அறிந்தும் அறியாமலும் செய்கிறார்கள் என விட்டுவிடலாம். எங்களுக்கு சிலப்பாடங்களுக்குத் தேர்வு கிடையாது. குழுவாக இருந்து ஆராய்ச்சிக்கட்டுரை சமர்ப்பிக்க வேண்டும். தனியாளாக இராப்பகலாக கண் விழித்து ஆராய்ச்சிக் கட்டுரையைச் சமர்ப்பித்து தகவலை சக பாகிஸ்தானிய குழுவினரிடம் சொன்னால்

"ஸே இன்ஷா அல்லா" எனச்சொல்லும்பொழுது வரும் எரிச்சல் இருக்கிறதே!!! "போங்கடா நீங்களும் உங்க குல்லாவும்" எனச் சொல்லத் தோன்றும்,ஆனால் இல்லாத ஒன்றைக் கேலி செய்து ஏன் உடன் இருக்கிற நபர்களை வருத்தப்பட வைக்கவேண்டும் என சொல்லாமலேயே விட்டுவிடுவதுண்டு.

என்னுடைய அறைத் தோழன் அப்பாவி கணேசன் கதைதான் பரிதாபம், ஆள் நல்ல வாட்டசாட்டமாக பஷ்டு மொழி பேசுற பதான்கள் மாதிரி உருவத்தில் இருப்பார்.அவருக்கு சலாம் அலைக்கும் உடன் கட்டிப்பிடி வைத்தியமும் நடக்கும்.

"யோவ் சுவீடன்ல பசங்களைக் கட்டிப்பிடிக்காதீங்க, ஹோமோன்னு சொல்லிடுவானுங்க" என அச்சுறுத்திய பின்னர்தான் கணேசனும் தூரம் இருந்து வணக்கம் சொல்ல கொள்ள பழகிக் கொண்டார்.

என்னங்க!! கரசேவைக்குப் போய் வந்த காவிச்சட்டைக்காரன் மாதிரி மாதிரி பேசுறேன்னு நினைக்கிறீங்களா!! கருப்புச்சட்டைகாரரின் கருத்துக்களோடு காந்தியமும் புரிந்த என்மனப்பக்குவம் கொஞ்சம் கொஞ்சமாக குறைந்து வருவதாகவே உணர்கிறது. தமிழகத்தில் இருந்தபொழுது இப்படி இல்லை.

92 ஆம் ஆண்டு உலகக்கோப்பை சிட்னி ஆட்டத்தில் , பக்கத்து வீட்டு பஷீரை இந்தியாவுடன் பாகிஸ்தான் தோற்ற பொழுது எங்களது குடியிருப்பில் இருந்த அனைத்து சிறுவர்களும்

"டேய், உங்க பாகிஸ்தான் தோத்துப்போச்சா" கேலி செய்த பொழுது அவன் டெண்டுல்கரின் தீவிர ரசிகன் என்பதையும் புரிந்த கொண்டு ஆறுதல் அளித்தது நான்தான்.


என் தாத்தா ஊரில் இருந்து எங்க வீட்டுக்கு வரும்பொழுது எல்லாம் "இந்த துலுக்கப் பசங்க பயணம் போய் போய் நிறையக் காசுபார்த்துடுறனுங்க" என அலுத்துக்கொள்ளும்பொழுதேல்லாம்

"இப்படி எல்லாம் சொல்லிட்டு ரம்ஜான்க்கு முதல் ஆளாக பிரியாணிக்கு நில்லுங்க" என்று சொல்லி என் அப்பாவிடம் கொட்டு வாங்கியதுமுண்டு.

"மாட்டுக்கறி திங்கிற சையத் அக்தர்ஷா எப்படிறா இப்படி நல்லா மார்க் வாங்குறான்" பள்ளித்தோழன் வாசுதேவன் அடித்த கிண்டலுக்குப்பின்னர் வாசுதேவனின் நட்பை முறித்துக் கொண்டவன் நான்.

"மச்சான் , சுவீடன் விசாவுக்கு பத்து லட்சம் புரட்டனும்டா" சொன்னவுடன் வங்கியில் இருந்து தனது இரண்டு லட்சங்களை எடுத்துக் கொடுத்தது அஜீஸ் அகமது தான். இப்படி தமிழக இஸ்லாமியர்களுடன் நட்பு பாராட்டிய என்னால் இவர்களுடன் சகஜமாகப் பழக முடியவில்லையே என்பது வருத்தமாகத்தான் இருந்தது. எவனைப் பார்த்தாலும் தொலைக்காட்சியில் காட்டும் குண்டு வைப்பவனைப் போலவே இருந்தது.


கடவுள் நம்மைப் பற்றி கவலைப்படுவதில்லை, நாமும் கடவுளைப் பற்றி கவலைப் பட வேண்டியதில்லை என என் கொள்கை என்க்கு மட்டும் என இருக்கும் நான் அம்முவைத் தவிர வேறு யாருடனும் கடவுள் சம்பந்தப்பட்ட விசயங்களை விவாதிப்பதில்லை.

"நீ சாஃப்ட்வேர் ஆர்க்கிடெக்சர் பரிட்சை நல்லா எழுதனும்னு பிள்ளையார் கோயில்ல 108 சுத்து சுத்தியும் நீ ஏண்டா ஃபெயில் ஆன" அம்முவின் நம்பிக்கையை பொய்யாக்கியதற்கு நான் மனதிற்குள் மன்னிப்புக் கேட்டாலும்,

"கடவுளுக்கும் கல்விக்கும் சம்பந்தம் இல்லை. பட் ஒன் திங் கடவுளோடு சிற்பங்களுக்கும் கலவிக்கும் சம்பந்தம் இருக்கு"

"கார்த்தி, நீ இப்படியே பேசிட்டு இரு, ஒரு நாள் சாமி சாமின்னு தெருத்தெருவா சுத்தப் போற"

"குட் ஈவ்னிங் அங்கிள்" என மழலைக்குரல் கேட்டு நிகழ்கால நினைவுக்கு வந்தபொழுது , எதிரில் தன்குழந்தையுடன் வாசிம்ராசா நடந்து வந்து கொண்டிருந்தார்.

வாசிம்ராசா பாகிஸ்தானி தான், ஆனால். இவர் இந்தியாவில் இருந்தால் கண்டிப்பாக ஏதாவது ஒரு மாநிலத்துக்கு ஆளுனராகப் போகக்கூடிய அளவிற்கு இந்து அரசியல்வாதிகளுக்குப் பிடித்தமான அப்துல்கலாம் மாதிரியான இஸ்லாமியர். "இந்தியா, ஹிந்தி நாஹி மாலும்"
எனக் கேட்காத ஆங்கிலம் சரளாமாகப் பேசும் பஞ்சாபி பாகிஸ்தானியர்.

ஆரம்ப சில சந்திப்புகளில் அவர் குழந்தை சலாம் ஒ அலைக்கும் எனத்தான் சொல்லிக்கொண்டிருந்தது. என்னுடைய மனோபாவத்தைப் புரிந்து கொண்ட வாசிம், அவரின் குழந்தையிடம் அப்படிச் சொல்லவேண்டாம் என அறிவுறுத்தி இருப்பார் போலும், இப்பொழுதெல்லாம் சொல்வதில்லை.

பாகிஸ்தானின் கல்வி முறைகளில் மதச்சார்பு குறைந்தால் மட்டுமே நாடு வளமைடைய வாய்ப்பு உண்டு என்பதை ஒப்புக்கொள்பவர். உன் நாட்டைப்போல கருப்புச்சட்டைகளும் கம்யூனிஸ்ட்களும் இருந்திருந்தால் , நீ குறையாகச் சொல்லும் விசயங்கள் எங்களிடம் இருந்திருக்காது என்று சொல்லும் அவரின் நேர்மை எனக்கு மிகவும் பிடிக்கும்.


" வாட் ஹேப்பண்ட் டு யுவர் குங்கும்" வாசிமிற்கு , நான் நெற்றியில் இட்டு இருந்த சந்தனம் பனிச்சாரலில் கரைந்துப் போய் இருப்பதைப் பார்த்துக் கேட்டார்.

" யூ லுக் ஸ்மார்ட் அண்ட் லுக்ஸ் டிபிகல் இண்டியன் வித் தட் "

" தாங்க்ஸ் " சிரித்துக்கொண்டே விடைபெற்றேன்.

வீட்டின் எதிரில் விளையாடிக்கொண்டிருந்த குழந்தைகள் என்னைப்பார்த்து சிரித்து விட்டு விளையாட ஆரம்பித்து விட்டன. முன்னைப்போல இவர்கள் அஸ்ஸலாமு அலைக்கும் சொல்வதில்லை.குழந்தைகள் மற்றவர்களின் வெறுப்பை எளிதாகப் புரிந்து கொள்வார்கள்.

வீட்டிற்கு வந்து அம்முவை இரண்டு முறை தொலைபேசியில் அழைத்தேன். அவளிடம் இருந்து பதில் இல்லை. வெந்நீரில் குளித்து விட்டு, அம்முவுக்குப் பிடித்தமாதிரி மெல்லிய சந்தனக் கீற்றை நெற்றியின் மையத்தில் இட்டுவிட்டு இணையத்தில் ரோன்னிபி உள்ளூர் செய்திகளை வாசிக்க ஆரம்பித்தேன்.

பாக்தாத் நகரில் ஏற்பட்ட குண்டு வெடிப்பில் ரோன்னிபி நகரத்தில் இருக்கும் அகதிகளின் உறவினர்கள் பலர் மரணம், சிறப்புத் தொழுகை கல்லூரி வளாகத்தில் உள்ள வழிபாட்டு அறையில் நடைபெறும் என்று இருந்தது. வருத்தமாக இருந்தது.

அம்முவின் அழைப்பு வர,

"பெங்களூர் டிரிப் எப்படி இருந்துச்சுடா குட்டிமா!!"

"செம ஆட்டண்டா, போட்டோஸ் அனுப்பிச்சிட்டே இருக்கேன், போட்டோஸ்ல என்னைத் தவிர வேற எவளையாவது சைட் அடிச்சே மவனே உனக்கு சாவுதான்!!"

அம்முவின் அப்பா வேதகிரி , பாண்டிச்சேரி அரசாங்கத்தில் உயர் அதிகாரி, கண்டிப்பு கட்டுப்பாடுகள், எங்கு போனாலும் அபபாவின் நிழலில் இருந்து அடக்கமாகவே இருந்து பழக்கப்பட்டவள், பெங்களூர் ஒரு வார அலுவலக் சுற்றுலாவில் மடைதிறந்த வெள்ளமாக இவ்வளவு கொண்டாட்டமாக இருந்ததில் எனக்கு வியப்பில்லை.

"ஓய், வேதகிரி இல்லாட்டி இவ்வளவு ஆட்டம் போடுவியா நீ"

"நீ இப்ப எதுக்கு அப்பாவை ஞாபகப்படுத்துற, நான் ஏற்கனவே எப்படி உன்னைப் பத்தி அவர்கிட்ட சொல்றதுன்னு பயந்து நடுங்கிக்கிட்டு இருக்கேன்!!!"

அம்மு பெங்களூர் சுற்றுலாப் பற்றி சொல்லிக்கொண்டிருக்க, ஆழ்மனதில் அரபு அகதிகளைப் பற்றி ஓடிக்கொண்டிருந்தது. கலவர பூமியில் இருந்து வந்து தப்பித்தோம் பிழைத்தோம் என தஞ்சம் புகுந்த நாட்டில் அவர்கள் ஆசுவாசப்படுத்திக் கொள்வது எனக்கு எரிச்சலாக இருப்பது
தவறோ!!

அவள் பேசி முடித்தவுடன், நான் என்னுடைய ஒரு வாரக் கதையை ஆரம்பித்தேன். வாசிம்ராஜா சந்தனக் கீற்றைப்பற்றி கேட்டதைச் சொன்னேன்.

"கார்த்தி உன்கிட்ட ரொம்ப நாளா ஒன்னு கேட்கனும்னு நினைச்சிட்டு இருக்கேன்!! நீ குமதல்லகடி கும்மான்னு கிண்டல் பண்ற மாதிரி, நீ எனக்காக வைக்கிற நெத்தி சந்தனத்தை வெட்டுக்காயமான்னு கேட்டா உனக்கு எப்படி இருக்கும்"

அவள் கேட்டபிறகு தான் எனக்கு உரைத்தது, இதுவரை யாருமே குறிப்பாக எந்த ஒரு பாகிஸ்தானியும் அதைப் பற்றிக் கேட்டதே இல்லை. மனதில் இருந்த வெறுப்பு அகன்று மனது லேசாக மாறியது. வழமைப்போல இரவு முழுவதும் சங்கீத சுவரங்கள் பாடிவிட்டு ,

மறுநாள் காலை கல்லூரிக்குப்போகும் பொழுது,எனது குடியிருப்பின் இடதுபுறம் கொட்டிக்கிடந்த வெண்பனிக்குவியலில் பனிமனிதனை செய்து விளையாடிக்கொண்டிருந்த குழந்தைகள் என்னைப்பார்த்துச் சிரித்தன.

அவர்களைப் பார்த்து அஸ்ஸலாமு அலைக்கும் என்றேன். சில வினாடிகள் நிதானித்துவிட்டு

"வ அலைக்கும் சலாம்" என்று மொத்தமாக மழலை முகத்துடன் என்னைப்பார்த்து சொன்னார்கள். குழந்தைகளின் சிரிப்பில் இறைத்தன்மை தெரியும் எனப்புரிந்தது. அந்த வேற்று மொழி வாக்கியங்கள் எனது மொழியாகவேப் பட்டது. அம்மு காதலைச் சொன்ன நாளை விட இன்று அழகாக இருக்கிறது என்ற உணர்வுடன், என் மனதைப்போலவே வெண்மையாக படர்ந்து இருந்த பனிப்பரப்பில் நடக்கலானேன்.

உபரி ஓட்டங்கள் (Extras 22-December-2009)

கிரிக்கெட் ஆட்டத்தில் உபரி ஓட்டங்கள்(Extras) என்று ஓட்டங்கள் கணக்கெடுக்கப்ப்படும் ஒரு வகை உண்டு. பெரும்பாலும் இந்த உபரி ஓட்டங்கள் பெருமளவில் வெற்றி தோல்வியில் பங்கு பெறுவதில்லை என்றாலும், சிற்சிலச் சமயங்களில் ஆட்டத்தின் முடிவை மாற்றி
அமைக்ககூடிய வகையில் எண்ணிக்கை அமைந்து விடும்.99 ஆம் ஆண்டு உலகக் கோப்பை கிரிக்கெட் போட்டி ஒன்றில் இந்தியா ஜிம்பாப்வே அணிக்கெதிராக பாரி வள்ளல் போல 51 உபரி ஓட்டங்களை வாரி வழங்கியது.அதில் 31 ஓட்டங்கள் நோபால்No ball), மற்றும் வொயிட்(Wide) முறைகளில் கொடுக்கப்பட்ட ஓட்டங்கள். கடைசியில் இந்தியா மூன்று ஓட்டங்களில் வெற்றி வாய்ப்பை இழந்தது.

அந்த தோல்வியினால் அடுத்து வரும் ஆட்டங்கள் அனைத்தையும் வென்றால் மட்டுமே அடுத்தச் சுற்றுக்கு தகுதிப் பெற முடியும் என்ற நிலை ஏற்பட்ட தோட மட்டும் அல்லாமல்
இந்தச் சுற்றில் பெற்றிருக்க வேண்டிய போனஸ் பாயிண்டுகளையும் இந்தியா இழந்தது.அடுத்தச் சுற்றில்(super six) தர்ம அடி வாங்கி உலகக் கோப்பையை போட்டிகளில் இருந்து இந்தியா வெளியேறியது.



ஒரு வேளை ஜிம்பாப்வே அணிக்கெதிரான ஆட்டத்தில் இந்தியா குறைவான உபரி ஓட்டங்களைக் கொடுத்து வென்றிருக்குமானால் உலகக் கோப்பை அரையிறுதி வரையாவது இந்தியா முன்னேறி இருக்க வாய்ப்பு இருந்தது.அந்த ஆட்டத்தின் விபரத்தைப் பார்க்க இங்கேச் சொடுக்கவும்


திடீரென ஏன் உபரி ஓட்டங்கள் பற்றியக் கதை என்கிறீர்களா, பிரபலபதிவர்கள் எழுதும் கொத்துபரோட்டா, என்'ண்ணங்கள், சாண்ட்விச் அண்ட் நான்வெஜ், நங்கநல்லூர் பஞ்சாமிர்தம், குவியல், இட்லி-வடை-பொங்கல் ஆகியனவற்றை தொடர்ந்து வாசித்து வந்த
பாதிப்பினால் நானும் உபரி ஓட்டங்கள் தலைப்பில் சிலப் பல சுவாரசியமான தகவல்களை, அனுபவங்களை, பார்த்து ரசித்து சிந்தித்த விசயங்களை , புலம்பல்களைப் பதிவு செய்யலாம் எனத் தோன்றியது. மேற்சொன்ன பதிவுகளைப் போல சுவாரசியமானதாக இருக்குமா எனத்
தெரியவில்லை. இருந்த போதிலும் முயற்சித்தல் தவறில்லையே!!!

உபரி ஓட்டங்கள் ஆட்டத்தின் வெற்றித் தோல்விகளுக்கு பங்கு வகிப்பதைப் போல என்னுடைய இந்த உபரி ஓட்டங்களும் உங்களின் அன்றாட வாழ்வின் சுவாரசியத்தை அதிகப் படுத்தலாம் அல்லது yet another post என்ற வகையில் படித்தும் படிக்காமலும் ஒதுக்கிவிடலாம். வாரத்திற்கு ஒரு முறையாவது எழுதிவிட வேண்டும் என்ற உறுதியில் இதோ எனது முதல் உபரி ஓட்டங்கள் தொகுப்பு,

உபரி ஓட்டங்கள் என்று பெயர் வைத்தபின் கிரிக்கெட்டை வைத்து துவக்குவதுதான் சாலப்பொருத்தமாக இருக்கும். நேற்றைய ஒரு நாள் ஆட்டத்தில் தினேஷ் கார்த்திக் தான் டெண்டுல்கரின் சத வாய்ப்பைக் கெடுத்து விட்டார் என ரசிகர்கள் நொந்து கொள்வதாக எழுதி
இருக்கின்றனர். தினேஷ் கார்த்திக் விரைவாக ஒட்டங்கள் பெற்றது தவறு, டெண்டுல்கருக்கு மட்டையடிக்க வாய்ப்பு அளித்திருக்க வேண்டும் என கூறுவதில் நியாயம் இருந்தாலும், தொடர்ந்து கார்த்திக்கை ஆட்டமிழக்கச் செய்யும் வகையில் நடுவரிடம் முறையிட்டுக்கொண்டிருக்கையில் பந்தை அதிரடியாக சிகஸருக்கு விரட்டாமல் தினேஷ் கார்த்திக் ஆட்டமிழந்து இருந்தால், அடுத்தடுத்து விக்கெட்டுகளை இழந்து இந்தியா ரசிகர்களுக்கு முன்னொரு காலத்தில் பழக்கப்பட்ட தோல்விக் காட்சிகள் மறுஒளிபரப்பு செய்யப்பட்டிருக்கும்.ஒரு முனையில் நான்கு பந்துகளில் நான்கு விக்கெட்டுகளை வீழ்த்திய மலிங்கா பந்து வீசிக் கொண்டிருந்தார் என்பது குறிப்பிடத்தக்கது.



எதிர்பாராத சமயங்களில் எதிர்பார்க்காத விசயங்களை அள்ளிதருவதில் கிரிக்கெட் ஆட்டங்களைப்போல வேறு எதுவும் இல்லை. கிரிக்கெட்மட்டும் பெண்ணாக இருந்திருந்தால் அவளை நான் எப்பாடுப் பட்டாவது திருமணம் செய்து இருப்பேன். ஜெனி,ரம்யா, அம்முவைப்போல கிரிக்கெட்டும் என்னை விட்டுப் போய் இருக்க மாட்டாள். கிரிக்கெட் தந்த சுவாரசியங்கள் போல வேறு எந்த விளையாட்டும் எனக்குத்தராததாலும் கிரிக்கெட் இந்திய துணைக்கண்டத்தில் பிறந்த சாராசரி மனிதனின் மனோநிலைக்கு ஏற்ப இருப்பதாலும் கிரிக்கெட்டை பெண்ணாக உருவகிக்க முடிகிறது என நினைக்கின்றேன்.

சுவாரசியம் என்றதும், தோழர் ஒருவரிடம் ஏற்பட்ட ஒரு சமீபத்திய உரையாடல் நினைவுக்கு வருகிறது. வாழ்க்கை எப்படி இருக்கின்றது என்ற அவரின் கேள்விக்கு சுவாரசியமாக இருக்கின்றது என்றேன். அவருக்கு எனது அம்முவுடன் ஆன பிரிவு தெரியும். அவருக்கு ஒரே
வியப்பு, 100 நாட்கள் கூட ஆகவில்லை, எப்படி மகிழ்ச்சியாக இருக்கின்றீர்கள் என்று கேட்டார். நான் பதில் சொல்லவில்லை. சிரிப்பானை போட்ட்டுவிட்டு அடுத்த பேச்சுக்குத் தாவினேன். நான் வாழ்க்கை சுவாரசியமாக இருக்கின்றது என்று தானே சொன்னேன், மகிழ்ச்சி
என்று சொல்ல வில்லையே!! . சோகங்கள் வருத்தங்கள், ஏமாற்றங்கள் கூட சுவாரசியமான அனுபவங்களைத் தரும் அல்லவா!! அம்முவிற்கு நான் Phd பட்டம் பெறவேண்டும் என்று ஒரு விருப்பம். அடிக்கடி எனக்கு நினைவுப் படுத்தி என்னை உற்சாகப் படுத்துவாள். அவளின் வேண்டுகோளை நிறைவேற்றும் விதமாக என்னுடைய மாஸ்டர்ஸ் படிப்பிற்குப் பின் ஆராய்ச்சிப்படிப்பு படிக்க தயாராக வேண்டும் என ஐரோப்பிய பல்கலைக் கழகங்களைத் தேடிக்கொண்டிருக்கையில் பின்லேந்து தேசத்தில் படிக்க இருக்கும் வாய்ப்புகளைப் பற்றிய அதிகாரப்பூர்வமான இணையதளம் கண்ணில் சிக்கியது.மேற்படிப்பு படிக்க விரும்புவர்கள் இந்த தளத்தில் http://www.universityadmissions.fiஉபயோகமான தகவல்களைப் பெற்றுக்கொள்ளலாம்.


புதிய தலைமுறையின் ஸ்வீட் ஸ்வீடன் மேற்படிப்புப் பற்றியக் கட்டுரைக்குப்பின்னர் மின்னஞ்சல்கள் வந்தவண்ணம் உள்ளது. வரும் மின்னஞ்சல்களில் வருத்தமான விசயம் என்னவெனில், கன்சல்டன்சிகளை அணுகலாமா என்றக் கேள்வியுடன் மின்னஞ்சல்கள் வருவதுதான்.கட்டுரையின் முக்கிய நோக்கமே பரவலாகத் தகவல்கள் போய்ச்சேர வேண்டும், ஆலோசனை மையங்களிடம் தேவை யில்லாமல் பணம் கட்டி ஏமாறவேண்டாம் என்பவை தான். அந்தக் கட்டுரையில் மாணவர்களே படித்துப் புரிந்து கொள்ளும் வகையில் எளிமையான ஆங்கிலத்தில்அனுமதி முறைகள் கொடுக்கப்பட்டிருக்கும் இணையச்சுட்டி http://studera.nu தரப்பட்டுள்ளது. நுனிப்புல் மேய்வது போல தகவல்கள் தரும் கட்டுரைகளை வாசிக்கும் பழக்கம் மேற்படிப்பு படிக்க விரும்பும் மாணவர்களிடம் இருக்ககூடாது.
நினைவூட்டல் ஜனவரி 15 ஆம் தேதி வரை இணையதளத்தில் மேற்படிப்பிற்காக பதிவு செய்யலாம். சிலரின் மின்னஞ்சல்களுக்குப் பதில்தர இயலவில்லை. நேரத்திட்டமிடலில் இன்னும் நான் தேர்ச்சி பெறாததால் வழமையான பதிலான, நேரம் இல்லை,மன்னிக்கவும் என்ற பதிலை சொல்லிவிடுகின்றேன்.


பதிவுலக நண்பரான செந்தழல் ரவி கொடுத்த தகவலினால், டெலினூர்(Telenor) என்ற சுவிடனின் மிகப்பெரிய தொலைத் தொடர்பு நிறுவனத்தில் ஒரு வருடத்திற்கான சம்பளமற்ற பயிற்சி கிடைத்திருக்கின்றது. பயிற்சி என்ற போதிலும் நானும் அங்கு வேலைப் பார்க்கும்
ஒருவராகத்தான் கருதப்படுவேன். வாரத்திற்கு 30 மணி நேரம் அலுவலகத்திற்கு வர வேண்டும். கணிமை ரவி கொடுத்த பகிர்ந்து கொண்ட தகவலினால் சுவீடன் மேற்படிப்பு சாத்தியம் ஆயிற்று. மற்றும் ஒரு ரவி மற்றும் ஒரு பதிவுலக நட்பு மற்றும் ஒரு பயன்.நன்றி பதிவுலகம். வேலைவாய்ப்புகள் ஒன்றுமே இல்லாதநிலையில் மிகப்பெரும் நிறுவனத்தில் கிடைத்த வாய்ப்புக் கிடைக்க காரணமான செந்தழல் ரவிக்கு ஒரு நன்றியைத் தெரிவித்துக் கொள்கின்றேன். உபரியில் ஒரு உதிரித்தகவல், இந்த டெலினூர் தான் நமது ஊரில் யுனினூர் என்று வந்திருப்பது.





ஐரோப்பாவில் ஏற்பட்டிருக்கும் தொடர் பனிப்பொழிவினால் சுவீடன் பெரிய அளவில் பாதிக்கப்படவில்லை. ரயில்கள் தாமதமாக வந்தாலும், மாற்று ஏற்பாடாக பேருந்துகளை ஏற்படுத்திக் கொடுத்துவிடுகிறார்கள். பனிப்பொழி ஸ்காண்டிநேவியா மக்களுக்கு பழக்கப்பட்ட ஒன்றாகஇருப்பதனாலும் குளிர்காலத்திற்காக தயார் நிலையில் அரசாங்க இயந்திரம் இருப்பதனாலும் அன்றாட வாழ்விற்கு பெரியதாக பிரச்சினை இல்லை. நான் இருக்கும் ரோன்னிபி நகரத்திலும் பணிபுரியும் கார்ல்ஸ்க்ரோனா நகரத்திலும் சென்ற வருடத்தைக் காட்டிலும் பனிபோழிவு அதிகம் தானாம்.


கடைசியாக இந்த வார உபரி ஓட்டக் கேள்வி நியுசிலாந்து தேசத்தில் மவோரிக்கள் எனப்படும் பூர்வக்குடி மக்கள் இன்றும் சிறுபான்மையினராக இருக்கின்றனர். இந்த மவோரி சமூகத்தில் இருந்து நியுசிலாந்து கிரிக்கெட் அணிக்காக ஆடிய முதல் வீரர் யார்? இவர் தன் வசம்

வைத்திருக்கும் மற்றும் ஒரு சுவாரசியமான கிரிக்கெட் சம்பந்தப்பட்ட சாதனை என்ன? விடைகள் அடுத்த உபரி ஓட்டங்கள் பதிவில்.