Friday, December 27, 2013

டி. ராஜேந்தர் - திரையுலக தாவீது (எழுதியவர் கிளிமூக்கு அரக்கன்)

எனது மண்டப எழுத்தாளர்களில் ஒருவராக இருந்த கிளிமூக்கு அரக்கன் என்பவர் எழுதிய Facebook கட்டுரை (https://www.facebook.com/kilimookku ) அவரின் அனுமதியுடன் இங்கு பதிவு செய்யப்படுகின்றது. போற்றலும் தூற்றலும் அவருக்கே !!


----
திரைத்துறையில் இருப்பவர்கள் பெரும்பாலும் , ஆளும் அதிகார மையத்தை பகைத்துக் கொள்ளவிரும்பவே மாட்டார்கள். எம் ஜி ஆரைத் திகட்ட திகட்ட குளிப்பாட்டியவர்கள், இன்று அதிகாரத்திற்கு கலைஞர் வந்தாலும் சரி, ஜெ. வந்தாலும் சரி ஆளுயர மாலையை போட்டு மயக்கிவிடலாம் என காத்துக் கொண்டிருப்பவர்கள். விதிவிலக்குகள் இல்லையா என நீங்கள் கேட்கலாம். அந்த விதிவிலக்குகளுக்கு சிறந்த உதாரணம் டி. ராஜேந்தர். 

கலைஞர் அவர்கள், 'நம்பியாராக' மட்டும் காட்டப்பட்ட எம்.ஜி.ஆர் ஆட்சிக்காலங்களில் துணிந்து திமுகவை திரைப்படங்களில் பாலில் சர்க்கரையாகக் காட்டியவர். 
தன் இசைக்கு அசைய வேண்டும் என விரும்பிய எம்.ஜி. ஆரின் 80 களில் திமுகவிற்காக முன் நின்ற சொற்ப திரைத்துறையாளர்களில் ஒருவர் டி.ஆர். 
 திமுகவின் வனவாசக் காலங்களில் கலைஞருடன் நின்ற லக்‌ஷ்மனர்களில் ஒருவர் டி.ஆர். 

எம் ஜி. ஆர் காலத்திற்குப்பின்னர் ஜெ. முதல்வராக இருந்தபொழுது அவரை எதிர்த்து அரசியல். இடையில் பூங்கா நகர் சட்டமன்ற உறுப்பினராக சிறப்பாக பணியாற்றிய காலக் கட்டத்திற்குப்பின்னர் கலைஞரை எதிர்த்து அரசியல். அதிகாரத்தில் இல்லாதவர்களை எதிர்த்து அரசியல் செய்வது என்பது எளிது. ஆனால் எம் ஜி. ஆர்., ஜெ., கலைஞர் என அதிகாரத்துடன் மோதும் தாவீதாகவே டி. ஆர் இருந்து இருக்கின்றார். இப்பொழுது கூட ஜெ. அவர்களைச் சந்தித்து கட்சியை இணைத்து சுலபமாக சிலப்பல விசயங்களை கைகூட வைத்து இருந்து இருக்கலாம். ஆனால் அதிகாரத்தை எதிர்த்து அரசியல் செய்ய , துணிந்து மீண்டும்  அதிகாரத்தில் இல்லாத திமுகவிடம் வந்து இருக்கின்றார். 

தன்னைத்தவிர அவர் கட்சியில் வேறு யாரும் இல்லை என , டி.ஆர் அவர்களின் தனிபலத்தைப் பற்றி கேலி செய்பவர்களுக்கு ஒரு தகவல் 1991 ஆம் ஆண்டு ஜெ. வை எதிர்த்து பர்கூரில் , தனது தாயக மறுமலர்ச்சி கழகம் சார்பில் போட்டியிட்டு 29 சதவீத வாக்குகளைப் பெற்று இரண்டாமிடம் வந்தவர். திமுக வை விட்டு வைகோ பிரிந்தபின்னர், திமுகவிற்கு பலம் சேர்க்க மீண்டும் கட்சியில் இணைந்து இக்கட்டான சூழல்களில் ராபின் சிங்கைப் போல கைக்கொடுப்பவர் டி. ஆர். 

.கலைஞரிடம் ஒரு பிரச்சினை என்னவென்றால் தெரிந்தோ தெரியாமலோ சிலப்பல சமயங்களில் தில்லானா மோகனம்பாள் பட வைத்தி போன்றவர்கள் ஏற்றிவிட நம்பியாராக மாறிவிடுவார். பொன்னை வைக்க வேண்டிய இடத்தில் பூவையும் பூ வைக்க வேண்டிய இடத்தில் கசப்பையும் மாற்றிவைத்துவிட்டு விசுவாச உள்ளங்களை விலக வைத்துவிடுவார். கோபித்துக் கொண்டு போகின்ற சிலர் திரும்புகின்றனர். சிலர் கசப்புடன் திரும்பாமலேயே இருந்துவிடுகின்றனர். டி. ஆர் இன்று மீண்டும் திமுகவிற்கு திரும்பி இருக்கும் சூழலில் பத்தோடு பதினொன்றாக மேடைப்பேச்சாளராக மட்டும் பயன்படுத்தாமல் டெல்டா மாவட்டங்களில் , ஏதேனும் ஒரு பாராளுமன்றத் தொகுதியில் டி. ஆரை நிற்கவைக்க வேண்டும். 

டி. ஆரைப் பற்றிய பதிவு என்றால், அவரைப்பற்றிய கிண்டல் இல்லாமல் முடிப்பதா... முலாயம்சிங் யாதவோ மாயாவதியோ பிரதமராக  பேச, மோதி அவர்கள் எதிர்க்கட்சித்தலைவராக அவர்களுக்கு  பதில் அளிக்க, இடையில் டி. ஆர் புகுந்து இந்தியில் அவர் பாணியில் பேச அட்டகாசமாக இருக்கப்போகின்றது அமையப்போகும் பாராளுமன்றம்.

Thursday, December 26, 2013

சுமார் எழுத்து குமாரு - அனுபவம்


காதல் தோல்வியை மறக்க ஏதாவது ஒரு போதை தேவை ... 2005 ஆம் ஆண்டு மறுபாதியில், அம்மு வெர்ஷன் 1 என்னை ரன் அவுட் ( http://www.youtube.com/watch?v=MIaMmtAsZsg) ஆக்குகையில்,  அப்படியான ஒரு போதையை எழுத்தில் தேடிக்கொள்ளலாம் என எழுத ஆரம்பித்து.... எழுதிக்கொண்டே இருக்கின்றேன். சில கிரிக்கெட் ஆட்டக்காரர்கள் இருப்பார்கள். பெரிதாக மட்டையடித்தலிலோ பந்து வீச்சிலோ சாதித்து இருந்திருக்கமாட்டார்கள். ஆனாலும் அங்க கொஞ்சம் இங்க கொஞ்சம் என ஆடி , பத்து ஆண்டுகள் கூடத் தொடர்ந்து அணியில் இடம்பிடித்து ஆடிக்கொண்டு இருப்பார்கள்.,,,, ஆக என் எழுத்து வாழ்க்கைப் பயணமும் எட்டு ஆண்டுகளை கடந்து சிலப்பல மாதங்கள் ஆகிவிட்டன.  ஆகாஷ் சோப்ரா ஓட்டங்கள் எடுப்பதைப்போல , ஹிட் ஏறிக்கொண்டிருந்த சூழலில், எங்கிருந்தோ வந்த ஆபத்பாந்தவன் அனாதரட்சகன் 'கலைஞர்' ஒரே நாளில் சும்மா ஹிட்ஸை டிஜிவி ரயில் வேகக்கணக்கில் எகிற வைத்தார். எல்லாப்புகழும் கலைஞருக்கே....

தொட்டனைத்து ஊறும் மணற்கேணி என நினைத்தால் எழுத்தில் மட்டும் இழப்பதற்கு ஒன்றுமே இல்லை எல்லாமே ஈட்டல்தான்.  தமிழ்மணம் ஆகட்டும் ... சமூகஊடகங்கள் ஆகட்டும்... எழுத்தினால் எல்லாமே பெற்றவைதான். பெற்றவைகள் நூறு இருந்தாலும் சார்ஜா கிரிக்கெட் மைதானத்தில் கங்குலி இறங்கி வந்து கூரைக்கு மேல சிக்ஸர் அடித்தது ( http://www.youtube.com/watch?v=hle1TAoR9sc) கண்ணுக்குள்ளேயே நிற்பதைப்போல சில எழுத்தாக்கங்களின்  அனுபவங்கள் செம 'கெத்து' கொடுக்கும். 

சில ஆண்டுகள் முன்பு, சுவீடனில் , விசா நீட்டிப்பிற்காக , குடியுரிமை அலுவலகம் ஒன்றில் காத்துக் கொண்டு இருந்தேன்.  சில இருக்கைகள் தள்ளி, தமிழ்க்குரல்... தமிழ்மாணவர்கள் சிலர், நகைச்சுவைகளை அள்ளித் தெறித்துப் பேசிக்கொண்டு இருந்தனர்.  அந்தக் காலக்கட்டம் கொஞ்சம் சிரமமான காலம்.. அம்மு வெர்ஷன் 2 என்னை பவுன்சர் போட்டு ஹிட் விக்கெட் (http://www.youtube.com/watch?v=yZjGdWt82k0) ஆக்கிவிட்டு சென்று இருந்தார். தீஸிஸ் வேறு நீட்டிக்கொண்டே போனது.  கையில் காசும் தீர்ந்துவிட்டது. டிராவிற்கு ஆடலாமா... வென்றுவிடலாமா... வென்றுவிட நினைத்தால் தோற்றுவிடுவோமா கிட்டத்தட்ட தென்னாப்பிரிக்க சொதப்பல் ஆட்டம் போல நாட்கள் போய்க்கொண்டிருந்தன.  முகத்தை இறுக்கிக் கொண்டு அமர்ந்து இருந்தாலும் , என்னால் சிரிப்பை அடக்க முடியவில்லை. சிரித்து விட்டேன். அங்கிருந்த மாணவர்கள், தூரத்தில் அமர்ந்தபடியே 

"என்ன தமிழா, எந்த யுனிவர்சிட்டி , எந்த பேட்ச் " எனக் கேள்விகள் கேட்டனர்.  சிலப்பல பொது நண்பர்கள் பேரைச் சொல்லித் தெரியுமா எனக் கேட்டனர். தெரியும் என்றேன்.  பேஸ்புக் ஐடி கேட்டார்கள்.  செல்வகுமார் வினையூக்கி என சொன்னவுடன், அமர்ந்து இருந்தவர்கள் உடனே எழுந்து நின்றார்கள். 

"அண்ணே ,நீங்களா அது, உங்க பிலாக்கில சுவீடன் மேற்படிப்பு கட்டுரை படிச்சுத்தான் நாங்க சுவீடனுக்கே வந்தோம்" 

கிட்டத்தட்ட மாணிக் பாட்ஷா மொமென்ட் அது.  

மேற்சொன்ன அனுபவம் ஒருவகை என்றால் சமீபத்தில் ஒன்று நடந்தது. இத்தாலியில், ஆராய்ச்சிப்படிப்பிற்கு புதிதாக ஒரு மாணவர் வந்து சேர்ந்து இருந்தார்.  சென்ற மாதம் , முன்னாள் கோபாலன் டிராபி இலங்கை அணியின் பிரபல'எறிபந்து' வீச்சாளர் முரளிதரன் சிலப்பல முதுகுசொறிதல் கருத்துக்களை சொல்லி இருந்தது உங்களுக்கு எல்லாம் நினைவுக்கு இருக்கலாம்.  அதைப்பற்றிய பேச்சு வருகையில், புதிய மாணவரிடம் , முரளிதரனையும் முகமது அலியையும் ஒப்பிட்டு சிலக்கருத்துக்களை சொன்னேன்.  உடனே அந்த புதிய மாணவர்,

"சார், இது எல்லாம் மூனு வருஷத்துக்கு முன்னமே எழுதிட்டாங்க,,,, நீங்க அதைப்படிச்சிட்டு வந்து இங்க சொல்லுறீங்களாக்கும்" என்றார். 

"அந்தக் கட்டுரையை எழுதினதே நான் தான் சார்" என்றேன் பதிலுக்கு... 

தட் வாஸ் எ , அந்தக்குழந்தையே நீங்கதான் மொமென்ட். 

சில ஆண்டுகளுக்கு முன்னர் அந்த  முரளிதரன் - முகமது அலி கட்டுரை வெளிவந்த பொழுது,  கொழும்பு வெள்ளவத்த டமில் பாய்ஸ் கூட்டம் போட்டு  அந்தக் கட்டுரை வெளியான தமிழோவியம் இணைய இதழில் பின்னூட்டங்களாக  என்னைத் திட்டித் தீர்த்தார்கள்.  சென்ற மாதம் அதேக்கட்டுரை வெட்டி ஒட்டி நீட்டி முழக்கி சிலப்பல தமிழ்த்தேசிய இணைய தளங்களிலும் காணக்கிடைத்தது.. 

சச்சின் அடித்த சிக்ஸர்கள் கூட மக்களுக்கு மறந்துப் போய் இருக்கலாம்.... ஆனால் வெங்கடேஷ் பிரசாத், நைரோபியில் அடித்த கவர் டிரைவ் சிக்ஸரை ( http://www.youtube.com/watch?v=hl4ajI2oUcE) யாராலும் மறக்க முடியாது... சொல்லிக்கொள்ள ஒன்றிரண்டு சிக்சர்கள் தான் இருந்தாலும்  இரண்டுமே  கெத்து சிக்சர் இந்த சுமார் எழுத்து குமாருக்கு....

Thursday, December 19, 2013

தன்னைப் போல் ஒருத்தி - சிறுகதை

"காரோ ..." 

மூன்றாவது தடவையாக ஆஞ்சலிகா என்னைக் கூப்பிட்டாள்.  காரோ என்பது அன்பே என்பதற்கான இத்தாலியச்சொல். 

"சொல்லுடி ..."  அவளுக்குத் தமிழ் தெரியாது என்றாலும் இந்த வார்த்தைப்புரியும். 

" அந்த டோல்சே - கப்பானா (Dolce & Gabbana The One: "Street of Dreams) விளம்பரம் பார்த்தாயா? "  இத்தாலியத்தில் கேட்டாள். 

" ஆமாம் பார்த்தேன், ஸ்கேர்லத் யோகன்சன் நடித்தது ...  கறுப்பு வெள்ளையில் கவனத்தை ஈர்க்கின்றது "   ஆங்கிலத்தில் பதில் கொடுத்தேன். 

"அதில் வரும் ஸ்கேர்லத் யோகன்சனைப் போல அச்சு அசப்பில் நான் இருக்கின்றேன் அல்லவா " 

எனக்கு சிரிப்பு வந்துவிட்டது. இருவருக்கும் ஏணி வைத்தாலும் எட்டாது. ஸ்கேர்லத் அத்தனை அழகு.  யுடியூபில் வரும் அத்தனை விளம்பரங்களையும் தவிர்க்க முடியாத அந்த ஐந்து வினாடிகள் மட்டும் காத்து இருந்து ,முழு விளம்பரத்தையும் பார்க்காமல் நேரிடையாக பாடலுக்கு தாவிவிடுவேன். ஆனால் இந்த டோல்சே கப்பானா வாசனைத் திரவிய விளம்பரம் மட்டும் விதிவிலக்கு.ஸ்கேர்லத் யோகன்சன் மட்டும் என் கண் முன் வந்து நின்றால் இந்த ஆஞ்சலிகா, இந்த இத்தாலிய வேலை , பணம், புகழ் அத்தனையையும் விட்டுவிட்டு ஸ்கேர்லத் காலடியில் கிடப்பேன். 

எனது நக்கல் சிரிப்பைக் கவனித்த ஆஞ்சலிகா , பழைய நாளிதழ்களில் சிலவற்றுடன் தனது படங்களையும்  எடுத்து வந்து அதில் இருந்த ஸ்கேர்லத் படங்களுடன் ஒப்பிட்டு பேசிக்கொண்டு இருந்தாள்.  ஆஞ்சலிகாவும் அவளது படங்களில் நன்றாகத்தான் இருந்தாள். ஆனால் ஸ்கேர்லத் யோகன்சனின் சினிமா ஸ்டில்களுக்கு முன்னால் ஆஞ்சலிகா தூசு. 

பெரும்பாலும் வெள்ளைக்காரப் பெண்கள் ஓர் அதிக ஈர்ப்புடன் இருப்பதற்கான காரணம் அவர்களின் உடலுக்கு ஏற்ற உடை தேர்வும் அவர்களின் நிறமும். ஆஞ்சலிகா உட்பட , பெரும்பாலான வெள்ளைக்காரப் பெண்களை மாநிறமாக மாற்றிவிட்டால் நம்மூரின் சுமாரானப் பெண்களைவிட சுமாராகத்தான் இருப்பார்கள்.  ஆனால் ஸ்கேர்லத் ஒரு விதிவிலக்கு. அவளை ஆப்பிரிக்க கறுமை நிறத்திற்கு மாற்றினாலும் அழகு. அனேகமாக கிளியோபட்ரா கறுப்பு ஸ்கேர்லத்தாக இருந்து இருக்கவேன்டும். 

ஐரோப்பா வந்ததும் வெள்ளைக்காரத் தோழி இருக்கின்றாள் என்பதை உலகத்திற்குக் காட்டிக்கொள்ள முதலில் சிக்கும் பெண்ணிடம் பெரும்பாலான இந்தியர்கள் அதீதநட்புடன் இருப்பார்கள். இங்கு நட்பு  படுக்கைக்கும் சில சமயங்களில் போய்விடுவதால் அது காதலாய் கசிந்துருகிவிடுகின்றது.  இந்திய் ஆண்களுக்கு வெள்ளைக்காரத் துணை இருப்பது, ஒருவிதத்தில் சமூக பாதுகாப்பு மேலும் விசா போன்ற விசயங்களுக்கும் துணைபுரியும்,  கடைசி வருடப்படிப்பின் பொழுது ஆஞ்சலிகாதான் மெக்டோனல்ட்ஸில் வேலை பார்த்து என்னைப் படிக்க வைத்தாள். ஆக வெள்ளைக்கார மோகம் காமத்தில் ஆரம்பித்து இப்பொழுது ஓர் அளவிற்கு வேறு வழி இல்லாத அன்பில் வந்து நிற்கின்றது. 

மறுநாளும் ஆஞ்சலிகா , ஸ்கேர்லத் புராணத்தை ஆரம்பித்தாள். 

"கடைசி பத்து ஆண்டுகளாகவே ஸ்கேர்லத் போல இருக்கின்றேன் என எனக்குத் தெரியும்... ஆனால் யாரிடமும் சொன்னதில்லை... உன்னைக்கூட , உனது விருப்பமான நடிகை ஸ்கேர்லத் யோகன்சன் என சொன்னபிறகுதான் மிகவும் பிடித்துப் போனது " 

நான் ஒன்றும் சொல்லவில்லை.  கல்லூரியில் படிக்கும்பொழுது நடிகர் மாதவன் அலைபாயுதே படத்தில் காட்சி தந்த  பக்காவாட்டு தோற்றம் எனக்கும் இருந்ததாக நானும் நினைத்துக் கொண்டதுண்டு.  பின்னர் நந்தா சூரியா போல அசப்பில் நான் இருப்பதாக நினைத்துக் கொண்டு சிலப்படங்கள் எடுத்து வைத்திருக்கின்றேன்.  அவர்களுக்கும் எனக்கும் ஸ்னானபிராப்தி கூட இல்லை என்பது மிகவும் தாமதமாகத்தான் புரிந்தது. 

ஒரு நாள், இரு நாள் ,, இரு மாதங்களாய் இந்த ஸ்கேர்லத் புராணம் தொடர்ந்தது. எனக்கு ஸ்கேர்லத்தின் மேல் வெறுப்பு வந்துவிடுமோ என்ற பயத்துடன்  ஒருவேளை என் ஆஞ்சலிகா பைத்தியமாகிவிட்டாளோ என்ற பயமும் சேர்ந்துவிட்டது. 

ஒருநாள் என்ன நடந்தாலும் பரவாயில்லை என்று 

"ஆஞ்சி, நீ ஸ்கேர்லத் யோகன்சனைப் போல கொஞ்சம் கூட முக அமைப்பில் இல்லை " 

"இல்லை, அவளைப்போலத்தான் இருக்கின்றேன்.. வேண்டுமானால் என் அம்மா அப்பா என் தோழிகளைக் கேட்போம்" சாமியாடும் பெண்களைப் போலப் பேசினாள். 

அந்த வார இறுதியில் அனைவரும் வந்தார்கள். அவர்கள் எவ்வளவு எடுத்து சொல்லியும் ஆஞ்சலிகா தன் கருத்தை மாற்றிக்கொள்ளவில்லை.  இறுதியாக ஆஞ்சலிகாவை ஒரு மனநல மருத்துவரிடம் கூட்டிப்போவது என முடிவு எடுக்கப்பட்டது.  இந்தியத் துணைக்கண்ட ஆண்களுடன் காதல் வயப்படும் ஐரோப்பிய பெண்கள் கொஞ்சம் மறை கழன்டவர்கள் என்ற எனது கருதுகோள்களில் ஒன்று நிஜமாகிவிடுமோ எனத் தோன்றியது. 

பலத்தரப்பட்ட  பரிசோதனை, தனி ஆலோசனைகளுக்குப்பின்னர்... 

"Apophenia வில் ஒரு வகை இது ... Pareidolia , மேகங்களில் , மலைகளில் மனித உருவங்களையோ தனக்குப்பிடித்த உருவங்களையோ பார்ப்பதைப்போல...  தான் தனக்குப்பிடித்த ஓர் ஆளுமையைப்போல முகச்சாயலுடன் இருக்கின்றோம் என்பதை ஆழமாக நம்புவது.. இந்த வகையான மயக்குறு சூழலில் உங்களது ஆஞ்சலிகா இருக்கின்றார்  "  என்ற மருத்துவர்  தொடர்ந்து 

"ஆஞ்சலிகாவை வேறு ஏதாவது ஊருக்கு சுற்றுலாவாக கூட்டிக்கொண்டு போங்கள் ... ஸ்கேர்லத் யோகன்சனைப் பற்றி பேசாதீர்கள்"  என அறிவுறுத்தினார்

அதற்குப்பின்னர் ஆஞ்சலிகா , ஸ்கேர்லத்தைப் பற்றி எதுவும் பேசவில்லை.  உற்சாகமாகவே பாரீஸ் பயணத்திற்குத் தயாரானாள்.  ரோம் விமானநிலையத்தில் நடைமுறைகளை முடித்துவிட்டு விமானத்திற்காகக் காத்துக் கொண்டு இருக்கையில் , தூரத்தில் ஒரு பரபரப்பு. அது நடிகை ஸ்கேர்லத் யோகன்சன் என மக்கள் உற்சாகமாகினர். இந்த சூழலில் எனக்கு ஆஞ்சலிகாவே முக்கியம் எனத் தோன்றியதால் அங்கு போகவில்லை. ஆஞ்சலிகாவிற்கு அந்த பரபரப்பில் கவனம் போகவில்லை. அவள் இளையராஜா பாடல்களை கேட்டுக்கொண்டு இருந்தாள்.  ஸ்கேர்லத் பாரீஸ் தான் போகப்போகின்றார் போலும்... எங்கள் இடத்தை நோக்கி வந்து கொண்டிருந்தார். பிரயாணிகள் தங்களது கைபேசிகளில் அவரைப் படமெடுத்துக் கொண்டு இருந்தனர். ஸ்கேர்லத் எங்கள் இருக்கைகளுக்கு எதிரே வந்து நின்றார். 

வியப்புடன், ஆஞ்சலிகாவைக் கண்ணுக்குக் கண் பார்த்த ஸ்கேர்லத் ஆங்கிலத்தில் சொன்னது  

"என்ன ஆச்சரியம்... நீ அச்சு அசப்பில் என்னைப்போலவே இருக்கின்றாய்?" 
                               ------------------  

Tuesday, December 17, 2013

கலைஞர் , சோ. ராமசாமி and a conspiracy theory - கட்டுரை - கிளிமூக்கு அரக்கன்

எனது மண்டப எழுத்தாளர்களில் ஒருவராக இருந்த கிளிமூக்கு அரக்கன் என்பவர் எழுதிய Facebook கட்டுரை (https://www.facebook.com/kilimookku ) அவரின் அனுமதியுடன் இங்கு பதிவு செய்யப்படுகின்றது. போற்றலும் தூற்றலும் அவருக்கே !!

-----
கலைஞர் கடைசி நேரத்தில் யு டர்ன் அடித்து வெறும் வாயை மெல்லுபவர்களுக்கு அவல் கொடுப்பார் எனக் காத்திருப்பவர்களுக்கு என்னுடைய மற்றும்ஓர் அபத்தமான ஹைப்பொதிஸிஸ்.

அரசியலில் கலைஞரும் அரசியல்-தரகு வேலைகளில் சோ. ராமசாமியும் நீ அரிசி கொண்டு வா , நான் உமி கொண்டு வருகின்றேன் ஊதி ஊதி திங்கலாம் வகையைச் சேர்ந்தவர்கள் . அப்படிபட்டவர்கள் மீண்டும் ஜோடியாக காட்சி தருகிறார்கள் என்றால் யாரோ ஒருவர் வெல்லப்பாகும் மற்றொருவர் இடித்த அரிசியும் வைத்து இருக்கின்றனர் என பொருள். இப்படி வின் - வின் சூழல் இல்லை என்றால் ஒழிய ஒன்று சேரவே மாட்டார்கள். கலைஞரும் குடும்பத்துடன் சோ. இல்லத்திருமணத்திற்கு குடும்பத்துடன் போய் வாழ்த்தி இருந்து இருக்கமாட்டார்.

1. சோ. ராமசாமிக்கு மோடி பிரதமர் ஆக வேண்டும். ஒரு காலத்தில் இவர் அத்வானியின் ரசிகராக இருந்தாலும் , இளைய அத்வானியான மோடி போன்ற ஒருவர் காங்கிரசில் இருந்து இருந்தாலும் மூன்றாம் அணியில் இருந்து இருந்தாலும் சோ. ஆதரிப்பார்.  பிஜெபி க்கு தலைகீழாக நின்று நீர் குடித்தாலும் மெஜாரிட்டி கிடைக்காது எனும் சூழலில் ஆள் பிடிக்க தயாரானவர்தான் சோ. ( சோ. அவர்கள் , தமிழருவி மணியன் சாரைப் போல பஞ்சத்திற்கு ராஜகுரு ஆனவர் அல்ல என்பது நினைவுகூறத்தக்கது )

2. இங்குக் கிடைக்கும் 40 என்பது மிகப்பெரும் எண்ணிக்கை. பி ஜே பி - தி மு க இணையவேண்டும் இரண்டு தரப்பில் யார் ஆசைப்பட்டு இருந்தாலும் வெற்றி என்பது ஒட்டு மொத்தமாக துடைத்துக் கொண்டு போய்விடும் என இரு தரப்பிற்கும் தெரியும். தமிழகத்தைப் பொறுத்தவரை மோடிக்கான வாக்குகள் என்பது ஜெ விற்கான வாக்குகளின் ஒரு பகுதி. திமுக இருந்தால் அவை அனைத்தும் ஜெ விற்கே மீண்டும் போய்சேரும். ஏற்கனவே காங்கிரஸ் கூட்டணியால் அதிருப்தியாக இருந்த கூட்டத்துடன் மோடியின் மேல் இருக்கும் கோபத்தினால் விசுவாச சிறுபான்மை வாக்கு வங்கியும் ஜெ விற்குப் போய் சேரும். ஆக பி ஜே பி - தி மு க அணி என்பது கிட்டத்தட்ட 40 யையும் அம்மையாருக்கு தாரை வார்ப்பதைப் போலத்தான்.

3. பி ஜே பி - அதிமுக அமைவதை பெரும்பாலான மனுவாதிகள் விரும்பினாலும் சொற்ப இடங்களைக் கொடுத்துவிட்டு , வென்ற பின்னர், மோடியை தமிழகத்திற்கு நான் தான் அறிமுகப் படுத்தினேன் , என்னால் தான் அவர் வென்றார் என ஜெ., ராஜீவ் காலத்து கலாட்டாக்களை செய்வார் என்பதை மனுவாதிகள் அறியாதவர்கள் அல்ல.

4. மத்திய அரசாங்கத்தைப் பொறுத்தவரை திமுக நம்பிக்கையான கட்சி. லாப நட்டத்தில் முன்ன பின்ன இருந்தாலும் அட்ஜஸ்ட் செய்து கொண்டு போகக் கூடியவர்கள்.

5. பிஜேபி தலைமையில் ஓர் அணி -- பி ஜே பி + வைக்கோ + மாம்பழம் ( கருப்பு எம் ஜி ஆர் வந்தால் லாபம் வராவிடினும் நட்டம் இல்லை)  நாகர்கோவில் , சேலம் , கோவை , விருதுநகர் என குறைந்தது நான்கு இடங்களிலாவது வெல்ல வாய்ப்பு.

6. அதிமுக - திமுக என நேரடிப் போட்டியை உருவாக்குகையில் அதிமுகவின் சனாதன - ஆண்ட பரம்பரை வாக்குகள் பிஜேபி அணிக்கு பிரிந்து விட , தனித்து நிற்கின்றோம் என இரட்டிப்பு உற்சாகத்தில் வேலைபார்க்கும் திமுக அதிக இடங்களில் கத்தியின்றி இரத்தமின்றி சுலபமாக வெல்ல வாய்ப்பு உண்டு

7. அறுவடை திமுகவிற்கு என்றாலும் பலன் பி ஜே பிக்குத்தான். நிலையான ஆட்சி நாட்டிற்கு வேண்டும் 
என , தேர்தலுக்குப் பின்னர் திமுக பிஜேபிக்கு ஆதரவு நல்கும். (கடைசி நேரத்தில் , முதல் சில மாதங்களுக்கு அத்வானி பிரதமர் ஆக்கப்பட்டு அனைத்தும் சரி கட்டப்பட்டாலும் படலாம் )

8. தமிழகத்தில் திமுக தனித்து நிற்பது என்பது பி ஜே பி மத்தியில் ஆட்சிக்கு வரவேண்டும் என வேலை செய்யும் அரசாங்க 'எந்திரத்தின்' மாஸ்டர் ஸ்ட்ரோக் மூவ். திமுகவிற்கு மீள் எழுச்சி. ஆக வின் வின் .

பொதுசனம் மத்தியில் ஆளுவது காங்கிரஸ் அல்லது பிஜேபி என நினைக்கலாம் , ஆனால் நிஜத்தில் ஆள்வது அரசு அதிகாரிகளும் அவர்களை ஆளும் தேசிய / பன்னாட்டு நிறுவனங்களும் தான். அவர்களின் நலன்களை தொடர்ந்து காப்பாற்ற ஒரு மாற்றம் தேவை. அந்த மாற்றத்தைக் கொண்டு வர , மோடியின் மாயப்பிம்பத்தைப் பயன்படுத்தி அத்தனை விதமான வெட்டி ஓட்டல் வேலைகள் தொடங்கிவிட்டன. 'அவர்களுக்குத்' தேவையான மாற்றத்தைக் கொண்டுவர ஏற்கனவே கேஜ்ரிவாலைத் தயார்படுத்தியாகிவிட்டது. கலைஞரின் வெற்றியையும் உறுதி செய்தாகிவிட்டது. அடுத்து ஆந்திர ஜெகன் மோகன் என வேலைகள் ஜரூராகத் தான் நடக்கின்றன.

இனி பாருங்கள் , வழக்கமாக கலைஞரை வசைபாடும் நாளிதழ்கள் இனி வசையைக் குறைத்துக் கொள்ளும். சோ. ஸ்டாலின் புகழ் பாடுவார். திமுக தனித்து நிற்பது மிகப்பெரும் ராஜதந்திரத்தின் ஒரு பகுதி என்றாலும் , கலைஞர் வரம் கொடுக்கும் நிலையில் இருப்பவர். வசைபாடிய திமுகவை 'குளிப்பாட்டுவது' 67 யில் ராஜாஜி காலத்திலும் 96 யில் கடும் ஜெ எதிர்ப்பு காலத்திலும் நடந்து இருப்பதால் அவர்களுக்குப் புதிதாக ஒன்றும் இருக்காது. கலைஞரும் வரம் கொடுக்கும் வாய்ப்புகளைத் தவறவிடமாட்டார். ஆக வரும் நாட்கள் படு சுவாரசியமாக இருக்கப் போகின்றன.

Saturday, December 14, 2013

வரும் பாராளுமன்றத் தேர்தலில் திமுக தனித்து நிற்கவேண்டும், ஏன்? - கட்டுரை ( கிளிமூக்கு அரக்கன் )

எனது மண்டப எழுத்தாளர்களில் ஒருவராக இருந்த கிளிமூக்கு அரக்கன் என்பவர் எழுதிய Facebook கட்டுரை (https://www.facebook.com/kilimookku ) அவரின் அனுமதியுடன் இங்கு பதிவு செய்யப்படுகின்றது. போற்றலும் தூற்றலும் அவருக்கே !!

----
முன்குறிப்பு :- விஜயபாரதம் வாசிப்பவர்கள், ஆம் ஆத்மி ஆத்மாக்கள், மோடி மஸ்தான்கள் , பேஸ்புக்கில் ராஜராஜன் கண்ட தமிழ்த்தேசியங்களை அமைத்த ஆண்ட பரம்பரையினர் ஆகியோர் இந்தப் பதிவைத்தவிர்த்து விடலாம். கலைஞரின் கசின்ஸ் , மாற்று சிந்தனையாளர்கள் , அரசியல் பார்வையாளர்கள், கட்சி சார்பற்ற சாமானியர்கள் ஆகியோர் இந்தக் கட்டுரையைப் படிக்கலாம் 

கடுகாய் சிறுத்தாலும் காரம் குறையாமல் திராவிட இயக்க விழுதுகளை இன்னும் தாங்கிப்பிடித்துக் கொண்டு இருக்கும் ஒரே இயக்கம் திமுக என்பதை திமுகவின் விமர்சகர்களும் மறுக்க மாட்டார்கள். அத்தகைய பாரம்பரியமும் நெடும் வரலாறும் கொண்ட இயக்கம் 2006 க்குப்பின்னர் ( கவனிக்க 2009 அல்ல ) முதுகில் சுமக்கும் வேதாளங்களால் தடுமாறுவதைப் பார்க்கையில் தமிழகம் 'சதுர்வேதி மங்கல' காலங்களுக்கு மீண்டும் போய்விடுமோ என்ற அச்சம் எழுகின்றது. அறுபது ஆண்டு கால வரலாற்றில் , பாதிக்கு மேல் , அதிகாரம் எதுவும் இல்லாமல் வெறும் தொண்டர் பலத்தில் மட்டும் ஒவ்வொரு நாளும் பீனிக்சாய் விடியலை நோக்கிப் பறந்து கொண்டிருந்த திமுக , தனது விக்கிரமாதித்த பலத்தை மறந்து அனாவசிய சுமைகளை சுமந்து சுமந்து சுயத்தை இழந்து கொண்டு இருக்கின்றது. 

திமுக தனித்து நின்று கிட்டத்தட்ட 25 ஆண்டுகள் ஆகிவிட்டன. சாதாரணமாக, தனித்து நின்றே வென்று இருக்க வேண்டிய 1996 ஆண்டு தேர்தலை தேவையில்லாமல் , சைக்கிளில் ஜி.கருப்பையா , ரஜினி போன்றவர்களை வைத்து திமுக ட்ரிபிள்ஸ் அடித்து ,வென்றதும் என்னமோ அவர்களால்தான் திமுக வென்றதைப்போல ஊடகங்களால் மாயப்பிம்பம் கட்டமைக்கப்பட்டது. தொலைந்துப் போய் இருக்க வேண்டிய பண்ணையார்களுக்கான வாக்குகளை திமுக மீட்டுக் கொடுத்துவிட்டது. திமுகவின் முக்கியப் பிரச்சினையே முகவரி இல்லாதவர்களுக்கு அரண்மனை கொடுத்து அவர்களாலேயே வீழ்வதுதான். 

காங்கிரசை சேர்ந்த , மணிசங்கர் அண்மையில் ஒரு கருத்தைத் தெரிவித்து இருந்தார் . அது என்னவென்றால் , காங்கிரஸ் எதிர்க்கட்சி வரிசையில் அமர்ந்து தங்களை மீள் ஆக்கம் செய்து கொள்ளவேண்டும் என்பதுதான் அந்தக் கருத்து. அந்தக் கருத்தை திமுகவைப் பொறுத்தவரை தனித்து நின்று தங்களை மீள் உருவாக்கம் செய்துகொள்ள வரும் பாராளுமன்றத் தேர்தல் மிகப்பெரும் வாய்ப்பு என்பதாக மொழிமாற்றிக்கொள்ளலாம்.

திமுக கூட்டணியில் , கூட்டத்தோடு கூட்டமாக கோவிந்தா போட்ட ஆண்டிப்பண்டாரங்கள், சமணத்தையும் புத்தத்தையும் ஏற்றியதைப்போல சமத்துவத்தையும் பாஸிச மரத்தில் கழுவில் ஏற்ற தயாராகிக் கொண்டு இருக்கும் வேலையில் , வரும் பாராளுமன்ற தேர்தலில் திமுக தனித்துப் போட்டியிடுவது என்பது, 'மனுக்கள் மறுபிரவேசம் செய்ய முற்பட்ட 50 களில் தேர்தலை சந்தித்த அளவிற்கு முக்கியத்துவமானது. 

வெறும் 20 தொகுதிகளில் மட்டும் போட்டியிட்டு , மற்ற தொகுதிகளில் சொத்தை சோப்ளாங்கிகளுக்கு வேலை செய்யும் திமுக தொண்டனை, 40 தொகுதிகளிலும் நமக்காக வேலை செய் என்றால் பத்து மடங்கு உற்சாகமாக வேலை செய்வான். 50களிலும் சரி 60களிலும் சரி 80 களிலும் சரி இன்றைய நுனிப்புல் மேயும் பேஸ்புக் தலைமுறைவரை திமுகவின் பலம் கலைஞர் அல்ல, கலைஞருக்காக கால் வயிறு சாப்பாடு சாப்பிட்டுவிட்டு ஊர் சுற்றி வேலைப்பார்க்க , அடிமட்டத்தில் இருந்து உயர்மட்டம் இருக்கும் திமுகவின் தொண்டர்கள்தான். கோலியாத்துகளை எதிர்த்து தனித்து இருக்கும் தாவிதுகளை விரும்பும் சமூக மனோபாவத்தில், திமுக தனித்து நிற்கும்பொழுது திமுகவை உள்ளூரக் காதலித்து , இன்று தூர நின்று துற்றும் பைபிளில் வரும் 'கெட்ட குமாரர்களும்' இல்லம் திரும்பும் வாய்ப்பு அதிகம். 

இவை எல்லாம் சாமானியன் ஆன எனக்கே தெரியும் பொழுது , சூத்திரனுக்கும் சூழ்ச்சி வரும் என அறியவைத்த சகலகலாவல்லவருக்கு தெரியாமலா இருக்கும். இது நாள் வரை, பூதங்கள் கேட்டதைக் கொடுக்காது போனால் , தேவதைகளாய் மாறி எதிர்ப்பக்கம் போய் வரமளித்து விடுமோ என்ற எண்ணத்தில் உள்ளதில் பகிர்ந்து அளித்து பூதங்களின் தவறுகளுக்கு தன் தலையைக் காவுக் கொடுத்து கொண்டிருப்பவர் கலைஞர். 

ஆனால் இதுவரை இருந்த தேர்தல்களைப் போல அல்லாமல் , வரும் தேர்தலில் தமிழகம் முதன் முறையாக பிரதமர் வேட்பாளரையும் முன் நிறுத்துகின்றது.. பிரதமர் ஆக வேண்டும் என்ற விருப்பத்தில் இருக்கும் ஜெ. ஓர் உறையினுள் மற்ற வாள்களை அனுமதிக்க மாட்டார். குறுவாள் ராகுலும், ஏற்கனவே ரத்தச்சுவைக் கண்ட கொடும் வாள் மோடியும் புரட்சித்தலைவியின் அருகினில் கூட போக முடியாது. ஆக அம்மையார் 40 உம் நமக்கே என பாளையத்துக்காரர்கள் சீமான், நெடுமாறன், தா. பாண்டியன் , சரத்குமார் போன்றவர்களின் துணையுடன் களம் இறங்குவார். எதிர்முகாம் நிலை உறுதியாக ஏற்கனவே தெரிந்து விட்டபடியால் துணிந்து வேதாளங்களின் கேள்விகளுக்குப் பதில் சொல்லாமல் தனித்து ஆட்டத்தில் குதிக்கலாம். 

அமைதியடையாத பேய்களைப் போல, காங்கிரசும் பிஜேபியும் தனித்துவிடப்படும் பொழுது , அதிமுக Vs திமுக என்ற நேரிடைப் போட்டி வருகையில் , எதிர் மறையாக யோசித்தாலும் குறைந்தபட்சம் 10 தொகுதிகளில் ஆவது திமுக வெற்றிபெறும் வாய்ப்புண்டு . . இந்த எண்ணிக்கை கூட்டணியில் போட்டி போட்டு வெல்லப்போகும் தொகுதிகளின் மதிப்பைக் காட்டிலும் அதிகம். 40 களிலும் திமுகவே போட்டியிடும் பொழுது , அத்திருப்தி ஆட்களின் உள்ளடி வேலைகளும் குறையும், சொல்ல முடியாது எதிர்பார்க்கும் எண்ணிக்கையை விட அதிகமாகவே வெல்லலாம் . 

ஒரு வேளை ஜெ. ஒட்டு மொத்தமாக 40 களிலும் வென்றாலும் பெரிய லாபம் இருக்கின்றது. 40 யை வைத்துக் கொண்டு கண்டிப்பாக முன்றாம் அணியில் ஜெ. பிரதமர் ஆவார். பிரதமர் ஆனவர் மீண்டும் முதலமைச்சர் ஆக திரும்ப மாட்டார். சுயத்தைப் பரிசோதித்த திமுக 2016 சட்டமன்றத் தேர்தலில் அட்டகாசமாக ஏதேனும் ஓர் அதிமுக டம்மி முதல்வர் வேட்பாளரை எதிர்த்து அனாயசமாக வெல்லும் வாய்ப்பும் அதிகம். 

80 களிலும் ஆரம்ப 90 களிலும் மக்களவையில் ஓர் உறுப்பினர் கூட இல்லாமல் , திமுக இருந்த காலங்கள் உண்டு. அக்காலக் கட்டத்திலும் ஈழப்பிரச்சினை ஆகட்டும் , தமிழக நலன் சார்ந்த விசயங்கள் ஆகட்டும் சார்ஜா டெண்டுல்கரைப் போல சூறாவளி ஆட்டங்கள் திமுக ஆடியதுண்டு. ஆக மக்கள் பிரச்சினையை தீர்த்து வைக்க , மக்களவை உறுப்பினர்கள் இல்லாமலேயே திமுகவினால் முடியும். இது திமுக தோற்றுப் போக வேண்டும் என எழுதிய பத்தி அல்ல. திமுக தோற்றாலும் பலத்தைக் காட்டி தேர்தலாக இருக்கவேண்டும் என எழுதப்படுவது. கிரிக்கெட்டில் பெரிய இலக்குகளைத் துரத்தி தோற்றுப்போனாலும் தோற்ற அணி மதிக்கப்படும். அத்தகையத் துரத்தலை திமுக செய்யவேண்டும். 

லெனினிற்குப் பின்னர் ஸ்டாலின் பலம் வாய்ந்த தலைவராக தனித்து உருவேடுத்தலைப் போல, திமுகவின் ஸ்டாலின் விசுவரூபம் எடுக்க இந்த பாராளுமன்றத் தேர்தலை லிட்மஸ் டெஸ்டாக பார்ப்பது திமுகவின் வரலாற்றுக் கடமை. தனித்து நிற்கவேண்டும் என்பது தூரத்தில் நின்று திமுகவின் தவறுகளை உள்செரித்துக் கொண்டு, இன்னமும் திமுகவைக் காதலித்துக் கொண்டு இருக்கும் கிளிமூக்கு அரக்கனின் விருப்பம் மட்டுமல்ல.. நாடி நரம்பு ரத்தம் என அணு அணுவாக திராவிட எண்ணங்கள் கொண்டு இருக்கும் ஒவ்வொரு திமுக தொண்டனின் விருப்பமும் கூட. இந்திய ஒன்றியத்தின் ஒற்றுமை குலையாமல் இருக்க, மதவாத சக்திகள், ஊழல் எதிர்ப்பு என்ற பெயரில் மனுவாத ஆத்மிக்கள் தலையெடுக்காமல் இருக்க பலம் பொருந்திய திமுக தமிழகத்திற்கு மட்டுமல்ல , ஒட்டு மொத்த இந்தியாவிற்கும் அவசியம். நகைச்சுவையாக சொல்ல வேண்டுமானால் , திமுக சத்ரியன் படத்தில் நடிகர் திலகன் சொல்லுவதைப்போல பழைய பன்னீர்செல்வமாக திரும்பவேண்டும். 

பின்குறிப்பு :- பொதுக்குழுவில் திமுக பிஜேபி அல்லது காங்கிரசுடன் கூட்டணி அமைத்துப் போட்டியிடலாம் என முடிவு செய்யலாம். வெற்றி கூட பெறலாம். ராஜாஜியுடன் கூட்டணி வைத்தபோழுதும் இந்திராவுடன் கூட்டணி வைத்தபோழுதும் வாஜ்பாயுடன் கூட்டணி வைத்த பொழுதும் சகித்துக் கொண்டு வேலை பார்த்த  மன நிலையில்தான் வரும் தேர்தலில் தொண்டர்கள் வேலை செய்வார்கள். அப்படியாகும் பட்சத்தில் திமுக நிற்கும் இடங்களில் திமுகவிற்கு வாக்கு அளியுங்கள். மீதி இடங்களில் அதிமுகவிற்கு வாக்கு அளியுங்கள் என்பது என் பரப்புரையாக இருக்கும்.

On December 15th, DMK General Council decided NOT to have any alliance with either Congress or BJP. It is a good news for DMK cadres. 

Wednesday, December 04, 2013

பேஸ்புக், ஒரு மாணவன் , ஒரு பெண் மற்றும் ஒரு பொய்

முதலில் இதை சிறுகதையாகத் தான் எழுதலாம் என இருந்தேன். ஆனால் அனுபவங்களை அனுபவப்பதிவாக எழுதினால் அதன் தாக்கத்தின் வீச்சு அதிகம் என்பதால் உண்மையில் பொய்யைக் கலந்து புனைவாக்கும் எண்ணத்தை ஒதுக்கி விட்டு இதை அப்படியே உள்ளது உள்ளபடியே எழுதுகின்றேன். நாம் ஒவ்வொருவரும் தெரிந்தோ தெரியாமலோ சிலரின் வாழ்க்கையில் ஏதாவது ஒரு சந்தர்ப்பத்தில் விளையாடிவிடுவோம். அந்த விளையாட்டுக்கள் சில சமயங்களில் நன்மையிலும் பல சமயங்களில் பகையிலும் முடியலாம். அடுத்தவரின் வாழ்க்கையில் பெரும் மாற்றத்தைத் தரக் கூடிய விதியின் விளையாட்டுகளின் ஆட்டக்காரனாக அடிக்கடி நான் இடம் பெறுவதுண்டு. கல்லூரிக் காலங்களில் அவ்வகையான ஆட்டங்களை சாதுர்யமாக தெரிந்தே விளையாடி இருக்கின்றேன். கால ஓட்டத்தில் அறிவும் பக்குவமும் அதிகமாக அதிகமாக மற்றவர்களின் உணர்வுகளைப் பணயம் வைத்து ஆடும் ஆட்டம் அறவே மறந்துப் போய் விட்டது. கடைசியாக பங்கேற்ற ஆட்டம், ஒரு பிரபல வலைப்பதிவரினால் தொடர்கதையாக எழுதப்பட்டு பரவலான வரவேற்பையும் பெற்றது. அத்தொடரில் நானும் ஒரு முக்கிய கதை மாந்தர். 

தமிழ் , தெலுங்கு, இந்தி என இந்திய அளவிலேயே இருந்த அடுத்தவரின் வாழ்க்கையை திசைத் திருப்பும் ஆட்டங்கள் இன்று பன்னாட்டு அந்தஸ்தையும் அடைந்தது 

ஒரு மாணவன் , பேஸ்புக் , ஒரு பெண் மற்றும் ஒரு பொய் ஆகியனவும் இவ்வாட்டத்தில் முக்கியமானவை. எனது துறையில் ஆராய்ச்சி மாணவனாக , பாகிஸ்தானைச் சேர்ந்த ஒருவன், சென்ற ஆண்டு சேர்ந்தான். கடந்த ஜூன் மாதம் , பாகிஸ்தானிற்கு சென்றவன் , அங்கிருந்து துறைப் பேராசிரியருக்கு , தனது தந்தை உடல் நலம் சரியில்லாமல் இருப்பதாகவும் , அதனால் ஆறு மாதங்கள் படிப்பில் விலக்கு அளிக்க வேண்டும் எனக் கேட்டுக் கொண்டு மின்னஞ்சல் செய்து இருந்தான். 

மாணவர் நலனில் மிகுந்த அக்கறைக் கொண்ட எனது பேராசிரியரும் , அதற்கான சாத்தியக் கூறுகளை பரிசீலித்து அதற்கான முன்னெடுப்புகளை எடுத்து இருந்தார். பல்கலை கழக விதிமுறைகளின் படி , மாணவர்களுக்கு உடல் நோவு வந்தால் மட்டுமே ஆறு மாதங்களோ ஒரு வருடமோ விலக்கு அளிக்கப்படும், ஆனாலும் பேராசிரியர் மிகவும் நல்லவர் என்பதால், இண்டு இடுக்கு விதி முறைகளைப் பயன்படுத்தி மாணவர்களுக்கு நல்லது செய்வார் அடிக்கடி என்னிடமும் எனது சக மாணவனான  மற்றொரு பாகிஸ்தானியனிடமும், விலக்கு கோரிய மாணவனைப் பற்றியும் அவனது தந்தையின் உடல் நலம் பற்றியும் விசாரிப்பார். 

இன்று மாலை, ஒரு சந்தர்ப்பத்தில் பாகிஸ்தானிய மாணவனைப் பற்றி பேச்சு வருகையில் , அந்த மாணவனது பேஸ்புக்கில் ஏதேனும் தகவல் இருக்கின்றதா என எங்களிடம் கேட்டார். நீண்ட நாட்களுக்குப் பிறகு நேரம் இருந்ததால் இன்று தான் சிலப் பலப் புகைப்படங்கள் போட்டு சுயத்தம்பட்டம் அடித்துக் கொண்டு இருந்தேன். வாத்தியார்கள் எள் என்றால் எண்ணெய் ஆக மாறும் தமிழ் வழிப் படிப்புச் சூழலில் வளர்ந்ததால் உடனே , அவனது பேஸ்புக்கைப் பார்த்து , மாணவன் எதுவும் தகவல் பகிரவில்லை ஆனால், அவனது தோழி ஒருத்தி புகைப்படங்களில் அவனை இணைத்துள்ளதைக் காட்டுகின்றது என மட்டும் சொன்னேன். பேராசிரியர் என்ன நினைத்தாரோ தெரியவில்லை, உடனே என் இருக்கைக்கு வந்து படங்களைப் பார்த்தார். மாணவனும் அவனது ஐரோப்பியத் தோழியும் , ஜெர்மணியின் மியுனிக் நகரில் நடந்த ஒரு திருவிழாக் கொண்டாட்டத்தில் தங்களது நண்பர்களுடன் எடுத்துக் கொண்ட படங்கள் கடந்த செப்டம்பர் மாதம் தரவு ஏற்றப்பட்டிருந்தன. பேராசிரியரின் முகம் மாறியது. 

பயபுள்ள, அப்பாவிற்கு உடல் நலம் சரியில்லை என கூறிவிட்டு , ஜெர்மனியில் ஆட்டம் போட்டுக் கொண்டு இருக்கின்றது என எனக்கு விளங்கியது. 

அந்த மாணவனுக்கு ஆரம்பத்தில் இருந்தே இத்தாலியும் எங்களது துறையையும் பிடிக்கவில்லை. ஆராய்ச்சிப் படிப்பிற்கான ஊக்கத் தொகையும் மிகவும் குறைவு என்ற மனக்குறையும் அவனுக்குண்டு. நான் சேர்ந்த ஆண்டில், நிதி நிலைமை காரணமாக ஊக்கத் தொகை எனக்கு கிடையாது. பல்கலை கழகத்தில் அங்கே கொஞ்சம் இங்கே கொஞ்சம் நான் வேலைப் பார்ப்பதால் தான் அப்படி இப்படி என ஓர் ஆயிரம் ஈரோக்கள் எனக்கு கிடைக்கும். அதை வைத்துக் கொண்டு தான் அரசனைப் போல வாழ்வதாக இங்கு கொஞ்சம் பந்தா காட்டுவதுண்டு. எனது பந்தாக்களைப் பற்றி எழுதினால் அது பத்து பக்கங்கள் போகும், அதைப் பின்னர் பார்க்கலாம். 

"சார் ஒருவேளை , இந்தப் பெண் சென்ற வருடம் எடுத்த புகைப்படங்களை இப்பொழுது தரவேற்றி இருக்கலாம் " பொய்மையும் வாய்மை இடத்து என சமாளிக்க முயலுகையில் ...... 

சமீபத்தில் , அதே தோழி , மாணவனது சுவற்றில் 'இன்றிரவு சாக்லெட் காப்பி கொண்டாட்டத்தில் கலந்து கொள்ள வருகின்றாயா ' என எழுதி இருந்ததையும் பேராசிரியர் கவனித்து விட்டார். 

 நான் படு சுமாராக ஆண்டிராய்டு நிரலி எழுதும் பொழுது கூட கோபப் படமாட்டார். தந்தைக்கு உடல் நலம் சரி இல்லை என சொல்லிவிட்டு , அதன் பொருட்டு சொந்த நாட்டில் இருப்பதாக விலக்கு கேட்டு , இங்கு குடியும் கும்மாளமுமாக இருப்பதைப் பார்த்த பேராசிரியரின் முகத்தில் அவ்வளவு கோபம் வெடித்தது.

உடனடியாக அந்த மாணவனுக்கு மின்னஞ்சல் செய்து விட்டு , அவனுக்காக எடுத்திருந்த முயற்சிகளை கைவிடுமாறு துறைத் தலைவருக்கும் தெரிவித்து விட்டார். 
மார்ச்சில் அவன் திரும்ப வந்தால், முதலில் பாஸ்போர்ட் இம்மிக்ரேஷன் முத்திரையை பார்க்க வேண்டும் என கோபமாக சொல்லிக்கொண்டு இருந்தார். 

ஐரோப்பா வரும் இந்தியத் துணைக்கண்ட மாணவர்களில் சிலர், , ஒரு நாட்டில் படிப்பிற்கான அனுமதியை வாங்கிக் கொண்டு , அனுமதி பெற்ற படிப்பிற்கு போக்குக் காட்டிவிட்டு , மற்றொரு நாட்டிற்கு சென்று அங்கு படிப்பிற்கோ வேலைக்கோ பெண்களுக்கோ தூண்டில் போட்டுக் கொண்டு இருப்பார்கள். அந்த வகையில் இந்த பாகிஸ்தான் மாணவன் செயல்பட நினைத்து இருந்து இருக்கலாம். அதற்காக அப்பா உடல்நிலை என்ற திரைக்கதையை எழுதி இருக்கலாம்.ஆறு மாதங்கள் வேறு நல்ல வாய்ப்பிற்காக காத்திருந்து ஒரு வேளை கிடைக்காவிட்டால் , மீண்டும் இத்தாலிக்கே வந்துவிடலாம் என்பது மாணவனின் திட்டமாக இருந்து இருக்கும். திட்டமிட்டு எழுதப்பட்ட திரைக்கதையில் எழுதியவருக்கே ட்விஸ்ட் கொடுக்கும் விதமாக பேஸ்புக் அமைந்துவிட்டது. அவனது பெண் தோழி மட்டும் அந்தப் படங்களைப் பகிராமல் இருந்திருந்தாலோ  அல்லது Tag செய்வதை இந்த மாணவன் எடுத்துவிட்டு இருந்தாலோ ஆப்பசைத்த  குரங்காய் மாட்டாமல் இருந்து இருக்கலாம். அந்த மாணவன் நேர்மையாக இல்லை, பொய் சொன்னான் என்பதெல்லாம்  ஒரு புறம் இருந்தாலும், நாளை என் பேஸ்புக் வழியாகத் தான் அவனது தகவல்களைப் பேராசிரியர் பார்த்தார் என அவனுக்கு தெரிய வரும் பொழுது, நான் அவனுக்கு வில்லன் ஆவேன். ஒரு நாயகனுக்குத்தான் எத்தனை வில்லன்கள்.... 

சமூக டக உலகமானது , தகவல் பரிமாற்ற யுகம் மட்டுமல்ல, தகவல் கசிவு உலகமும் கூட... எத்தனை எச்சரிக்கையாக இருந்தாலும், மறைக்க வேண்டும் என நினைக்கும் விசயங்கள் சமூக ஊடகத் தொடர்பு சங்கிலியில் எங்கேயாவது ஓர் இணைப்பில் தெறித்து விழும். அதே போல , சொல்லப்பட்ட பொய், நீருக்குள் அமுக்கப்பட்ட காற்றடைத்தப் பந்து மேல் எழும்பி வருவதைப் போல என்றாவது ஒரு நாள் மேலே வரும்.

Monday, November 25, 2013

இரண்டாம் உலகம் - திரைப்படம் - சிலக்குறிப்புகள் - எழுதியவர் மண்டப எழுத்தாளர் கிளிமூக்கு அரக்கன்

இரண்டாம் உலகம் திரைப்படம் பற்றிய பின்வரும் சிலக் குறிப்புகளை எழுதியவர் கிளிமூக்கு அரக்கன் (https://www.facebook.com/kilimookku)
---

சிலப்பள்ளிகளில் நூற்றுக்கு எழுபது மதிப்பெண்கள் எடுப்பவன் தான் முதல் மாணவனாக இருப்பான். அவனுக்கு அடுத்தபடியாக எடுத்தவன் மதிப்பெண்களைப் பார்த்தால் வெறும் 25 அல்லது முப்பது இருக்கும். பள்ளியின் நிலைமை , மாணவனின் சூழல் ஆகியவற்றைக் கருத்தில் கொள்ளாமல் , முதல் மாணவனை , வேறு பள்ளியில் 95 சதவீதம் எடுக்கும் மாணவனுடன் ஒப்பிட்டு , அடி அடி என அடித்தால் என்ன செய்வது... செல்வராகவனும் அந்த எழுபது சதவீத முதல் மதிப்பெண் மாணவனைப் போன்றவர்தான். தமிழ்த் திரைப்பட சூழல், அதன் வர்த்தகம் ஆகியவற்றைக் கருத்தில் கொண்டு , இரண்டாம் உலகம் படத்தை மதிப்பீடு செய்ய வேண்டும். நம்மவர்களுக்கு பிரச்சினையே, மனைவியிடம் முன்னாள் காதலியைத் தேடுவது, ரோகித் சர்மாவிடம் டெண்டுல்கரைப் பார்ப்பது, ஆங்கிலப் படத்தை தமிழில் தேடுவது என்பதுதான். முதல் உலகின் வணிகப்படங்களின் தரத்தை, மூன்றாம் உலகத்தின் திரைப்படத்தில் தேட வேண்டிய அவசியம் இல்லை. 

சிலப் படங்களை ஆற அமர உட்கார்ந்து ரசித்துப் பார்க்க வேண்டும். இரண்டு மணி நேரப் படம் , இருபது நிமிடம் போல் கடக்க வேண்டும் என நினைப்பவர்களால் , இரண்டாம் உலகத்தை ரசிக்க முடியாது என்பதல்ல, அவர்களுக்கு அத்தனை நேரம் மற்றும் பொறுமை இருக்காது. இழுவை, புரியவில்லை என கமர்சியல் விமர்சகர்களால் கிழிக்கப்பட்ட அன்பே சிவம் , மும்பை எக்ஸ்பிரஸ் போன்று காலம் கடந்து நிற்கும் சிலப் படங்களின் வரிசையில் இரண்டாம் உலகம் சேரும். 

ஆயிரத்தில் ஒருவன் திரைப்படம் வெளியான பொழுது , சோழர்களைக் காட்டுமிராண்டிகளாக காட்டுவதா என கொதித்து எழுந்த தமிழ்த் தேசியவாதிகள் , இரண்டாம் உலகத்தில் எங்கும் தமிழ் இருப்பதைப் பார்த்து மகிழ்ச்சி அடையலாம். நமக்கு வீரர்களாக தெரிந்த , சோழர்கள் காட்டுமிராண்டிகளா என்பதை அக்கால மலேசியத் தீபகற்ப மக்களைக் கேட்டால் தான் தெரியும். சோழர்களை மிகைப்படுத்தல் இன்றி , புனைவில் காட்டியமைக்காகவே ஆயிரத்தில் ஒருவன் திரைப்படத்தை எனக்குப் பிடிக்கும். ஆயிரத்தில் ஒருவனைப் பிடித்தவர்களுக்கு கண்டிப்பாக இரண்டாம் உலகம் பிடிக்கும். 

இரண்டாம் உலகத்தில் எங்கும் தமிழ் என்பதை வழமைப்போல மென்-இந்துத்வா 'பதிப்பக இணையதளம்' ஒன்று ஆரிய கிண்டல் அடித்து இருந்ததைப் படித்தது தான் இந்தத் திரைப்படத்தைப் பார்க்க தூண்டு கோலாக இருந்தது. சிலப் படங்களை யார் எதிர்க்கின்றார்கள் என்பதை வைத்துதான் பார்க்க வேண்டும். 

பின்னிப்பிணைந்து இருக்கும் இரண்டு உலகங்கள். இரண்டிலும் ஆரியா அனுஷ்கா . ஓர் உலகின் காதல் தோல்வி எப்படி மற்றொரு உலகத்தில் மாற்றம் கொண்டு வருகின்றது என்பதுதான் கதையின் அடி நாதம். செல்வராகவனின் முந்தையப் படங்களை விட , இந்தப்படத்தில் மென்மை அதிகம். 

படம் நெடுக விரவிக் கிடக்கும் நகைமுரண்கள் இரண்டாம் உலகத்தை சுவாரசியம் ஆக்குகின்றது. பெண் தெய்வத்தை வழிபடும் சமூகத்தில், பெண் அடிமைத்தனம். 

இவ்வுலகில் மட்டுமல்ல, இரண்டாம் உலகிலும் கடவுளைக் காப்பாற்றுபவன் மனிதன், அவனுக்கு வீரமும் ஈரமும் ஊட்டுவது காதல் மட்டுமே .. அதுவே மனித நாகரிகத்தின் மையப்புள்ளி

"அந்தக் கடவுளைத் தவிர அத்தனைபேரையும் கொல்லுங்கடா" - நாத்திகம் ஆத்திகம் என எப்படி பார்த்தாலும் இந்த வசனம் ஆழ்ந்த பொருள் தரும் வசனம். 

இரு வேறு துருவ ஆளுமைகளாக ஆரியா அனுஷ்கா கதாபாத்திரங்கள். 

இரண்டாம் உலகம் எனக் காட்டப்படும் ஜார்ஜியா , உண்மையில் சமகால வரலாற்றில் இரண்டாம் உலக நாடுகளில் ஒன்று. ( மேற்கத்திய முதலாளித்துவ நாடுகள் முதல் உலகம், பழைய சோவியத் தலைமையிலான பொதுவுடைமை நாடுகள் இரண்டாம் உலகம், இந்தியா போன்ற வளரும் நாடுகள் மூன்றாம் உலகம் ) 

ஆடல் பாடல் கவர்ச்சிக்கு வில்லத்தனத்திற்கு மட்டும் வெளிநாட்டு நடிகர்களைப் பயன்படுத்தும் இந்தியத் திரைப்படங்களில் , விதிவிலக்காக பெரும்பகுதியான படத்தில் , வெளிநாட்டு நடிகர்களை வைத்து எடுக்கப்பட்ட முதல் படம் அனேகமாக இரண்டாம் உலகமாகத்தான் இருக்கும். 

ஒரு சிலத் தமிழ்த் தேசிய இயக்குநர்கள் போல தனித் தமிழ் வசனங்கள் ஆன திரைப்படம் எனத் தம்பட்டம் அடிக்காமல், இயல்பான தமிழ் வசனங்களால் பெரும்பாலும் இரண்டாம் உலகம் நிரம்பி இருப்பது பாராட்டப்பட வேண்டியது. கலகமான விசயங்களை கூட்டம் கூட்டி விளம்பரப்படுத்தாமல் , நாத்திகமோ , உறவுச் சிக்கல்களோ போறப் போக்கில் சொல்லிவிட்டுப் போவதனால் தான் செல்வராகவன் தொடர்ந்து கவனிக்கப்படுகின்றார். 

ஓர் ஊரில் மிகப்பெரிய ஓவியன் இருந்தான். அவனது ஓவியங்கள் அகில உலகப் பிரபலம். மில்லியன் பவுண்ட் கணக்கில் அவனது ஓவியங்கள் விலை போகும். ஆளுமைகளின் வீட்டில் எல்லாம் அவனது ஓவியம் தான் வரவேற்கும். ஆனால் அவனது அம்மாவின் வீட்டில், ஓவியன் பதின்மங்களில் வரைந்த ஓவியம் ஒன்று மாட்டப்பட்டு இருக்கும். அவனது அம்மா வீட்டில் , ஏன் ஒவியனது சமகால ஓவியம் மாட்டப்படமால் , ஒப்பீட்டளவில் சுமாராக உள்ள ஓவியனது ஆரம்ப கால ஓவியம் இருக்கின்றது என அனைவருக்கும் வியப்பு. அவனது அம்மாவின் பதில், " இன்றைய மதிப்பில்லா ஓவியங்களின் ஆரம்ப விதை , அந்த ஓவியமே .. அது பாராட்டப்பட்டதனாலேயே இன்றைக்கு இவ்வளவு ஓவியங்கள் கிடைத்துள்ளன. என்னளவில் எனது மகனது சிறந்த ஓவியம் அவனது இந்த பழைய ஓவியமே "

செல்வராகவனும் ஓர் ஓவியனே ... ஓவியனின் அம்மாவைப்போல இன்று தோள் தட்டிப் பாராட்டுவோம். ஆளுமையும் வயதும் திமிரும் இந்த ஓவியனுக்கு இருக்கின்றன, இவை அனைத்தும் தொடக்கமே !! 

குழந்தைகளை மட்டுமல்ல, திரைப்படங்களையும் 'சமமற்ற' வைகளுடன் ஒப்பிடக் கூடாது. தமிழ் டப்பிங்கில் ஆங்கிலப் படங்களைப் பார்த்துவிட்டு, ஐ எம் டி பி யில் குறிப்புகள் படித்து விட்டு, விக்கிப்பிடியாவில் இருந்து மொழிப் பெயர்த்து விட்டு உலக சினிமா பேசுபவர்களைப் புறந்தள்ளி விட்டு , இரண்டாம் உலகத்தைப் பாருங்கள். எனக்குப் பிடித்து இருந்ததைப் போல உங்களுக்கும் பிடித்து இருக்கும். ஒரு வேளை பிடிக்காவிடினும் கவலைப் படாதீர்கள். சில ஆண்டுகள் கழித்துப் பிடிக்கும். வாழ்க்கையில் நிறைய விசயங்கள் ஒத்திப் போடப்பட்டே ரசிக்கப்படுகின்றன.

Friday, November 15, 2013

ஒளி - மலேசிய தமிழ்த் திரைப்படம் - திரைப்பார்வை

நேற்று மாலை முழுவதும் ஏலியன்கள் அமெரிக்காவிற்கு மட்டும் வருகின்றன. தமிழ்ப் பேசும் பகுதிகளுக்கு எல்லாம் வாராதா என்பதை ஒரு சிறுகதை கருவிற்காக யோசித்துக் கொண்டு சோம்பேறியாக இருந்த பொழுது படம் பார்க்க நினைத்தேன்.  சோம்பித் திளைக்கும் பொழுதுகளை சுவாரசியப்படுத்த பிரபலம் ஆகாத , இதுவரை பெயர் அறியாத திரைப்படங்களைப் பார்ப்பதுண்டு. சில சமயங்களில் அப்படிப் பார்க்கப்படும் , அறியப்படாத படங்கள் எதிர்பார்ப்புகளையும் விஞ்சி நன்றாக இருந்துவிடுவதும் உண்டு.  'ஒளி' மலேசியத் தமிழ்த் திரைப்படம் என்ற அடைமொழியுடன் ஓர் இணையத் தளத்தில் புதுவரவுகளில் ஒன்றாக இருந்தது.  மலேசியா தயாரிப்பு  என்பதும் முகப்புப் படமும் ஈர்த்ததால் படத்தைப் பார்க்க ஆரம்பித்தேன்.



தமிழ்நாட்டு சினிமா, தொலைக்காட்சி மட்டும் பார்ப்பவன் என்பதால்  படத்தில் நடித்து இருந்தவர்கள் அனைவரும் எனக்கு புதிய முகங்களாகவே இருந்தனர்.  மலேசியத் தமிழர்களுக்கு ஏற்கனவே அறிமுகமானவர்கள் ஆக இருக்கலாம்.  திருமணம் முடிந்து ஏழு ஆண்டுகள் ஆகியும் குழந்தை இல்லா தம்பதியினர் , குழந்தை இன்மைக்காக வருத்தப்படும் நாயகியின் பெற்றோர் என படம் ஆரம்பிக்கின்றது.   புவியியல் பொறியியலாளர் ஆன நாயகன் (சசீதரன் ) பணியின் பொழுது  சுரங்கத்தில் தவறி விழுகின்றார். மயக்கமடையும் அவர், கனவுகளில் வருவதைப் போல ஓர் அமானுஷ்ய உலகத்திற்கு கூட்டி செல்லப்படுவதைப் போன்ற ஓர் அனுபவம் கிட்டுகின்றது.  மயக்கம் ஒரு நிமிடத்தில் தெளிந்தாலும் , நாயகனுக்கு ஏதோ நீண்ட நேரம் வேறு ஓர் உலகில் சஞ்ச்சரித்ததைப் போன்ற உணர்வு.  நாயகி அவதாரம் என்ற தலைப்பில் ஆன புத்தகத்தை தேடிக்கொண்டு இருக்கையில் , நூல் நிலையத்தில் முன்னறிமுகம் இல்லா ஒருவர் அந்தப் புத்தகத்தைக் கொண்டு வந்து நாயகி இடம்   கொடுக்கின்றார்.

அன்றிரவு படுக்கையில் நாயகியுடன் காதல் கொள்ளும் நாயகனுக்கு நீண்ட நேரம் இன்பத்தில் இருந்ததைப் போன்ற உணர்வு.  நாயகி வழமையான நேரம் தான் எடுத்துக் கொண்டான் எனச் சொல்லுகின்றாள். தொடர்ந்து வீட்டில் அமானுஷ்ய பிரசன்னம் இருப்பதைப் போல நாயகன் உணர்கின்றான்.  அடுத்த சில நாட்களில் , நாயகிக்கு புத்தகம் கொடுத்தவர் கொல்லப்பட , அவரின் கையில் இருந்து நாயகியின் படத்தை போலிஸ் கைப்பற்றுகின்றது.  கொல்லப்பட்டவர் , வேற்றுக்கிரக விண்வெளி கலத்தை ஒளிப்படம் எடுத்து வைத்து இருந்தவர் என்பதை போலிஸ் அறிகின்றது.

பின்னர் ஒரு நாள்,  நாயகனுக்கு ஆரம்பத்தில் ஏற்பட்ட கனவு அனுபவத்தைப் போல நாயகிக்கும் ஏற்படுகின்றது. ஒளிக் கலத்தில் , ஒளி மனிதர்களைப் பார்க்கின்றாள். பின்னர் அவள் நாயகன் காரில் வீடு திரும்பும் பொழுது, காரின் மேல் கிடக்கின்றாள். பயந்துப் போன நாயகன் ஒரு சந்தர்ப்பத்தில் , ஏலியன் மிருகத்தை சந்திக்க , நாயகனும் நாயகியும் முன்பு உணர்ந்த ஒளி மனிதர்கள் தோன்றி மிருகத்தை அழித்து , அவர்களால் , நாயகன் ஒளி உலகம் அழைத்து செல்லப்படுகின்றான். அங்கு  நாயகன் நடந்தவைகளுக்கு  விளக்கம் பெறுகின்றான்.  உலகத்தின் பிரச்சினைகள், சண்டைகள், அவலங்கள், வன்முறைகள் பிணிகளைக் காட்டி இதை எல்லாம் சரி செய்ய ஓர் அவதாரம் தோன்றாத என நாயகியின் அம்மா அங்கலாய்க்க , நாயகி தன் வயிற்றைத் தடவுகின்றார்.  நமக்கும் முடிவு புரிகின்றது. படமும் நிறைவு பெறுகின்றது.

மொத்தம் பத்துக்கும் குறைவான கதாபாத்திரங்கள் வைத்துக் கொண்டு முடிந்தவரை சுவாரசியமாகவே எடுத்து இருக்கின்றார்கள்.   அனைத்து கதாபாத்திரங்களும் நன்றாகவே நடித்து இருந்தனர்.  நாயகன் - நாயகி நெருக்கம் ரசிக்கும்படி அழகாக இருந்தது.  மணிரத்னம் படத்தில் எது நன்றாக இருக்கின்றதோ இல்லையோ , நாயகன் நாயகி நெருக்கம் கியுட்டாக எடுக்கப்பட்டிருக்கும். இந்தப் படத்தில் மணிரத்னம் டச் இருந்தது.

திகில் படம் என்ற வகையில் சேர்த்தாலும்  ஒரு வகையான ஆன்மிகப் படமாகத் தான் எனக்குப் பட்டது. மனிதனால் வழிபடும் கடவுள்கள் எல்லாம் நிஜம் , அவர்கள் வேற்றுக் கிரகத்தில் இருந்து வந்து மனிதனுக்கு அறிவாற்றலைக் கொடுத்து சென்றவர்கள் என்ற கருதுகோள் ஒன்று உண்டு. ஆதி மனிதன் பயத்தில் பிரமிப்பில் அவர்களை கடவுள்களாக வழிபட ஆரம்பித்தான் என்பது அதன் நீட்சி.

படத்தில் அடுத்த அவதாரம் தோன்ற , நீங்கள் தேர்ந்தெடுக்கப்பட்டவர்கள் என ஒளி மனிதர் கூறுகையில் , கிறித்தவர்களுக்கு மரியாள், யோசப் நினைவுக்கு வரலாம். படத்தில் நல்லவை அதீதம் ஆகும்பொழுது கெட்ட அவதாரமும் , கெட்டவை அதீதம் ஆகும் பொழுது நல்ல அவதாரமும் தோன்றும் இது நியதி என முடித்து இருந்தது இயற்கையின் சமனை விளக்கும் விதமாக இருந்தது.



செல்சி , மான்செஸ்டர் யுனைடட் , விடுதலைப்புலிகள் என இயக்குநருக்கு பிடித்தமான விசயங்களும் ஆங்காங்கே தூவப்பட்டுள்ளன.  படத்திற்கு ஒட்டாத ஐட்டம் கிளப் பாடல் ஒன்றும் உண்டு. இது ஒருவேளை தமிழ்ச்சினிமாவின் பாதிப்பாக இருக்கலாம்.

தமிழ்ச்சினிமா தமிழகம் சார்ந்தே காலம் காலமாய் இருந்து வருகின்றது.  இந்த நிலை மாற , மலேசியத் தயாரிப்புகள் போன்று புலம் பெயர்ந்த சினிமாக்கள் வெளிவர வேண்டும். ஆரம்பத்தில் அமெச்சூர்த் தனமாக இருந்தாலும் நிச்சயம் புலம் பெயர் தமிழ்த் திரைப்படங்கள் தமிழ்நாட்டுத் தமிழ்த்திரப்படங்களுடன் போட்டி போடும் காலம் வெகு தொலைவில் இல்லை. அதற்கு நல்லதொரு எடுத்துக்காட்டு இந்த 'ஒளி' திரைப்படம்.  

Tuesday, November 12, 2013

பேஸ்புக் புகைப்படம் - குட்டிக் கதை

'கார்த்தி , ஒரு சின்னப் பிரச்சினை...'

 பொதுவாக அம்மு அவளின்  பிரச்சினைகளை என்னிடம் கொண்டு வர மாட்டாள் , அவளுடைய பிரச்சினைகளை அவளே சரி செய்து கொள்ள முடியும் என்ற திமிரான எண்ணம் அவளுக்கு உண்டு.  என்னவாக இருக்கும் என்ற யோசனையுடன்   "சொல்லு அம்மு" என்றேன்.

'இந்த ஜீவா, என்னுடைய போட்டோக்களை எல்லாம் ரிசேர் செய்றாரு, அதுக்கு தேவதை , அழகி அப்படி இப்படி , ஹார்ட் சிம்பல்களுடன் என வர்ணனைகளுடன் பண்றது எனக்குப் பிடிக்கல"

அந்த ஜீவா , அம்முவோட போட்டோக்களை எல்லாம் மறுபகிர்வு செய்து , அதில் அவரின் நண்பர்கள் ஆபாசத்திற்கு சற்று குறைந்த அளவில் வார்த்தை விளையாட்டுகளுடன் உரையாடுவதைப் பார்த்து இருக்கின்றேன். அம்முவே அதை ஒன்றும் சொல்லுவதில்லை எனும்பொழுது , நான் என்ன சொல்லுவது என அமைதியாக இருந்துவிடுவதுண்டு.  இது மாதிரியான விசயங்களில் பெண்களிடம் பிரச்சினை என்னவென்றால் ஏதாவது  கேள்வி கேட்டால் சந்தேகம் என்பதாகவும், கேட்க வில்லை என்றால் அக்கறை இல்லை என்பதாகவும் புரிந்து கொள்வார்கள்.

"பிடிக்கவில்லை என்றால்  ஜீவாவிடமே சொல்லிவிடு, இல்லை என்றால் டோட்டலா பிலாக் பண்ணிடு அம்மு "

"சொல்லிப் பார்த்துட்டேன் கார்த்தி ,  பிலாக் செய்ய மனசு வரல,  பொதுவா நல்ல மனுஷன், நீ இதை எப்படி ஹேண்டில் பண்றதுன்னு ஒரு ஐடியா கொடேன்"

"பொம்பளபுள்ளங்க பஞ்சாயத்துக்குப் போறது எரிச்சலான விசயம்னு சொல்லி இருக்கேன்ல,  போட்டோ போட்டு கூடி கும்மி அடிக்கிறப்ப இப்படியான விஷயம் எல்லாம் வரத்தான் செய்யும் என்னால எதுவும் செய்ய முடியாது ... நீயே பார்த்துக்கோ அம்மு   "
தொலைப்பேசி அழைப்பை உடனடியாக துண்டித்து விட்டாள்.  இரண்டு மணி நேரம் கழித்து அழைத்தாள்.

"கார்த்தி, அந்த ஜீவா என்னோட எல்லா போட்டாக்களையும் எடுத்துட்டாரு, சாரி சொல்லி மெசேஜ் கூட அனுப்பிட்டாரு,,,,, நீ ஏதாவது செஞ்சியா"

" அவரோட மனைவி புரபைலை கண்டுபிடிச்சி , எனக்கு விசிபிளாக   தெரியுற அவங்களோட போட்டோவுல , நீங்கள்  அழகு, உங்கள் கண்களில் சொக்கி விட்டேன்.  உங்கள்  கணவர் கொடுத்து வைத்தவர், அவரின் மேல் எனக்கு பொறாமையாக இருக்கின்றது என்பதுடன் ஒரு ஹார்ட் சிம்பலுடன் கமெண்ட் போட்டு இருந்தேன்"
                   --------------

Tuesday, November 05, 2013

பேஸ்புக்கும் child porn / child abuse ஆபாசப் பக்கங்களும்

அச்சு ஊடகமாக இருக்கட்டும் , ஒலி ஊடகமாக இருக்கட்டும் திரை ஊடகமாக இருக்கட்டும், கணினி , இணைய ஊடகமாக இருக்கட்டும் , மனிதனின் அடிப்படைத் தேவையான செக்ஸ் விஷயங்களுக்காகவும் அவைப் பயன்படுத்தப்படும். சமூக ஊடகங்கள் தலை எடுத்த பின்னர் அரசியல், சமூகம் பற்றிய விசயங்களைப் பேச எப்படி மக்கள் எத்தனித்தார்களோ , அந்த அளவிற்கு கலவி சம்பந்தப்பட்ட விசயங்களைப் பேசவும் ஒரு கும்பல் கிளம்பும். பிளாக்கர் வலைப்பூக்கள் , பேஸ்புக் ஆகியன விதிவிலக்குகள் அல்ல. தமிழ் ஆண்ட்டிகள் , மல்லுப் பெண்கள் என ஏகப்பட்ட பக்கங்கள் பேஸ்புக்கில் விரவி கிடக்கின்றன. பெரும்பாலனாவை படங்களுடன் லத்தீன் வரி வடிவத்தில் எழுதப்பட்டிப்பவை. (தி இந்து செய்தியாளர் ஜெயமோகன் அவற்றைப் பார்த்தால் மகிழ்வாரா என்பது வேறு விஷயம்). பெண்களைப் போகப் பொருளாகப் பார்ப்பது தவிர்க்கப்பட வேண்டியது  என்றாலும் , சம்மதத்துடன் கவர்ச்சியாக காட்சியளித்தவர்களின் படங்களை விரும்பிப் பார்க்கக் கூடாது  என சொல்ல முடியாது.

பாலியல் வறட்சி , பாலியல் கட்டுப்பாடுகள் நிறைந்த தமிழ்ச்சமூகச் சூழலில் , வயதுக்கு வந்தோர் கலவிப்படங்களைப் பார்ப்பதோ, அவற்றை வடிகாலாக பயன்படுத்துவதோ பெரிய குற்றமாக கருத முடியாது. பேஸ்புக் உள் நுழைவு அனுமதியை வைத்து என்னுடைய நிறைய நண்பர்கள் கிளுகிளுப்பான படங்களைப் பார்த்திருப்பது பேஸ்புக் கால வகைப்படுத்தலில் தெரிய வரும். அந்த நண்பர்களிடம் அதைப் பற்றி கேட்பது எல்லாம் கிடையாது. ஒரு வேளை தோழிகளாக இருந்தால், அவர்களின் நட்பு வட்டம் , அவர்களைப் பயன்படுத்திக் கொள்ளக்கூடிய சூழலை அவர்கள் தெரிந்தோ தெரியாமலோ உருவாக்கக் கூடாது என, கிளுகிளுப்புப் படங்களைப் பார்க்க பேஸ்புக் உள் நுழைவைப் பயன்படுத்ததீர்கள் என அறிவுரைப்பதுண்டு.

தேர்ந்தெடுக்கப்பட்ட நடிகர் நடிகைகளை வைத்து எடுக்கப்படும் கிளுகிளுப்புப் படங்களைப் பார்ப்பது ஒரு மன இறுக்கத்தைத் தளர்த்தும் பொழுது போக்கு என்றாலும், உண்மையான காதலர்களின் நெருக்கம், தம்பதியினரின் தேனிலவு நெருக்கம் போன்றவற்றை பார்ப்பதை தவிர்ப்பது நல்லது என்பது என் கருத்து.

அமெரிக்க சட்டங்களுக்குக் கட்டுப்பட்டு இருக்கும் போர்னோகிராபிக் தளங்கள் குழந்தைகளை மையமாக வைத்து எடுக்கப்படும் ஆபாசப்படங்களை ஒரு போதும் காட்ட மாட்டார்கள். அப்படியே யாராவது தரவு ஏற்றினாலும் முதுகிற்குப் பின்னர் கைகளைக் கட்டி களித்தின்ன அனுப்பி விடுவார்கள். child porn எனத் தொடந்து தேடுபவர்கள் கூடக் கண்காணிக்கப்பட்டு , உண்மையான குரூரமானவர்களாக இருந்தால் தூக்கி உள்ளேப் போட்டு விடுவார்கள்.


எழுத்தாளர் ஜெயமோகன் அங்காடித் தெருப்படத்தில் சொன்னதைப் போல யானை இருக்கும் காட்டில் எறும்புக்கும் வாழ்க்கை இடம் உண்டு. கண்ணில் படும் அவற்றை எல்லாம் புறந்தள்ளி , அன்னப் பறவையைப் போல எது தேவையோ அதை மட்டும் எடுத்துக் கொண்டு.  போய்க் கொண்டிருந்த சமூக ஊடகச் சூழலில் , என்னுடைய நண்பர்கள் வட்டத்தில் இருந்த ஒரு பிரகஸ்பதி ஒன்று ஒரு பத்து வயது பெண் குழந்தைப் படத்திற்கு ஏதோ ஒரு கமெண்ட் போட்டு இருப்பதாகக் காட்டியது.

பொதுவாக நான், பெரியவர்களின் படங்களுக்கு விருப்பம் போடுகின்றோனோ இல்லையோ , அவர்களின் குழந்தைகளின் படங்கள் பகிரப்படும் பொழுது, அதுவும் பொதுவாக எல்லோருக்கும் (public ) ஆக பகிரப்படாமல் , நண்பர்களுக்கு மட்டும் பகிரப்பட்டிருந்தால் அவர்களின் குழந்தைகளின் படங்களுக்கு விருப்பமோ பாராட்டோ தெரிவிப்பது உண்டு. பொதுவில் இருக்கும் படங்களுக்கும் விருப்பமோ பாரட்டத் தெரிவிக்கையில் , அது என்னுடைய நட்பு வட்டத்திலும் பிரதிபலிக்கும். ஆயிரக்கணக்கான ஆட்கள் இருக்கும் என் வட்டத்தில் எந்த பொந்தில் எந்தப் பாம்பு இருக்கின்றது என தெரியாது அல்லவா...

சரி, நம் நட்பு வட்டத்து மக்களில் யாரோ ஒருவரின் குழந்தை என உற்று நோக்கிப் படித்தால் மட்டமான குரூரமான ஆபாச வர்ணிப்பு. அந்தப் புகைப்படம் பகிரப்பட்டிருந்தது ஒரு பேஸ்புக் பக்கம் (page ). அந்தப் பக்கத்தில் ஐந்து வயதில் இருந்து 12 வயது வரை இருக்கும் பெண் குழந்தைகளின் படங்களைப் போட்டு வர்ணனைகள்.
பகிரப்பட்டு இருந்த படங்கள் அனைத்தும் சமூக ஊடகங்களில் , பெற்றவர்கள் பகிர்ந்து இருந்தப் படங்களாகத் தான் தெரிந்தன. தீபாவளி கொண்டாட்டப் படங்கள், பள்ளிகளில் பரிசு வாங்கும் படங்கள் , சுற்றுலாப் படங்கள் என இயல்பான நிகழ்வுகளில் எடுக்கப்பட்ட படங்கள் அவை.

 நான்  யூத் யூத் என அடிக்கடி சொல்லிக்கொண்டாலும்  அம்மு வெர்ஷன் 1 ஐ திருமணம் செய்து  கொண்டு இருந்தால் , இன்று ஏழு எட்டு வயதில் எனக்கு ஒரு குழந்தை இருந்து இருக்கும்.  தந்தையின் ஸ்தானத்தில் அந்தப் படங்களைப் பார்க்கையில் மனது பகீர் என இருந்தது.

 இந்த பிரகஸ்பதி என்றோ ஒரு காலத்தில் எனது வட்டத்தில் சேர்ந்து இருக்கின்றது. களை எடுக்கையில் இதைத் தவறவிட்டு இருக்கின்றேன்.
 அந்தப் பக்கத்திற்கு 1000 க்கு மேற்பட்ட மக்கள் பின் தொடர்கின்றனர்  முதல் வேலையாக  அந்த பிரகஸ்பதியை ஒட்டு மொத்தமாக தடை செய்துவிட்டு , அந்தப் பக்கத்தைப் பற்றி பேஸ்புக் நிர்வாகத்திற்கு தகவல் ஆபாசம் என்ற வகையில் புகார் அனுப்பிவிட்டு வருத்தம் தோய்ந்த மனதுடன் அமைதியாகிவிட்டேன்.

அடுத்த நாள், பேஸ்புக்கில் இருந்து ஒரு தகவல் , நீங்கள் தகவல் அனுப்பிய பக்கத்தில் ஆபாசம் என எதுவும் இல்லை ஆகையால் உங்கள் கோரிக்கை நிராகரிக்கப்படுகின்றது என்ற வகையில் செய்தி வந்து இருந்தது.  வருத்தம் இரு மடங்கு ஆகி விட்டது. கண்ணுக்கு எதிரே நடக்கும் குரூரத்தை புகார் செய்தும் இப்படி ஆகிவிட்டதே என இருந்தது. புகார் செய்கையில்  child abuse என்ற வகையை சேர்க்க வேண்டும் என பேஸ்புக் நிர்வாகத்திற்கு மின்னஞ்சல் செய்ய வேண்டும் என நினைத்துக் கொண்டே நாட்கள்  கடந்துப் போயின. (புகார் பெட்டியில் child abuse என்ற வகை இல்லை, ஒருவேளை வேறு விதமாக இருந்தால், விபரம் அறிந்தவர்கள் சொல்லுங்கள்)

சாராசரி மனிதனாக ஒருநாள் மட்டும் பொங்கி விட்டு , மறந்துப் போன சூழலில் இன்று காலையில் பேஸ் புக்கிடம் இருந்து ஒரு தகவல் , நீங்கள் செய்த  புகார் மறுபரிசீலனை செய்யப்பட்டு இருக்கின்றது  , மறுபரிசீலனையில் நீங்கள் புகார் செய்தப்பக்கம் நீக்கப் பட்டுவிட்டது என வந்து இருந்தது, புகார் மதிக்கப்பட்ட மகிழ்ச்சி , பேஸ்புக்கின் பல அடுக்கு  பரிசீலனைகள் வியப்பு ஆகியன ஒருப்பக்கம் இருக்க,  ஓர் எதிர்கால தந்தையாக நிம்மதியாக இருந்தது.


இந்தப் பக்கத்தைப் போல ஆயிரம் பக்கங்கள் இருக்கலாம். அதை விரும்பும் லட்சக்கணக்கான கொடூரமானவர்கள் இருக்கலாம். ஆனால் என்னால் இயன்றவரை அந்த எண்ணிக்கையைக் குறைத்து உள்ளேன்.  ஓர் இரவு அமர்ந்து இது போன்றப் பக்கங்களைத் தேடி புகார் செய்ய வேண்டும் என முடிவு செய்து உள்ளேன். உங்கள் கண்களுக்குத் தட்டுப்பட்டால் புகார் செய்யுங்கள்.  நம் குழந்தைகளின் படங்களும் பகிரப்படலாம். பகிரப்படுவதைக் காட்டிலும் குழந்தை பாலியல் வன்முறையாளர்களின் எண்ணிக்கையை அதிகரிக்கும் இந்த சூழலை நமது குழந்தைகளின் படங்கள் பயன்படுத்தப்படும் தடுத்து நிறுத்துவது நமது கடமையும் கூட.

சில விசயங்கள் கவனத்திற்கு

1. குழந்தைகளின் படங்களைப் பகிர்கையில் பொதுவில் (public ) பகிராதீர்.
2. பெண் குழந்தைகளின் படங்களைப் பகிர்வதை தவிர்ப்பது நல்லது
3. வடிகாலுக்காக , பாலியல் கலவிப் படங்களைப் பார்க்கையில் 'நடிப்புப்' படங்களை மட்டும் பாருங்கள்.  காதலர்கள் , தம்பதியினர் தெரிந்தோ தெரியாமலோ எடுத்தப் படங்களைப் பார்க்காதீர்கள். ஆர்வக் கோளாறில் அவற்றை நண்பர்களுடன் பகிராதீர்கள்.

4. பாலியல் உணர்ச்சிகளின் வடிகாலிற்கு அதிகப்பட்சம் குமுதம் நடுப்பக்கம் அளவில் வைத்துக் கொள்வது நல்லது.  கட்டுப்பாடற்ற வகையில் கலவிப் படங்களைப் பார்ப்பது , அவரவர்க்கான நேரம் வருகையில் , சலிப்போ , அவ நம்பிக்கையோ , தாழ்வு மனப்பான்மையோ ஏற்படலாம். அற்புதமான வாழ்க்கையில், இந்த மாதிரியான ' தாழ்வு மனப்பான்மை' கட்டத்தில் வன்முறை உள்ளே நுழையும்.

5. அவரவர் அரசியல் என அரசியல் தளங்களில் இருக்கும் சமூக ஆர்வலர்கள் , அடுத்த கட்சிக்காரர்களை ஏசுவதுடன் மட்டும் கடமை முடிந்து விட்டது என நில்லாமல் , அவரவர் கட்சி ஆட்களின் முகப்புப் பக்கங்களில் இருக்கு மேலதிக விருப்பப் பக்கங்களையும் ஒரு எட்டு எட்டிப் பாருங்கள் , ஏதேனும் குழந்தை ஆபாச தளத்தொடுப்புகள் இருந்தால் கவனத்தில் கொண்டு , தெரிந்தவராக இருந்தால் ஆலோசனை கொடுங்கள். தெரியாதவராக இருந்தால் முற்றிலும் தடை செய்வது நல்லது

இவற்றைத் தவிர குழந்தைகளுக்கு குட் டச் பேட் டச்  விசயங்களைப் பூடகமாக சொல்லித் தாருங்கள்.  தமிழ்த் தேசியமோ திராவிடத் தேசியமோ , இந்தியத் தேசியமோ , வளமான குழந்தைப் பிராயம் வளமான எதிர்கால சமுதாயம்.


Monday, November 04, 2013

தமிழுக்குத் தேவை சீன வரிவடிவம் - கட்டுரை

சில விசயங்களுக்கு மூக்கை மூடிக் கொண்டுப் போய் விடலாம் என்றாலும் , அப்படியே அமைதியாக இருந்து கொண்டு இருந்தால் எல்லா ஆற்றிலும் அவரவர் வீட்டு சாக்கடைகளைக் கலந்து விடுவார்கள்.  தமிழில் எழுதும் ஓர் எழுத்தாளர் , தமிழ் வரி வடிவங்களை மாற்ற வேண்டும் என்ற ஒரு கருத்தை தமிழ் தினசரி ஒன்றில் எழுதி(http://tamil.thehindu.com/opinion/columns/ஆங்கில-எழுத்துருவில்-தமிழை-எழுதினால்-என்ன/article5311674.ece) இருந்ததை வாசிக்க நேர்ந்ததன் எதிர்வினை என்பதாக இந்தக் கட்டுரையைப் படியுங்கள்.

நாகரிகத்தின் தொடர்ச்சி , சிந்தனையோட்டங்களின் தொடர்ச்சி ஆகியன மொழியை மட்டும் சார்ந்தது அல்ல, மொழியுடன் பின்னிப்பிணைந்து இருக்கும் அதன் சொந்த வரிவடிவத்தையும் சார்ந்தது.  ஒன்றாய் இருந்தத் தமிழ் , மூன்றாய் நான்காய், ஐந்தாய் , இன்று திராவிட மொழிக் குடும்பமாய் மாறியதற்கு காரணம் வெவ்வேறு  காலக் கட்டங்களில் தமிழ் வழக்குகளாக இருந்த தெலுங்கு , கன்னடம், மலையாளம் ஆகியன தங்களுக்கு என்று புதிய வரி வடிவங்களை ஏற்றுக்கொண்டமைதான்.  சிந்து சமவெளி வரி வடிவங்கள் தமிழுக்கானவை என்றக் கருத்தும் உண்டு. இந்தக் கருத்தை ஒட்டி,  கைபர் போலன் கணவாய் வழி வந்த காட்டுமிராண்டி படையெடுப்புகள் , பேச்சு மொழியை மட்டும்  விட்டுவைத்து விட்டு , பயன் பாட்டு வரிவடிவத்தை மாற்றி இருந்து இருக்கும்  என்பதையும்  முன் வைக்கலாம்.

சில மாதங்களுக்கு முன்னர், துருக்கியத் தோழி ஒருவரிடம் , நவீன துருக்கியின் தந்தை முஸ்தபா கமால் அத்தாதுர்க்கைப் பற்றி சிலாகித்துப் பேசிக் கொண்டு இருக்கையில், அந்த தோழி சொன்னது,  'அத்தாதுர்க் அற்புதமான தலைவர், ஆனால் ஒரு விதத்தில் துருக்கிய வரலாற்றில் கரும்புள்ளி அவர் ... அற்புதமான துருக்கிய கடந்த காலத்தை எங்களிடம் இருந்து ஒட்டு மொத்தமாகத் துண்டித்து விட்டார்"

அந்தத் துருக்கியத் தோழி அப்படி சொன்னதற்கான காரணம் , 1928 ஆம் ஆண்டு , அத்தாதுர்க் , அரேபிய வரி வடிவத்தில் அமைந்து இருந்த துருக்கிய மொழி, இனி லத்தீன் வரி வடிவத்தில் மட்டும் பயன்படுத்தப்படும் என அறிவித்ததுதான்.  பழைய வரி வடிவம் தடை செய்யப்பட்டது.  ஓட்டோமான் துருக்கியர்களின் மேல் நூற்றாண்டுகளாக கடுங்கோபம் கொண்டிருந்த மேற்கத்திய உலகம், மேற்கத்திய மோகம் கொண்ட , அத்தாதுர்க்கைக் கொண்டு தான் நினைத்ததை சாதித்துக் கொண்டது என்பது துருக்கியத் தோழியின் கருத்தாக இருந்தது.  இன்றைய துருக்கியத் தலைமுறைக்கு , ஓட்டோமான் துருக்கிய பண்பாட்டு ஆக்கங்களை அதன் உண்மையான வடிவில் வாசிக்கத் தெரியாது.மொழி மாற்றத்தில் தொலைந்தவைகளை விட வரிவடிவ மாற்றத்தில் தொலைந்தவைகள் தாம் ஏராளம்.

பாரசீகம் இஸ்லாமைத் தழுவிய பொழுது, அரேபிய வரி வடிவத்தையும் தழுவிக் கொண்டது.  உலகப் போர்களுக்குப் பின்னர் ஈரானில் லத்தீன் வரி வடிவத்திற்கு மாறிக்கொள்ளலாம் என கருத்தாக்கங்கள் எழுந்த பொழுது எல்லாம், இஸ்லாமிய அடையாளம் பாதிக்கப்படுமோ என்று அஞ்சி மாற்றப்படவில்லை.  உயிர் எழுத்துகளுக்கான சரியான வடிவங்கள் இல்லை என்ற குறைபாடு இருந்த பொழுதிலும் , இன்றைய தலைமுறை கடந்த காலத்துடன் எப்பொழுதும் தொடர்பில் இருக்கின்றது என்ற மகிழ்ச்சி பாரசீக மக்களுக்கு உண்டு. லத்தீன் வரி வடிவம் இன்றி சொந்த கிரேக்க வரி வடிவத்துடன் கிரீஸ் ஐரோப்பாவுடன் தான் இருக்கின்றது.

நூறாண்டுகளுக்கு முன்னர், வரி வடிவத்தை மாற்றுவதும் , இன்றையக் காலக் கட்டத்தில் மாற்றச் சொல்லுவதற்கும் வித்தியாசம் இருக்கின்றது. அன்று கல்வியறிவு பெற்றவர்களின் விழுக்காடு மிக மிகக்குறைவு. ஐரோப்பாவிற்கு நெருக்கமாக மாறவேண்டும் என்ற நிலையின் அடிப்படையில் துருக்கியில்  அன்று அந்த முடிவு எடுக்கப்பட்டது.  மெல்லத் தமிழினிச் சாகும் என்றக் கூற்றைப் பொய்ப்பிக்க திராவிட இயக்கங்கள், அதைத் தொடர்ந்து இளையராஜா,  தமிழ்த் தொலைக் காட்சி ஊடகங்கள்  தொடர்ந்து மறுமலர்ச்சிகள் ஏற்பட்டுக் கொண்டேதான் இருக்கின்றன.  யுனிகோட் சாத்தியத்திற்குப் பின்னர் கன்னித் தமிழ் கணினித் தமிழாகவும் உருவெடுத்து உள்ளது.

சிலர் மலாய் மொழியை உதாரணம் காட்டுகின்றார்கள். இன்று லத்தீன் வரிவடிவங்களில் எழுதினாலும் அரேபிய வரி வடிவமும் புழக்கத்தில் உண்டு. மலாய் மொழி எடுப்பார் கைப்பிள்ளையாக , தொடர்ந்து வரி வடிவங்களை மாற்றிக் கொண்டே இருந்ததன் மூலம் பல வரலாற்றுச்  சுவடுகளைத் தொலைத்ததுதான் மிச்சம். அதில் தொலைந்துப் போனது மலாய் தீபகற்ப வரலாறு மட்டுமல்ல, தென்னிந்திய சோழர் வரலாறுகளும் தொடர்ந்த வரிவடிவ மாற்ற சுனாமிகளால் காணாமல் போனது.


இந்தோனேசியாவைப் பொறுத்த மட்டில், அது பலவேறு தேசிய இனக்குழுக்களை உள்ளடக்கிய பெரும் தீவுக் கூட்டம் அதனை ஒருங்கிணைக்க 'திணிக்கப்பட்ட மொழி' ஒன்றையும் கடன் வாங்கிய லத்தீன் வரி வடிவமும் அதிகாரப்பூர்வமாக்கப்பட்டது.
இந்தியை இந்தியாவின் தேசிய மொழியாக்கி , லத்தின் வரி வடிவத்தை அதிகாரப் பூர்வம் ஆக்குதல் போன்றது ஒடுக்குதல் ஆகும் அது.

தமிழ்ப் பேசும் சமூகம் ஆங்கில மோகம் கொண்டு அலைந்துத் தமிழைத் தொலைக்கின்றது என்பதே பொய்யான வாதம்.  அப்படி தொலைப்பது உண்மை என்றால் எல்லா நாளிதழ்களும் வார இதழ்களும் தங்களது இணைய வடிவங்களைத் தமிழில் உருவாக்கி இருந்திராது.

லத்தீன் வரிவடிவத்தில் ஒரு பிரச்சினை இருக்கின்றது. ஜெயமோகன் என்பதை Jayamokan  என்று எழுதலாம்.  ஐரோப்பிய மொழிகளில் J  என்பதற்கு ஜெ எனவும் யெ எனவும் உச்சரிப்பு உண்டு.   சில சமயங்களில் உச்சரிக்கவும் படாது. வருங்காலத் தலைமுறை Jayamokan  என்ற பெயரைப் படிக்கையில்  J வை உச்சரிக்காமல்  விட்டு விட்டு ஆயா மூக்கன் அதன் பின்னர் ஆய் மூக்கன் எனவும் மாறிவிட வாய்ப்பு உண்டு.

காந்தி மற்றவர்களுக்கு போதிக்கும் முன்னர் சுயப் பரிசோதனை செய்து கொள்வாராம்.  இந்து ஞான மரபு கூட அதைத் தான் சொல்லுகின்றது எனப்படித்ததும் நினைவுக்கு வருகின்றது.  எழுத்துரு கட்டுரையாசிரியர் காந்தியத்தில் நம்பிக்கைக் கொண்டவர் என்றும் இந்து ஞான மரபை பரப்புபவர் என்ற வகையில் அவரே தனது அடுத்தப் புதினத்தை லத்தீன் வரி வடிவத்தில் வெளியிடலாம்.

அந்த 'எழுத்துரு' கட்டுரை ஆசிரியர் விவாத எண்ணங்களை விதைக்கின்றார் என சிலர் பூசி மெழுகிக் கொண்டு இருப்பதால்,  நாம்  விவாத நோக்கில் பார்த்தோம் என்றாலும், இன்னும் இருபது வருடங்களில் சீன மொழி தான் உலக மொழியாகப் போகின்றது.  தமிழை அடுத்தத் தலைமுறைக்குக் கொண்டு செல்ல வேண்டும்  என்ற நோக்கம் இருந்திருந்தால் அந்தக் கட்டுரையாசிரியர் சீன வரி வடிவங்களைத் தான் முன் மொழிந்து இருக்க வேண்டும்.

ஸ்னொவ்டன் அவர்களின் கலகத்திற்குப்பின்னர் மென் பொருள் என்றாலே ஐயப்பட வேண்டி இருக்கின்றது.  ஒரு வேளை அந்தக் கட்டுரையாசிரியருக்கு தமிழ்த் தட்டச்சு மென்பொருள்கள் மேல் சந்தேகம் வந்து இருக்கலாம்.  எதற்கு சின்ன எலி பெரிய எலிக்கு தனித்தனி பொந்துகள் , ஒரேப் பொந்தாக , தனித் தனி மென்பொருள் தேவையின்றி லத்தீன் வரி வடிவம் இருந்தால் Thamiz  Vazhka எனச் சொல்லிவிடலாம் எனக் கருதி எழுதி இருப்பதாகத் தான் நாம் எடுத்துக் கொள்ள வேண்டும்.

லத்தீன் வரி வடிவம், தமிழைத் தொடர்ந்து மற்ற மொழிகளுக்கும் பின்பற்றப்படுமானால் ஒரு பயன் இருக்கின்றது.  மலையாளம் , சேரலத்து தமிழ் வழக்காக மீண்டும் தமிழுடன் சேரும். பின்னர் தொடர்ந்து துளு, கன்னடம் தெலுங்கு என இந்த வரி வடிவ மாற்றத்தால் தமிழுடன் சேர்ந்து தமிழ் செழுமையுறும் என கட்டுரையாசிரியர் நினைத்து இருந்து இருக்கலாம் என நாமும் நம் பங்கிற்கு ஒரு சப்பைக் கட்டு கட்டிவிடுவோம்.

குரூர அரசியல் நகைச்சுவையாக நீண்ட நாட்களுக்கு முன்னர் , நண்பர் ஒருவர் சொன்னது நினைவுக்கு வந்தது. தமிழர்களை ஒடுக்க வன்முறையைக் கையில் எடுத்தற்குப் பதிலாக , தமிழுக்கு சமமான அந்தஸ்து உண்டு , ஆனால் தமிழ் சிங்கள வரிவடிவத்தில் எழுதப்பட வேண்டும் என உடன்படிக்கை செய்து கொண்டிருந்தால் ஈழத்தமிழர்கள் மலையாளிகளைப் போல தனிச் சமூகமாக மாறி இருந்து இருப்பார்கள்.  ஆனால் நம்பூதிரிகளைப் போல சிங்களவர்கள் புத்திசாலிகள் இல்லை என நண்பர்  சொன்னார்.

சரி முடிவாக, அடுத்தத் தலைமுறைக்கு தமிழைக் கொண்டுச் செல்லவேண்டும் என்றால், தமிழைப்படியுங்கள் , இணைப்பு மொழியாக ஆங்கிலம் / ஐரோப்பிய மொழிகளைப் படியுங்கள்.  இவற்றுடன் சீன வரி வடிவத்தையும் கற்றுக் கொள்ள மறவாதீர். எதிர்காலத்தில் இழப்பின்றி வரலாற்றை வரிமாற்றம் செய்யப் பயன்படும். சித்திர எழுத்து வரி வடிவம் தமிழுக்குப் புதிதல்ல .. 'சிந்துசமவெளி'யில் இருந்த தமிழுக்கும் சித்திர எழுத்துதான். 

Tuesday, October 29, 2013

ஊடக அனுபவங்கள்


அண்ணா பல்கலைகழகத்தில் இறுதி ஆண்டு படிக்கும் மாணவர் ஒருவர்,  அமெரிக்கப் பல்கலை கழகம் ஒன்றில் ஆராய்ச்சிப் பட்டம் பெற்றார் என்ற இந்து ஆங்கில நாளிதழ் செய்தியும், மறுநாள்  அது தவறான தகவல்களால் எழுதப்பட்ட கட்டுரை என்று வருத்தங்களுடன் வந்த மறுப்பு செய்தியும்  கடந்த இரண்டு தினங்களாக சமூக ஊடகங்களில் தொடர்ந்து பகிரப்பட்டன.
(NEWS Link: - http://www.thehindu.com/news/cities/chennai/chennai-engineering-student-doctorate-claims-false/article5278851.ece)
 பாதி உண்மையும் மீதி மிகைப்படுத்தப்பட்ட பொய்களையும் உள்ளடக்கி மாணவன் கொடுத்த தகவல்களை சரிபார்க்காமல்  தனது தளத்தில்  போட்டுக்கொண்ட அண்ணா பல்கலை கழகத்தையும் அப்படியே கட்டுரையாக்கிய செய்தியாளரையும் பற்றி யோசித்துக் கொண்டிருந்த பொழுது இந்த பத்தியை  எழுத முடிவு செய்தேன்.  பெரும்பாலான விசயங்கள் ஏற்கனவே பண்புடன் இணையத் தமிழ்க் குழுமத்தில் பதியப்பட்டதுதான்.

இனிப்பான வாழ்வின் நிகழ்வுகளுக்கு , தெரிந்தோ தெரியாமலோ 'கசப்பனுபவத்தை' ஊட்டுபவர்கள் இந்த 'முந்திரிக் கொட்டை' செய்தியாளர்கள்.   சென்ற வருடம்  எனக்கு  கூகுள் பரிசில் ( பெரிய தொகை ) ஒன்று வழங்கப்பட்டது.  தொடர்ந்து படிப்பில் சாதிக்கும் பெண்களுக்கும் , மாற்றுத் திறனாளிகளுக்கும் கூகுள் நிறுவனம் விண்ணப்பங்களை வரவேற்று , பரிசீலித்து தேர்வு செய்யும். ( வென்ற ஆண்டிற்கு முந்தைய ஆண்டு என்னுடைய விண்ணப்பம் நிரகாரிக்கப்பட்டது. )

விளம்பரப் பிரியன் ஆன நான்,  வழமைப் போல பேஸ்புக்கில் / வலைப் பதிவில் தம்பட்டம் அடித்து விட்டு அமைதியாகிப் போனேன். ஒரு நாள் பிரபல வார இதழ்  ஒன்றின் செய்தியாளர் மின்னஞ்சலில் தொடர்பு கொண்டார்,  விபரங்களைக் கேட்டறிந்தார். இதனால் கூகிளில் நிரந்தர வேலை கிடைக்குமா என்றார்? நான் வெற்றிகரமாக ஆராய்ச்சிப் படிப்பை முடித்து கூகுளிற்கு விண்ணப்பித்தால் வேலை கிடைக்க உதவும் கூறுகளில் முக்கியமான ஒன்றாக உதவியாக இருக்கும் என்றேன் , பின்பு என் பின்புலம் , நான் வந்த வழி எல்லாம் கேட்டு , கூகுள்  பரிசு பெரும் பொழுது எடுத்தப் புகைப்படம் ஏதேனும் இருக்கின்றதா எனக் கேட்டார். அடுத்த மாதம் தான் , ஜூரிச்சில் நிகழ்வு. அந்த நிகழ்ச்சி முடிந்தவுடன் படத்தை அனுப்புகின்றேன் என்றேன்.

அடுத்த வாரம்,  இதழில் கட்டுரை  வெளி வந்தது.  இரண்டு அதிர்ச்சிகள். முதலாவது ,  படித்து முடித்தவுடன் கூகுளில் வேலை உறுதி என்பதாக இருந்தது.  சரி இதை 'பாசிடிவ்' ஆக எடுத்துக் கொள்வோம்  என வருத்தத்தை தவிர்த்து விட்டு, இதழில்  வெளியான புகைப்படத்தைப் பார்த்த பொழுது , அது சுவீடனில் நான் முதுகலைப் பட்டம் பெற்றபொழுது எடுத்த பட்டமளிப்பு படம்.

"ஏன் இப்படி செய்தீர்கள்"  என செய்தியாளரைக் கேட்ட பொழுது " படத்துடன் இருந்தால் கட்டுரை சிறப்பாக இருக்கும்" என பேஸ்புக்கில் இருந்த பட்டமளிப்பு படத்தை எடுத்தாண்டதாக சொன்னார். .  ஆயிரம் மைல்களுக்கு அப்பால் இருக்கும் அப்பாவிகளுக்குத் தெரியவாப் போகின்றது என்ற சாதரணமாக எடுத்துக் கொள்ள முடியாத இணையக் காலம் இது.  பெரிய வார இதழ்... எதிர்த்து எழுதி அன்றைய மகிழ்ச்சியைக் கெடுத்துக் கொள்ள வேண்டாம் என்று அப்படியே விட்டு விட்டேன்.

என்னுடைய ஒரே எதிர்ப்பு, அந்தக் கட்டுரையின் மின் வடிவத்தை என்னுடைய எந்த சமூக ஊடகப் பக்கத்திலும்  பகிராமல் இருந்தது தான். யாராவது அதைப் பகிர்ந்து  என்னைக் கோர்த்து விட்டாலும் போய் சத்தமில்லாமல் என் பெயரை நீக்கிவிட்டு வந்து விடுவேன்.  இந்தக் கொடுமையில், அந்தக் கட்டுரையின் பல வரிகளுடன் , சில தினசரிகளிலும் அடுத்த இரண்டு தினங்களில் வெளிவந்தது தான்.

அன்றைக்கு அந்த செய்தியாளருக்கு ஒரு சாதரணமான விஷயம். அவரைப் பொறுத்த வரை படத்துடன் இருப்பது கட்டுரைக்கு முழு வடிவம் தரும். ஆனால் தட்டுத் தடுமாறி கிடைக்கும் கிளைகளைப் பற்றி வளர்ந்து , பெரிய உயரத்தை நோக்கிப் போகையில் எதிர்காலத்தில்இதே புகைப்படம் பூதகரமாக வெளிவரக்கூடும் என்பது செய்தியாளரைப் பொருத்தவரை யோசிக்க முடியாத விஷயம்.  நொந்து கொண்டு அடுத்த வேலையைப் பார்க்க போய் ஆகிவிட்டது

செய்தித் தாளின் செய்திக்கும் வாழ்க்கைக்கும் நெருங்கிய தொடர்பு உண்டு என்பதை அனுபவித்து இருக்கின்றேன். 8 வருடங்களுக்கு முன்னர்,  சென்னையில் மட்டும் வெளிவரும் சில ஆயிரங்கள் வெளியாகும் ஒரு மாத இதழ் ஒன்று என்னைப் பற்றிய கட்டுரை ஒன்றை எழுதி இருந்தது. அவர்கள் மானே தேனே பொன் மானே எல்லாம் போட்டு எழுதி இருந்தாலும் , ஓர் அட்டகாசமான வரியை எழுதி இருந்தார்கள். 'இடுப்புக்குக் கீழே எதுவுமே செயல்பட முடியாத நிலையிலும்'  இவ்வளவு சாதித்து இருக்கின்றார்.  அப்பொழுது அம்மு எண் 1 உம் நானும் காதலித்துக் கொண்டு இருந்தோம்.  இடுப்புக் கீழே செயல் இழந்தவர் என்ற வாசகம்  அந்தக் காதலை முடக்க  அவர்களின் குடும்பத்தினரால் பெரிய அளவில் குறிப்பிடப்பட்டது.  அந்தக் கேள்வி இன்றைக்கு  கேட்கப்பட்டு இருந்திருந்தால் நிருபிக்க ஒரு வாய்ப்புக் கேட்டு இடுப்புக்கு கீழே செயற்படும் என உறுதிப் படுத்தி இருக்கலாம். . அன்று எதுவும் சொல்லத் தெரியவில்லை.  எதுவாக இருந்தாலும் நன்மைக்கே .. அந்த அம்மு ஆண்டி ஆகிவிட்டாள். நான் இன்னமும் யூத்.

ஒரு தடவை பெரியாரைப் பெருமையாக சொல்ல, பேட்டி எடுத்த அம்மணி  திரித்துப் போட்டு விட்டது.  சரியான புரிதல் இல்லாதவன் என என்னுடைய பெரியாரிய ஆசிரியர்கள் என்னைக் கடிந்து கொண்டார்கள்.

சில சமயங்களில் செய்தியாளர்களின்  அரசியலும் உண்டு.  என் வலைப்பதிவுக் கட்டுரை ஒன்றை வினையூக்கி என்றப் புனைப் பெயரில் ஏன் போட வில்லை என்றதற்கு , 'எடிட்டர் அதற்கு ஒப்புக்கொள்ளவில்லை   செல்வகுமார்' என்றே போட சொல்லி விட்டார்.' என்ற பதில் கிடைத்தது.

பொதுவாக , இந்த செய்தியாசிரியர்கள் மானே தேனே பொன் மானே போடுவதாக நினைத்துக் கொண்டு பாட்ஷா பட ரேஞ்சில் இருக்கும் விசயங்களை விக்ரமன் பட ரேஞ்சிற்கு இறக்கி விடுவார்கள். இன்னும் சிலர் தூர்தர்ஷனின் அந்தக் கால  செவ்வாய்க் கிழமை நாடகங்களைப் போல ஆக்கி விடுவார்கள்.

இந்த அனுபவங்களால் , சில மாதங்களுக்கு முன்னர் ,  "உன்னை பற்றி ஒரு கட்டுரை ஒன்றை எழுதட்டுமா"  எனக் கேட்ட பாரம்பரிய வார இதழ் ஒன்றின் மதிப்பிற்குரிய  முதன்மை செய்தியாளர் ஒருவருக்கு  நாசூக்காக "வேண்டாம் அண்ணே" என மறுப்பு தெரிவிக்க வேண்டியதாகிவிட்டது.  அவர் கோபித்துக் கொள்ளாமல் புரிந்து கொண்டார்.

ஒரே ஒரு முறை மட்டும் செய்தியாளர் ஒருவரின்  முந்திரிக்கொட்டை தனத்தால் நல்லதும் நடந்து இருக்கின்றது.  தனிப்பட்ட விசயமாக செய்த  அரசியல் சம்பந்தப் பட்ட ஒன்று எதிர்பாராத விதமாக பெரும் 'நற்பலனை'  எனக்கும் , ஆளவந்தான் படத்தில் வருவதைப் போல டாஸ் மாறி விழுந்த ஒருவருக்கும்  தொடர்ந்து அளித்துக் கொண்டு இருக்கின்றது.

அந்த செய்தியில் வந்த மாணவனைப் பற்றி யோசிக்கையில் என்னுடைய மற்றொரு அனுபவம் நினைவுக்கு வந்தது. 2004 ஆம் ஆண்டு, ஐரோப்பிய ஒன்றிய - இந்திய தொழில் மேம்பாட்டு மாநாடு ஒன்று புது தில்லியில் நடந்தது. ஐரோப்பிய ஆணையத்தில் முக்கியப் பொறுப்பில் இருந்த என் நண்பரின் சிபாரிசு மூலமாக , மாற்று திறனாளிகளுக்கான உயர் படிப்பு என்ற தலைப்பில் பேச , அனைத்து செலவுகளையும் ஏற்றுக்கொண்டு அவர்கள் அழைத்து இருந்தனர் . ஒரு வாரம் மாநாடு , சந்தித்த நபர்கள் எல்லாம் ஐரோப்பிய ஒன்றியத்தின் மிகப் பெரிய ஆளுமைகள்,  நிறுவன முதலாளிகள்.  என்னுடைய சக்கர நாற்காலி எப்பொழுதும் சிறப்பு ஈர்ப்பு என்பதால், அனைவரும் என்னுடன் வலிய வந்து பேசினார்கள்.   "ஐரோப்பா வா, உனக்கு நான் வேலை தருகின்றேன்"  என இரண்டாவது மிடக்கு வைன் கொடுத்த பின்னர் ஒருவர் சொல்ல, போதையில் மற்றொருவர் அதை ஆமோதிக்க , புது உலகத்தில் இருந்தேன்.

மெட்ராஸ் வந்த பின்னர், அலுவலக நண்பர்களிடம் அதைப் பற்றி தம்பட்டம் அடிக்க,  என்னுடைய மேலதிகாரி ஒருவர் தனியாக அழைத்தார்.

"பொதுவாக , வெளிநாட்டு கருத்தரங்கங்களில் , இரவு உணவு நிகழ்வுகளிலோ  , அதன் பின்னர் மதுபான கொண்டாட்டங்களின் பொழுதோ முக்கியமானவர்கள் , நாம் எதை சொன்னாலும் பாராட்டு மழை மட்டுமே பொழிவார்கள். எங்கள் ஊரில் வெள்ளைக் காகங்கள் இருக்கின்றன என்றாலும்   'வாவ்.. தட்  இஸ் எ வோண்டர்புல் திங் "  என்பார்கள்.  கொண்டாட்ட நிகழ்வுகளில் பரிமாறப்படும் விசயங்களை அப்படியே மூளைக்கு எடுத்துக் கொண்டு நம்புவது முட்டாள் தனமானது..  நீ வேண்டுமானால் அவர்களுக்கு மின்னஞ்சல் செய்து பார்,, மெட்ராசில் வெயில் எப்படி இருக்கின்றது என்ற பதிலைத் தவிர உனக்குத் தேவையானது எதுவம் வராது"

என்னுடைய பலமே என்னுடைய வழிகாட்டிகள் , வசிஷ்டர்களாக அமைந்து விடுவதுதான்.  அவர் சொல்படியே , வேலைக் கேட்டு மின்னஞ்சல் அனுப்பினால் மெட்ராஸ் வெயிலைப் பற்றி  கேட்டார்கள்  வசிட்டர் வாக்கின் படி . ஓரிரவில் கிடைக்கும் விசயங்கள்  ஓரிரவிலேயே காணாமல் போகும் என்பதைப் புரிந்து கொண்டு தகுதிகளை முடிந்தவரை அதிகப்படுத்திக் கொண்டு தட்டுத் தடுமாறி மேலே வந்து கொண்டு இருக்கின்றேன்.

யாராவது ஒரு வசிட்டர் , அந்த மாணவனை உலுக்கி நிதர்சனத்தைப் போதித்து இருந்தால் ஒரு நாளில் ஹீரோவாகவும் மறுநாள் ஜீரோவாகவும் ஆக்கப்படாமல் இருந்து இருக்கலாம்.  நோண்டி நொங்கு எடுக்காமல் , தளைத் தட்டி , அந்த மாணவனை  மடை மாற்றலாம் . ஆர்வக் கோளாறுகளுக்கு தேவை நல்ல வழிகாட்டிகள்.