Tuesday, October 29, 2013

ஊடக அனுபவங்கள்


அண்ணா பல்கலைகழகத்தில் இறுதி ஆண்டு படிக்கும் மாணவர் ஒருவர்,  அமெரிக்கப் பல்கலை கழகம் ஒன்றில் ஆராய்ச்சிப் பட்டம் பெற்றார் என்ற இந்து ஆங்கில நாளிதழ் செய்தியும், மறுநாள்  அது தவறான தகவல்களால் எழுதப்பட்ட கட்டுரை என்று வருத்தங்களுடன் வந்த மறுப்பு செய்தியும்  கடந்த இரண்டு தினங்களாக சமூக ஊடகங்களில் தொடர்ந்து பகிரப்பட்டன.
(NEWS Link: - http://www.thehindu.com/news/cities/chennai/chennai-engineering-student-doctorate-claims-false/article5278851.ece)
 பாதி உண்மையும் மீதி மிகைப்படுத்தப்பட்ட பொய்களையும் உள்ளடக்கி மாணவன் கொடுத்த தகவல்களை சரிபார்க்காமல்  தனது தளத்தில்  போட்டுக்கொண்ட அண்ணா பல்கலை கழகத்தையும் அப்படியே கட்டுரையாக்கிய செய்தியாளரையும் பற்றி யோசித்துக் கொண்டிருந்த பொழுது இந்த பத்தியை  எழுத முடிவு செய்தேன்.  பெரும்பாலான விசயங்கள் ஏற்கனவே பண்புடன் இணையத் தமிழ்க் குழுமத்தில் பதியப்பட்டதுதான்.

இனிப்பான வாழ்வின் நிகழ்வுகளுக்கு , தெரிந்தோ தெரியாமலோ 'கசப்பனுபவத்தை' ஊட்டுபவர்கள் இந்த 'முந்திரிக் கொட்டை' செய்தியாளர்கள்.   சென்ற வருடம்  எனக்கு  கூகுள் பரிசில் ( பெரிய தொகை ) ஒன்று வழங்கப்பட்டது.  தொடர்ந்து படிப்பில் சாதிக்கும் பெண்களுக்கும் , மாற்றுத் திறனாளிகளுக்கும் கூகுள் நிறுவனம் விண்ணப்பங்களை வரவேற்று , பரிசீலித்து தேர்வு செய்யும். ( வென்ற ஆண்டிற்கு முந்தைய ஆண்டு என்னுடைய விண்ணப்பம் நிரகாரிக்கப்பட்டது. )

விளம்பரப் பிரியன் ஆன நான்,  வழமைப் போல பேஸ்புக்கில் / வலைப் பதிவில் தம்பட்டம் அடித்து விட்டு அமைதியாகிப் போனேன். ஒரு நாள் பிரபல வார இதழ்  ஒன்றின் செய்தியாளர் மின்னஞ்சலில் தொடர்பு கொண்டார்,  விபரங்களைக் கேட்டறிந்தார். இதனால் கூகிளில் நிரந்தர வேலை கிடைக்குமா என்றார்? நான் வெற்றிகரமாக ஆராய்ச்சிப் படிப்பை முடித்து கூகுளிற்கு விண்ணப்பித்தால் வேலை கிடைக்க உதவும் கூறுகளில் முக்கியமான ஒன்றாக உதவியாக இருக்கும் என்றேன் , பின்பு என் பின்புலம் , நான் வந்த வழி எல்லாம் கேட்டு , கூகுள்  பரிசு பெரும் பொழுது எடுத்தப் புகைப்படம் ஏதேனும் இருக்கின்றதா எனக் கேட்டார். அடுத்த மாதம் தான் , ஜூரிச்சில் நிகழ்வு. அந்த நிகழ்ச்சி முடிந்தவுடன் படத்தை அனுப்புகின்றேன் என்றேன்.

அடுத்த வாரம்,  இதழில் கட்டுரை  வெளி வந்தது.  இரண்டு அதிர்ச்சிகள். முதலாவது ,  படித்து முடித்தவுடன் கூகுளில் வேலை உறுதி என்பதாக இருந்தது.  சரி இதை 'பாசிடிவ்' ஆக எடுத்துக் கொள்வோம்  என வருத்தத்தை தவிர்த்து விட்டு, இதழில்  வெளியான புகைப்படத்தைப் பார்த்த பொழுது , அது சுவீடனில் நான் முதுகலைப் பட்டம் பெற்றபொழுது எடுத்த பட்டமளிப்பு படம்.

"ஏன் இப்படி செய்தீர்கள்"  என செய்தியாளரைக் கேட்ட பொழுது " படத்துடன் இருந்தால் கட்டுரை சிறப்பாக இருக்கும்" என பேஸ்புக்கில் இருந்த பட்டமளிப்பு படத்தை எடுத்தாண்டதாக சொன்னார். .  ஆயிரம் மைல்களுக்கு அப்பால் இருக்கும் அப்பாவிகளுக்குத் தெரியவாப் போகின்றது என்ற சாதரணமாக எடுத்துக் கொள்ள முடியாத இணையக் காலம் இது.  பெரிய வார இதழ்... எதிர்த்து எழுதி அன்றைய மகிழ்ச்சியைக் கெடுத்துக் கொள்ள வேண்டாம் என்று அப்படியே விட்டு விட்டேன்.

என்னுடைய ஒரே எதிர்ப்பு, அந்தக் கட்டுரையின் மின் வடிவத்தை என்னுடைய எந்த சமூக ஊடகப் பக்கத்திலும்  பகிராமல் இருந்தது தான். யாராவது அதைப் பகிர்ந்து  என்னைக் கோர்த்து விட்டாலும் போய் சத்தமில்லாமல் என் பெயரை நீக்கிவிட்டு வந்து விடுவேன்.  இந்தக் கொடுமையில், அந்தக் கட்டுரையின் பல வரிகளுடன் , சில தினசரிகளிலும் அடுத்த இரண்டு தினங்களில் வெளிவந்தது தான்.

அன்றைக்கு அந்த செய்தியாளருக்கு ஒரு சாதரணமான விஷயம். அவரைப் பொறுத்த வரை படத்துடன் இருப்பது கட்டுரைக்கு முழு வடிவம் தரும். ஆனால் தட்டுத் தடுமாறி கிடைக்கும் கிளைகளைப் பற்றி வளர்ந்து , பெரிய உயரத்தை நோக்கிப் போகையில் எதிர்காலத்தில்இதே புகைப்படம் பூதகரமாக வெளிவரக்கூடும் என்பது செய்தியாளரைப் பொருத்தவரை யோசிக்க முடியாத விஷயம்.  நொந்து கொண்டு அடுத்த வேலையைப் பார்க்க போய் ஆகிவிட்டது

செய்தித் தாளின் செய்திக்கும் வாழ்க்கைக்கும் நெருங்கிய தொடர்பு உண்டு என்பதை அனுபவித்து இருக்கின்றேன். 8 வருடங்களுக்கு முன்னர்,  சென்னையில் மட்டும் வெளிவரும் சில ஆயிரங்கள் வெளியாகும் ஒரு மாத இதழ் ஒன்று என்னைப் பற்றிய கட்டுரை ஒன்றை எழுதி இருந்தது. அவர்கள் மானே தேனே பொன் மானே எல்லாம் போட்டு எழுதி இருந்தாலும் , ஓர் அட்டகாசமான வரியை எழுதி இருந்தார்கள். 'இடுப்புக்குக் கீழே எதுவுமே செயல்பட முடியாத நிலையிலும்'  இவ்வளவு சாதித்து இருக்கின்றார்.  அப்பொழுது அம்மு எண் 1 உம் நானும் காதலித்துக் கொண்டு இருந்தோம்.  இடுப்புக் கீழே செயல் இழந்தவர் என்ற வாசகம்  அந்தக் காதலை முடக்க  அவர்களின் குடும்பத்தினரால் பெரிய அளவில் குறிப்பிடப்பட்டது.  அந்தக் கேள்வி இன்றைக்கு  கேட்கப்பட்டு இருந்திருந்தால் நிருபிக்க ஒரு வாய்ப்புக் கேட்டு இடுப்புக்கு கீழே செயற்படும் என உறுதிப் படுத்தி இருக்கலாம். . அன்று எதுவும் சொல்லத் தெரியவில்லை.  எதுவாக இருந்தாலும் நன்மைக்கே .. அந்த அம்மு ஆண்டி ஆகிவிட்டாள். நான் இன்னமும் யூத்.

ஒரு தடவை பெரியாரைப் பெருமையாக சொல்ல, பேட்டி எடுத்த அம்மணி  திரித்துப் போட்டு விட்டது.  சரியான புரிதல் இல்லாதவன் என என்னுடைய பெரியாரிய ஆசிரியர்கள் என்னைக் கடிந்து கொண்டார்கள்.

சில சமயங்களில் செய்தியாளர்களின்  அரசியலும் உண்டு.  என் வலைப்பதிவுக் கட்டுரை ஒன்றை வினையூக்கி என்றப் புனைப் பெயரில் ஏன் போட வில்லை என்றதற்கு , 'எடிட்டர் அதற்கு ஒப்புக்கொள்ளவில்லை   செல்வகுமார்' என்றே போட சொல்லி விட்டார்.' என்ற பதில் கிடைத்தது.

பொதுவாக , இந்த செய்தியாசிரியர்கள் மானே தேனே பொன் மானே போடுவதாக நினைத்துக் கொண்டு பாட்ஷா பட ரேஞ்சில் இருக்கும் விசயங்களை விக்ரமன் பட ரேஞ்சிற்கு இறக்கி விடுவார்கள். இன்னும் சிலர் தூர்தர்ஷனின் அந்தக் கால  செவ்வாய்க் கிழமை நாடகங்களைப் போல ஆக்கி விடுவார்கள்.

இந்த அனுபவங்களால் , சில மாதங்களுக்கு முன்னர் ,  "உன்னை பற்றி ஒரு கட்டுரை ஒன்றை எழுதட்டுமா"  எனக் கேட்ட பாரம்பரிய வார இதழ் ஒன்றின் மதிப்பிற்குரிய  முதன்மை செய்தியாளர் ஒருவருக்கு  நாசூக்காக "வேண்டாம் அண்ணே" என மறுப்பு தெரிவிக்க வேண்டியதாகிவிட்டது.  அவர் கோபித்துக் கொள்ளாமல் புரிந்து கொண்டார்.

ஒரே ஒரு முறை மட்டும் செய்தியாளர் ஒருவரின்  முந்திரிக்கொட்டை தனத்தால் நல்லதும் நடந்து இருக்கின்றது.  தனிப்பட்ட விசயமாக செய்த  அரசியல் சம்பந்தப் பட்ட ஒன்று எதிர்பாராத விதமாக பெரும் 'நற்பலனை'  எனக்கும் , ஆளவந்தான் படத்தில் வருவதைப் போல டாஸ் மாறி விழுந்த ஒருவருக்கும்  தொடர்ந்து அளித்துக் கொண்டு இருக்கின்றது.

அந்த செய்தியில் வந்த மாணவனைப் பற்றி யோசிக்கையில் என்னுடைய மற்றொரு அனுபவம் நினைவுக்கு வந்தது. 2004 ஆம் ஆண்டு, ஐரோப்பிய ஒன்றிய - இந்திய தொழில் மேம்பாட்டு மாநாடு ஒன்று புது தில்லியில் நடந்தது. ஐரோப்பிய ஆணையத்தில் முக்கியப் பொறுப்பில் இருந்த என் நண்பரின் சிபாரிசு மூலமாக , மாற்று திறனாளிகளுக்கான உயர் படிப்பு என்ற தலைப்பில் பேச , அனைத்து செலவுகளையும் ஏற்றுக்கொண்டு அவர்கள் அழைத்து இருந்தனர் . ஒரு வாரம் மாநாடு , சந்தித்த நபர்கள் எல்லாம் ஐரோப்பிய ஒன்றியத்தின் மிகப் பெரிய ஆளுமைகள்,  நிறுவன முதலாளிகள்.  என்னுடைய சக்கர நாற்காலி எப்பொழுதும் சிறப்பு ஈர்ப்பு என்பதால், அனைவரும் என்னுடன் வலிய வந்து பேசினார்கள்.   "ஐரோப்பா வா, உனக்கு நான் வேலை தருகின்றேன்"  என இரண்டாவது மிடக்கு வைன் கொடுத்த பின்னர் ஒருவர் சொல்ல, போதையில் மற்றொருவர் அதை ஆமோதிக்க , புது உலகத்தில் இருந்தேன்.

மெட்ராஸ் வந்த பின்னர், அலுவலக நண்பர்களிடம் அதைப் பற்றி தம்பட்டம் அடிக்க,  என்னுடைய மேலதிகாரி ஒருவர் தனியாக அழைத்தார்.

"பொதுவாக , வெளிநாட்டு கருத்தரங்கங்களில் , இரவு உணவு நிகழ்வுகளிலோ  , அதன் பின்னர் மதுபான கொண்டாட்டங்களின் பொழுதோ முக்கியமானவர்கள் , நாம் எதை சொன்னாலும் பாராட்டு மழை மட்டுமே பொழிவார்கள். எங்கள் ஊரில் வெள்ளைக் காகங்கள் இருக்கின்றன என்றாலும்   'வாவ்.. தட்  இஸ் எ வோண்டர்புல் திங் "  என்பார்கள்.  கொண்டாட்ட நிகழ்வுகளில் பரிமாறப்படும் விசயங்களை அப்படியே மூளைக்கு எடுத்துக் கொண்டு நம்புவது முட்டாள் தனமானது..  நீ வேண்டுமானால் அவர்களுக்கு மின்னஞ்சல் செய்து பார்,, மெட்ராசில் வெயில் எப்படி இருக்கின்றது என்ற பதிலைத் தவிர உனக்குத் தேவையானது எதுவம் வராது"

என்னுடைய பலமே என்னுடைய வழிகாட்டிகள் , வசிஷ்டர்களாக அமைந்து விடுவதுதான்.  அவர் சொல்படியே , வேலைக் கேட்டு மின்னஞ்சல் அனுப்பினால் மெட்ராஸ் வெயிலைப் பற்றி  கேட்டார்கள்  வசிட்டர் வாக்கின் படி . ஓரிரவில் கிடைக்கும் விசயங்கள்  ஓரிரவிலேயே காணாமல் போகும் என்பதைப் புரிந்து கொண்டு தகுதிகளை முடிந்தவரை அதிகப்படுத்திக் கொண்டு தட்டுத் தடுமாறி மேலே வந்து கொண்டு இருக்கின்றேன்.

யாராவது ஒரு வசிட்டர் , அந்த மாணவனை உலுக்கி நிதர்சனத்தைப் போதித்து இருந்தால் ஒரு நாளில் ஹீரோவாகவும் மறுநாள் ஜீரோவாகவும் ஆக்கப்படாமல் இருந்து இருக்கலாம்.  நோண்டி நொங்கு எடுக்காமல் , தளைத் தட்டி , அந்த மாணவனை  மடை மாற்றலாம் . ஆர்வக் கோளாறுகளுக்கு தேவை நல்ல வழிகாட்டிகள்.

Sunday, October 27, 2013

பேஸ்புக் - பொழுதுபோக்கு குட்டிக் கதை


காட்சி - 1

அம்மு :- 'யாருடா கார்த்தி அந்தப் பொண்ணு, அடிக்கடி உன் போஸ்ட் களுக்கு லைக் கமெண்ட் எல்லாம் போடுறா ?" 

கார்த்தி :- 'எந்த பொண்ணுடா அம்மாடி, நிறைய பொண்ணுங்க என் பக்கம் வருவாங்களே ' 

அம்மு :- "அதுதான் அபிராமி-அபிராமி அப்படின்னு ஒருத்தி வந்து கமெண்ட் போடுவாளே , அவள் யாரு? "

கார்த்தி :- "அதுவா , அந்தப் பொண்ணு என்னோட ரசிகை , எழுத்துக்கு மட்டும், நீ கண்டுக்காதே "


காட்சி - 2

அம்மு :- "ஏன்டா கார்த்தி, என்னை பிலாக் பண்ணிட்ட ... "

கார்த்தி :- "சும்மா நொய் நொய் நு கேள்வி கேட்டுட்டு இருந்தீன்னா அப்படித்தான் "

அம்மு :- "அப்போ சரி, நீ உன் உன் கடலை கேர்ல்ஸ் கூட happy ya இரு, நான் பேஸ்புகில் இருந்தால் தானே கேள்வி எல்லாம் வருது, நானே டி - ஆக்டிவேட் செஞ்சுட்டு பேஸ் புக்கு விட்டுட்டு போய்டுறேன் "
காட்சி - 3

கார்த்தி :- "தங்கம்முலு , நான் பேஸ்புக்கில ஒரு ஆர்டிக்கிள் போட்டு இருக்கேன் பாரு ... செம கைத்தட்டு கிடைச்சிட்டு இருக்கு நான் உன்னை அன்-பிலாக் பண்றேன் .. நீ பாரேன் "

அம்மு:- ",போடா நாயே ... என்னை நீ பிலாக் பண்ண பிறகு டி ஆக்டிவேட் பண்ணிட்டேன்"

கார்த்தி :- " சரி, நான் என்னோட வேற ஒரு ஐடி தரேன்.. அதுல பாரு "

அம்மு :- "சரி சொல்லித் தொலை ..."

கார்த்தி :- " abhirami-abhirami@*****.com பாஸ்வேர்ட் உன்னோட பேரு தான் "

Saturday, October 26, 2013

Languages often teach more history than the documented history


சென்னைத்தமிழ், நெல்லைத்தமிழ், தஞ்சைத்தமிழ் போல , சேரளத் தமிழான மலையாளமும் தமிழின் ஒரு பேச்சு வழக்கு என அறிந்திராத காலம் அது. எகத்தாளம் , கேலி , நக்கல் எல்லாம் நிரம்பிய இருபதுகளின் ஆரம்ப நாட்கள். ஆங்கிலத்தில் மட்டும் பேசிக்கொண்டிருந்த மலையாளி ஒருவர் முன்னிலையில் அவரைப்பற்றி தமிழில் இன்னொரு நண்பரிடம் ஏதோ மென்மையான நக்கல் ஒன்றை அடித்துவிட மலையாள நண்பர் சில நாட்கள் என்னிடம் பேசவில்லை. பின்பு ஒரு நாள் அவர் தான் சொன்னார் , மலையாளிக்கு தமிழ் நன்றாக விளங்கும் , விளையாட்டுக்குக் கூட மலையாளிகளைக் கிண்டல் செய்ய அவர்களின் முன்னால் , அவர்களுக்குப் புரியாது என நினைத்துக் கொண்டு, பிறரிடம் தமிழில் கிண்டல் செய்து விடாதே என்று அறிவுறுத்தினார். அந்த மலையாள நண்பருக்கு பெயரில் எந்தவிதமான சாதிப் பின்னொட்டு இல்லை என்பது ஓர் உபரித் தகவல்.

மேற்சொன்ன அனுபவம் மலையாளத்திற்கு என்றால், பின்வரும் சம்பவம் தெலுங்கு சம்பந்தப்பட்டது. சுவீடனில் படிக்கையில் , ஆரம்ப காலத்தில் தெலுங்கானா பகுதியைச் சார்ந்த தெலுங்கு மாணவர்கள் என் வீட்டில் சில காலம் இருந்தார்கள் அவர்களுடன் பேசிப் பேசி தெலுங்கானா தெலுங்கு கொஞ்சம் புரிபட ஆரம்பித்தது. ஒரு நாள் இரவில் நான் அரைத்தூக்கத்திற்கு சென்ற பின்னர் , அவர்களின் உரையாடல் ஆரம்பித்தது. அதில் ஒரு நண்பன் சுத்த தெலுங்கில் பேசு, இவனுக்கு தெலுங்கானா பேச்சு வழக்குப் புரியும் என குறிப்பு கொடுக்க சுத்தத் தெலுங்கில் பேச ஆரம்பித்தார்கள் . அவர்கள் பரிசுத்த தெலுங்கில் , அவர்கள் உடனடியாக வீட்டைக் காலி செய்ய விரும்புகின்றார்கள், புது வீடு அவர்களுக்கு குறைந்த வாடகையில் வேறு பகுதியில் கிடைத்து இருக்கின்றது. உடனடியாக வீட்டைக் காலி செய்தால் , தனி ஒருவனாக முழு வாடகை கொடுக்க எனக்கு சிரமம் இருக்குமே எனக் கவலை இல்லாமல், அவர்களின் வசதியைப் பற்றி மட்டும் பேசிக் கொண்டு இருந்தார்கள். இரண்டு நாட்கள் கழித்து சொன்னார்கள். இந்த விஷயம் 'ஏற்கனவே தெரியுமே' என்றேன். எப்படி என்றக் கேள்விக்கு,
சுத்தத் தெலுங்கு , தெலுங்கானத் தெலுங்கை விட தமிழுக்கு மிக நெருக்கமாக இருக்கும், மேலும் தெலுங்கில் இருக்கும் பண்டைய சொற்கள் தமிழின் இலக்கியச் சொற்கள். , தமிழின் குழந்தை தெலுங்கு என என் தமிழரசியலையும் அவர்களிடம் விதைத்து விட்டு அவர்களை சுமுகமாக வழியனுப்பி வைத்தேன்.

சுவீடனில் மற்றும் ஒரு முறை , சிங்கப்பூர் சீனாக் காரன் , பூவெல்லாம் கேட்டுப்பார் படத்தில் சூரியா வரிசையாக பூக்களின் பெயர்களைச் சொல்லுவதைப் போல, பல தமிழ்க்கெட்ட வார்த்தைகளை சொன்னான். எப்படி சீனாக்காரர்கள் தமிழில் கிண்டலடிக்கப்டுவார்கள் என்பதையும் சொன்னான். இவை அனைத்தும் அவனது சிங்கப்பூர் தமிழ் நண்பர்களிடம் சிறு வயதில் இருந்து கற்று கொண்டதாம். அன்றில் இருந்து சீன ஆட்களை மறந்தும் கூட கிண்டலடிப்பதில்லை.

இப்படி திராவிட மொழி அனுபவங்கள் ஒரு வகை என்றால் , இத்தாலியில் வேறு ஒருவகையில் இருந்தது. ரோமை சுற்றிப்பார்க்க வந்திருந்த எனது எகிப்திய நண்பர்களை , என் இத்தாலிய - சிசிலி நண்பனிடம் அறிமுகப் படுத்தினேன். எகிப்திய நண்பர்கள் அவர்களுக்குள் அவ்வப்பொழுது அரபியில் பேசிக்கொண்டும் சிரித்துக் கொண்டும் இருந்தனர். இது சகஜமான ஒன்று என்பதால் நான் கண்டு கொள்ளவில்லை. கொண்டாட்ட ஒன்று கூடல்களில் இந்தி'யர்கள் அவர்கள் மொழியில் பேசிக்கொண்டு இருக்கும் பொழுது , நானும் என் தமிழ் நண்பர்களும் தமிழில் பேசிக் கொண்டு இருப்போம். ஆனால் என் இத்தாலிய நண்பனின் முகம் அடிக்கடி கடுமையாக மாறிக்கொண்டு இருந்தது. பின்னர் , இத்தாலிய நண்பனிடம் 'அவர்கள் அரபியில் பேசிக் கொண்டு இருந்ததால் நீ கோபம் ஆகிவிட்டாயா? ' எனக் கேட்டதற்கு
"கோபம் அவர்கள் அரபியில் பேசியதற்காக இல்லை, அரபியில் அவர்கள் இத்தாலியைப் பற்றியும் என்னையும் கேலி செய்து கொண்டு இருந்தார்கள். எனக்கு அரபி தெரியாது என்றபோதிலும் , அவர்கள் கேலி செய்யப் பயன்படுத்திய அரபி வார்த்தைகள் அப்படியே இன்றும் சிசிலியில் புழக்கத்தில் உண்டு, சிசிலித் தீவு , வரலாற்று ரீதியாக ரோமப் பேரரசு / இத்தாலிக்கு எந்த அளவிற்கு நெருக்கமோ அதே அளவிற்கு எகிப்திற்கும் நெருக்கம். அரபிக் கலப்பு என்பது  சிசிலியின் இத்தாலிய பேச்சு வழக்கில் சாதாரணமான ஒன்று " என்றான்.

Tuesday, October 22, 2013

தங்கச் சாமியார்


எனது முதன்மை சீடனுக்காகக் காத்து இருக்கின்றேன். எனது ஆசிரமத்தில் இருந்து 50 கிலோ மீட்டர்கள் தொலைவில் இருக்கும் பாழடைந்த சோழர்கள் கால மண்டபத்தில் அகழ்வாராய்ச்சி நடந்து கொண்டு இருக்கின்றது. அங்கிருந்து எதிர்பார்த்து இருக்கும் நல்ல செய்தி ஒன்றிற்காகக் காத்து இருக்கின்றேன். 

முப்பது வயதில் என்னளவிற்கு யாரேனும் சாதிக்க முடியுமா எனத் தெரியவில்லை. நடுத்தரக் குடும்பத்தில் பிறந்து தட்டுத் தடுமாறி பொறியியல் படித்து சில நாட்கள் துறை சார்ந்து வேலைப் பார்த்து , பின்னர் பக்கத்து வீட்டு சித்த மருத்துவரிடம் கொஞ்சம் சித்த மருத்துவம் கற்றுக்கொண்டு ஊரில் ஒரு சித்த மருத்துவக்கடை ஒன்றைப் போட்டது வரை சுமாராகத்தான் போய்க் கொண்டு இருந்தது. ஒரு நல்ல நாளில், சித்தத்தில் கொஞ்சம் காவி கலந்து பகவத் கீதைல என்ன சொல்லியிருக்கிறது என்றால் என பேச ஆரம்பித்து மருந்துகள் கொடுக்க ஆரம்பித்த பின்னர் கூட்டம் கூடியது. கொஞ்சும் தமிழ், நிறைய ஆங்கிலம், கொஞ்சம் வடமொழி என பேசியதால் மக்களுக்கு அபிமானம் கூடிக் கொண்டே போனது.

மன நிம்மதியற்று வருபவர்களுக்கு மருந்து என வெல்லசூரணத்துடன் போதைப்பொருளையும் சேர்த்துக் கொடுக்க ஆரம்பித்த பின்னர் வெளிநாட்டுக் காரர்களும் என் சீடர்களில் இடம் பிடித்தனர் ஆம்ஸடர்டாம் நகருக்கு அடுத்தப்படியாக என் குட்டி ஆசிரமம் விசயத்திற்கு பிரபலம்.

மற்ற வணிகத்தில் வடநாட்டவர்கள் கலக்கினாலும் இந்த ஆன்மிகத்தில் தென்னிந்திய சாமியார்கள் தான் பேரரசர்கள் . என்னைப் போல நிறைய தமிழ்ச் சாமியார்கள் பெருகிவிட்டதால் நான் பெற்ற இடத்தை இழக்காமல் இருக்க , ஆன்மிக வியாபரத்திற்கு சம்பந்தம் இல்லாத பிரபாகரன் , பெரியார் என பேசி எல்லாம் கூட்டம் சேர்க்க வேண்டியதாக இருக்கின்றது. ஆன்மிகத்தையும் அரசியலையும் இணைக்கும் போராளிகளே எனது சீடர்கள் என நான் அடிக்கடி சொல்லுவதுண்டு.

ஒரு நாள் ஏதேச்சையாக , தொலைக்காட்சியில் குறும்படம் ஒன்றைப் பார்க்க, அதில் கதைப்படி ஒரு சாமியார் பண்டைய அரசனின் கோவிலில் தங்கம் இருப்பதாக சொல்லுவார். அதையே என் கனவாக மாற்றி , சோழர் மண்டபத்தில் தங்கப் புதையல் எனச் சொல்லிவிட்டேன். இரண்டு நாட்களாக , நான் தான் செய்திகளின் செல்லப்பிள்ளை. அகழ்வாராய்ச்சி நிறுவனத்தில் வேலைப்பார்க்கும் ஒருவர் என் சூரணத்திற்கு கட்டுப்பட்டவர் என்பதால் கனவை மெய்ப்பிக்கத் தோண்டிக் கொண்டு இருக்கின்றார். என் கனவு என் உரிமை என, அவருக்கு முன்னரே என் சீடனை அனுப்பி 150 கிலோ தங்கத்தை அங்கேப் புதைக்க சொல்லி இருந்தேன். தங்கம் கிடைக்கும் ... என் புகழ் மேலும் பரவும் ... என சீடனுக்காகக் காத்து இருக்கின்றேன். அவனோ கைப்பேசி அழைப்பையும் எடுக்க மாட்டேன் என்கின்றான். ஒருவேளை தங்கத்தைப் புதைக்காமல் எடுத்துக் கொண்டு ஓடி இருப்பானோ !!

ஒரு நிமிடம் இருங்கள், அகழ்வாராய்ச்சி நிபுணரிடம் இருந்து அழைப்பு !!!

"ஹல்லோ"

Wednesday, October 16, 2013

அங்கு கண்ட மனிதர்கள் - சிறுகதை

பன்னாட்டு வான்வெளி ஆய்வு மையம் மகிழ்ச்சியில் திளைத்துக் கொண்டு இருந்தது.  ஆம் பல நூறு ஒளியாண்டுகள் தள்ளி இருக்கும் ஒரு கோளில் மனிதர்கள் இருப்பதை கண்டுபிடித்து விட்டனர். அண்ட சராசரத்தில் முடிவிலா பயணம் மேற்கொண்டு இருக்கும் புவியில் இருந்து அனுப்பப்பட்ட ஒரு விண்கலம்  அதை  படம் பிடித்து அனுப்பி இருக்கின்றது.  வந்து இருந்த படத்தில், மிகப்பெரிய சமவெளியில்  கூட்டம் கூட்டமாக மனிதர்கள் இருக்கின்றனர்.

"ஆடைகள் இன்றி இருப்பதால் , நாகரிக காலம் இன்னும் அங்கு தோன்றாமல்  நாம் ஆதியில் இருந்ததைப் போல இருக்கின்றனர் போலும் "  என்றார் ஓர் அறிவியல் ஆளர்

"இந்தக் கோளின் ஒரு பகுதியைத் தானே படம் பிடித்து இருக்கின்றது நமது விண்கலம்... மறு பகுதிக்கான படங்கள் என்று வரும் ?"  என்ற பத்திரிக்கையாளரின் கேள்விக்கு

"இன்னும் ஓர் ஆண்டில் எதிர்பார்க்கின்றோம் "  பதில் சொன்னார் தலைமை அறிஞர்.

உலகமே இதைப் பற்றித்தான் பேசிக்கொண்டு இருந்தது . கல் தோன்றா மண்  தோன்றா  காலம் முன்னரே அங்கு சென்ற நமது தொப்புள் கோடி உறவுகளாக இருக்கும் என தமிழ் நாட்டுத் தலைவர்கள் கட்டுரைகள் எழுதினர்.  ஏக இறைவன் மனிதனைப் படைத்தான். பல இடங்களில் அவனை அமர வைத்தான் என ஆபிரகாமிய மதங்கள் புது விளக்கங்கள் கொடுத்தன.  அவர்கள் அனேகமாக இந்திரனைத் தலைமையாகக் கொண்ட தேவர்களாக இருக்கக் கூடும். ஆடை இல்லை என்பது ஒரு முக்கியமான விஷயம் என்பதால் , ஒளிக்கூசும் ஆடைகளை விண்கலம் படம் பிடிக்க இயலவில்லை என வேத விற்பனையாளர்கள் விளக்கம் சொன்னார்கள்.  மேற்கு உலகில் ,  எவ்வளவு விரைவில் அங்கு போக முடியும் என்பதற்கான ஆராய்ச்சிகள் தொடங்கலாயின.

அதே நேரத்தில் மனிதர்களைக் கண்டுபிடித்த கோளின் மறுபக்கத்தில், 

பிரம்மாண்டமாய் இருந்த டைனசோர்கள்,  கற்பனையின் உச்சத்தில்   ஒரு கட்டிடம் இருந்தால் எப்படி இருக்குமோ அவ்வகையான கட்டமைப்பின் மையத்தில்,  இன்னும் இருபது வருடங்களுக்குள் ஏற்படப் போகும் உணவுப் பற்றாக்குறையை விவாதிக்கக் கூடி இருந்தன.

"மனித இனப்பெருக்கம் குறைந்து கொண்டே வருகின்றது .. அடுத்த பத்து ஆண்டுகளுக்குள் நமக்கு சத்தான மனித மாமிசம் கிடைப்பது நின்று விடும் °

விவாதம் போய்க் கொண்டிருக்கையில்  தலைமை காவல் மையத்திடம் இருந்து தகவல் வந்தது.  ஐயத்திற்கு இடமான ஒரு பொருள் ஒன்று நமது  கோளின் மேல் சுற்றிக் கொண்டு இருக்கின்றது.

"அழித்து விட வேண்டாம்,  அதன் தொடர்புகளைக் கண்காணியுங்கள்... பின் தொடருங்கள் "

அடுத்த சில மணி நேரத்தில் அடுத்த செய்தி வந்தது

"மகிழ்ச்சியான செய்தி,   அந்த சந்தேகத்திற்கு இடமான பொருள் தொடர்பு கொள்ளும் கிரகத்தில்  , நாம் உணவிற்காக வளர்க்கும் மனித விலங்குகள் ஏராளமாக இருக்கின்றன."

"அருமை... நாளையே நமது கலங்களைத் தயார் செய்யுங்கள் .. நமது எதிர்கால உணவுப் பிரச்சினை தீர்ந்தது "

கோளின் மறுபக்கப் படங்கள் புவிக்கு வரும் முன்னரே, டைனோசர்கள் பூமியில் களம் இறங்கின



Tuesday, October 15, 2013

புக்பேஸ் - சிறுகதை

"இப்படியே போனால் இன்னும் இரு வருடங்களில் இந்தியா வல்லரசு ஆகி விடும் , ஏதாவது செய்து அவர்களை பிரச்சினைக்குட்படுத்த வேண்டும் , உங்கள் யோசனைகளை சொல்லலாம்" என அமெரிக்க - ஐரோப்பிய - சீன  கூட்டு அமைப்பின் தலைவர் கூடியிருந்த உயர்மட்ட உறுப்பினர்களைக் கேட்டுக் கொண்டார்

"வழமைப்போல , சாதி கலவரம்  மத கலவரங்களைத் தூண்டி விட்டு விடுவோமா " என்றாள் சீனாக்காரி

"பல வருடங்களுக்கு முன்பு அது மிகவும் எளிது , அன்று தமிழ்நாட்டில் மட்டும் பெரியாரியத்தினால் இருந்த சகிப்புத் தன்மை , இன்று  நாடு முழுவதும் இருக்கின்றது.... நாடே பெரியார் பெயரை உச்சரிப்பதால் அதற்கான வாய்ப்பு இல்லை "  என்றான் சுவீடனின் ஆண்டர்சன்

"இந்தியாவின் மீது படை எடுக்கலாமா? "

"வேண்டாம்... அது மூன்றாம் உலகப் போரில் கொண்டு வந்து விட்டு விடும்.  நாம் விற்ற ஆயுதங்களாலேயே இன்று அவர்கள் பலமாக இருக்கின்றார்கள்  கூடங்குளம் அணு உலை கூட சிறப்பாக செயற்பட்டு கொண்டு இருக்கின்றது"

"மருத்துவ ரீதியாக, ஏதேனும் நோய்களை உருவாக்கி விடலாமா "

"மூட நம்பிக்கைகளை ஒழித்த கையோடு , போலி மருத்துவம் எல்லாம் ஒழித்து, தடுப்பூசிகள், சிறப்பான அறிவியல்  மருத்துவத்தினால் பாதுகாப்பான நம்மை விட சுகாதார  வளமான சமுதாயமாக இருக்கின்றது ..  " என்றான் ஒரு ஜெர்மானியன்.

கடைசியாக  "என்னிடம் கத்தியின்றி இரத்தமின்றி இந்தியாவில் ஒரே இரவில் பிரச்சினைகளைக் கொண்டு வர ஒரு வழி இருக்கின்றது "  என சொல்லியபடி எழுந்தான் அமெரிக்காவின் ஆரஞ்சுபிட்டர்.

ஆவல் மேலிட அவனை எல்லோரும் பார்க்க , ஆரஞ்சுபிட்டர் தொடர்ந்தான்.

"என்னுடைய புக்பேஸ் சமூக இணைய தளத்தில்  இந்தியாவிற்கு மட்டும் பயனாளர்களுக்கு தகவல் பாதுகாப்பு பாக்கியங்களை நீக்கி விடுகின்றேன் "

"புரியவில்லை " என்பது போல அனைவரும் ஒரே சேர புருவம் உயர்த்தினர்

"புக்பேஸ் இந்திய பயன்பாட்டாளர்களுக்கு மட்டும் சக இந்திய பயன்பாட்டாளர்களின் தனித் தகவல்கள் பரிமாற்றங்கள், தனி அரட்டை பரிமாற்றங்கள் , புகைப்படங்கள் இவற்றை எந்தவித கட்டுப்பாடு இன்றி   யார் வேண்டுமானாலும் யாருடையதை வேண்டுமானாலும் பார்த்துக் கொள்ள முடியும்,   இந்தியர்கள் யாரும்  தகவல்களை அழிக்கவோ மாற்றவோ முடியாது , மேலும்  அவர்கள் கணக்கை முடக்கவோ தற்காலிகமாக நிறுத்தி வைக்கவோ முடியாது.. ஒவ்வொரு இந்தியரின்  ரகசியமும் எல்லா இந்தியர்களுக்கும் சொந்தம்"

உயர் மட்ட கூட்டம் வெற்றிச் சிரிப்புடன் கலைந்தது.  அடுத்த சில நாட்களில் இந்தியா பற்றி  எரிந்தது.

Tuesday, October 08, 2013

இந்திய உள் நாட்டு கிரிக்கெட் அணிகளின் டெஸ்ட் அங்கீகாரமும் ஈழத்துக் கிரிக்கெட் அணியும் - கட்டுரை

பன்னாட்டு கிரிக்கெட் மன்றத்தின் (ICC) விதிகளின் படி, அதன் துணை / இணை உறுப்பினராக , ஒரு நாட்டைச் சார்ந்த கிரிக்கெட் வாரியமாக இருக்க வேண்டிய அவசியம் இல்லை . கிரிக்கெட்டிற்காக ஒருங்கிணைந்த நாடுகளின் கூட்டு வாரியமாகவோ கிரிக்கெட் கட்டுமானம் சரியாக அமைந்து, புவியியல் அமைப்பைச் சார்ந்து இருக்கும் வாரியமாகக் கூட இருக்கலாம். (may be from a country, or countries associated for cricket purposes, or a geographical area where cricket is firmly established and organised.) இந்த வாரியங்களின் சார்பில் அணிகள் , ஐசிசி நடத்தும் போட்டிகளில் பங்கேற்கும். எடுத்துக்காட்டாக , மேற்கிந்திய தீவுகள் அணி கரிபியன் நாடுகள் மற்றும் ஒரு தென்னமெரிக்க நாடு ஆகியனவற்றை உள்ளடக்கிய அணியாகும். பிரிட்டன் , இங்கிலாந்து , ஸ்காட்லாண்டு மற்றும் ஐயர்லாந்து என மூன்று அணிகளைக் கொண்டுள்ளது. இதில் அயர்லாந்து கிரிக்கெட் அணி, யூகே வின் வடக்கு அயர்லாந்து மற்றும் ஐயர்லாந்து குடியரசு சேர்ந்தது ஆகும். சமீபத்தில் கூட, உச்ச நீதி மன்றத்தில், இந்தியக் கிரிக்கெட் அணி, இந்திய நாட்டிற்கானது அல்ல, இந்திய கிரிக்கெட் கட்டுப்பாட்டு வாரியத்தின் அணி என தெளிவுப்படுத்தப்பட்டது.

பண பலம் இருந்தாலும் சமயங்களில் பன்னாட்டு கிரிக்கெட் மன்றத்தைக் கட்டுக்குள் வைக்க , இந்தியக் கிரிக்கெட் வாரியம் தடுமாறும்.. தேவைப்பட்டதை நிறைவேற்றிக்கொள்ள பண பலத்துடன் 'லாபி' யும் தேவை. ஆக இதனை செயற்படுத்த , இந்தியக் கிரிக்கெட் வாரியம் தமிழ்நாடு, மும்பை, கர்நாடகா போன்ற பலமான அணிகளின் அமைப்புகளை , பன்னாட்டு கிரிக்கெட் மன்றத்தின் துணை / இணை உறுப்பினர்களாக விண்ணப்பிக்க ஊக்குவிக்க வேண்டும். கிரிக்கெட் கட்டுமான வசதிகள், உள்ளூர் போட்டிகள் நடக்கும் புவியியல் சார்ந்த நிலப்பகுதிகளின் அமைப்புகள் உறுப்பினர் ஆக முடியும் என்ற விதியை இந்திய வாரியம் பயன் படுத்திக் கொள்ள வேண்டும். இன்று ஆரம்பித்தால் அடுத்த பத்தாண்டுகளில் இந்தியக் குடியரசில் இருக்கும் கிரிக்கெட் அணிகள் பன்னாட்டு கிரிக்கெட் மன்றத்தில் முழு உறுப்பினர் தகுதியை அடைய முடியும். அப்படி அடையும் பட்சத்தில் தமிழ் நாடு அணி டெஸ்ட் ஆடும் நிகழ்வை யோசித்துப் பார்த்தாலே மனம் மகிழ்கிறது சோப்ளாங்கி இலங்கை அணி எல்லாம் டெஸ்ட் போட்டிகள் ஆடும் பொழுது , இந்திய உள்ளூர் அணிகள் ஆடுவதில் என்ன குறை ...

சில வருடங்கள் முன்பு வரை, உள்ளூர் அணிகள் , பன்னாட்டு அளவிலான போட்டிகளில் பங்கேற்பது , அது பற்றிய எண்ணங்களை இப்படி முன் நிறுத்துவது என்பது கூட, 'தேசத்துரோக' அளவில் எண்ணப்படலாம். ஆனால் கால ஓட்டத்தில், ஐபிஎல் போட்டிகளுக்குப் பின்னர் 'தனது நிலம் சார்ந்த' அணி என்ற எண்ணம் இப்பொழுது எல்லாம் சர்வ சாதாரணம் ஆகிவிட்டது. ஆக , தமிழ்நாடு , மும்பை போன்ற அணிகள் முழு உறுப்பினர் ஆகி, டெஸ்ட் அந்தஸ்தைப் பெற்று, கிரிக்கெட் ஆடும்பொழுது, கிரிக்கெட்டின் தரம் கண்டிப்பாக உயரும். ஒரு பங்களாதேஷ் - இலங்கை கிரிக்கெட் போட்டியை விட ஒரு ஜிம்பாப்வே - இலங்கை கிரிக்கெட் போட்டியை விட , நிச்சயம் தமிழ்நாடு - இங்கிலாந்து , மும்பை - ஆஸ்திரெலியா டெஸ்ட் ஆட்டங்கள் கண்டிப்பாக சுவாரசியமாக இருக்கும்.

சரி, நமது வழமையான தமிழ்த்தேசிய அரசியலுக்கு வருவோம். சமீபத்தில் ஈழம் கால்பந்து அணி , அங்கீகரிக்கப்படாத நாடுகளுக்கு இடையில் ஆன கால்பந்து போட்டிகளில் கலந்து கொண்டு உலகத்தை திரும்பிப் பார்க்க வைத்தது. விளையாட்டு என்பதைக் காட்டிலும் அது ஒரு அடையாள அரசியல் போராட்டம். தமிழ்ச் சூழலில் கிரிக்கெட் ஒரு முக்கியமானதொரு ஆட்டம் என்பதால். ஐரோப்பிய வாழ் புலம் பெயர் ஈழத் தமிழர்கள் கிரிக்கெட்டிற்காக ', குறைந்த பட்சம் 15,000 மக்கள் தொகை கொண்ட நிலப்பகுதி சார்ந்த அமைப்பு உறுப்பினர் ஆகலாம் என்ற கிரிக்கெட் வாரியத்தின் விதி முறையை உள்வாங்கி , ஈழம் கிரிக்கெட் அணியை உருவாக்கலாம். தமிழ் சினிமா சம்பந்தப்பட்ட விசயங்களுக்காக வாரி இறைக்கும் புலம் பெயர் தமிழர்களுக்கு ஒரு கிரிக்கெட் அமைப்பை உருவாக்குவதில் பெரிய சிரமம் ஒன்றும் இருக்காது. முதல் பத்து பதினைந்து வருடங்கள் கட்டமைப்பில் கவனம் செலுத்தி , இந்திய உள் நாட்டு அணிகள் டெஸ்ட் அங்கீகாரம் பெறுவதைப்போல , ஈழம் அணியும் பெறலாம். பொருளாதார வளமும் தமிழ்த் தேசிய எண்ணங்களும் இருக்கும் புலம் பெயர்ந்த தமிழர்கள் சிந்திக்கலாம்.

இந்திய கிரிக்கெட் வாரியத்தின் உலகளாவிய வல்லமையை மேலும் வலுப்படுத்தும் நோக்குடன் , இந்திய தேசிய வாதிகளும், உள் நாட்டு அணிகளும் டெஸ்ட் ஆடும் அங்கீகாரத்தைப் பெற முன்னெடுப்புகளை எடுக்க வேண்டும். மேற்சொன்ன முன்னெடுப்புகள் எல்லாம் நிகழந்தால், தமிழ் நாடு - ஈழம் அணிகளுக்கு இடையில் ஆன டெஸ்ட் போட்டிகள் ஸ்விட்சர்லாந்திலோ நோர்வேயிலோ ஏதாவது ஒரு கோடையில் நடக்கும் காலம் 
  வெகு தொலைவில்  இல்லை.

Wednesday, October 02, 2013

போலிஷ் பெண்ணும் நானும் மற்றும் காந்தியும் - புனைவு அல்லது அனுபவம்

பின் வரும் சம்பவத்தை உண்மையாக எடுத்துக் கொண்டாலும் சரி புனைவாக எடுத்துக் கொண்டாலும் சரி , சொல்ல வருவது காந்தியைப் பற்றிதான். 
----
சுவீடன் கார்ல்ஸ்குரொனாவில் ( Karlskrona) இருந்து போலாந்து கிடினியா (Gdynia) விற்கு பயணிகள் கப்பல் போக்குவரத்து உண்டு. வார நாட்களில் மிக மிக மலிவான விலையில் பயணச்சீட்டுகள் கிடைப்பது உண்டு. இன்று போல அன்றும் ஏழை மாணவன் தான். ஆக, குறைவான விலை பயணச்சீட்டை வாங்கிக் கொண்டு வீட்டிலேயே கட்டிக் கொண்ட கட்டு சோறு . கொஞ்சம் போலிஷ் சிலாத்தி பணம் என தனியாக கப்பல் ஏறிவிட்டேன். அம்மு பிரிந்து போன சோகக் காலக்கட்டம் அது . காதல் சோகங்களை மறக்க இரண்டு வழிமுறைகள் உண்டு., ஒன்று மதுவில் மூழ்கலாம் அல்லது பயணங்கள்... காட்டுத்தனமாக பயணம் செய்யும் பொழுது, சந்திக்கும் புது மனிதர்கள், அனுபவங்கள் மெல்ல மெல்ல மீட்டு, மனிதனை பக்குவமாக்கும். நான் தேர்ந்து எடுத்தது பயணங்களை. நான் படு சுமாரான எழுத்தாளன் என்பதால், அனுபவங்களை கதைகளாக்கி நான்கு பேர் கைத் தட்டி படிக்கும் அளவிற்கு வாசகர் கூட்டமும் சேர்த்து வைத்து இருக்கின்றேன். ஆக பயணங்கள் பலவகைகளில் பயனுள்ளதாக இருந்தன. 

கப்பலில் வழமைப் போல சூதாட்ட அறையில் கூட்டம் இருந்தது. சூதாட்டம் பிடிக்காது என்பதாலோ அல்லது சூதாட்டம் ஆடும் அளவிற்கு பணம் இருக்காது என்பதாலோ எப்பொழுதுமே , அந்த அறைகள் பக்கம் தலை வைத்துப் படுப்பதில்லை. அப்படியே கப்பலை ஒரு சுற்று சுற்றிவிட்டு , வெளித்தளத்தில் கடலை வேடிக்கைப் பார்க்க ஆரம்பிக்கையில் , தடுப்புக் கம்பிகளுக்கு அருகில் இருந்த நீள் நாற்காலியில் , மென் சோகத்துடன் ஒரு பெண் வந்து அமர்ந்தாள். எப்பொழுது என் பக்கம் திரும்புவாள், புன்னகையைத் தரலாம் என காத்து இருந்தேன். அவள் என் பக்கம் திரும்பிய அடுத்த நொடி, நான் கொடுத்த சிரிப்பிற்கு , மின்னலைப் போல பதில் புன்னகை வந்து விழுந்தது. என்னை அறிமுகப் படுத்திக் கொண்டேன். இந்தியா என்றதும் பெஞ்சின் அடுத்த முனையில் இருந்து நகர்ந்துநெருங்கி வந்து தன்னை அறிமுகப் படுத்திக் கொண்டாள். 

அவளின்  பெயரைச் சொல்லப் போவதில்லை. சொன்னால் என்னுடைய பேஸ்புக்கை நீங்கள் தோண்டி அவளைக் கண்டுபிடித்து விடுவீர்கள். அவளின் தேசம் போலாந்து , அவளின் தாத்தா பாட்டி ஜெர்மானியர்கள். கிடினியாவும் அதன் இரட்டை நகரமான கிடான்ஸ்க் (Gdansk)  நகரமும் பல காலங்கள் ஜெர்மானிய ஆதிக்கத்தில் இருந்தன. போருக்குப் பின்னர் போலாந்து வசம் வந்து விட்டது. ஜெர்மானியர்கள் அப்படியே இங்கேயே இருந்து விட்டனர். 

குளிர் எடுக்க ஆரம்பித்த்து விட்டதால், கப்பலின் வரவேற்பு தளத்தில் அமர்ந்து பேச ஆரம்பித்தோம். சுவீடனில் தனது காதலனுடன் வாழ்ந்து வந்ததாகவும் , தற்பொழுது பிரிந்து விட்டதால் மீண்டும் தனது நாட்டிற்கே போகின்றதாக அவள் சொன்ன பொழுது அவளின் மென் சோகம் புரிந்தது. 

தமிழ், கிரிக்கெட், இலங்கை எனது படிப்பு, எனது வாழ் சூழல் என பேச்சு நள்ளிரவு வரை தொடர்ந்தது. நள்ளிரவின் பொழுது, தனக்கு அன்றுதான் பிறந்த நாள் எனக் கூறினாள். கைக்குலுக்கினேன். வரியற்ற கடையில் ஏதேனும் வாங்கித் தரலாம் என்றாலும் கையில் இருந்த பணம் மிக மிகக் குறைவு. யோசிக்கையில் சட்டென அம்மு நினைவுக்கு வந்தாள். ஆம் மெட்ராசில் இருந்து கிளம்புவதற்கு முதல் நாள், சிலப் பல பத்து ரூபாய்த் தாள்களை என் கையில் திணித்து "என் நினைவாக வைத்துக் கொள், படித்து முடித்து விட்டு திரும்புகையில், என்னைப் பார்க்க வருகையில் இந்தப் பணத்தை பயன்படுத்து" என சொன்னது நினைவுக்கு வந்தது. அதை என் பணப்பையில் ஒளித்து வைத்து இருந்தேன். சட்டென அதில் இருந்த ஒரு பத்து ரூபாய்த் தாளை எடுத்து, கப்பல் தோழியின் பெயரை எழுதி, பிறந்த நாள் வாழ்த்துகள் என தமிழிலும் ஆங்கிலத்திலும் எழுதிக் கொடுத்தேன். 

"காண்டி " எனச் சொல்லியபடி என்னை அணைத்துக் கொண்டாள். 

"உண்மையைச் சொல்ல வேண்டும் என்றால், நீ வருவதற்கு முன்னர் ஒரு நொடி கடலில் குதித்து விடலாம் எனத் தான் நினைத்தேன். உன் சக்கர நாற்காலி, இந்திய முகம் ஆகியன, முடிவை ஒத்திப் போட வைத்தது ... இப்பொழுது காந்தியின் படம் போட்ட பணத்தாள் "

நாம் அமைதியாகக் கேட்டுக் கொண்டு இருந்தேன். 

"இந்த நேர்மறை சம்பவங்கள் எல்லாம் எனக்கு ஏதோ ஒன்றை சொல்லுகின்றதோ ... ஹிட்லரின் காலத்தில் காந்தி என்றொரு ஒரு மகான் வாழ்ந்து இருக்கின்றார் என்பதை நினைக்கையிலேயே சிலிர்க்கின்றது... இந்தக் கப்பலில் வந்தமைக்கும் நன்றி ... இந்த காந்தி பணத்தாளிற்கும் நன்றி " எனச் சொல்லிவிட்டு அவளின் அறைக்கு சென்றுவிட்டாள். 

நான் எனது மலிவுவிலை நாற்காலிப் பயண அறைக்கு சென்றுவிட்டேன். அடுத்த இணைய இணைப்பு வந்தவுடன் பேஸ்புக்கில் அவளை சேர்த்துக் கொள்ள வேண்டும் என்பதற்காக அவளின் பெயரை குறித்து வைத்துக் கொண்டேன். 

மறுநாள் அவளைப் பார்த்தேன். அப்பாடா கடலில் விழவில்லை. பேஸ்புக்கில் சேர்த்துக் கொண்டாள். சோகமாய் இருக்கும்பொழுது எல்லாம் பேசுவாள், நான் இல்லை என்றால் காந்தியைப் பற்றி ஏதாவது ஒன்றைப் படித்து விட்டு சோகத்தில் இருந்து மீண்டு கொண்டதாக சொல்லுவாள். அவள் ஸ்காட்லாண்டு சென்ற பொழுது , காந்தியின் மேல் மதிப்புக் கொண்ட ஒரு பிரிட்டிஷ் தோழனுடன் தற்பொழுது மகிழ்ச்சியாக வாழ்ந்து வருகின்றாள். அவளின் பேஸ்புக் தளத்தில் , நான் அளித்த காந்தி பணத்தாளின் மின்னச்சு வடிவம் , தன்னை மீட்டு எடுத்த விஷயம் என்றத் தலைப்பில் இன்றும் இருந்து கொண்டு இருக்கின்றது.