கதையில் வந்த பெண் - சிறுகதை

ஒரு வாரம் அலுவலக விசயமாக திருச்சி சென்று விட்டு சென்னைக்கு காரில் திரும்பிக் கொண்டிருக்கையில், திண்டிவனத்திற்கு முன் ரோட்டின் நடுவே ஒரு பெண் கையை ஆட்டி லிஃப்ட் வேண்டும் என்று கேட்பதை சில மீட்டர்கள் முன்னமே கார்த்தி கவனித்து விட்டான். நள்ளிரவில் வரும் கார்களில் இது போல லிஃப்ட் கேட்டு வழிப்பறி செய்யும் கும்பலின் ஆளாக இருப்பாளோ என்ற பயம், பாவம் உதவலாம் என்ற அவனது எண்ணத்தை வென்றது. அழகான , பார்ப்பவர் முகத்தில் சட்டென்று பதியும் வட்ட முகம். சிவப்பு கலர் சுடிதார், கண்ணாடி அணிந்திருந்தாள். வண்டியை நிறுத்தாமல் இன்னும் வேகமெடுத்தான்.

மறுநாள் தனது வீட்டில் கலைந்து கிடந்த தினசரிகளை அடுக்கி வைக்கையில் அவனது கண்ணில் பட்ட செய்தி

"திண்டிவனம் அருகே இளம்பெண் கொலை, சென்னையைச் சேர்ந்த பிரபல தொழிலதிபரின் மகள்..."

செய்தியின் அருகே, நேற்றிரவு என்னிடம் லிஃப்ட் கேட்ட பெண்ணின் புகைப்படம் இருந்தது... அய்யோ !!! ஒரு வேளை லிஃப்ட் கொடுத்திருந்தால் அவளைக் காப்பாற்றி இருக்கலாமோ என்ற குற்ற உணர்ச்சி அவனக்கு அதிகமாகிய போது எதேச்சையாக தினசரியின் தேதியைக் கவனித்தான்.. அந்த செய்தி இரண்டு நாட்களுக்கு முந்தையது !!!!!
.....................

மங்கலான வெளிச்சத்தில் பஸ்ஸினுள் மேற்சொன்ன ஒரு பக்க கதையை வார இதழுக்காக நான் எழுதி முடித்தபோது, பஸ் விழுப்புரம் அடுத்து எதோ ஒரு ஊரில் பயண இடைவெளிக்காக நின்றது. வழக்கமாக நான் கதையை எழுதும்பொழுது கதை மாந்தர்களுக்கு கற்பனை உருவம் கொடுப்பது போல் வந்த அந்த பெண் கதாபாத்திரத்துக்கும் ஒரு அழகான உருவம் மனதில் கொடுத்து வைத்தேன். பஸ் மீண்டும் நகர... அப்படியே கண்களில் அந்த உருவத்துடன் கண்ணயர்ந்தேன். பஸ்ஸின் அதிர்வுகள் நின்றதை அடுத்து தூக்கம் கலைந்தது.

"மெட்ராஸ், ஒரு சீட் இருக்குமா!!!"

"சீட் இல்லை, ஸ்டாண்டிங் தான், 200 ரூபாய்"

பஸ்ஸின் மாற்று டிரைவர், பஸ்ஸை நடுவழியில் நிறுத்திய அந்த பெண்ணுக்கு கதவைத் திறந்துவிட்டார். கதையில் வந்த பெண்ணுக்கு நான் கொடுத்த உருவத்தின் அச்சு அசலாய் இந்த பெண்..

பஸ்ஸின் வெளிச்சத்தில் ரோட்டின் இடது புறத்தில் உள்ள தூரப் பலகைக் காட்டியது திண்டிவனம் 8 கி.மீ
---------------------------------------