இனவெறி தென்னாப்பிரிக்காவிற்கு சென்ற இலங்கை கிரிக்கெட் அணி

இனவெறி தென்னாப்பிரிக்காவைப் புறக்கணித்தோம், இலங்கையையும் புறக்கணிக்க வேண்டும் என்று மனித உரிமைப் போராளிகளுடன், மனிதாபிமானம் நிறைந்தவர்களும் குரல் எழுப்பிக் கொண்டிருக்கும் சூழலில்,  வெள்ளையரல்லாதவர்களை வன்கொடுமைகளுக்கு ஆளாக்கி , நிறவெறிக் கொள்கைகளைக் கடைப்பிடித்து வந்து தென்னாப்பிரிக்க நாட்டிற்கு கிரிக்கெட் ஆட சென்ற முதல் “வெள்ளையரல்லாத அணி” இலங்கையின் “கலக” அணி என்பதை கிரிக்கெட் விரும்பிகள் தெரிந்து வைத்துக் கொள்ள வேண்டும்.

இலங்கையின் முதல் டெஸ்ட் அணியின் தலைவர் யார்?
இலங்கைக் காக டெஸ்ட் போட்டிகளில் முதல் பந்தை சந்தித்தவர் யார்?
இலங்கையின் முதல் டெஸ்ட் ஓட்டத்தை அடித்தவர் யார்?
இலங்கையின் அறிமுக டெஸ்ட் ஆட்டத்தில் முதலில் ஆட்டமிழந்தவர் யார்?
இலங்கை அணியில் இருந்து கிரிக்கெட் ஆட தடை செய்யப்பட்ட முதலாம் நபர் யார்?

இவற்றிற்கு எல்லாம் ஒரே பதில். பந்துல வர்ணபுரா (Bandula Warnapura). இந்தப் பெயரை கடைசி இரண்டு வாரங்களில் ஏதேனும் கிரிக்கெட் இணையதளங்களில் பார்த்து இருந்திருக்கக் கூடும். இலங்கை கிரிக்கெட் வாரியத் தலைவராக வர முன்னணியில் இருந்தவருக்கு வயது காலை வாரிவிட்டது.  இலங்கையைச் சேர்ந்த கத்தோலிக்க குருமார், போப் பதவிக்கு வரமுடியாது ஆனது போல, இதுவும் நல்லதற்குத்தான். இல்லாவிடின், கிரிக்கெட் வரலாற்றில் மிகப்பெரும் களங்கம் ஆகி இருக்கும்.

இன்றைக்குத் தமிழ்நாட்டில் ஆட வரக்கூடாது என்று தடைசெய்யப்பட்டிருக்கும் இலங்கை வீரர்கள் தங்களது கிரிக்கெட் திறனை வளர்த்துக் கொண்டதே, தமிழ் நாட்டு அணியுடன் கோபாலன் டிராபிக்கான ஆட்டங்கள் ஆடித்தான். அப்படி ஆடிக்கொண்டிருக்கும் காலக்கட்டத்தில்தான், இலங்கைக்கு பலத்த தயக்கத்துடன் ஐசிசி டெஸ்ட் அங்கீகாரம் கொடுத்தது. டெஸ்ட் அங்கீகாரம் கொடுக்க வைத்ததில், இந்தியா கிரிக்கெட் வாரியம் மிகப்பெரும் லாபி செய்தது என்றும் சொல்வார்கள்.

1982 யில் முதல் நான்கு டெஸ்ட் ஆட்டங்கள் எல்லாம் நல்லபடியாகத்தான் சென்றன. முக்கியமான ஆட்டக்காரர்களைக் கொண்ட இங்கிலாந்தின் கலக அணி ஒன்று , அந்த சமயத்தில் தான், தென்னாப்பிரிக்காவிற்கு சென்று வந்திருந்தது.

இப்பொழுது இலங்கையின் முத்தையா முரளிதரன், எங்களது நாட்டில் எல்லாம் வளமும் நலமுமாக இருக்கின்றது என  அரசாங்கத்தின் ஆளாகச் சொல்வதைப்போல , தென்னாப்பிரிக்காவில் கறுப்பர்கள் பாலும் தேனும் அருந்தி மேல்தட்டில் வசிக்கின்றனர்,  நாங்கள் வேறுபாடு காட்டுவதில்லை என அந்த நாட்டின் வாரியமும் காட்டிக்கொள்ள ஆசைப்பட்டு ஒரு வெள்ளையரல்லாத அணியை தென்னாப்பிரிக்காவிற்கு கொண்டு வர விரும்பியது.

எப்படி இப்பொழுது இலங்கை விரித்த வலையில் மற்ற அணிகள் விழுகின்றனவோ, அப்படி, அப்பொழுது, தென்னாப்பிரிக்கா விரித்த வலையில் இலங்கையில் ஒட்டு மொத்த அணியும் சிக்கிக்கொண்டது. வர்ணபுராவுடன், அஜித் டி சில்வா, அனுரா ரனசிங்கே,  மகேஷ் குணதிலகே, டோனி ஒபாதா ஆகிய பன்னாட்டு வீரர்களுடன் சில கிளப் கிரிக்கெட் வீரர்கள் கொண்ட அணி தென்னாப்பிரிக்கா பயணப்பட்டது.

இதில் ஆட்களைச் சேர்த்தவர் என டோனி ஒபாதா முத்திரைக் குத்தப்பட்டாலும், கூட்டுத்திட்டத்தில் இருந்த, துலீப் மெண்டிஸூம் ராய் டியாஸும் கடைசி நேரத்தில் கவிழ்த்து, அடுத்து வந்த ஆட்டங்களில் கேப்டனாகவும் துணை கேப்டனாகவும் ஆக அமைச்சர் காமினி திசநாயகாவுடன் ஒப்பந்தம் செய்து கொண்டனர். மெண்டிஸும் டியாஸும் இந்த குற்றச்சாட்டை மறுத்தாலும், வர்ணபுரா , அவர்கள் கையெழுத்து இட்ட ஆவணங்கள் தன் வசம் இருப்பதாக இந்தியன் எக்ஸ்பிரஸிற்கு அளித்த பேட்டி ஒன்றில் குறிப்பிட்டுள்ளார்.

இன்று நாயகனாக கருதப்படும் அர்ஜுன ரணதுங்கா வும் கலக அணியில் சேர விரும்பினாராம். ஆனால் வர்ணபுரா, அன்று பதினெட்டு வயதே நிரம்பிய ரணதுங்கா வயதில் இளையவர், நல்ல எதிர்காலம் அணியில் இருக்கின்றது, என அவரை சேர்க்க மறுத்துவிட்டார்.

சாதாரணமாகவே இரண்டாந்தர அணிதான்,அதில் பாதி ஆட்டக்காரர்கள் இல்லாது, தென்னாப்பிரிக்கா சென்ற இலங்கையின் கலக அணி மரண அடி வாங்கி வந்தது.  தென்னாப்பிரிக்க சென்ற ஆட்டக்காரர்கள் 25 ஆண்டுகள் கிரிக்கெட் விளையாட தடை செய்யப்பட்டனர்.  இலங்கை கிரிக்கெட் வாரியம் என்ன நினைத்ததோ,  தமிழர்களுக்கு எதிரான இனவெறிக் கொடுமைகள் உச்சத்தில் இருந்த சமயத்தில் 9 ஆண்டுகளுக்குப் பின்னர் தடைகளை நீக்கிக் கொண்டது.
தாங்களும் தென்னாப்பிரிக்கா அன்று இருந்த நிலையில் என்றாவது ஒரு நாள் இருப்போம், இந்தத் தடை ஒரு முன்னுதாரணமாக இருந்து தங்களுக்கு எதிராக என்றாவது ஒருநாள் திரும்பிவிடக்கூடாது என்பதனால் கூட தடை நீக்கப்பட்டு இருந்து இருக்கலாம்.

பந்துல வர்ணபுரா, ஆசிய கிரிக்கெட் கவுன்சிலில் முக்கியப் பொறுப்பில் இருக்கின்றார். இந்த அவமானகரமான கலக சுற்றுப்பயணத்திற்கு காரணமாக இருந்த துலீப் மெண்டிஸும் ராய் டியாஸும் இலங்கை கிரிக்கெட் வாரியத்தில் மிகப் பெரியப் பதவிகளை அடைந்தனர். இதில் சிலர் கிரிக்கெட் பயிற்சியாளர்களாகவும் அரசியல்வாதிகளாகவும் வியாபாரிகளாகவும் ஆகிவிட்டனர்.

தென்னாப்பிரிக்காவின் நல்ல குணங்களை நிலைநாட்ட, இலங்கை கலக அணியின் பயணத்தை முன்னோட்டமாகப் பயன்படுத்திக் கொண்ட, தென்னாப்பிரிக்க கிரிக்கெட் வாரியம் , அடுத்து மேற்கிந்திய கலக வீரர்களைக் கொண்ட அணியை வரவழைத்து ஆடியது. நகை முரணாக, மேற்கிந்திய கலக அணியில் ஆடியவர்கள் இன்றும் மதிக்கப்படுவதில்லை. ஆனால் இலங்கை  மக்கள், கொத்துக் கொத்தாய் கொலைகள் விழுந்த பொழுதே, கடந்தவை கடந்தவையாக இருக்கட்டும் என இருப்பவர்கள், சாதாரண கிரிக்கெட் சுற்றுப்பயணத்திற்கா வருந்தப் போகின்றார்கள். யார் கண்டது, எதிர்காலத்தில் இலங்கை தடை செய்யப்பட்டாலும், தமிழகத்தில் இருந்து , கருங்காலிகள் கொண்ட அணியை அங்கு வரவழைத்து ஆடச் செய்தாலும் செய்வார்கள்.

கிரிக் இன்போ பதிப்பிக்க மறந்த கார்ட்டூன்

வழக்கமான அசட்டுத்தனத்துடன் கிரிக் இன்போ தளத்தில் கிறுக்கப்பட்டிருந்த கார்ட்டுனிற்கு , ஆஃப் சைட்ல வருகின்ற பந்தை லெக் கிளான்ஸ் செய்வதைப் போல குட்டித் திருத்தத்துடன்  கிரிக்இன்போ தமிழ் உணர்வு சித்திரத்திற்குப் பதில் சிக்சர்.

Cricinfo - Cartoon - Tamil Sentiments - Tamil Genocide - Sri Lanka - Tamil Eelam

Original NO BALL is here - http://www.espncricinfo.com/blogs/content/story/627200.html

குழந்தைப் போராளி - ஒரு நிமிடக்கதை

நான், எனது ஸ்விடீஷ்  நண்பன் நீல்ஸன் அவனது மனைவி அன்னா, அவர்களது நான்கு வயதுக் குழந்தை ஆகியோர், அன்று டெல்லியின் புறநகர்ப் பகுதியில் ஓர் உயர்தர உணவகம் ஒன்றில் அமர்ந்து சாப்பிட்டுக்கொண்டிருந்தோம். தூரத்தில் ஒரு வடக்கிந்தியன் ஒருவன் நாங்கள் இருக்கும் இடத்தையே வெறித்தபடி பார்த்துக் கொண்டிருந்தான். குறிப்பாக அவன் அன்னாவைப் பார்க்கும் பார்வை எனக்குப் பிடிக்கவில்லை.

“நீ விவரிக்கும் ,தமிழர்களுக்கு நடந்த அத்தனை கொடுமைகளையும்  என்னால் புரிந்து கொள்ள முடிந்தாலும்., தமிழ்ப் புலிகள் குழந்தைகளை போர் வீர்ர்களாகப் பயன்படுத்தியதை ஜீரணிக்கவே முடியவில்லை”  நீல்ஸனின் பேச்சில் எனது கவனம் கலைந்தது.

அவனின் குழந்தைப்போராளி கேள்விக்குப் பதில் சொல்ல எத்தனிக்கும்பொழுது,,

அந்த வடக்கிந்தியன் எங்களின் மேசைக்கு வந்து இவர்கள் யார் என என்னிடம் இந்தியில் கேட்டான், ஆங்கிலத்தில் பதில் சொன்னேன். வெளிநாட்டுக்காரர்கள் இந்தியாவிற்கு வரும்பொழுது,  அவர்கள் சந்திக்கும் இந்தியர் அழுக்காய் இருந்தால் பாம்பாட்டி எனவும், மிடுக்காய் இருந்தால் கணிப்பொறி வல்லுனர்எனவும் நினைத்துக் கொள்வார்கள். இவன் மிடுக்காய் இருந்தான். அவர்கள் சங்கடமில்லாமல் அவனுடன் பேச, சீக்கிரம் இந்த இடத்தை விட்டுக் கிளம்ப வேண்டும் என்று நினைத்தேன்.

இதனிடையில் அன்னாவும் குழந்தையும் கைகழுவும் இடத்திற்கு நகர, இந்த வடக்கிந்தியனும் சில வினாடிகளில் அங்கேப்போனான். இரண்டு நிமிடங்களில் அங்கிருந்து ஒரே கூச்சல். அன்னாவின் குரல்தான். என்ன நடந்திருக்கக்கூடும் எனப்புரிந்தது.

சத்தத்தைக் கேட்டு ஓடிய நீல்ஸன், அந்த வடக்கிந்தியனுடன் வெளிவந்தான். வடக்கிந்தியனின் மூக்கில் ரத்தம் கொட்டியது. நீல்ஸன் இவ்வளவு வன்முறையாக இருந்து நான் பார்த்தது கிடையாது. அடி ஒன்றும் இடிபோல் இறங்கியது. அன்னா அரண்டுப் போய் இருந்தாள். குழந்தையும் மிரண்டு இருந்தது. போலிஸ் எல்லாம் கூப்பிட வேண்டாம் எனக் கேட்டுக்கொண்ட உணவக பொறுப்பாளர்கள் அவனை வெளியேப்போகச் சொன்னார்கள்.

நீல்ஸனின் குழந்தை என்ன நினைத்தாளோ தெரியவில்லை, அந்த வடக்கிந்தியன் வெளியேப்போகும் சில வினாடிகளுக்கு முன்னர், கையில் இருந்த கோப்பையை முழுப்பலத்தையும் திரட்டி அவன் மேல் எறிந்தாள். அடுத்தடுத்து, மேசை முள்கரண்டி, கத்தி என குழந்தையின் கைக்கு கிடைத்தது எல்லாம் எறியப்பட்டன,  நானும் தடுக்கவில்லை, நீல்ஸனும் எதுவும் சொல்லவில்லை.

தமிழ் இனப்படுகொலை - பணத்தாளில் எழுதுங்கள் - கவன ஈர்ப்பு முயற்சி

சமுதாயத்திற்கு பயம், கட்டமைக்கப்பட்ட தேசியத்திற்கு பயம், காலங்காலமாய் தோளில் தூக்கி வைத்திருக்கும் சாதிக்குப் பயம், சம்பந்தமே இல்லாத மதங்களுக்குப் பயம் , வேரில் வெந்நீர் ஊற்றிவிடுவார்களோ என்ற பயம், என பயத்தை மட்டுமே தன்னுள் வைத்திருக்கும் ஆயிரக்கணக்கான சராசரித் தமிழர்களைப் போல நானும் பயந்த சுபாவம் கொண்டவன் தான். இருந்த போதிலும் சில அரிதான சமயங்களில் பயத்தை உடைத்து, நடந்த அநியாயத்தை சன்னமான குரலிலாவது சொல்ல வேண்டும் என நினைப்பதுண்டு. அதுவும் பாலச்சந்திரனின் கண்களைப் பார்த்தபிறகாவது சிறிய குரலாவது எழுப்பவில்லை என்றால் படிப்பு, எழுத்து, அக்கறை என்று சொல்வதற்கெல்லாம் எத்தகைய பொருளும் இல்லை என்று உணர்ந்த ஒரு தருணத்தில், இருபது ஈரோ பணத்தாளில், இலங்கையில் தமிழ் மக்களுக்கு எதிராக நடந்த நடந்து கொண்டிருக்கும் இனப்படுகொலையை குட்டித்தகவலாக எழுதி இன்று செலவளித்தேன்.  

தமிழ் இனப்படுகொலை - Tamil Genocide in Sri Lanka

பணத்தில் எழுதுவது சட்டத்திற்குப் புறம்பாகக் கூட இருக்கலாம். கவலையில்லை. போராட்டம் என்பதே சட்டத்தை மீறுவதே.. .. மீறும்பொழுது அது இன்னமும் கவனம் பெறுகின்றது. பதின்மங்களில் காதல் தேவதைகளின் பெயருடன் நமது பெயரையும் சேர்த்து பணத்தாளில் எழுதி மகிழ்ந்து இருப்போம். விளையாட்டை வீரியமான ஒரு காரியத்திற்காக செய்வோம். 
ஏற்கனவே தெலுங்கானா போராட்டத்திற்கு பயன்படுத்திய கவன ஈர்ப்பு உத்திதான், இதை பன்னாட்டு அளவில் செய்வோம். 

இந்தியக் குடியரசில்,  Section 35A of the Banking Regulation Act 1949 இன் படி, தண்டனைக்குரிய குற்றம் என்றாலும் ஒட்டு மொத்த மக்கள் தொகையில் பத்து சதவீத மக்கள் அதாவது 70 லட்சம் மக்கள் , ஒற்றை பத்து ரூபாய் தாளில் எழுதி புழக்கத்தில் விட்டால் கொஞ்சமேனும் அதிர்வலைகளை ஏற்படுத்தும். 

போரினால் புலம் பெயர்ந்த தமிழர்களானாலும் சரி, திரவியம் தேட திரைகடல் ஓடிய தமிழர்களானாலும் சரி, ஏதாவது அந்தந்த நாட்டு பணத்தாளில் இப்படி எழுதி புழக்கத்தில் விடுங்கள். பட்டாம்பூச்சி விளைவுகளை ஏற்படுத்தக் கூடும்.

--பிற்சேர்க்கை 

ஈழத்து இனப்படுகொலைக்கு எதிர்ப்பு தெரிவிக்கும் விதமாக , சிங்கத்தின் குகைக்குள் இருந்தே, ஓர் ஈழத்தமிழர் ”தமிழ் ஈழக்குடியரசு” என தமிழிலும் ஆங்கிலத்திலும் எழுதிப் புழக்கத்தில் விட்டிருக்கும் இலங்கை ரூபாய் பணத்தாள்கள். கொழும்பிலோ , யாழ்ப்பாணத்திலோ இந்தத் தாள்களைப் பார்த்தால், இதன் பின் புறம் என்ன எழுதி இருக்கிறது என்று சொல்லுங்கள். ஒருப்பக்கம் மட்டுமே எனக்குக் கிடைத்தது. 

தமிழீழக் குடியரசு / Republic of Tamil Eelam

ஒரு புத்த மத நீதிக் கதை

ஓர் ஊரில் ஒரு அழகான பூந்தோட்டங்களுடன் அமைந்த வீட்டில் தனது சீடர்களுடன் அமைதியான புத்தத்துறவி வசித்து வந்தார். தினமும் அவரைப் பார்க்க அவ்வூர் மக்கள் அடிக்கடி வருவர். துறவியின் பக்கத்துவீட்டில் , தன் பிள்ளைகள் மேல் ஏக பாசம் வைத்திருக்கும் பக்‌ஷேசூரா என்ற ஒருவன் வாழ்ந்து வந்தான். பக்‌ஷேசூராவிற்கு துறவியைப் பிடிக்கவில்லை. அதனால் ஏகப்பட்ட பிரச்சினைகளை துறவிக்குக் கொடுத்துக் கொண்டிருந்தான். கழிவுகளை , துறவியின் வீட்டின் எல்லைக்குள் எறிவது, துறவியை சந்திக்க வருபவர்கள் , அவன் வீட்டை கடக்கும்ப்பொழுது ஏக வசனத்தில் திட்டுவது, சில சமயம் வீட்டில் இருந்து கல்லெறிவது, துறவியின் சீடர்களைத் தாக்குவது என ஏகத்துக்கும் போய்க் கொண்டிருந்தது. பக்‌ஷேசூராவின் நெருங்கிய நண்பரின் இடத்தைத் தான் இவர்கள் வாடகைக்கு எடுத்து இருந்தார்கள். அதனால் வீட்டு உரிமையாளரிடம் சொல்ல இயலாது. துறவி ஏதாவது செய்ய வேண்டும் என சீடர்கள் கேட்டுக்கொண்டார்கள் . நாளை முதல் பக்‌ஷேசூராவின் தொந்தரவு இருக்காது என உறுதியளித்த துறவி. வழக்கமாக துறவியின் வீட்டுத் தோட்டத்தில் விளையாட வரும் ஏகப்பட்ட பிள்ளைகளில், பக்‌ஷேசூராவின் பிள்ளைகளை மட்டும் தலையில் நான்கு குட்டுகள் குட்டி, இனிமேல் இந்தப் பக்கம் விளையாட வரக்கூடாது என துறவி விரட்டினார். குழந்தைகள் விளையாட இடமும் ஆட்களும் இல்லாமல் ஏங்கித் தவித்ததைப் பார்த்த பக்‌ஷேசூரா , மனந்திருந்தியதை போல் கொஞ்சம் நடித்து தனது கொடுமைகளை நிறுத்தினான். நடிப்பு என்று துறவி புரிந்து கொண்டாலும் பக்‌ஷேசூராவின் குழந்தைகளை விளையாட அனுமதித்தார்.

நீதி - தனக்குத் தொந்தரவு கொடுப்பவர்களை சிறு வன்முறையினால் மிரட்டலாம். தவறில்லை.

கதையில் சொல்லாமல் விட்ட நீதி  

குழந்தைகளைக் குட்டியது வருத்தமானது என்றாலும் துறவியின் நிலை கடினமானது.  அவர் ஓர் இடத்தில் வாடகைக்கு இருக்கிறார். சொந்த “ இடமாக” இருந்திருந்தால் , இந்நேரம் பக்கத்துவீட்டுக்காரனை வெளுத்து எடுத்து இருப்பார். அனேகமாக அடுத்தடுத்த வாரங்களில் துறவியும் சீடர்களும் சொந்த ”இடத்தைப்” பற்றி யோசிக்க ஆரம்பித்து இருப்பார்கள்

மாங்கல்யம் தந்துநானே - சிறுகதை

நான் மூக்குவிடைத்த சாதியைச் சேர்ந்தவன் என்பது அம்முவிற்கும் , அவள் காது துடிக்கும் சாதியைச் சேர்ந்தவள் என்பது எனக்கும் இன்று தான் தெரியும். நாங்கள் திருமணம் செய்து கொள்ள ஆசைப்படுகின்றோம் என்று எங்கள் வீட்டில் செய்தியை சொன்னபொழுது, எங்களின் அம்மாக்கள் கேட்ட முதல் கேள்வி,..

“அவங்க என்ன ஆளுக”

அப்பாக்களைக் காட்டிலும் அம்மாக்கள் சாதி அபிமானங்களை அதிகம் கொண்டிருக்கின்றனர்.

“என்னடா கார்த்தி, காது துடிக்கிறவனுங்க, இன்னக்கி நமக்கு சமமா இருக்கிற மாதிரி இருக்கலாம், ஒரு காலத்தில் எங்க தாத்தா அவங்களை எல்லாம் மதிக்கவே மாட்டாரு” என் அம்மா இப்படி சொல்லிவிட்டார் என்பதை மிகவும் வருத்தமாக அம்முவிடம் சொன்னபொழுது, அவளின் அம்மா மூக்குவிடைத்த சாதியைப் பற்றி  மிகக் கேவலமாக சொன்னதை சொல்லி என்னைத் தேற்றினாள்.

அம்மு பாசம் காட்டுவதில் மட்டும் “நெஜமாத்தான் சொல்றியா” வகை பெண்ணாக இருந்தாலும், நிறையவே முற்போக்கு அரசியல் சிந்தனைகளைக் கொண்டிருப்பவள். என்னைப்போல் அவளுக்கும் எளிமையான சுயமரியாதை திருமணம் செய்து கொள்ள வேண்டும் என்பதுதான் விருப்பம்.

“ஏண்டா கார்த்தி உனக்கு இந்த நினைப்பு, உன் கல்யாணத்துக்கு ஒத்துக்கிட்டதே பெரிய விசயம், நல்லநாள் அதுவுமா, வாழ்த்தாம வசவா பாடிட்டு இருப்பானுங்க, ஒரு மரியாதையும் வேண்டாம்... எனக்கு சடங்கு சம்பிராதாயம் எல்லாம் முக்கியம்...“

அம்முவிற்கு கிட்டத்தட்ட இதே பதில்தான். பெரியாரைப் புரிந்து இருந்ததால் , மூக்கும் காதும் இந்த ஒரு புள்ளியில் இணைவது வியப்பைத் தரவில்லை.

அம்முவைப்போல் எனக்கு எப்படியாவது பிரச்சினை இல்லாமல் திருமணம் முடியவேண்டும் என்ற பயம் இருந்ததால் சமாதானத்திற்கு தயாரான பொழுது, எனது அப்பா ஒரு யோசனையை சொன்னார்.

அம்மா ஏற்கனவே தேர்ந்து எடுத்து வைத்திருந்த புரோகிதரிடம் திருமண சடங்குகளுக்கு முன்பதிவு செய்ய நானும் அப்பாவும் தான் போனோம்.  புரோகிதர் ஆங்கிலத்தில் தான் பேசினார். இடையிடையே மணிப்பிரவாள நடைப்போல கொஞ்சம் தமிழும் நிறைய சமஸ்கிருதமும் வந்து விழுந்தது.

“தமிழில், திருமண வாழ்த்து வசனங்களை சொல்ல வேண்டும், அதற்கான தமிழ் இலக்கியப்பாடல்கள் குறள்களை நாங்களே தருவோம்”

”நோ இட் ஈஸ் இம்பாஸிபிள், நீங்க வேற ஆளைப் பார்த்துக்கோங்க. ... இல்லாட்டி திக காரவாளை கூப்பிட்டுக்கோங்க”

என வெளியில் கழுத்தைப் பிடித்து தள்ளாத குறையாக விரட்டினார்.

இந்த புரோகிதர் தான் வேண்டும் என அம்மா ஒற்றைக்காலில் நின்றார். இனி அம்மாவிற்குப் பதில் சொல்ல வேண்டுமே...எனக் கையைப் பிசைந்து கொண்டிருந்த பொழுது,

அப்பா என்னை புரோகிதரின் அலுவலகத்திற்கு வெளியே நிற்க வைத்துவிட்டு  மீண்டும் உள்ளே சென்றார். வரும்பொழுது சிரித்துக் கொண்டே ”புரோகிதர் தமிழுக்கு சம்மதித்துவிட்டார் “ என்றார்.

அன்பும் அறனும் உடைத்தாயின் எனத் தொடங்கி  தமிழ் வாழ்த்துப்பாக்களுடன் அந்த புரோகிதரால் திருமணம் சிறப்பாகவே நடத்தி வைக்கப்பட்டது. சாப்பாட்டை விட, திருமணத்திற்கு வந்தவரெல்லாம் தமிழ் மந்திரங்களைப் பற்றித்தான் பேசிக்கொண்டு இருந்தார்கள்.

சாவகாசமாக , அப்பாவிடம், எப்படி அந்த புரோகிதர் சம்மதித்தார் எனக் கேட்ட பொழுது

“அவர் வழக்கமாக வாங்கும் பணத்தை விட, இரண்டு மடங்கு தருவதாக சொன்னேன், ஒப்புக்கொண்டார்”

“அட..”    இது எனக்குத் தோன்றாமல் போய்விட்டதே என நினைக்கையில் அப்பாவே தொடர்ந்தார்,

”இன்னொன்றை கவனித்தாயா, அவர் பூணூல் கூட போட்டிருந்திருக்க மாட்டார், அதற்கும் கொஞ்சம் எக்ஸ்ட்ரா கொடுத்தேன்”

----

வினையூக்கி வழங்கும் மாணவர்களுக்கான கட்டுரைப் போட்டி - மொத்தப் பரிசுத் தொகை 25,000ரூபாய்

அடுத்த சில மாதங்களில் மாணவர்களுக்கு குறைந்த பட்சம் ஒரு மாதமாவது விடுமுறை கிடைக்கும். விடுமுறையில் கிரிக்கெட் பார்க்கலாம். சிலத் திரைப்படங்கள் பார்க்கலாம். பலத் தொலைக்காட்சித் தொடர்கள் பார்க்கலாம். பேஸ்புக்கில் நிறைய நேரம் செலவிடலாம். தேர்ந்தெடுத்து செய்ய இப்படி ஏகப்பட்ட விசயங்கள் உள்ளன. இருந்தாலும் இவற்றுடன் கொஞ்சம் தமிழுக்காகவும் , கொஞ்சம் அரசியலுக்காகவும் , கொஞ்சம் கிரிக்கெட்டுக்காகவும் மாணவர்களை எழுத வைக்க நான் எடுக்கும் சிறிய முன்னெடுப்பு இந்தக் கட்டுரைப் போட்டிக்கான அறிவிப்பு. 

நான்கு தலைப்புகள், அவற்றில் ஏதேனும் இரண்டைத் (*) தேர்ந்தெடுத்து கட்டுரைகளாக எழுதி அனுப்ப வேண்டும். 

முதல் பரிசு - 10,000 ரூபாய்
இரண்டாம் பரிசு - 5000 ரூபாய் 
மூன்றாம் பரிசு -   3000 ரூபாய் 

பங்கு பெறும் அனைவருக்கும் நல்லதொரு தமிழ்ப்புத்தகம் ஊக்கப்பரிசாக வழங்கப்படும்.  

தலைப்புகள் 

1.   இந்திய தேசியத்தைக் கட்டமைத்ததிலும் கட்டிக் காப்பதிலும்  கிரிக்கெட்டின் பங்கு என்ன? அதை சமீபகாலமாய் எப்படி ஐபிஎல் போட்டிகள் அசைத்துப் பார்க்கின்றன? 

2.   பெரியாரும் பிரபாகரனும் - தமிழர் வாழ்வியலில் இவர்களின் கொடைகள்

3.  மக்களின் சம உரிமையான இடஒதுக்கீட்டிற்கு எதிராக இந்தியத் திரைப்படங்களில் வைக்கப்பட்ட நுட்பமான அரசியலும் அவற்றை மக்கள் எதிர்கொண்ட விதமும்

(உ.ம். ஒரேயொரு கிராமத்திலே, ஜெண்டில்மேன், இந்தித்திரைப்படங்களில் ஒன்றான  Aarakshan )

4. போலாந்து தேசியமும் தமிழர்த் தேசியமும் - ஓர்  ஒப்பிடல் 

---
விதிமுறைகள் 

1. கட்டுரைகள் தமிழில் இருக்க வேண்டும். இயன்றவரை தனித்தமிழில் இருக்க வேண்டும். கலைச்சொற்களை ஆங்கிலத்தில் புரிய வைக்க வேண்டிய  கட்டாயம் இருந்தால் அவற்றை அடைப்புக்குறிக்குள் கொடுக்கலாம். 

2. 12 ஆம் வகுப்பு தேர்வுகள் முடித்து கல்லூரிப்போகக் காத்திருக்கும் மாணவர்கள் தொடங்கி இளங்கலை இறுதியாண்டு மாணவர்கள் வரை யார் வேண்டுமானாலும் கட்டுரைகள் அனுப்பலாம். நீங்கள் முதுகலை மாணவராகவோ , ஆராய்ச்சிப் படிப்புப் படிப்பவராகவோ இருந்து, உங்கள் வயது 25 யைத் தாண்டாமல் இருந்தாலும் கட்டுரைகள் அனுப்பலாம். போட்டியில் பங்கு பெறலாம். 

3. குறைந்தபட்சம் 4 உசாத்துணைகள் (References ) இருக்க வேண்டும்   விக்கிப்பீடியா சுட்டிகளாக இல்லாமல் இருத்தல் நலம். திரைப்படம் சார்ந்த கட்டுரையில் வசன மேற்கோள்களோ அல்லது அந்தப் படங்களைப் பற்றி ஏற்கனவே வந்த கட்டுரைகளை மேற்கோள் காட்டலாம். 


4.  10 அளவிலான எழுத்துருவில் 5 பக்கங்களுக்கு குறையாமல் இருந்தல் வேண்டும். அதிகபட்சம் 10 பக்கங்கள் 


5. முதல் பத்துக் கட்டுரைகள் புத்தகம் ஆக்கப்படலாம். (கட்டுரையாசிரியர்கள் அனுமதி அளிக்கும் பட்சத்தில்)

6. போட்டிக்கு அனுப்புபவர் ஏற்கனவே வலைத்தளம் வைத்து இருந்தால், அங்கு பதிப்பித்து சுட்டியை மட்டும் அனுப்பலாம். அல்லது மின்னஞ்சலிலும் எனக்கு அனுப்பலாம்.

7. கட்டுரைகள் அனுப்ப கடைசித் தேதி DEAD LINE EXENDED September 12, 2013. 


8. அறிவார்ந்த பெருமக்கள் சிறந்தக் கட்டுரைகளைத் தேர்ந்தெடுப்பார்கள் 

9. எழுத்தாளுமைக்குக் கொடுக்கப்படும் அதே முக்கியத்துவம், கட்டுரையில் ஆசிரியர் கொடுக்கும் சமுதாயப் புரிதலுக்கும் வழங்கப்படும். 

10.  (*)  சிங்கப்பூர், மலேசியா, ஈழம்  ஆகிய நாடுகளைப் பூர்வீகமாக கொண்ட மாணவர்கள், இட ஒதுக்கீடு,  கிரிக்கெட் தலைப்புகளைத் தவிர்த்து  மீதம் இருக்கும் இரண்டில் ஏதேனும் ஒன்றைத் தேர்வு செய்து கொள்ளலாம். அவர்கள் ஒரு கட்டுரை மட்டும் எழுதி அனுப்பினால் போதுமானது. 

11. மாணவர்களுக்கானப் போட்டியாக இருந்தாலும், போட்டியில் பங்கேற்காமல் ஏனையவர்களும் கட்டுரைகள் அனுப்பலாம். அவர்களுக்கும் ஒரு சிறப்புப் பரிசு காத்திருக்கின்றது. 

12. ”வினையூக்கி வழங்கும் மாணவர்களுக்கான கட்டுரைப் போட்டி” எனக் குறிப்பிட்டு அனுப்ப வேண்டிய மின்னஞ்சல் முகவரி - selva@outlook.com 

---

இந்தப் பதிவை வாசிக்கும் வாசகர்கள், பதிவர்கள், ஆர்வலர்கள் மறு பகிர்வுகள் மூலம் மாணவர்களுக்கு கொண்டு சேர்க்க உதவலாம். 
அனைவருக்கும் வாழ்த்துகளும் நன்றியும். 

மண்டப எழுத்தாளன் (Ghost Writer) - சிறுகதை

இரண்டு பேர் ஆடும் சதுரங்க ஆட்டத்தை தனியொருவனாக ஆடுவது என் பொழுது போக்குகளில் ஒன்று. தன்னை வெல்வது ஆண்மை மட்டுமல்ல, ஆன்மிகமும் கூட.  செஸ் ஆடுவதைப்போல,  அம்மு, ஆவி, ஈழம், திராவிடம், வன்மம், காமம் என   எனக்கான கேள்விகளுக்கு நான் வைக்கும் பதில்கள் என் எழுத்து. சிறுகதையோ பத்தியோ வார இதழ்களுக்கு இதுவரை எதுவும் அனுப்பியதில்லை. எனக்காக தோன்றியதை எழுதி, இணையத்தில் எங்கேயாவது பதிவு செய்துவிட்டு,  வேண்டியவர்கள் படித்துவிட்டார்கள் என்றால், கலவிக்குப்பின்னர் கிடைக்கும் அயர்ச்சியான உணர்வைப் போன்றதொரு மனநிலையில்,  அந்த எழுத்துக்களும் மறந்துப் போய்விடும். இதில் சிலர் கதையில் என்னைத் தேடிக்கொண்டிருப்பார்கள். சிறுகதை நிஜங்களை நம்புபவர்கள். அவற்றைவிட என் வாழ்க்கைத் தொடர்கதையில் சுவாரசியம் அதிகம் என்பதைத் தெரிந்து வைத்துக் கொள்வதில்லை

எழுத்து படிக்கப்பட்டவுடன், எழுத்தாளன் மட்டுமல்ல, எழுத்தும் தற்கொலை செய்துகொள்ளவேண்டும் என்று நான் சொல்லிக்கொண்டாலும், ஆடிக்கொருதடவை ஏதாவது சஞ்சிகைகளில் சிலப் பத்திகள் வரும்பொழுது, அதை கையில் வைத்துக் கொண்டு அம்மு சந்தோசப்படுவதைப் பார்ப்பதற்காகவே வெகுசனமாகவும் எழுதவேண்டும் என நினைப்பதுண்டு.

போன வாரம், ஒரு மின்னஞ்சல் வந்து இருந்தது. கொங்கு மண்டலத்தில் இருக்கும் வளர்ந்து வரும் ஓர் ஆன்மிக குருவிற்கு , சில நீதிக்கதைகள் எழுதித் தரவேண்டும் என்பதாக செய்தி அதில் இருந்தது.  முதலில் நான் நம்பவில்லை. நான் நிறையப் பேருக்கு விளையாடியதைப் போல எனக்கும் செய்கிறார்கள் எனக் கண்டுகொள்ளவில்லை.  15 கதைகள் எழுதிக்கொடுத்தால், 60 ஆயிரம் ரூபாய் தருவதாக சொன்னார்கள். பணம் எனக்குப் பல்லைக் காட்டியது.  பதில் அனுப்பினேன்.  மீன்கடைக்கு மீனின் வாசம்போதும், இணைய உலகில் சிறு தேடல் நம் தளத்தை நோக்கிக் கொண்டு வரும்.  தொலைபேசியில் அழைத்தார்கள்.

“உங்கள் தளத்தில் அந்த ஆன்மிகத் தேடல் கதைப் படித்தோம், மகாமகாரிஷி குருக்களுக்கு பிடித்துப் போய்விட்டது. அது போன்றக் கதைகளை மகாமகாரிஷி குருக்கள் ஒரு வார இதழில் எழுதப்போகின்றார், அதற்காக அதைப்போன்ற கதைகள் நீங்கள் எழுதித் தரவேண்டும்”

“மண்டபத்தில் உட்கார்ந்து எழுதித் தந்துவிடவேண்டும் அவ்வளவுதானே... நக்கீரர்கள் யாரும் வந்துவிட மாட்டார்களே”

எதிர்முனையில் இருந்தவர் சிரித்தார். எனது வங்கிக் கணக்கும் சிரித்தது. ஆன்மிகவாதிகள் பணவிசயத்தில் நேர்மையாகத்தான் இருக்கிறார்கள்.

“ அனைத்தையும் அர்ப்பணி ... ஆண்டவனுக்கு” என்றத் தலைப்பில் நீதிக்கதைகள் சக்கைப்போடுப் போட்டன. ஒவ்வொரு வாரமும் அம்மு புத்தகத்தை கையில் கொண்டுவந்து கொடுத்து, வாசி வாசி எனப் படுத்தி எடுத்தாள். தொழிலில் நான் நேர்மையானவன் என்பதால் அவளுக்கு இந்த விசயம் தெரியாது. போகிறப்போக்கில் மகாமகாரிஷிக்களின் சிஷ்யையாகவே மாறிவிடுவாள் போல இருந்தது. அதற்கும் ஒரு காரணம் இருந்தது, சில சமயங்களில் அவள் பேச்சில் தூவிவிடும் குட்டி குட்டி விசயங்களை நான் எழுத்தில் சேர்த்து விடுவேன்.

“பாருடா கார்த்தி, நான் போன வாரம் சொன்னதை சாமி அப்படியே இந்த வாரம் எழுதியிருக்காரு”

இரண்டு மாதங்கள் கடந்து இருக்கும். ஒரு தொலைபேசி அழைப்பு. இன்னொரு சாமியாரின் அலுவலகத்தில் இருந்து.  இவரை மகாமாகாரிஷிக்குருக்களுக்கு போட்டி சாமியார் என்றும் சொல்வார்கள். அவர் கங்கைக்கரை காவி என்றால் இவர் கொஞ்சம் நவநாகரீகமானவர். பகுத்தறிவு சாமியார் எனக்கூட வைத்துக்கொள்ளலாம். ஆங்கிலம் , தமிழ் , கொஞ்சம் தமிழ்த் தேசியம் எல்லாம் பேசும் சாமியார். பிரபாகரனுடன் எடுத்துக் கொண்ட படங்களை எல்லாம் வலைத்தளத்தில் வைத்திருப்பவர். இப்பொவெல்லாம் சோப்பு டப்பா விற்கிறவன் கூட தேசியத்தலைவருடன் இருப்பதாக படம் செய்து வைத்துக்கொள்கின்றான்.  பெரிய சாமியாராக இருந்த போதிலும் எந்தவிதமான பந்தாவும் இல்லாமல் அவரே தொடர்புக்கு வந்தார்.

“தோழா, உங்கள் வலைப்பதிவைப் படித்தோம், நீங்கள் ஆன்மிகத்தையும் அரசியலையும் இணைக்கும் பாங்கு பிடித்திருந்தது. ஒரு பிரபல வாரப்பத்திரிக்கைக்கு கட்டுரைகள் எழுதப்போகின்றேன், எனக்கு நேரம் இல்லாத காரணத்தால், நல்லதொரு சிந்தனையாளனை தேடிக்கொண்டு இருக்கின்றேன். நீங்கள் ஒரு பத்துக் கட்டுரைகளை எழுதுக் கொடுத்தீர்கள் என்றால் , அதற்கான சன்மானம் உங்களுக்கு வழங்கப்பட்டுவிடும். எனதுத் திருத்தத்திற்குப்பின்னர் பிரபல வார இதழில் வெளிவரும், தலைப்பு - அனைத்தையும் அடித்து நொறுக்கு .. ஆண்டவன் நீயே ”

சிவபெருமானுக்கே மண்டப எழுத்தாளன் என்ற பெருமை ஒருதடவைதான் கிடைத்தது. கடவுளை விஞ்சியவன் ஆகிவிட்டேனோ...

“தோழா, மேலும் ஒரு விசயம், ஆக்ரோஷம் தூக்கலாக இருக்க வேண்டும், குறிப்பாக அந்த மக்குசாம்பிராணி மஹாரிஷி எழுதும் நீதிக்கதைகளைத் தாக்குவதுப்போல கட்டுரையின் ஊடாக சிலக்கதைகளையும் சேருங்கள்.... கதை எழுதுகின்றானாம் கதை... மட்டமான ரசனைக்காரன்”

இந்த ஆட்டம் எனக்குப் பிடித்து இருந்தது. நான் வரிசைப்படுத்தி வைத்திருந்த கறுப்பு , வெள்ளை நிற சதுரங்கக் காய்கள் என்னைப்பார்த்து சிரித்தன. மற்றும் ஓர் ஆட்டத்தைத் தொடங்கினேன்.

அவள் உடைத்தது வெறும் கண்ணாடிப்பாத்திரங்கள் மட்டுமே- சிறுகதை

கண்ணாடி பாத்திரம் ஏதோ ஒன்று உடையும் சத்தம் கேட்டது. கேத்தரீனா மற்றும் ஒரு கண்ணாடி குவளையை உடைத்திருக்கிறாள் போலும். கேத்தரீனா என்னைக் காதலிக்கிறாள். அவளை இத்தாலியின் மிலான் நகரில் ஓர் ஆய்வகக் கருத்தரங்கில் சந்தித்தேன்.  ஒரு வருடப் பழக்கம், அவளை விட நான் அறிவாளி, அவள் என்னை விட உலகத்தையும் மனிதர்களையும் அதிகமாக நேசிப்பவள், அதனாலேயே ஒரு வேளை ஈர்ப்பு ஏற்பட்டு இருக்கலாம். அவளின் ஒரு வார விடுமுறையில் ரோம் நகரத்திற்கு வந்திருக்கிறாள். சொல்லப்போனால் என்னை மட்டும் பார்ப்பதற்காகத்தான் இந்த ரோம் பயணமே.... ரோம் நகரத்தைச் சுற்றிப்பார்ப்பது என்பது இரண்டாம் பட்சம், அல்லது முக்கியமே அல்ல..

“மன்னித்துவிடு கார்த்தி, இன்னொரு பாத்திரத்தை உடைத்துவிட்டேன்” அவள் கண்களில் நான் திட்டிவிடுவேனோ என்ற பயம் தெரிந்தது.

என்னிடம் பாசம் காட்டும் பெண்களை எனக்குப் பிடிப்பதைப்போல, என்னிடம் பயப்படும் பெண்களையும் பிடிக்கும்.

“பரவாயில்லை, கேத்தி, உடைந்த கண்ணாடி உன் கைகளைக் கீறிவிடவில்லைத்தானே” அவளின் பயம் எனது நேசமான வார்த்தைகளால் மறைந்தது.

இரண்டு கண்ணாடிக்குவளைகள், மூன்று பீங்கான் தட்டுகள், ஒரு ஸ்விட்ச் போர்டு, குளிர்சாதனப் பெட்டியில் காய்கறி வைக்கும் பிளாஸ்டிக் தடுப்பு, சன்னலை மூடும் நீண்ட ஷட்டர் கதவு என அவள் உடைத்த விசயங்கள் நீண்டு கொண்டே இருந்தன.

அவள் உடைத்த பொருட்களின் ஒட்டு மொத்த மதிப்பு, விடியற்காலையில், அவள் அன்பாக போட்டுத்தரும் டீக்கு கால் தூசியாகாது.  அவள் போடும் டீ படு சுமாரான ஒன்றுதான், ஆனாலும் அவள் அதைக் கொண்டு வந்துத்தரும் அன்பில், இனிப்பு சரியாகக் கலக்கவில்லை என்றாலும், டீத்தூள் சரியாகப் போடவில்லை என்றாலும் எதுவுமே குறையாகத் தெரியாது. சுடுதண்ணியில் டீ பாக்கெட்டைப் போட்டு, டீக் குடித்து பழகியவளுக்கு, டீத்தூளைக் கொதிக்க வை, பாலைக் கலந்து, இஞ்சி ஏலம் தட்டிப்போடு என்பது எல்லாம் லத்தீன் கற்றுக்கொள்வதுப் போல... இருந்தாலும் மகிழ்ச்சியாக செய்கின்றாள்.

இப்பொழுது கூட, இணையக் குறிப்புகளைப் படித்து , பிரியாணி செய்ய முயற்சி செய்துக் கொண்டிருக்கிறாள். அதீத அன்பு காட்டுபவர்கள் அவர்களை அறியாமல் அடிமையாகிவிடுவார்கள்.  அந்த அதீத அன்பில்தான், மூன்று வெங்காயங்களை கண்கள் கலங்க வெட்டிக்கொண்டிருக்கிறாள்.

”கார்த்தி, பிரியாணி சாப்பிடுகிறோம், அப்புறம் ஒரே கொஞ்சல்ஸ் மட்டும்” கொஞ்சல்ஸ் என்ற அவளுக்குத் தெரிந்த பிடித்த ஒரே தமிழ்வார்த்தையை மட்டும் கலந்து ஆங்கிலத்தில் சொன்னாள்.

அவளை நான் திருமணம் செய்து கொள்வேனா, காதலிப்பேனா என்றெல்லாம் அவளுக்கு கவலை இல்லை. நான் அவளுக்கு ஒரு குழந்தையைத் தரவேண்டும். அவளுக்கு இந்தியக் குழந்தை, குறிப்பாக தமிழ்க்குழந்தை வேண்டுமாம். பெரியப் பிடிப்பற்ற அவளின் வாழ்க்கையில் பெருமிதமான பிடிப்பாக ஒரு தமிழ்க் குழந்தை, அதுவும் என் குழந்தை இருக்கும் என்பது அவளின் அசைக்க முடியாத நம்பிக்கை.

இந்திய ஆண்களைக் காதலிக்கும் மேற்கத்தியப் பெண்கள் மாயையான பொய்மை அதிகம் நிறைந்த இந்தியக் கலாச்சரத்தில் மதிமயங்கிவிடுகிறார்கள். அந்த மதிமயக்கத்தை கிறுக்குத்தனம் என்றும் சொல்லலாம். ஆனால் இந்திய அல்லது தெற்காசியப் பெண்களைக் காதலிக்கும் மேற்கத்திய ஆண்கள் பெரும்பாலோனோருக்கு குனி என்றால் குனியும் நிமிர் என்றால் நிமிரும் பெண்கள் வேண்டும் என்ற ஆதிக்கத்தனம். நான் ஒரு முறை கேத்தரீனாவை அரைக் கிறுக்கு என்று கூட சொல்லி இருக்கின்றேன்.

“அன்பு செய்வது அரைக்கிறுக்குத்தனம் என்றால் நான் முழுக் கிறுக்காக விரும்புகின்றேன்” என்பது அவளின் பதிலாக இருந்தது.

பிரியாணிக்கான வேலைகள் துரிதமாக நடந்து கொண்டிருக்கையிலேயே , “

“குட்டிப்பாப்பாக்கு என்ன பெயர் வைக்கலாம் கார்த்தி” எனக் கேட்டுக்கொண்டிருக்கும்பொழுதே இன்னொரு கண்ணாடி டம்ளரை உடைத்தாள்.

பாலச்சந்திரன் அல்லது இசைப்பிரியா என்று சொல்லத்தான் நினைத்து இருந்தேன், ஆனால் அந்த நொடி துடுக்குத்தனத்தில்,

“பாத்திரங்களை கீழேப்போட்டு உடைத்துவிடுவதுபோல பாப்பாவையும் கீழே போட்டு உடைத்து விடாமல் இருந்தால் பெயர் வைப்பதுப் பற்றி யோசிப்போம்” என்றேன்.  நகைச்சுவை ஆளுமைகள் எல்லா நேரத்திலேயும் ரசிக்கப்படுவதில்லை விரும்பப்படுவதில்லை.

 கண்களில் தாரைத் தாரையாக கண்ணீர் வழிந்தது. நிச்சயம் வெங்காயம் காரணமில்லை. அப்படியே போட்டது போட்டபடி என்னருகில் வந்து அமர்ந்து கொண்டு, என்னைக் கட்டிக்கொண்டு அழுதுத் தீர்த்தாள். பெண்கள் அழுது விட்டார்கள் என்றால் , அந்தப் பிரச்சினைக்காக மற்றும் ஒரு முறை அழ மாட்டார்கள். அழுது முடித்தவுடன் சில முத்தங்களுடன் சின்னப்புன்னகையைக் கொடுத்துவிட்டு , பிரியாணி செய்து முடித்தாள்.  தலைப்பாக்கட்டு பிரியாணி தோற்றுவிடும்,,, அவ்வளவு ருசியாக இருந்தது.

நான்கு நாட்கள் கழித்துப்போவதாக இருந்த பயணத்தேதியை இரண்டு நாட்கள் முன்னதாகவே மாற்றினாள். அடுத்த இரண்டு நாட்களுக்கு எனக்கு எந்த குறையும் வைக்கவில்லை. ரயில் நிலையத்தில் , வண்டியில் ஏறிய பின்னர், இறங்கி  ஆழ்ந்த முத்தம் கொடுத்து பின்னர் ரயில் ஏறினாள். மிலான் சேர்ந்ததும் எஸ் எம் எஸ் அனுப்ப சொன்னேன். தலையாட்டினாள். 10 மணி நேரம் ஆகியும் அனுப்பவில்லை. பேஸ்புக்கிலும் தகவல் அனுப்பவில்லை. அவளின் பேஸ்புக் முகப்புப்பக்கம் போய்ப்பார்த்தேன்.

”நான் உடைத்தது வெறும் கண்ணாடிப்பாத்திரங்கள் மட்டுமே” எனப் பொருள் தரும் வாக்கியத்தை சோகச்சின்னத்துடன் இத்தாலிய மொழியில் எழுதி வைத்திருந்தாள்.

அவள் அலைபேசிக்கு அழைத்தேன்,,,, நீண்ட அழைப்பு எடுக்கவில்லை.. இரண்டாம் முறை எடுக்கவில்லை... முன்றாம் முறையும் அழைக்கின்றேன்... கண்டிப்பாக அழைப்பை எடுப்பாள் என்ற நம்பிக்கை இருக்கின்றது.
----------